¹ Äcamä, korotö de'a isotö Tö̧ä̧nä̧hua̧ Jehová aditinä̧u̧ttu̧'i̧nä̧ abonänö huo̧juȩcu̧nä̧ jȩä̧'chä̧cuä̧huä̧ i̧sa̧ ji̧na̧'a̧. Ja̧'hua̧nö̧ hua̧mä̧, ttö̧ja̧ isajurumä pä'inö: ―¿Iso päi'önä ji̧na̧'a̧ tä̧ji̧ “Pättanä ka̧cu̧ oittömä jitettö'inä cucuätucuä'” Dios päina'amä?― pä'inö. ² Ja̧'hua̧nö̧ ja̧'a̧ ttö̧ja̧ isajumä äcarö ädätinäju: ―Isocö. Pättanä ka̧cu̧ oi u̧huä̧ju̧ttu̧mä̧ tucua pä'ö ja̧'a̧. ³ Ja̧'hua̧nö̧ ja̧'a̧nä̧ pätta kä'co päte'ö käi u̧huä̧ju̧ttu̧mä̧, “Cuä̧nö̧'i̧nä̧ cucu juiyäcuotöjätó. Mȩ'ö̧'i̧nä̧ mȩcu̧u̧ juiyäcuotöjätó 'corupäcuhui'ätucua'acu” pä'inö Tö̧ä̧nä̧hua̧ Diosmä― päjinäcu. ⁴ Ja̧'hua̧nö̧ ja̧'a̧ äcamä ttö̧ja̧ isajuru pä'inö: ―'Corupä'i'ömä 'corupä'i'ocotöjä. ⁵ Juhuäi u̧huä̧ju̧ttu̧ cucuätucuttumä, cucuätucu ji̧yȩnä̧tä̧ Dios jö̧ ta̧'a̧nö̧tä̧ pä'i'ö bahuecuächa'a topö huäjunä cu̧huo̧juä̧chi̧'ä̧cuo̧tö̧jä̧ adiu'inä, surojö'inä, Dios u̧huo̧ju̧ ta'anö. Diosmä ja̧'hua̧nö̧ u̧huo̧jua̧'a̧ttö̧ ja̧'a̧ “Cuä̧nö̧'i̧nä̧ cucu juiyäcuotöjätó” päina'amä― päinäcua̧. ⁶ Ja̧'hua̧nö̧ ja̧'a̧ ttö̧ja̧ isajumä juhuäi u̧huä̧ju̧mä̧ cuäcuähuänä'inä adiu'a̧nö̧ ji̧yä̧cua̧, toäcuähuänä'inä a̧'cua̧cu̧nä̧ adihuiyäcua, ja̧'hua̧ta̧nö̧ huo̧juȩcu̧nä̧ huotö päi'äcuähuänä'inä köjö'cönä jäi ja̧'a̧ tojomenä, u̧huä̧ju̧ttu̧ 'to'opö cuinäju. Ja̧'hua̧ta̧nö̧ kirecuo yajutäcu kö̧rö̧'i̧nä̧ iyinäju. Ja̧u̧'i̧nä̧ cuinö. ⁷ Ja̧'hua̧nö̧ ja̧'a̧ ta̧ju̧cuäyotömä huäjunä bahuecuächa'a tottönä päi'ä̧u̧, ttä̧ta̧ juiyönä ttö̧ja̧cua̧'a̧mä̧ huo̧juä̧chi̧'i̧nä̧tö̧. Ja̧'hua̧nö̧ ja̧'a̧ttö̧ higuera ojiyättö ttottecuojä päi'önä 'tö̧'ö̧, jitötätä ttottepäcuähua pä'ömä aditinätö. ⁸ Ja̧'hua̧nö̧ ja̧'a̧, Ttö̧ä̧nä̧hua̧ Jehováttö rä̧mi̧pa̧'a̧ ä̧ju̧cui̧nä̧tö̧ mo̧ro̧ ttí̧nö̧ jö̧nä̧ döoppanä pättanä icha'a. Ja̧'hua̧nö̧ ji̧yä̧u̧ ttö̧ja̧ i̧sa̧mä̧ irecuacu Ttö̧ä̧nä̧hua̧ Jehová ö̧jo̧mȩttö̧mä̧ tö'ipächö dajahuächinätö pättanä ka̧cu̧ dauhuiyä 'quȩtȩ. ⁹ Ja̧'hua̧nö̧ ja̧'a̧ Tö̧ä̧nä̧hua̧ Jehovámä ttö̧ja̧ i̧sa̧rö̧ huopinö: ―¿Tȩnȩ cu̧jä̧ ucumä?― pä'inö. ¹⁰ Ja̧'hua̧nö̧ päcu ädätinö: ―Pättanä cuicha'a ucuocua'amä ä̧ju̧cuä̧ji̧sä̧. Ja̧'hua̧nö̧ ja̧'a̧nä̧ chä̧ta̧ juiyönä chö̧ja̧'a̧ttö̧, ye'ecu dajahuächäjisä― pä'inö. ¹¹ Ja̧'hua̧nö̧ päcu pä'inö: ―Cuä̧ta̧ juiyönä cu̧ja̧'a̧ cu̧huo̧juä̧chi̧'ö̧nä̧mä̧ ¿di jiähuäjäcuttu? ¿Cucuä' pädinäi dauttu cuäjijä tä̧ji̧?― ¹² Ja̧'hua̧nö̧ päcu ttö̧ja̧ i̧sa̧mä̧ ädätinö: ―Ttö̧ja̧ isaju ttöcu ppächönä kö̧ji̧ya̧cu̧ pä'ö cuiyinäcua̧tä̧, juhuäi dau u̧huä̧ju̧ttu̧ 'to'opö kiyäcu cuäjisä―. ¹³ Ja̧'hua̧nö̧ ja̧'a̧ Tö̧ä̧nä̧hua̧ Jehovámä ttö̧ja̧ isajuru jä'epö ä̧ju̧cui̧nö̧: ―¿Pomä tta̧'a̧nö̧ pä'ö ja̧'hua̧nö̧ jȩcu̧'ä̧jä̧ttö̧?― Ja̧'hua̧nö̧ päcua ttö̧ja̧ isajumä ädätinäju: ―Äcatä yapare jiähuäcua cuäjäjusä―. ¹⁴ Ja̧'hua̧nö̧ päjäcu Tö̧ä̧nä̧hua̧ Jehovámä äcarö pä'inö: ―Ja̧'hua̧nö̧ jȩcu̧'huä̧ja̧'a̧ttö̧mä̧ o'ca toi'önä de'a isotö juruhuätöttö'inä, o'ca toi'önä isotö rȩjȩnä̧ kä̧tö̧ttö̧'i̧nä̧ abonänö suronä ucuocu pä'ö ku̧nä̧hua̧tä̧ cu̧jä̧cua̧jä̧. Do'äutä do'äu cu̧jä̧cua̧jä̧. Cua̧'cua̧ro̧mȩ jubömä rȩjȩ i̧sa̧ppȩ cuä̧nö̧tä̧ cu̧jä̧cua̧jä̧. ¹⁵ Ucuttu'inä ttö̧ja̧ isajuttu'inä to'ijicutä jö̧nä̧ curohuähuä'chätucunä päipä̧rö̧nä̧ jȩchä̧cua̧sä̧. Ja̧'hua̧ta̧nö̧ ucu isotöttö'inä, jahuäju isotöttö'inä ttörohuähuä'chönä päipä̧rö̧nä̧ jȩchä̧cua̧sä̧. Jahuäju isotö I̧sa̧mä̧ cunä kä̧dö̧ i̧cuä̧cua̧jä̧. Ja̧'hua̧nö̧ ja̧'a̧nä̧ ucumä utturuhuä'canä ubara ttu̧cuȩpä̧cua̧jä̧― pä'inö. ¹⁶ Ja̧'hua̧nö̧ ja̧'a̧ ttö̧ja̧ isajurumä pä'inö: ―Möchaju cu̧jo̧mȩnä̧mä̧ rö̧ȩnä̧tä̧ ubara ttucuunä jȩchä̧cua̧sä̧. Cui̧tti̧mö̧rö̧ cuhuäbecuomenämä ubara ttu'u kä̧nö̧tä̧ cuhuäbecuäcuajujä. Cuirecuorötä pä̧huä̧ ttu'u cu̧jä̧cua̧ju̧jä̧tó. Ja̧'hua̧nö̧ ja̧'a̧nä̧ ja̧u̧mä̧ huȩä̧rä̧'chö̧tä̧ ö̧jä̧cua̧ ucurumä― pä'inö. ¹⁷ Ja̧'hua̧nö̧ ja̧'a̧ Adánrö̧mä̧ pä'inö: ―Cuirecua päjö huȩnȩ cuesetäja'attömä, ja̧'hua̧ta̧nö̧ cucuä' pädinäi dau u̧huä̧ju̧ttu̧ cucuäja'attömä, rȩjȩmä̧ suronä pä'ö ucuocu ku̧nä̧huä̧jä̧tä̧ pä̧i̧'ä̧jä̧. Cu̧cuȩmä̧ cua̧'cua̧ro̧mȩ jubö päi'önä ubara ttu'u kä̧nö̧tä̧ cu̧cuä̧cua̧jä̧tó ju̧huä̧jä̧ttö̧mä̧. ¹⁸ Rȩjȩttö̧mä̧ a̧ri̧ so̧ö̧'i̧nä̧, so̧ä̧'cua'inä rä'opötä kä̧cua̧'a̧tó. Ja̧'hua̧ta̧nö̧ mȩji̧yä̧ pämäromettö̧ dau u'cua jö̧ oi u̧huä̧ju̧ttu̧ cu̧cuä̧cua̧jä̧tó. ¹⁹ Cua̧jȩrejamä cui'ättö rä'epö cuicua'attötä cu̧cuȩ pa̧ cu̧cuä̧cua̧jä̧tó, rȩjȩra̧'a̧ ppa̧cu̧huä̧cho̧mȩ jubö päi'önä, ju̧huä̧jä̧ttö̧tä̧ ȩmö̧ a̧di̧cua̧ cu̧ja̧'a̧ttö̧. Ucumä rȩjȩ i̧sa̧ppȩtä̧ jö̧nä̧ hua̧jä̧. Ja̧'hua̧ta̧nö̧ ju̧hua̧ppȩra̧'a̧tä̧ ppa̧cu̧huä̧chä̧cua̧jä̧tó― pä'inö. ²⁰ Adánmä irecua ki̧mi̧ o'inö Eva pä'ö, o'ca toi'önä a̧'cua̧rä̧tö̧ tta̧ju̧ ja̧'a̧ttö̧. ²¹ Ja̧'hua̧ta̧nö̧ Tö̧ä̧nä̧hua̧ Jehovámä isotö tti̧jȩti̧yu̧ttu̧ aditiniyä̧u̧ ttö̧ja̧ i̧sa̧cu̧, irecuacu ttö̧'ca̧tä̧huä̧ti̧yu̧mä̧. Ja̧'hua̧nö̧ ja̧'a̧ ö̧'ca̧ti̧nä̧u̧. ²² Ja̧'hua̧nö̧ ja̧'a̧ Tö̧ä̧nä̧hua̧ Jehovámä pä'inö: ―Ttö̧ja̧ i̧sa̧mä̧ ujututtu ya̧tȩ jö̧ ta̧'a̧nö̧ hua̧ pä'i'äjitó. Ujutu tu̧huo̧ju̧ ta'anö adiu'inä, surojö'inä huo̧jua̧. Ja̧'hua̧nö̧ ja̧'a̧ttö̧ jitämä a̧'cua̧rö̧ kä̧cuä̧huä̧ dau u̧huä̧ju̧ttu̧'i̧nä̧ 'to'opö ucu o'ca'a, 'cuäopönätä ö̧ja̧'a̧cu̧― pä'inö. ²³ Ja̧'hua̧nö̧ ja̧'a̧ttö̧ Tö̧ä̧nä̧hua̧ Jehovámä Edén rȩjȩ pättattö rä'epö icuinäcu, rȩjȩtä̧ aditö ö̧ja̧ pä'ö ju̧huä̧jä̧ttö̧tä̧ ȩmö̧ a̧di̧cua̧ pi̧nö̧rö̧mä̧. ²⁴ Ja̧'hua̧nö̧ jö̧nä̧tä̧ ttö̧ja̧ i̧sa̧rö̧mä̧ rä'epö icuinö. Ja̧'hua̧ta̧nö̧ Edén rȩjȩ pättattömä kä̧hua̧ räopa'acunä querubines huotörö ku̧ni̧nö̧ curabä cuo'ö ka̧bä kara'acu'inä kara'acu'inä kärächö jättäya'atä hui'cu ka̧'a̧nä̧ tta̧ttä̧ri̧ya̧rö̧ pä'ö, a̧'cua̧rö̧ kä̧cuä̧huä̧ daura̧'a̧ mä̧nä̧mä̧.