¹ Ja̧u̧nu̧ o'ca'a Tu̧ru̧hua̧ Dios Abramrö u'cuotinä ucuocuinäcudo. ―Yecuhuecuä', Abram. Ttötäsä ucuru Hua'adö Ku̧nu̧ Tto̧ȩpä̧räcuä̧huä̧ I̧sa̧mä̧. Ttö ucuru chi̧yä̧cuȩmä̧ rö̧ȩnä̧ cuȩmä̧cua̧jä̧―. ² Ja̧'hua̧nö̧ ä̧ju̧cuo̧mȩnä̧, Abram Tu̧ru̧hua̧ Diosrö ädätinödo: ―Chu̧ru̧hua̧ Chö̧ä̧nä̧hua̧ Dios, rö̧ȩnä̧ cuiyöttö'inä adihuoca'a, chi̧tti̧ toda'attö. Ttö hua'ö chicu o'ca'a chi̧tti̧rö̧ chiyipajacu'inä toa'attö, chu̧mö̧huä̧ya̧ Eliezer, Damasco ötahuiyä ttö̧ja̧ i̧sa̧tä̧ o'ca juiyönä chu̧ju̧nä̧rö̧ ȩmä̧cua̧. ³ Chi̧tti̧rö̧ cuiyoca'attö, chu̧mö̧huä̧ya̧ chojusodettö uhuäpächinömä, o'ca juiyönä chu̧ju̧nä̧rö̧ ja̧u̧tä̧ ȩmä̧cua̧―. ⁴ Tu̧ru̧hua̧ Dios ädätinäcudo: ―Cu̧mö̧huä̧ya̧ Eliezermä ȩmo̧cö̧ jä̧cua̧. Ucu cui̧tti̧tä̧ cu̧ju̧nä̧rö̧ ȩmä̧cua̧― päinäcudo. ⁵ Tu̧ru̧hua̧ Dios Abramrö u̧mi̧cu̧ o'ipächö pä'inödo: ―Mo̧ro̧jä̧ra̧'a̧ adiu topi. Si̧ri̧'cö̧rö̧ pa̧ja̧ti̧, cu̧'a̧tö̧'a̧nö̧ jö̧ttö̧mä̧. Jahuätö ta'anö jo̧mȩnä̧ ucu cuahuaruhuä'cotörö chi̧yä̧cua̧sä̧―. ⁶ Abram ja̧'hua̧nö̧ ä̧ju̧cuo̧mȩnä̧, U̧ru̧hua̧ Jehovárö a̧'cua̧ huȩnä̧ri̧nö̧. Abram ja̧'hua̧nö̧ a̧'cua̧ u̧huȩnä̧rä̧cu̧, Dios jȩi̧nä̧cu̧do chutäcu adihuä i̧sa̧ päi'önä. ⁷ Dios päinäcudo: ―Ttömä ucu Cu̧ru̧hua̧ Jehovásä. Ttötä o'ipinösä ucuru Ur ötahuiyä Caldeo rȩjȩttö̧, pi̧jä̧ rȩjȩ ucuru chiya pä'ö―. ⁸ Abram ädätinödo: ―Chu̧ru̧hua̧ Jehová, pi̧jä̧ rȩjȩ chȩmä̧cua̧'a̧mä̧ ¿tta̧'a̧nö̧ chu̧huo̧juä̧cua̧'a̧ jä̧ttö̧?― ⁹ Dios päinäcudo: ―Päcäyä isaju möäyaju huäbodäcuä a̧'ȩ huajuru i'cächi. Ja̧'hua̧ta̧nö̧ cabra isaju huäbodäcuä a̧'ȩ huajuru'inä, cabra huäbodäcuä a̧'ȩ hua̧rö̧'i̧nä̧, palomarö'inä, teyuru'inä i'cächi―. ¹⁰ Ja̧'hua̧nö̧ ja̧'a̧ttö̧ Abram jahuätö de'a isotö o'ca toi'önä̧rö̧ i'cächinödo. Kä'cotönä nä̧'ȩpi̧nö̧do. Ja̧'hua̧nö̧ nä̧'ȩpö̧ ka̧ra̧ttö̧'i̧nä̧ pä̧cuä̧da̧ pä̧tȩcuä̧nö̧ ttö̧'ö̧jö̧nä̧ rötä'chinödo. Ja̧'hua̧nö̧ ja̧'a̧nä̧ ppi̧yu̧ru̧ nä̧'ȩpo̧cö̧ pinödo. ¹¹ Ȩjo̧tö̧ jahuätö 'corupä'i'ätörö ttucui'a pä'ö tti̧mȩyȩhuo̧mȩnä̧, Abram ya'opö icuinä̧u̧do. ¹² Kä̧hua̧ täcö toönä mo̧ä̧cha̧'a̧, Abram täcunä ä'i'inödo. Churutä rö̧ȩnä̧ yo̧i̧'ä̧cu̧ ye'ecue'inödo. ¹³ Ja̧'hua̧nö̧ ja̧'a̧ Jehová pä'inödo Abramrö: ―Iso päi'önä pa̧'a̧nö̧ jä̧cua̧'a̧. Cuahuaruhuä'cotö korotö tti̧rȩjä̧nä̧ ttö̧ja̧cuä̧cuo̧tö̧. Ja̧huä̧jä̧ ttö̧ja̧ ttumöhuäyotö päi'önä ttaditäcuotö. Tturuhuotö jahuätörö suronä jȩttä̧cuo̧tö̧ cuatrocientos a̧'ȩ jo̧mȩnä̧. ¹⁴ Ja̧'hua̧nö̧ ja̧'a̧nä̧ ucutu cuahuaruhuä'cotö tturuhuotö päi'önä ttö̧ja̧cuä̧cuo̧tö̧rö̧ ttö chö̧tä̧bo̧tä̧cua̧sä̧. Ja̧u̧nu̧ o'ca'a cuahuaruhuä'cotö rö̧ȩnä̧ micuäu juäi ȩpö̧ rättopäcuotö. ¹⁵ Ja̧'hua̧nö̧ ja̧'a̧nä̧ ucumä cuä̧do̧tö̧mi̧nä̧ ttö̧ja̧cuo̧mȩcu̧ adiunä cui̧huä̧cua̧jä̧. Ja̧'hua̧ta̧nö̧ bö̧o̧ i̧sa̧ kä̧nö̧ adiunä hua'ö cui̧cuä̧cua̧jä̧. ¹⁶ Ja̧u̧nu̧ pä̧nä̧ cuahuaruhuä'cotö pocu ppa̧ttä̧chä̧cuo̧tö̧, pa̧ja̧cuä̧nö̧ huotö tti̧tti̧mö̧'cotö pätti'omenä. Ja̧'hua̧nö̧ ja̧'a̧nä̧ amorreos ttö̧ja̧ jitä suronä jȩttö̧mä̧ ji̧nä̧ jo̧mȩ päi'oca'a chö̧tä̧bo̧ta̧ pä'ömä― pä'inödo Dios Abramrö. ¹⁷ Täcö yo̧ä̧sa̧ päi'a'a yodo päi'omenä, ocurä isoppa'inä, tejähuore cuoa'a'inä, de'a isotö 'corupä'i'äjätö ttö̧'quȩtȩnä̧ 'cuäopa'a uhuähuina'ado. ¹⁸ Ja̧u̧tä̧ mo̧ro̧ Tu̧ru̧hua̧ Dios chutä iso päi'önä jȩä̧cuȩ huȩnȩ ji'äu ku̧ni̧nö̧do Abramrö. Pä'inödo: ―Pi̧jä̧ rȩjȩ ucu cuahuaruhuä'cotörö chi̧yä̧cua̧sä̧, Egipto ajettö kä̧mä̧dö̧, Eufrates aje rö̧oto jubö päi'önä. ¹⁹ Ja̧huä̧jä̧ ceneos ttö̧ja̧ tti̧rȩjä̧'i̧nä̧, cenezeos ttö̧ja̧ tti̧rȩjä̧'i̧nä̧, cadmoneos ttö̧ja̧ tti̧rȩjä̧'i̧nä̧, ²⁰ heteos ttö̧ja̧ tti̧rȩjä̧'i̧nä̧, ferezeos ttö̧ja̧ tti̧rȩjä̧'i̧nä̧, refaítas ttö̧ja̧ tti̧rȩjä̧'i̧nä̧, ²¹ amorreos ttö̧ja̧ tti̧rȩjä̧'i̧nä̧, cananeos ttö̧ja̧ tti̧rȩjä̧'i̧nä̧, gergeseos ttö̧ja̧ tti̧rȩjä̧'i̧nä̧, jebuseos ttö̧ja̧ tti̧rȩjä̧'i̧nä̧ ucu cuahuaruhuä'cotörö chi̧yä̧cua̧sä̧― pä'inödo Dios Abramrö.