¹ Abram noventa y nueve a̧'ȩ u̧ju̧nä̧ro̧mȩnä̧, Tu̧ru̧hua̧ Jehová i̧jȩcui̧nä̧cu̧do Abramrö. Pä'inödo: ―Ttötäsä Cu̧huä̧nä̧hua̧ Dios o'ca juiyönä ju̧ru̧hua̧mä̧. Ttörötä amöcuädö adiu cue'ächi suronä jȩcu̧'o̧ca̧'a̧. ² Ttö ucurutä ji'äu ku̧nu̧sä̧ ucuru iso päi'önä jȩchä̧cuȩ huȩnȩmä̧. Cuahuaruhuä'cotö recuätö ttö̧ja̧cu̧nä̧ jȩchä̧cua̧sä̧― päinäcu. ³ Abram ihue'quiyunä pä̧mä̧dö̧ ja̧rȩyu̧nu̧ pä'i'ö i'ä rȩjȩ kö̧rä̧chi̧'ö̧ becuächönä ucuotönö jȩpi̧nö̧do, Tö̧ä̧nä̧hua̧ Dios juhua'a yabocu ucuocua'anä: ⁴ ―Pi̧yȩtä̧ ttö ucuru iso päi'önä jȩchä̧cuȩ huȩnȩmä̧. Ucutä recuätö pi̧jä̧ pa̧ja̧cu̧nä̧ ka̧cuä̧tö̧ ttä'o päi'önä cu̧jä̧cua̧jä̧. ⁵ Jitämä Abram pä'ö micuocöjä. Jitämä cui̧mi̧cuä̧cua̧jä̧ Abraham pä'ö, ucu recuätö pi̧jä̧ pa̧ja̧cu̧nä̧ ka̧cuä̧tö̧ ttä'o päi'önä jȩcha̧'a̧ttö̧. ⁶ Ucu cuahuaruhuä'cotö recuätö ttö̧ja̧cu̧nä̧ jȩchä̧cua̧sä̧. Ucu cuahuaruhuä'cotöttö ötahuiyä jö̧ a̧'u̧cuä̧ rö̧ȩnä̧ ruhuotö ttö̧ja̧cuä̧cuo̧tö̧. ⁷ Pi̧yȩmä̧ ucuru iso päi'önä jȩchä̧cuȩ huȩnȩmä̧ beipächocö huȩnȩ jä̧cua̧'a̧ ucuru'inä, cuahuaruhuä'cotörö'inä. Ucu Cu̧huä̧nä̧hua̧ Dios'inä cha'anä, cuahuaruhuä'cotö'inä Ttö̧ä̧nä̧hua̧ Dios päi'önä chö̧jä̧cua̧sä̧ 'cuäopönätä― pä'inödo Diosmä. ⁸ Juhua'a yabo pä'inödo Dios: ―Ucuru'inä, cuahuaruhuä'cotörö'inä ucu kara'attö i̧chä̧cuä̧hua̧ cu̧jo̧mȩ rȩjȩ, Canaán rȩjȩ, o'ca juiyönä chi̧yä̧cua̧sä̧, ucututä 'cuäopönä cui̧rȩjä̧tu̧cu̧ päi'önä. Ucu cuahuaruhuä'cotö'inä Ttu̧ru̧hua̧ Dios päi'önä chö̧jä̧cua̧sä̧―. ⁹ Dios Abrahamrö juhua'a yabo pä'inödo: ―Ja̧'hua̧nö̧ ja̧'a̧ttö̧ ucuru iso päi'önä jȩchä̧cuȩ huȩnȩ amöcuädö, ttö huedömä jȩpö̧ cu̧ja̧cuä̧tu̧cua̧ja̧, ucu'inä, cuahuaruhuä'cotö'inä 'cuäopönä. ¹⁰ Ttö ucuru'inä, cuahuaruhuä'cotörö'inä iso päi'önä jȩchä̧cuȩ huȩnȩ jiäcuähuä huȩnȩ päi'önä jö̧mä̧. Ja̧'hua̧nö̧ ja̧'a̧ttö̧ ucutu ja̧u̧ huȩnȩ amöcuädö, pa̧'a̧nö̧ jȩcu'ä̧tu̧cua̧ja̧. Ucututtu u̧mä̧tö̧ o'ca toi'önä̧rö̧ tti̧jȩta̧ 'cui'opö jȩcu̧'ä̧cuo̧tö̧jä̧. ¹¹ Ja̧u̧ 'cuiocuämä ttö ucuru iso päi'önä jȩchä̧cuȩ huȩnȩ esetätö pä'ö jiähuäcua'a. ¹² Ucutu cui̧tti̧mö̧ u̧mä̧tö̧rö̧ ttuhuäpächö o'ca'a, ochonö mo̧ro̧ ttu̧ju̧nä̧ro̧mȩnä̧, tti̧jȩta̧ 'cui'opö jȩpä̧tu̧cui̧tö̧. Cumöhuäyotörö cuojusodenä uhuäpächätörö'inä, korotö tti̧rȩjä̧ttö̧ pärätänä mitö cuȩmä̧tu̧cuä̧u̧ru̧'i̧nä̧ jȩpä̧tu̧cui̧tö̧. Porö kä̧mä̧dö̧ juhua'a yabocu 'cuäopönä jȩpä̧tu̧cui̧. ¹³ O'ca toi'önä u̧mä̧tö̧rö̧ cumöhuäyotörö cuojusodettö uhuäpächätörö'inä, korotö tti̧rȩjä̧ttö̧ pärätänä mitö cuȩmä̧tu̧cuä̧u̧ru̧'i̧nä̧ tti̧jȩta̧ 'cui'opö jȩpä̧tu̧cui̧tö̧. Ja̧u̧ juäi 'cuiocuämä huo̧juȩcuä̧ päi'önä jä̧cuȩ ttö ucuturu iso päi'önä jȩchä̧cuȩ huȩnȩ 'cuäopönä cuamöcuädätucuäcua'a̧nö̧. ¹⁴ Ttö ucuturu iso päi'önä jȩchä̧cuȩ huȩnȩ ucuotocömä, i̧jȩta̧ 'cui'ocu jȩpo̧cö̧mä̧, rä'epö icuätucuirö. Ja̧u̧mä̧ ttö huedömä jȩpo̧cö̧― pä'inödo Dios Abrahamrö. ¹⁵ Ja̧'hua̧ta̧nö̧ Tö̧ä̧nä̧hua̧ Dios pä'inödo Abrahamrö: ―Jitämä ucu cuirecua Sarai pä'ö micuocoju. Porö kä̧mä̧dö̧ juhua'a yabocu Sara pä'ö kimicuäcuaju. ¹⁶ Adiu eseunu ppä̧dä̧dä̧cua̧sä̧ yajuru. Yajucu cui̧tti̧rö̧ chi̧yä̧cua̧sä̧. A̧, yajuru eseunu ppä̧dä̧dä̧cua̧sä̧. Recuätö pi̧jä̧ pa̧ja̧cu̧nä̧ ka̧cuä̧tö̧ tta̧ju̧ päi'önä kö̧jä̧cua̧ju̧. Ja̧'hua̧ta̧nö̧ kahuaruhuä'cotöttö rö̧ȩnä̧ ötahuiyä jö̧ a̧'u̧cuä̧ ruhuotö ttö̧ja̧cuä̧cuo̧tö̧ jahuäjuttu isotömä―, pä'inödo Dios Abrahamrö. ¹⁷ Abraham ihue'quiyunä pä̧mä̧dö̧ ja̧rȩyu̧nu̧ pä'i'ö i'ä rȩjȩ becuächönä jȩpö̧ ya̧'ä̧hui̧nö̧do. Amöcuädinödo: ―¿Cien a̧'ȩ hua̧'i̧nä̧ i̧tti̧rö̧ u̧ju̧nä̧rö̧'a̧nö̧ hua̧ tä̧ji̧?― pä'ö amöcuädinödo. ―¿Sara, noventa a̧'ȩ huaju'inä, ki̧tti̧rö̧ ku̧ju̧nä̧rö̧'a̧nö̧ huaju tä̧ji̧?― pä'ö amöcuädinödo. ¹⁸ Abraham Tö̧ä̧nä̧hua̧ Diosrö pä'inödo: ―Chi̧tti̧ Ismaelrötä adiu ppä'ädiyittö, ucu cuä'ca jo̧mȩ adiu ö̧jä̧cua̧'a̧nö̧―. ¹⁹ Ja̧hua̧nö̧ ja̧'a̧nä̧ Tö̧ä̧nä̧hua̧ Dios ädätinödo: ―Ttömä ucuocusä cuirecua Sara ucucu ki̧tti̧rö̧ ku̧huä̧bȩcuä̧cua̧rö̧tä̧. Ucu ja̧u̧ru̧ o̧cu̧huä̧cua̧jä̧ i̧mi̧mä̧ Isaac pä'ö. Ttö ucuru iso päi'önä jȩchä̧cuȩ huȩnȩ, beipächocö huȩnȩmä̧, ja̧u̧ru̧'i̧nä̧ ji̧dä̧huä̧cua̧sä̧, ja̧u̧ ahuaruhuä'cotörö'inä 'cuäopönä. ²⁰ Ismaelrö jäcuhuepäjimä ä̧ju̧cuä̧ji̧sä̧. Ja̧u̧ru̧ ppä̧dä̧dä̧cua̧sä̧. Ja̧u̧ i̧tti̧mö̧ttö̧ juhua'a yabo ttirecuächönä jȩchä̧cua̧sä̧. Ismael i̧tti̧mö̧ ttö̧jä̧pö̧ttö̧nö̧ ta̧ju̧nu̧ juiyo ruhuotörö u̧ju̧nä̧rä̧cua̧. Jȩchä̧cua̧sä̧ ttahuaruhuä'cotö recuätörö ttu̧ju̧nä̧rö̧nä̧. ²¹ Ja̧'hua̧nö̧ ja̧'a̧nä̧ ttö ucuru iso päi'önä jȩchä̧cuȩ huȩnȩmä̧ Isaacrö ji̧dä̧huä̧cua̧sä̧. Ja̧u̧ru̧ Sara ku̧huä̧bȩcui̧yä̧cua̧jä̧ jitä a̧'ȩnä̧ jitätä juäi isome―. ²² Tö̧ä̧nä̧hua̧ Dios Abrahamcu ucuocu cä'ädäji'ca̧, juhuorö cä'ecuächinödo. ²³ Ja̧u̧nu̧tä̧ mo̧ro̧ Abrahammä i̧tti̧ Ismaelrö'inä, umöhuäyotö ojusodettö uhuäpächinätörö'inä, korotö tti̧rȩjä̧ttö̧ pärätänä mitö ȩmi̧nä̧u̧ru̧'i̧nä̧ tti̧jȩta̧ 'cui'opö jȩi̧nä̧u̧do. O'ca toi'önä u̧mä̧tö̧ ojusodenä ka̧cuä̧tö̧mä̧ ja̧u̧nu̧tä̧ mo̧ro̧ tti̧jȩta̧ 'cui'opö jȩi̧nä̧u̧do, Tö̧ä̧nä̧hua̧ Dios hueäji ta'anö. ^{26 24} Ji̧yȩtä̧ mo̧ro̧ Abrahamrö'inä, i̧tti̧ Ismaelrö'inä tti̧jȩta̧ 'cui'opö jȩtti̧nä̧u̧do. ²⁷ Jahuätöcu korotö u̧mä̧tö̧'i̧nä̧, ojusodettö uhuäpächinätö'inä, korotö tti̧rȩjä̧ttö̧ pärätänä mitö ȩmi̧nä̧u̧'i̧nä̧ tti̧jȩta̧ 'cui'opö Tö̧ä̧nä̧hua̧ Dios hueähuä jȩtti̧nä̧u̧do. ²⁵ Abraham noventa y nueve a̧'ȩ huinödo. I̧tti̧ Ismael trece a̧'ȩ huinödo, jahuätö ta̧ju̧ tti̧jȩta̧ 'cui'opö jȩtti̧nö̧ mo̧ro̧mä̧.