¹ Ja̧'hua̧nö̧ ja̧'a̧ Josémä jä'orö hua'adiö ajuäunu 'chuo̧pi̧nö̧. ² Ja̧u̧nu̧ o'ca'a Josémä u̧mu̧huäyoto jahuapu ruhuärö hueinö jä'orö tuttepa pä'ö a̧mȩu̧ juiyönä. ³ Jahuätömä cuarentanö mo̧ro̧ jo̧mȩ aditinätö̧, ja̧'hua̧nö̧ mo̧ro̧ jo̧mȩnä̧ pättecuächa'attö 'corujuoächätörö isähua tuecuämä. Egipto ttö̧ja̧mä̧ ja̧u̧ru̧ ajuähuinättö̧ setentanö mo̧ro̧ jo̧mȩ. ^{4 5 6} Ttajahuäji mo̧ro̧ beipächomȩnä̧, Josémä Faraón umuhuäyotö su̧ru̧da̧u̧ tturuhuotucu ucuocuinö pa̧'a̧nö̧ pä'ö: Jitä ucutunä po̧cui̧pu̧sä̧ retopu ppädäcuäcuä ja̧'hua̧nö̧ ja̧'a̧ttö̧ ppä'ädätucuittö ucuocu Faraónrö̧: Ttö chä'omä a̧ jȩchä̧cua̧sä̧ pädönä pä'inäcu̧sä̧: "Topittö, tä'cö 'corujuoächösä. Ja̧'hua̧nö̧ ja̧'a̧ttö̧ ttötä sadinä̧junä rȩä̧dö̧ cuicuattö̧ja̧ Canaán rȩjȩra̧'a̧tä̧. Juȩnȩtä̧ rȩä̧dö̧ cuicuätucuättö̧ja̧," Jitämä, ja̧'a̧tä̧ topätucuittö chä'orä rȩä̧dö̧ 'chi̧cha̧'a̧nä̧, ja̧u̧nu̧ o'ca'atä ppa̧dä̧chä̧cua̧sä̧." Faraón ädätinö: "Tä'i cuä'orö rȩä̧dä̧ji̧, ucuru jȩcu̧'a̧ pä'ö hueinö ta'anö." ⁷ Josemä 'chi̧nö̧ jä'orö rȩä̧dö̧ icua pä'ö. O'catoi'önä su̧ro̧do̧u̧ faraón u̧mu̧huä̧yo̧tö̧'i̧nä̧ ja̧u̧cu̧ 'chi̧nä̧tö̧, Ru̧hua̧rö̧ isodettöä tta̧'a̧rä̧tö̧'i̧nä̧, o'catoi'önä su̧ro̧do̧u̧ Egipto rȩjȩnä̧ ko̧cuä̧tö̧'i̧nä̧, ⁸ o'catoi'önä José ojusodenä ko̧cuä̧tö̧'i̧nä̧ i̧jä̧hua̧'i̧nä̧, ja̧'hua̧ta̧'a̧nö̧ jä'o ojusodenä ko̧cuä̧tö̧'i̧nä̧. Ja̧'hua̧nö̧ ja̧'a̧nä̧ tti̧tti̧mu̧mä̧, ttäji oveja̧tö̧'i̧nä̧ ttä̧ji̧ pä̧cä̧yö̧'i̧nä̧ ko̧cui̧pi̧nä̧tö̧ Gosén rȩjȩnä̧tä̧. ⁹ Carukiyä ja̧hua̧ta̧'a̧nö̧ cabayu̧tu̧nä̧ hu̧jä̧tö̧'i̧nä̧ ja̧u̧cu̧ 'chinätö. Juiyó recuinätö ttö̧ja̧mä̧. ¹⁰ Jordán aje pä̧tȩcuä̧nö̧ trillar de Atad rȩjȩnä̧ ttö̧rä̧bȩhuo̧mȩnä̧, jahuätömä rö̧'ä̧nä̧ tta̧'cua̧ tta̧'ȩcu̧ pä̧i̧cu̧nä̧ ajuähuinätö. Juorömä ji̧mu̧tȩ ta'arenö mo̧ro̧ jo̧mȩnä a̧'cua̧ ttä̧'ȩcui̧nö̧ Josemä jä'o korujuoächäja'amä. ¹¹ Ja̧huä̧jä̧ rȩjȩnä̧ ko̧cuä̧tö̧mä̧, canan ttö̧ja̧mä̧, topinätö tta̧ö̧'cua̧ tta̧ttȩcu̧mä̧ Atad rȩjȩttö̧, ja'huätö pä'inätö: "Pi̧yȩ pä̧nä̧mä̧ Egipto ttö̧ja̧ rö̧ä̧nä̧ tta̧'cua̧ tta̧tȩcu̧ mo̧ro̧ ja̧'a̧." ja̧'hua̧nö̧ä̧ ja̧'a̧ttö̧ juȩnȩmä̧ ottinome Abel Mizraim pä'ö, juȩnȩmä̧ ki̧'i̧pa̧'a̧ Jordán aje yabonä. ¹² Jacob i̧tti̧mö̧'cotö ttä'omi̧nä̧ hueipinö ta'anö jȩpi̧nä̧tö̧do. ¹³ Canaán rȩjȩra̧'a̧cu̧ o'co jähuä ȩpi̧nä̧tö̧do. Ihueye 'turu icuähuome päi'önä Abrahamminä Efrón hitita ttö̧ja̧ i̧sa̧ttö̧ imitinä̧jä̧nä̧, ju̧huȩnȩtä̧ rorä idoränä ttä'o Jacobmi̧nä̧ o'co jähuä rötinätödo. Ja̧huä̧jä̧ Macpela pä'ö mi̧cuä̧jä̧'inä, Mamre pä'ö micuä̧jä̧'inä tö'cö ji̧na̧'a̧do. ¹⁴ Jä'omi̧nä̧rö̧ rötö i̧huä̧ji̧'ca̧, José Egipto rȩjȩra̧'a̧ ppa̧'ä̧chi̧nö̧do, u̧bö̧o̧tö̧cu̧, ö̧jä̧hua̧cu̧ o'ca toi'önä jahuätöcu jä'ominärö rötö i̧huä̧jä̧tö̧cu̧. ¹⁵ Ttä'omi̧nä̧ 'corupäi'äji o'ca'a, José u̧bö̧o̧tö̧ pä'inätödo: ―Iso päi'önä Josémä churutä suronä jȩti̧nö̧ micuä päi'önä ¿pärocua'attö ujuturu suronä jȩö̧'a̧nö̧ ja̧'a̧ tä̧ji̧?― ¹⁶ Ja̧'hua̧nö̧ ja̧'a̧ttö̧ Josérö tti̧huȩnȩ hue'inätödo. Pä'inätödo: ―Tä'omi̧nä̧ 'corupäi'äcua'a ä'canä hue'ipinö: ¹⁷ “Pa̧'a̧nö̧ päcuhuätucuaröja Josérömä pä'ö. Jädepäcujä, unichi'i cu̧bö̧o̧tö̧ suronä jȩtti̧nö̧mä̧, ucuru suronä jȩtti̧na̧'a̧ttö̧,” pä'inö cuä'omi̧nä̧― pä'inätödo. ―Ja̧'hua̧nö̧ ja̧'a̧ttö̧ unichi'i cuä'o Ö̧ä̧nä̧hua̧ Dios umöhuäyotö suronä jȩti̧nö̧mä̧― pä'inätödo. Ja̧'hua̧nö̧ ja̧'a̧ tti̧huȩnȩ ä̧ju̧cu̧, José ajuähuinödo. ¹⁸ Ja̧u̧nu̧ o'ca'a u̧bö̧o̧tö̧ José ä'ca jo̧mȩ ichi'ö, ttihue'quiyunä pä̧mä̧dö̧ ucuotönö pä'inätödo: ―Topi, ujutumä ucu cumöhuäyotö päi'önä ichäjätöjä―. ¹⁹ Ja̧'hua̧nö̧ ja̧'a̧nä̧ José jahuätörö pä'inödo: ―Yecuhuecuätucuättö. Tö̧ä̧nä̧hua̧ Diosmä̧cö̧sä̧ ttömä. ²⁰ Ucututä ttörö suronä jȩcu̧'ä̧tu̧cua̧ pä'ö cuamöcuädinätucua'anä, Tö̧ä̧nä̧hua̧ Diostä jȩpi̧nö̧ adihua'a ja̧ pä'ö. Ja̧'hua̧nö̧ ja̧'a̧ttö̧ jitä pi̧yȩ pä̧nä̧ recuätö tta̧'cua̧rö̧ ki̧'ä̧tö̧ Tö̧ä̧nä̧hua̧ Dios jȩi̧nö̧nä̧. ²¹ Ja̧'hua̧nö̧ ja̧'a̧ttö̧ yecuecuätucuä'. Ttö ucuturu'inä, cui̧tti̧mö̧rö̧'i̧nä̧ chi̧yä̧cua̧sä̧ ucuturu recuä rö̧jö̧mä̧―. Ja̧'hua̧nö̧ José jahuätörö repe'ö re rö̧jö̧nä̧ topö ucuocuinä̧u̧do. ²² Egipto rȩjȩnä̧tä̧ ki̧nö̧do Josémä, jä'ominä ahuaruhuä'cotö'inä. José ciento diez a̧'ȩ ki̧nö̧do. ²³ Ja̧'hua̧ta̧nö̧ Josémä i̧tti̧ Efraín i̧tti̧mö̧ tti̧tti̧mö̧ juhua'a yabo tti̧tti̧mö̧rö̧'i̧nä̧ topinödo. Manasés i̧tti̧ Maquir i̧tti̧mö̧ ttuhuäpächomenä, ttiyinäcudo José öja ju'tä huä̧nä̧u̧ esehua pä'ö. ²⁴ Ja̧'hua̧nö̧ ja̧'a̧ Josémä u̧bö̧o̧tö̧rö̧'i̧nä̧, ö̧jä̧hua̧rö̧'i̧nä̧ pä'inö: ―Täcö 'corupädi'a̧nö̧ jä̧cu̧sä̧. Ja̧'hua̧nö̧ ja̧'a̧nä̧ Tö̧ä̧nä̧hua̧ Dios yorö'iso ucuturu tta̧huä̧rä̧cuo̧töjä̧. Ja̧'hua̧ta̧nö̧ pi̧jä̧ttö̧ ucuturu ȩpä̧cuo̧tö̧jä̧ korojä̧ra̧'a̧cu̧, Abrahamrö'inä, Isaacrö'inä, Jacobrö'inä iya päinä̧jä̧ra̧'a̧―. ²⁵ Ja̧'hua̧nö̧ ja̧'a̧ Josémä, jä'ominä Israel i̧tti̧mö̧'cotörö pä'inödo: ―Yorö'iso Tö̧ä̧nä̧hua̧ Diostä ucuturu tta̧huä̧rä̧cua̧mä̧. Ja̧'hua̧nö̧ ja̧'a̧ttö̧ “Cuihue'quiyu cuo'co jähuä pi̧jä̧ttö̧ tȩpä̧cuo̧tö̧jä̧” pä'ätucuittö― pä'inödo José. ²⁶ Ja̧'hua̧nö̧ ja̧'a̧ José ciento diez a̧'ȩ hua̧ ö̧jo̧mȩnä̧, 'corupä'i'inödo. Ja̧u̧ru̧ Egipto rȩjȩ ttö̧ja̧ ttihueye jȩtti̧nö̧ ta'anö jȩpi̧nä̧tö̧do. Ja̧u̧nu̧ o'ca'a hua'are ȩnä̧huo̧ca̧ jacuä ȩni̧nä̧tö̧do Egipto rȩjȩttö̧.