¹ Ja̧'hua̧nö̧ ja̧'a̧ Jacob i̧tti̧mu̧rö̧ huopö pä'inö: Ji̧nä̧ yo̧mȩtȩ pä'i'ätucui, ja̧'hua̧nö̧tä̧ ji̧dä̧huä̧ju̧jä̧ ucuturu yodoji 'cuä̧o̧pä̧cuä̧. ² Ji̧nä̧ yo̧mȩtȩ pä'i'ö ä̧ju̧cuä̧tu̧cui̧, Jacob i̧tti̧mö̧. Ä̧ju̧cuä̧tu̧cui̧ Israélrö, cuä'otucuru. ^{3 4} Rubén, ucutä ja̧'a̧ ä̧cuo̧mȩnä̧ chi̧tti̧mä̧, chujurumä, muä̧ya̧ kä̧nö̧ chujuruhuäi chi̧tti̧mä̧, ucutä ja̧'a̧ korotöttö'inä yabonänä ucuotäcuähua ja̧'hua̧ta̧'nö̧ cujuru'inä ku̧nä̧rö̧mä̧. Aje pä̧i̧cu̧nä̧ döome ttottepapä'o jȩttä̧'i̧nö̧'a̧nö̧ hua̧jä̧, cui̧jä̧hua̧tö̧ttö̧'i̧nä̧ ttubuo jö̧nä̧mä̧ cu̧ji̧yä̧cua̧jä̧, jua'amä cuä'o ä'omä 'chacuächäja̧'a̧ttö̧. Cucuotoca'a: Ttö chä'ome do'ächäjijä. ⁵ Simeón'inä, Leví'inämä ji̧nä̧ yotöte isotö ja̧'a̧. Ttucuräcuähuänämä 'cui'ö icu cuä'äu tticua pä'ötä huotö. ⁶ Sottö̧ cha̧'cua̧ruhue, jahuätö ro̧'ȩpö̧ jittäunämä ja̧'hua̧ta̧'a̧nö̧ ca̧ca̧cu̧ ttö̧'ȩjo̧mȩmä̧ doächö juiyajá, isopäi'önä chami iso'quimä ja̧u̧ tö'cömä rö̧ä̧nä̧ ucuotäcuähuä ka̧'a̧, Jahuätö ttö̧'ä̧i̧nä̧mä̧ ttö̧ja̧rö̧ cuä'äu icuinä̧tö̧. Rö̧ä̧nä̧ eseu pä̧cä̧yu̧rö̧ 'cui'ö icuinä̧tö̧. ⁷ Ttamisurumä surojuoepötä ja̧'a̧, jahuätömä pä̧i̧cuä̧tö̧ jo̧mȩttö̧, rö̧ä̧nä̧ suronä jȩttö̧mä̧ juhua'amä usurä isotö juottönä jȩpä̧tö̧ jo̧mȩttö̧. Jacobrömä 'cä̧'ȩpö̧ chi̧cuä̧cua̧sä̧, ja̧'hua̧nö̧ jȩpö̧ Israelnä pperetö chicuäcuotö. ⁸ Judá ahuaruhuäcumä̧ eseu ra̧ttä̧cua̧jä̧. Ucu cumömä̧ cuaboiyotö ttu̧ru̧pä̧'quȩnä̧ cu̧huȩnä̧rä̧cua̧jä̧. Cuä'o i̧tti̧mö̧mä̧ ucu cuä'ca jo̧mȩ ttihue'quiyunä̧ kä̧mä̧dö̧ ja̧rȩyu̧ pätti'äcuotö. ⁹ Judámä̧ mö yähui i̧tti̧ ja̧'a̧. Chi̧tti̧, cu̧'o̧ya̧rö̧mä̧ cuänö̧ cä'ädö 'cha'achäjijä̧. Ja̧u̧mä̧ jareyu pä'i'ö, beberunö pä̧mä̧dö̧ mö yähui jä̧'i̧nö̧'a̧nö̧, mö yähui isaju jä̧'i̧nö̧'a̧nö̧. ¿Dijä̧ttö̧ ja̧u̧ru̧ ö'oräda'anö̧ hua̧mä̧? ¹⁰ Ruhuo hue'ö ötta'camä̧ Judáttömä̧ 'cä̧ípä̧cho̧ca̧'a̧ jä̧cua̧'a̧, ttö̧ja̧ ttu̧ru̧hua̧ ötta'ca'inä ttö̧jä̧pö̧ 'cä̧tȩttö̧mä̧ räopoca'a jä̧cua̧'a̧, Siloh ichome jubö päi'önä̧. Ttö̧ja̧mä̧ ja̧u̧ru̧ ttucuotäcuotö. ¹¹ Uva daunä̧ äji bö̧rö̧ba̧rö̧ ti̧'ä̧dö̧ ku̧nu̧mä̧ ja̧'hua̧ta̧'a̧nö̧ bö̧rö̧ba̧ acu ttahuähuächäcurumä̧ uva dau pojopö ku̧nä̧huäinä̧, ja̧u̧ ö̧'ca̧tä̧huä̧ti̧yu̧mä̧ vino isoyanä̧ ö̧tö̧cä̧cua̧ juhua'atäcu ö'catähuä'pimä̧ uva ucuojanä̧. ¹² Iäremä̧ rö̧ä̧nä̧ i̧di̧cuä̧cua̧ vino isoya 'cua̧rö̧nä̧, ja̧'hua̧ta̧'a̧nö̧ acumä̧ rö̧ä̧nä̧ tȩä̧cua̧ atateja 'cua̧ru̧nä̧. ¹³ Zabulón ucumä cu̧jä̧cua̧jä̧ dä'ähuäptä jäyototä, Juȩnȩmä̧ huoi'quiyu bäreu rä̧mä̧dä̧cuo̧mȩ, ja̧'hua̧ta̧'a̧nö̧ tti̧rȩjä̧ beipomemä Sidónbu jä̧cua̧'a̧. ¹⁴ Isacar ahuaruhuämä amäcöjueitä ttaditäcuotö burro 'cua̧rö̧nä̧, Ja̧'a̧tä̧ra̧'a̧ isotö ttä'ocanä'inä ä'ecu ko̧cuä̧tö̧. ¹⁵ 'Cuä'ächö ö̧'a̧ pä'ömä rȩjȩta̧'i̧nä̧ adihuäcu. Amäcö juei'inä cä'epö huä̧nä̧u̧ ȩpö̧ ja̧'hua̧nö̧tä̧ korotö huetta'anä̧tä̧ aditö ö̧jä̧cua̧. ¹⁶ Dantä̧ ruhuo huȩä̧cua̧ ahuaruhärö israél ttö̧ja̧sa̧ ja̧'a̧ttö̧. ¹⁷ Dan jä̧cua̧'a̧ mä̧nä̧nä̧ äca ö̧'a̧'a̧ jä̧'i̧nö̧'a̧nö̧ ö̧'ä̧cua̧mä̧, äca u̧mä̧nȩhuä̧ ni̧'a̧ cameyu̧tu̧ ttö̧'a̧juȩnä̧ yö̧ä̧cua̧, ja̧u̧ u̧huä̧mȩ huö̧mä̧ aboja̧'a̧cu̧ ppoächönä. ¹⁸ Ttömä tta̧'a̧rö̧sä̧ ppäcuädattö pä'ö, CHÖ̧Ä̧NÄ̧HUA̧. ¹⁹ Gad'römä, nä̧u̧cuä̧rä̧cuä̧huä̧ isotö 'chuttä̧dä̧cua̧, ja̧'hua̧nö̧ ja̧'a̧nä̧ ja̧u̧mä̧ örohuphuä̧cua̧ röjinä rö̧jä̧tu̧cu̧. ²⁰ Aser u̧cuä̧mä̧ juiyo nö̧ä̧cua̧'a̧, ja̧'hua̧nö̧mja̧'a̧ttö̧ ruhuotö ttucunä'inäp i̧yä̧cua̧. ²¹ Naftalí ahuaruä o'cotömä pä̧huä̧rö̧jö̧'a̧nö̧ yä̧mä̧ isaju kö̧jaa̧'a̧ jä̧'i̧nö̧'a̧nö̧ ko̧cuä̧tö̧, ja̧u̧mä̧ ku̧nä̧rö̧ adihuätö yä̧mä̧ i̧tti̧mu̧rö̧ u̧ju̧nä̧rä̧'i̧nö̧ a̧nö̧ ku̧nä̧rö̧. ²² Josemä dau ä̧na̧juȩ u̧huä̧ju̧ huȩja̧i jä̧'i̧nö̧'a̧nö̧ hua̧, ä̧na̧juä̧ rö̧'ä̧nä̧ juȩja̧juȩ aje jäyoto käittö, ä̧na̧jui̧yä̧ ttoecuäbä huä̧mȩnä̧nö̧ päi'önä käi. ²³ 'po'obunä rohuähuäto'inä tti̧chä̧cua̧ ja̧'hua̧ta̧'a̧nö̧ 'po'äu'inä 'po̧ttä̧huä̧cua̧ ja̧'hua̧ta̧'a̧nö̧ ru̧'huä̧rö̧'i̧nä̧ ru̧ttä̧ra̧cua̧. ²⁴ Ja̧'hua̧nö̧ ja̧'a̧nä̧ chutä u'popobumä jueönätä̧ u̧ju̧nä̧rä̧cua̧, ja̧'hua̧nö̧ ja̧'a̧nä̧ cu̧mu̧nä̧mä̧ 'cuä'ächi'o'inä 'cuäcuächi'ä Jacob u̧mu̧nä̧ ujuruhuinö'anö juruhui, adihua'a ovejatö̧ro̧ tta̧huä̧rä̧cuä̧huä̧ i̧sa̧rö̧tä̧, Israél ttö̧ja̧rö̧ inähua tto̧ȩpä̧ra̧'a̧ jä̧'i̧nö̧'a̧nö̧ ttä̧'ȩpä̧rö̧' ²⁵ Ucu cuä'o Diostä ppä̧dä̧cua̧jä̧. Ja̧'hua̧ta̧'a̧nö̧ o'cajuiyönä ju̧ru̧hua̧tä̧ re'topu ppä̧dä̧cua̧jä̧ mo̧ro̧jä̧ ju'toju jähuänä, ppä̧dä̧cua̧jä̧ pi̧jä̧ dea'a ko̧cu̧nä̧'i̧nä̧, ppä̧dä̧cua̧jä̧ ttamucanä jahuänä'inä ja̧hua̧ta̧'a̧nö̧ tti̧rȩba̧ jome'inä. ²⁶ Cuä'o ucuru ppädömä juiyo rö̧a̧'a̧tó täbo muäkiyutu'inä korojuä'ittö'inä,täbo'cö meje'ca po̧ri̧yä̧ttä jö̧ttö̧'i̧nä̧ abonänö. Ja̧u̧mä̧ ka̧cua̧cua̧ pä̧'ö̧ ja̧'a̧ José ú juttä, ja̧hua̧nö̧ ja̧'a̧nä̧'i̧nä̧ cui̧jä̧cua̧ ru̧hua̧ i̧tti̧ ú juttä'inä. ²⁷ Benjamínmä̧ böo ähuiri ppä̧i̧cua̧ ja̧'a̧. Mo̧ro̧ päia'amä̧ idepä ucui'äcua̧, ja̧'hua̧ta̧'a̧nö̧ nipä̧ro̧mȩmä̧ rohuäu 'choipäji iyä'chu i̧cuä̧cua̧. ²⁸ Pitö ja̧'a̧ Israel i̧tti̧ doce huinä̧tö̧mä̧. Pa̧'a̧nö̧tä̧ päinä̧u̧ ttä'omä̧ adiunä̧ jö̧ iyö kä̧nö̧mä̧, yotucunä̧rö̧ adiunä̧ jö̧mä̧ ²⁹ iyä'chinö̧ adiunä̧ ppädö'anö̧ jö̧mä̧. Ja̧'hua̧nö̧ ja̧'a̧ jȩttä̧cuä̧ ji'äumä̧ pä̧i̧nä̧u̧: A̧'u̧cua̧'a̧tä̧ jö̧ o'ca'a chahuaruhuä ttö̧ja̧cua̧'a̧ chi̧'chä̧cua̧sä̧. Chä̧do̧tö̧ minä̧ ttö̧'ȩjo̧metä̧ rȩä̧dö̧ cuicuätucuattojä̧ ³⁰ idorä hit ttö̧ja̧sa̧ ö'ättanä̧ koränätä̧. Idorä macpela meje'canä̧ koränä̧tä̧, mamrettö̧mä̧ tö'cönä̧nö̧, canaán rȩjȩnä̧, Abraham i̧rȩjä̧nä̧ hit ttö̧ja̧sa̧ Efrónttö̧ eminome hua'are 'turähuome jö̧nä̧. ³¹ Ju̧huȩnȩtä̧ Abraham minä̧rö̧'inä, irecua Sara minä̧rö̧'inä̧, Isaac minä̧rö̧'inä, irecua Rebeca minä̧rö̧'inä ja̧'hua̧ta̧'a̧nö̧ Lea minärö̧'inä ju̧huȩnȩtä̧ rȩä̧dö̧ icuinö̧sä̧. ³² De'a ja̧'hua̧ta̧'a̧nö̧ idorä'inä ro̧mȩ het ttö̧ja̧ttö̧ emä̧huo̧mȩ." ³³ Jacobmä i̧tti̧mö̧rö̧ röji i̧huȩnȩ ucuocu rö̧ni̧pö̧, ö̧jä̧pi̧yä̧ camanä cä'epö huä̧nö̧ pä̧mä̧dö̧, ami yuppa täcö röjitä 'chahuäda'attö 'corupä'i'inödo.