¹ Mo̧ro̧ji̧yä̧'i̧nä̧, pi̧jä̧'i̧nä̧ ja̧u̧ o̧du̧nä̧ ka̧cu̧'i̧nä̧ ka̧cuä̧tö̧'i̧nä̧ ja̧'hua̧nö̧tä̧ jö̧nä̧ jo̧mȩnö̧tä̧ päi'ina'a. ² Ja̧'hua̧nö̧ ja̧'a̧ ko̧ro̧mö̧ttö̧ todärenö mo̧ro̧ päi'omenä, Tö̧ä̧nä̧hua̧ Dios aditähuä aditä'chäjimä jo̧mȩnö̧tä̧ cä'ädinö. Ja̧'hua̧nö̧ cäädäji o'ca'a ko̧ro̧mö̧ttö̧ todärenö mo̧ro̧ päi'omenä, o'ca juiyönä aditähuä jä̧ji̧mä̧ cä'ädö ku̧nu̧ huirochi'inö. ³ Ja̧'hua̧nö̧ ja̧'a̧ ko̧ro̧mö̧ttö̧ todärenö mo̧ro̧ päi'äjimä, Tö̧ä̧nä̧hua̧ Dios o'ca juiyönä aditähuä aditä'chäji cä'ädö ku̧nu̧ ihuirochi'äji mo̧ro̧ ja̧'a̧ttö̧, i̧mi̧cu̧nä̧tä̧ mo̧ro̧ jö̧nä̧ 'quȩ'ȩpö̧ ku̧nu̧, adiunätä ucuocu pä'ö ku̧ni̧nö̧ ja̧u̧ mo̧ro̧mä̧. ⁴ Pi̧yȩ huȩnȩtä̧ ja̧'a̧tó mo̧ro̧ji̧yä̧'i̧nä̧, pi̧jä̧'i̧nä̧ kada'ca huȩnȩ, Tö̧ä̧nä̧hua̧ Jehová, pi̧jä̧'i̧nä̧ mo̧ro̧ji̧yä̧'i̧nä̧ uhuäbe'inö pänä ji̧nö̧ huȩnȩmä̧. ⁵ Mȩji̧yä̧ pämäromettö̧ dau u'cua jö̧ oi'inä pi̧jä̧nä̧ juiyäimä, ja̧'hua̧ta̧nö̧ rȩjȩ pämäromettö̧ pättiyu cuähuä'inä juiyäimä, ajiyamä ichoca'a ji̧na̧'a̧ Tö̧ä̧nä̧hua̧ Jehová ajiya ichönämä jȩo̧ca̧'a̧ttö̧ pi̧jä̧nä̧mä̧. Ttö̧ja̧ i̧sa̧'i̧nä̧ toina'a pättanä a̧di̧tä̧cua̧mä̧. ⁶ Ja̧'hua̧nö̧ ja̧'a̧nä̧ rȩjȩttö̧mä̧ diyahuoppatä ju'tojucu rä'opö ki̧na̧'a̧ rȩjȩmä̧ jä̧ttä̧yä̧jä̧tä̧ huämenättö̧ i̧yȩpä̧rö̧ ka̧ pä'ö. ⁷ Ja̧'hua̧nö̧ ja̧'a̧ Tö̧ä̧nä̧hua̧ Jehová rȩjȩ i̧sa̧ppȩttö̧ aditinö ttö̧ja̧ i̧sa̧rö̧. Ja̧'hua̧nö̧ aditäjäcu i̧ji̧yu̧nä̧ ppö'inö a̧'cua̧rö̧ kä̧cuä̧huä̧ ami yuppa. Ja̧'hua̧nö̧ ppöäcutä ttö̧ja̧ i̧sa̧mä̧ a̧'cua̧ri̧nö̧. ⁸ Ja̧'hua̧nö̧ ja̧'a̧ Tö̧ä̧nä̧hua̧ Jehovámä kä̧hua̧ räopa'acu päte'öttö Edén rȩjȩnä̧ pätta rötinö. Juhuätta pättanämä aditäjäcu ttö̧ja̧ i̧sa̧rö̧ ku̧ni̧nö̧. ⁹ Ja̧'hua̧nö̧ ja̧'a̧ Tö̧ä̧nä̧hua̧ Jehovámä o'ca juiyönä adihuä juäi dauhuiyämä toäcuähuänä'inä a̧'cua̧cu̧nä̧ adiu, cuäcuähuänä'inä adiu, rȩjȩttö̧ rä'opö baunä jȩpi̧nö̧. Ja̧'hua̧ta̧nö̧ pätta kä'co päte'öttö a̧'cua̧rö̧ kä̧cuä̧huä̧ dau'inä rä'opö baunä jȩpi̧nö̧. Ja̧'hua̧ta̧nö̧ adiu'inä, surojö'inä, huo̧juä̧huä̧ dau'inä rä'opö baunä jȩpi̧nö̧. ¹⁰ Ajemä Edén rȩjȩttö̧ räopoto ri̧na̧'a̧ pättanä i̧yȩpä̧ra̧ pä'ö. Juhuorömä pa̧ja̧cuä̧nö̧ oto räopina'a. ¹¹ Äcuomenä räopoto i̧mi̧mä̧ Pisón aje pä'ö micuoto. Juhuotomä Havila rȩjȩ jä̧ttä̧yä̧jä̧ suhuacuächönä ro̧to. Ju̧huȩnȩmä̧ oro pä̧jo̧mȩ. ¹² Ja̧huä̧jä̧ rȩjȩ oromä surojö'inä ppächö juiyönä adiu. Ja̧'hua̧ta̧nö̧ dauhuiyä ö̧tä̧nȩ a̧dö̧nä̧ ameu bedelio'inä, ja̧'hua̧ta̧nö̧ inä o'qui ónice'inä pä̧jo̧mȩ. ¹³ Ja̧u̧nu̧ o'ca'a räopotomä Gihón pä'ö micuoto. Juhuotomä Cus rȩjȩ jä̧ttä̧yä̧jä̧ suhuacuächönä ro̧to. ¹⁴ Huäbotocuä päi'önä räopotomä Tigrisa pä'ö micuoto. Juhuotomä Asiria rȩjȩttö̧mä̧ kä̧hua̧ räopa'acu päte'ö mo̧ö̧nä̧ ro̧to. Pa̧ja̧cuä̧nö̧ päi'önä räopotomä Éufrates pä'ö micuoto. ¹⁵ Ja̧'hua̧nö̧ ja̧'a̧, Tö̧ä̧nä̧hua̧ Jehovámä ttö̧ja̧ i̧sa̧rö̧ ȩmo̧po̧'ö̧, Edén rȩjȩttö̧ pättanä ku̧ni̧nö̧ aditä̧rö̧nö̧ tta̧huä̧ri̧ya̧rö̧ pä'ö. ¹⁶ Ja̧'hua̧nö̧ ja̧'a̧ Tö̧ä̧nä̧hua̧ Jehovámä hue'ö u̧ju̧ni̧nä̧cu̧: ―Pättanä ka̧cu̧ oittömä o'ca juiyönättö̧tä̧ cucu'a̧nö̧ ja̧'a̧. ¹⁷ Ja̧'hua̧nö̧ ja̧'a̧nä̧ adiu'inä, surojö'inä huo̧juä̧huä̧ dauttumä cu̧cui̧yä̧cua̧jä̧tó. Juhuäittö cucuttumä, ja̧u̧nu̧tä̧ mo̧ro̧mä̧ iso päi'önätä 'corupäcuhui'ä̧cua̧jä̧― päinä̧cu̧. ¹⁸ Ja̧'hua̧nö̧ ja̧'a̧ Tö̧ä̧nä̧hua̧ Jehovámä pä'inö: ―Ttö̧ja̧ i̧sa̧ katä ö̧ja̧ pä'ömä adihuoca'a. Chutä jö̧ ta̧'a̧nö̧ kö'ätecuächönä ppädä̧rä̧cuä̧huä̧ isajuru chaditiyäcu― pä'inö. ¹⁹ Tö̧ä̧nä̧hua̧ Jehovámä o'ca toi'önä de'a isotö juruhuätörö'inä, o'ca toi'önä ju'tojunä co̧'ä̧rä̧tö̧rö̧'i̧nä̧ rȩjȩttö̧tä̧ aditi̧nä̧u̧. Aditäji'ca̧ jahuätörömä ttö̧ja̧ i̧sa̧ ö̧ja̧'a̧cu̧ i'cächinö, tta̧'a̧nö̧ jö̧nä̧ oä'chäcua'a ja̧ pä'ö, toä̧ra̧ pä'ö. Ja̧'hua̧nö̧ ja̧'a̧ ttö̧ja̧ i̧sa̧ oä'chö'a̧nö̧tä̧ ya̧cu̧nä̧ tta̧'cua̧rö̧ ku̧nä̧rä̧tö̧mä̧ tti̧mi̧tä̧ päi'ina'a. ²⁰ Ja̧'hua̧nö̧ ja̧'a̧ o'ca toi'önä de'a isotörö'inä, ppi̧yu̧ ju'tojunä co̧'ä̧rä̧tö̧rö̧'i̧nä̧, o'ca toi'önä rȩjȩnä̧ kä̧tö̧rö̧'i̧nä̧ tti̧mi̧ o'ä'chö ku̧ni̧nö̧ ttö̧ja̧ i̧sa̧mä̧. Ja̧'hua̧nö̧ ja̧'a̧nä̧ yajute'inä toina'a, Adán jö̧ ta̧'a̧nö̧ kö'ätecuächönä ppädä̧rä̧cuä̧huä̧ isaju jö̧nä̧ huajumä. ²¹ Ja̧'hua̧nö̧ ja̧'a̧ttö̧ Tö̧ä̧nä̧hua̧ Jehovámä Adán täcunä äi'önä jȩi̧nä̧cu̧. Ja̧'hua̧nö̧ ä̧'ä̧ra̧'a̧nä̧ i'esubä o'quittö yo'quite ȩmi̧nä̧cu̧. Ȩmä̧ji̧'ca̧, idepämä pä'äji ta'anö mö̧'ȩpö̧ icuinäcu ȩmä̧jo̧mȩmä̧. ²² Tö̧ä̧nä̧hua̧ Jehovámä juhuo'qui i'esubä iso'qui, ttö̧ja̧ i̧sa̧ttö̧ ȩmä̧jo'quittö aditinö ttö̧ja̧ isajuru. Jahuäjurumä i'cächö iyinö ttö̧ja̧ i̧sa̧rö̧. ²³ Ja̧'hua̧nö̧ ja̧'a̧ Adánmä pä'inö: ―Pa̧'a̧nö̧ huaju kihue'quiyumä ttötä cha̧mo̧nä̧ chihue'quiyuttu ȩmä̧huä̧ o'ca. Kidepä'inä ttötä cha̧mo̧nä̧ chidepättö ȩmä̧hua̧ju̧mä̧. Isaju jö̧nä̧tä̧ pättäcuaju, ttö̧ja̧ i̧sa̧ttö̧ ȩmö̧ adicuaju ja̧'a̧ttö̧― pä'inö. ²⁴ Ja̧'hua̧nö̧ ja̧'a̧ttö̧ ttö̧ja̧ i̧sa̧mä̧ jä'ottö'inä, ja̧ju̧ttu̧'i̧nä̧ 'quȩi̧pä̧chä̧cua̧. Irecuacutä ppä'ächi'ö ö̧jä̧cua̧. Jahuätö ta̧ju̧mä̧ ya̧tȩtä̧ idepä jö̧nä̧ huotötä pätti'äcuotö. ²⁵ Jahuätö ta̧ju̧mä̧ ttä̧ti̧yu̧'i̧nä̧ jui'ötä ki̧nä̧tö̧. Ja̧'hua̧nö̧ ttö̧ja̧'a̧nä̧ dä'äcuocotö pinätö̧.