¹ Abram irecua Saraimä ki̧tti̧mö̧ toinäjudo. Kumöhuäyaju Egipto rȩjȩ ttö̧ja̧ isajuru ku̧nä̧ri̧nä̧judo, Agar pä'ö micuajuru. ² Ja̧'hua̧nö̧ ja̧'a̧ Sarai pä'inäjudo Abramrö: ―Ucu huo̧jua̧jä̧ Tu̧ru̧hua̧ Jehová chi̧tti̧rö̧ iyococua pinäju̧sä̧. Ja̧'hua̧nö̧ ja̧'a̧ttö̧ chumöhuäyajucu kä̧hui̧. Jahuäjucu cui̧tti̧mö̧rö̧tä chi̧tti̧mö̧ päi'önä chu'uttädäcuajusä―. Abram irecua Sarai päjömä esetinödo. ³ Ja̧'hua̧nö̧ ja̧'a̧ Abrammä Canaán rȩjȩnä̧ dieznö a̧'ȩ päi'önä ö̧jo̧mȩnä̧, Saraimä kumöhuäyaju Egipto rȩjȩ ttö̧ja̧ isajuru hue'inäjudo Abram irecua päi'önä. ⁴ Abram Agarcu ji̧nä̧ yo̧mȩtȩ pä'i'inödo. Ja̧'hua̧nö̧ ja̧'a̧ Agar täcö möchaju juo'ächinäjudo. Agar täcö möchaju kä̧nö̧, jahuäjumä adiunä huocoju pä'ä'chinäjudo kuruhuaju Sarairö. ⁵ Ja̧'hua̧nö̧ ja̧'a̧ Saraimä pä'inäjudo Abramrö: ―Ucutä ja̧'hua̧nö̧ jȩpä̧ji̧mä̧, Agar ttörö suronä kucuocuä'cha pä'ö. Ttömä yajuru hue'inäjusä ucuru. Ja̧'hua̧nö̧ ja̧'a̧nä̧ täcö möchaju kä̧nö̧, ttörö suronä pä'ä'chäju. Tu̧ru̧hua̧ Diostä u̧huo̧juä̧cua̧ di jä̧ttö̧ ja̧'hua̧nö̧ suronä jȩpä̧ji̧mä̧, ¿ucucö̧? ¿ttöcö̧?― pä'inäjudo Sarai. ⁶ Ja̧'hua̧nö̧ ä̧ju̧cu̧, Abram ädätinödo: ―Jahuäjumä ihueye ucutä cumöhuäyaju. Ucutä päcu'anö pä'iju―. Ja̧'hua̧nö̧ päcua, Saraimä pä̧i̧cu̧nä̧nö̧ jȩpi̧nä̧ju̧ Agarrö. Ja̧'hua̧nö̧ jȩjä̧cua̧, Agar tö'ipächinäjudo. ⁷ Ja̧'hua̧nö̧ tö'ipächäjä'caju ttö̧ja̧ toächome kö̧jo̧mȩnä̧, Tu̧ru̧hua̧ Jehová huȩ'ä̧hua̧ ángel ö̧'o̧cui̧'i̧nä̧cua̧do, reju ajiya acuäju tö'cö kö̧ja̧'a̧. Ju̧huȩnȩ reju ajiya acuäju Shur ötahuiyä mä̧nä̧ pä̧cuä̧dä̧mä̧nä̧ ji̧na̧'a̧do. ⁸ Ángel Agarrö pä'inödo: ―Agar, Sarai kumöhuäyaju, ¿tottö cuichä? ¿To cui̧'chä̧?― päinäcuado. ―Churuhuaju Saraittö tö'ipächäjusä pä'ö― ädätinäjudo Agarmä. ⁹ Ja̧'hua̧nö̧ ja̧'a̧ Tu̧ru̧hua̧ Jehová huȩ'ä̧hua̧ ángel Agarrö pä'inödo: ―Pä'äji ta'anö ppa̧'ä̧chi̧ curuhuaju kö̧jo̧mȩtä̧. Jahuäju huejömä o'ca juiyönä jȩ'cu̧'a̧ja̧―. ¹⁰ Juhua yabo Tu̧ru̧hua̧ Jehová huȩ'ä̧hua̧ ángel pä'inö: ―Ucu cuahuaruhuä'cotörö recuätörö chi̧yä̧cua̧sä̧, pa̧ja̧cuo̧mȩ juiyönä huotörö. ¹¹ Juhua yabo Tu̧ru̧hua̧ Dios huȩ'ä̧hua̧ ángel pä'inödo: Täcö möchajujä. Cui̧tti̧rö̧ cu̧ju̧nä̧rä̧cua̧ju̧jä̧. I̧mi̧mä̧ ocuhuäcuajujä Ismael pä'ö, Tu̧ru̧hua̧ Dios ä̧ju̧cui̧na̧'a̧ttö̧ usurä cuȩmä̧hua̧'a̧mä̧. ¹² Cui̧tti̧mä̧ 'cuäopönä ö̧ra̧huä̧rä̧'chä̧cua̧. Korotö o'ca toi'önä tta̧bo̧i̧ya̧ päi'önä ö̧jä̧cua̧. Ja̧'hua̧ta̧nö̧ korotömä chutä aboiyotö päi'önä ttö̧ja̧cuä̧cuo̧tö̧. Ucu cui̧tti̧mä̧ ö̧jä̧cua̧ ahuaruhuättömä otonänö―, pä'inödo ángel. ¹³ Tu̧ru̧hua̧ Jehová Agarrö ucuocua'attö, Agar pä'inäjudo, ―Dios ucutä Toäcuähuä I̧sa̧jä̧―. Ja̧'hua̧nö̧ ja̧'a̧ Agar pä'ähuinäjudo: ―Diosrö tochäja'anä'inä, ji̧nä̧ kä̧ju̧sä̧―. ¹⁴ Ja̧'hua̧nö̧ ja̧'a̧ttö̧ reju ajiya acuäju i̧mi̧mä̧ ―Dios 'cuäopönä kö̧mä̧ ttörö topö― pä'ö o'inäjudo. Ju̧huȩnȩ reju ajiya acuäju Cades ötahuiyäcu'inä, Bered ötahuiyäcu'inä kä'co päte'ö jo̧mȩ ki̧na̧'a̧do. ¹⁵ Ja̧u̧nu̧ o'ca'a Agar ki̧tti̧rö̧ uhuäbecuinäjudo, Abramcu ki̧tti̧rö̧. Abram o'inödo i̧mi̧mä̧ Ismael pä'ö. ¹⁶ Abram ochenta y seis a̧'ȩ huinödo, Agar Ismaelrö kuhuäbecuinömä.