¹ Ja̧u̧nu̧ o'ca'a Tu̧ru̧hua̧ Dios i̧jȩcui̧nö̧do Abrahamrö Mamre idepiyuttu, oi bäreu dauhuiyä ka̧cui̧no̧mȩttö̧. Kä̧hua̧ du'a'attö, Abrahammä ojusode äpate ä'ca pinödo. ² Abram u cä'epö topinödo u̧mä̧tö̧ huämetucuärö chutä ä'ca jo̧mȩ ttö̧ja̧cua̧'a̧. Jahuätörö topö, jurunä ä̧rä̧mi̧'ö̧, äpate ä'cattö jopinödo jahuätörö toa pä'ö. Ja̧rȩyu̧nu̧ pä'i'ö, i'ä rȩjȩ becuächönä ucuotönö jȩpi̧nö̧do. ³ Jahuätörö pä'inödo: ―Churuhuotö, ttörö cuesehuätucuttumä, jurunä 'cuäcuopätucua pä'ocösä. ⁴ Ajiya ji̧'qui̧cha̧nö̧tä̧ tti'cächipa hueda pä'ösä, cu̧jä̧pi̧yä̧ cutöcähuätucua pä'ö, dau kada'ca jurunätä 'cuä'ächi'ö cu̧'ä̧tu̧cua̧'a̧nä̧. ⁵ Ttö ucutu cu̧mö̧huä̧ya̧tu̧cu̧sä̧. Chojusodenä 'cuäcuopätucua'attö mä̧cuä̧, cu̧cuȩtu̧cu̧ ttaditopo'a hue'ösätó, cucuätucua cujuru cuȩmä̧tu̧cua̧ pä'ö mä̧nä̧ cui̧'chä̧tu̧cuä̧cua̧'a̧ ä'canä― pä'inödo Abraham. Jahuätö pä'inätödo: ―Ye. Päcuhuäjimä jȩpi̧―. ⁶ Ja̧hua̧nö̧ ja̧'a̧ Abraham ojusodenä jurunä do'ächi'ö, pä'inödo irecua Sararö: ―Jurunä ȩmo̧po̧'ä̧ji̧ veinte kilos jo̧mȩnä̧ trigo i̧sa̧ppȩ adihuä juäi i̧sa̧ppȩttö̧ pa̧ cuȩtto̧po̧'a̧ pä'ö―. ⁷ Abraham jopächö 'chi̧nö̧do äji pä̧cä̧yö̧ ttö̧ja̧cua̧'a̧cu. Ja̧'hua̧nö̧ ja̧'a̧ päcäyä mö̧ä̧ya̧ a̧di̧hua̧ttö̧ 'chu'huädö iyö, u̧mö̧huä̧ya̧rö̧ hue'inödo, idepä jurunä aditopo'a pä'ö. ⁸ Ja̧'hua̧nö̧ ja̧'a̧ queso'inä, leche'inä, idepä dahuähua'a'inä i'cächipö iyinä̧u̧do. Jahuätö dau kada'ca pä̧nö̧ ttucua'anä, kä̧nö̧ tta̧'ä̧ri̧nö̧do Abrahammä. ⁹ Ttu̧cuȩ ttucuäji o'ca'a jahuätö jättepinäcudo: ―¿To kö̧ja̧'a̧ttö̧ cuirecua Saramä?― Abraham ädätinödo: ―Pȩnȩtä̧ isode jacuä kä̧ju̧―. ¹⁰ Jahuätöttö ya̧tȩ pä'inödo: ―Jitä a̧'ȩnä̧ pä'äji ta'anö ppa̧dä̧chä̧cua̧sä̧ ucuru do'ächö ichö. Ja̧u̧nu̧mä̧ täcö ucu cuirecua Sara ki̧tti̧rö̧ ku̧ju̧nä̧rä̧cua̧ju̧―. Saramä Abraham abo ja̧'a̧nä̧, äpate jacuä kä̧nö̧ ä̧ju̧cui̧nä̧ju̧do. ¹¹ Abraham'inä, Sara'inä juiyo böäcuächinätö ji̧na̧'a̧do. Saramä ihua'inä kö̧rö̧ juiyönä juo'ächinäju ji̧na̧'a̧do. ¹² Sara ja̧u̧ ucuocua'a ä̧ju̧cu̧, ya̧'ä̧u̧ ka̧'cua̧nä̧ amöcuädinäjudo: ―Pi̧yȩ chesehuächi'önä jö̧mä̧, ¿tta̧'a̧nö̧ chu̧ju̧nä̧rä̧cua̧'a̧ttö̧? Chirecuo'inä, ttö'inä juiyo töböäcuächina'amä―. ¹³ Ja̧'hua̧nö̧ ja̧'a̧ Tu̧ru̧hua̧ Jehová Abrahamrö pä'inödo: ―¿Dä̧bö̧ ya̧ja̧hua̧'a̧ttö̧ Saramä? “Böa isaju cha'attö, chi̧tti̧rö̧ chu̧ju̧nä̧rö̧ juiyö'a̧nö̧ ja̧'a̧,” pä'ö ¿kamöcuäda'attö esetocoju tä̧ji̧? ¹⁴ Ttö jȩchö̧ juiyö'a̧nö̧ jö̧mä̧, ¿imicunänö jö̧'i̧nä̧ ka̧'a̧ tä̧ji̧? Jitä a̧'ȩnä̧ jitätä juäi isome pä'äji ta'anö ppa̧dä̧chä̧cua̧sä̧ ucuru do'ächö ichö. Ja̧u̧nu̧mä̧ täcö ucu cuirecua Sara ki̧tti̧rö̧ ku̧ju̧nä̧rä̧cua̧ju̧―. ¹⁵ Ja̧'hua̧nö̧ ja̧'a̧, Sara ye'ecue'inäjudo. Ä̧ppö̧tä̧rö̧ pä'inäjudo: ―Ya̧'ä̧huo̧co̧ju̧ päjäjusä―. Tu̧ru̧hua̧ Dios ädätinödo: ―Isocö. Ya̧'ä̧huä̧jä̧ju̧jä̧―. ¹⁶ Ja̧'hua̧nö̧ ja̧'a̧ u̧mä̧tö̧ ä̧rä̧mi̧'ö̧, Sodoma ötahuiyära̧'a̧cu̧ topinätödo. Juhua'acu tti̧'cho̧mȩnä̧, Abraham beometä jahuätöcu 'chi̧nö̧do. ¹⁷ Ja̧'hua̧ ja̧'a̧ Tu̧ru̧hua̧ Dios amöcuädinödo: ―Abrahamrömä yorö'iso dä̧'ȩpo̧'ä̧ro̧cö̧sä̧ jȩchä̧cuȩmä̧. ¹⁸ Abraham ahuaruhuä'cotöttö recuätö ja̧'a̧ttö̧ ttujuruhuäcuotö. Ja̧u̧ttu̧ kä̧mä̧dö̧ pi̧jä̧ o'ca toi'önä ttö̧ja̧rö̧ ppä̧dä̧dä̧cua̧sä̧. ¹⁹ Ttömä ja̧u̧ru̧ ȩmi̧nö̧sä̧ ja̧u̧ i̧tti̧mö̧rö̧'i̧nä̧, i̧tti̧mö̧ttö̧ ö̧nä̧mö̧rö̧'i̧nä̧ huea pä'ö adiu yoräteunä jȩpö̧ kä̧nö̧ ttesetäcua'anö. Ja̧'hua̧nö̧ adiu jȩo̧mȩnä̧tä̧ chiya pädinömä ȩmä̧cua̧―. ²⁰ Tu̧ru̧hua̧ Dios Abrahamrö pä'inödo: ―Sodoma ttö̧ja̧'i̧nä̧, Gomorra ttö̧ja̧'i̧nä̧ rö̧ȩnä̧ suronä jȩpö̧ ka̧cuä̧tö̧do pä'ö jittähua'a ä̧ju̧cuä̧ji̧sä̧. ²¹ Ja̧'hua̧nö̧ ja̧'a̧ttö̧ mȩyȩu̧ to̧chä̧cua̧sä̧ iso päi'önä ja̧ pä'ö jittähuäjimä. Ja̧'hua̧nö̧ jö̧ juiyöttömä, chu̧huo̧juä̧cua̧sä̧― pä'inödo Tu̧ru̧hua̧ Diosmä. ²² Ja̧'hua̧nö̧ ja̧'a̧ ta̧ju̧ u̧mä̧tö̧ rä'opächö 'chi̧nä̧tö̧do Sodoma ötahuiyära̧'a̧cu̧. Ja̧'hua̧nö̧ ja̧'a̧nä̧ Abrahammä Tu̧ru̧hua̧ Dios ä'ca jo̧mȩ ki̧nö̧do. ²³ Abraham Tu̧ru̧hua̧ Diosrö tö'cönänö 'chä̧hui̧'ö̧ pä'inödo: ―¿Ucumä adiu jȩpä̧tö̧rö̧mä̧ suronä jȩpä̧tö̧cu̧tä̧ ji̧nä̧ yo̧mȩtȩnä̧ be'epäjipö cui̧cuä̧cua̧jä̧ tä̧ji̧? ²⁴ Cincuentanö jo̧mȩnä̧ adiu jȩpä̧tö̧mä̧ ju̧huȩnȩtä̧ ttö̧jö̧ttö̧mä̧, ¿iso päi'önä be'epäjipö cui̧cuä̧cua̧jä̧? Adiu jȩpä̧tö̧rö̧ amöcuädömä ¿o'ca toi'önä ötahuiyänä ka̧cuä̧tö̧rö̧ ttö̧ji̧pö̧nä̧ jȩcu̧'i̧yä̧cua̧jä̧ tä̧ji̧? ²⁵ Ucumä ja̧'hua̧nö̧ jȩpo̧cö̧jä̧. Adiu jȩpätö̧rö̧mä̧ suronä jȩpä̧tö̧cu̧tä̧ ji̧nä̧ yo̧mȩtȩnä̧mä̧ be'epäjipö icuocöjä. Ja̧'hua̧nö̧ jȩcu̧'o̧mȩnä̧, adiu jȩpä̧tö̧rö̧'i̧nä̧, suronä jȩpä̧tö̧rö̧'i̧nä̧ yoräteunä jȩcu̧'a̧nö̧ ja̧'a̧. Ucumä ja̧'hua̧nö̧ jȩcu̧ juiyö'a̧nö̧ hua̧jä̧. O'ca toi'önä Ttu̧ru̧hua̧ cu'a'attö, ucumä suronä jȩpä̧tö̧rö̧tä̧ tä̧bo̧cuä̧ i̧sa̧jä̧― pä'inödo Abrahammä. ²⁶ Ja̧'hua̧nö̧ ja̧'a̧ Tu̧ru̧hua̧ Dios pä'inödo: ―Cincuentanö huotörötä adiu jȩpä̧tö̧rö̧ chö̧'o̧cui̧'ö̧ttö̧'i̧nä̧, jahuätörö amöcuädö ja̧u̧ ötahuiyämä be'epäjipö icuocö chä̧cua̧sä̧― pä'inödo Tu̧ru̧hua̧ Diosmä. ²⁷ Ja̧'hua̧ ja̧'a̧ Abraham juhua'a yabo pä'inödo: ―Usurä i̧sa̧ cha'anä'inä, ttömä Chu̧ru̧hua̧rö̧ yecuäcuähuä juiyönä ucuocusä. ²⁸ Adiu jȩpä̧tö̧ juhua'atä cuarenta y cinconö ttö̧ja̧ ttö̧ja̧cu̧ttu̧'inä, ¿be'epäjipö cui̧cuä̧cua̧jä̧ tä̧ji̧, ji̧nä̧ ji̧mö̧tȩnö̧ huotö ttö̧ja̧ toa'anä'inä?― jä'epinödo Abrahammä. Tu̧ru̧hua̧ Dios päinäcudo: ―Cuarenta y cinconö ttö̧ja̧rö̧tä̧ adiu jȩpä̧tö̧rö̧ chö̧'o̧cui̧'ö̧ttö̧mä̧, be'epäjipö icuocö chä̧cua̧sä̧― pä'inödo. ²⁹ Abraham pä'äji ta'anö jä'epinödo: ―¿Iso päi'önä adiu jȩpä̧tö̧rö̧ cuarentanö huotörötä cu̧'o̧cui̧'ö̧'a̧nö̧ ja̧'a̧ tä̧ji̧?― jä'epinödo. Tu̧ru̧hua̧ Dios päinäcudo: ―Jahuätö cuarentanö ttö̧ja̧rö̧ amöcuädö, be'epäjipö icuocö chä̧cua̧sä̧― pä'inödo. ³⁰ Abraham pä'inödo: ―Ji̧nä̧ chucuocuomenä, cu̧ra̧huä̧ri̧'ä̧ttö̧ Chu̧ru̧hua̧. ¿Treintanö huotörötä'inä adiu jȩpä̧tö̧rö̧ cu̧'o̧cui̧'ä̧cua̧jä̧cö̧?― jä'epinödo Abrahammä. Ja̧'hua̧nö̧ ja̧'a̧ Tu̧ru̧hua̧ Dios päinäcudo: ―Treintanö huotörötä'inä chö̧'o̧cui̧'ö̧ttö̧mä̧, be'epäjipö icuocö chä̧cua̧sä̧― pä'inödo. ³¹ Pä'äji ta'anö Abraham pä'inödo: ―Ttömä Chu̧ru̧hua̧rö̧ yecuäcuähuä juiyönä ucuocusä, ¿Veintenö huotörötä'inä cu̧'o̧cui̧'ö̧ttö̧mä̧di̧ttö̧?― jä'epinödo Abrahammä. Tu̧ru̧hua̧ Dios päinäcudo: ―Jahuätö veintenö huotörötä'inä amöcuödö be'epäjipö icuocö chä̧cua̧sä̧― pä'inödo. ³² Abraham pä'inödo: ―Ji̧nä̧ jitä ya'utenätä chucuocua'anä, cu̧ra̧huä̧ri̧'ä̧ttö̧, Chu̧ru̧hua̧. ¿Dieznö huotörötä'inä cu̧'o̧cui̧'ö̧ttö̧mä̧di̧ttö̧?― jä'epinödo Abrahammä. Tu̧ru̧hua̧ Dios päinäcudo: ―Dieznö huotörötä'inä chö̧'o̧cui̧'ö̧ttö̧mä̧, jahuätörö amöcuädö be'epäjipö icuocö chä̧cua̧sä̧― pä'inödo Tu̧ru̧hua̧mä̧. ³³ Abrahamcu ucuocu cä'ädö, U̧ru̧hua̧mä̧ i̧hui̧nö̧do. Ja̧'hua̧ta̧nö̧ Abrahammä ppa̧'ä̧chi̧nö̧do chu'inä ö̧jo̧mȩcu̧.