¹ Pi̧yȩ jä̧ji̧ o'ca'a ji̧yȩtȩ 'cuäopina'a, ya̧tȩ ji'ähuinö Josérö, Topittö, cuä'omä na'achö̧, pä'ö." Ja̧'hua̧nö̧ ä̧ju̧cu̧ ja̧u̧mä̧ i̧tti̧mö̧ ta̧ju̧rö̧; Efraínrö'inä, Manasésrö'inä o'ipächinö. ² Jacobrö ji'ähuinä̧tö̧: Topittö, cui̧tti̧ Josémä ucuru topö ichäji," Israel ujuru ȩmo̧po̧'ö̧, ä̧'ä̧huä̧ma̧nä̧ pä̧mä̧di̧nö̧. ³ Jacobmä Josérö pä'inö: Dios o'cajuiyönä ju̧ru̧hua̧mä̧ Luz pä'ö micuomȩ Canaán rȩjȩttö̧ i̧jȩcui̧nä̧cu̧sä̧. Ja̧u̧mä̧ Ttörö adiunä ji̧ya̧rö̧ pä'ötä iyinö, ⁴ ja̧'hua̧ta̧'a̧nö̧ ja̧u̧mä̧ pä'inö: Ttömä ucuru cui̧tti̧mö̧rö̧ yabonö recuätö yottähuächönä jȩchä̧cua̧jä̧, Ttömä ucuttömä ttö̧ja̧ recuätö ttö̧ja̧ ttirecuächönä jȩchä̧cua̧sä̧. Ttömä pi̧jä̧ rȩjȩmä̧ cui̧tti̧mö̧ tti̧rȩjä̧ päi'önä chi̧yä̧cua̧sä̧ 'cuäopönä tti̧rȩjä̧ jö̧nä̧tä̧. ⁵ Ja̧'hua̧nö̧ ja̧'a̧ttö̧ ucu cui̧tti̧mö̧ ta̧ju̧, Egipto rȩjȩttö̧ ttö Egiptära̧'a̧ chichäcua'a ä'canä uhuäpächinä̧tö̧mä̧ ttötä chi̧tti̧mä̧ ja̧'a̧. Efráin'inä, Manasés'inä ttötä chi̧tti̧ ja̧'a̧, Ruben jö̧ta'anö juhua'atäcu Simeón jö̧ta'anö. ⁶ Jahuätö tto'comenä ichätötä jä̧cua̧'a̧ cui̧tti̧mö̧ ttäcuotömä; jahuätömä tti̧rȩjä̧mä̧ ttu̧bö̧o̧tö̧ tti̧mi̧nä̧tä̧ iyähuäcuotö. ⁷ Ja̧'hua̧nö̧ ja̧'a̧nä̧ ttömä, Padánttö chichomenä, ttörö barahuinö̧mä̧, Canaán rȩjȩ mänättö̧ Raquelmä 'corujuo'ächinju̧, ji̧nä̧ Efratara̧'a̧ tti̧rȩbȩhui̧a̧'a̧ pä'ömä ji̧nä̧ otottö. Ttömä ju̧huȩnȩtä̧ Efrata mä̧nä̧ jäyä rȩ'ä̧dö̧ chicuinä̧cua̧." (Ju̧huȩnȩmä̧ Belén ja̧'a̧). ⁸ Israel José i̧tti̧mö̧rö̧ topömä, ja̧u̧rö̧ pä'inö: ¿Pitö titö juo'otöttö? ⁹ Josémä jä'orö pä'inö: Jahuätömä ttö chi̧tti̧mö̧, Dios porö iyinä̧u̧. "Israelmä pä'inö: Pocu jahuätörö i'cächipi, ttö adiunä jö̧ chiyatö." ¹⁰ Ja̧'hua̧nö̧ ja̧'a̧ Israel i'äriyämä toö juiyönä pä̧i̧pä̧ri̧nä̧cu̧ bö̧o̧sa̧ juoächa'amä, ja̧'hua̧nö̧ toö juiyönä ji̧nä̧cu̧. Ja̧'hua̧nö̧ ji̧yä̧cu̧ José tö'cönä̧nö̧ i'cächi pinö, ja̧'hua̧nö̧ ja̧'a̧ jahuätörö 'chu̧'o̧pö̧mä̧ huahuädi'inä̧u̧. ¹¹ Israelmä̧ Josérö pä'inö̧: Ttömä̧ yorö'iso ucu cui'ämä̧ pä'äjita'anömä̧ topöcösä̧cö̧ pä'ä'ijösä, ja̧'hua̧nö̧ ja̧'hua̧nö̧ ja̧'a̧nä̧ Diosmä̧ cui̧tti̧mö̧rö̧'inä tochönä̧ jȩi̧nä̧cu̧sä̧. ¹² Josémä̧ ppo̧'ä̧tö̧rö̧ Israel ihue'quiyu 'cä̧tȩ jo̧mȩttö̧ ȩmo̧po̧'i̧nö̧ ja̧'hua̧nö̧ jȩpö̧ ja̧u̧mä̧ i'ämä rȩjȩ jubö meä̧huä̧chö̧nä̧ ja̧rȩyu̧ pä'i'inö̧. ¹³ Josémä̧ ta̧ju̧cuäyotörö ȩmo̧po̧'ö̧, Efraín umö̧ u̧huo̧jua̧'a̧cu̧nä̧ ja̧'a̧nä̧, Israeltä u'ohucunä̧ ji̧na̧'a̧, ja̧'hua̧ta̧'a̧nö̧ Manasémä̧ u'ohuecu ja̧'a̧nä̧ Israeltä u̧huo̧jua̧'a̧cu̧nä̧ ji̧na̧'a̧, ja̧'hua̧nö̧ ja̧'a̧ jahuätörömä̧ ja̧u̧ ö̧jo̧me tö'cöcu ȩpi̧nä̧u̧. ¹⁴ Israelmä̧ u̧huo̧jua̧'a̧cu̧nä̧ i̧sä̧mö̧ te'ädinö̧ ja̧'hua̧nö̧ jȩpö̧ Efraín unä mȩ'inö̧ ö̧jä̧hua̧rö̧ ja̧'a̧nä̧, ja̧'hua̧ta̧'a̧nö̧ umö̧ u'ohuecunä̧mä̧ Manasés unä mȩ'i̧nö̧. Ja̧u̧mä̧ u̧mö̧pi̧yä̧ bi'cätö mȩ'i̧nö̧, Manasésmä̧ ä̧cuo̧menä̧ i̧sa̧rö̧ ji̧yä̧cu̧. ¹⁵ Israelmä̧ Josérö adiunä̧ jö̧ iyö kä̧nö̧mä̧ pä'inö̧: Chä̧do̧ minä̧ Abraham'inä̧, chä'o minä̧ Isaac'inä̧ ä'ca jo̧mȩnä̧ cuettächinä̧cu̧ Diomä̧, ja̧u̧ Diostä ja̧'a̧ jitä mo̧ro̧ jubö päi'önä̧ ttörö to̧pä̧rö̧ tta̧'a̧rä̧'i̧jö̧mä̧. ¹⁶ Ángel ttörö surjuoepa päö surojueö juiyönä̧ tta̧'a̧rä̧'i̧jö̧mä̧, ja̧u̧tä̧ adiunä̧ jö̧ iyätö pitö ppo̧'ä̧tö̧rö̧mä̧. Chimimä̧ jahuätönä̧'inä̧ ttunuchi'ö juiyajä̧ ja̧'hua̧ta̧'a̧nö̧ chä̧do̧ minä̧ Abraham imi'inä̧, chä'o minä̧ Isaac imi'inä̧. Jahuätömä̧ pi̧jä̧ttö̧mä̧ recuätö juottächönä̧ yottähui'a pä'ö ja̧'a̧. ¹⁷ José ö'cö juiyönä topinö jä'o u̧huä̧jua̧'a̧nä u̧mu̧nä̧ Efraín ú juttä mȩa̧'a̧ to'omenä, ja̧u̧mä̧ jä'o u̧mu̧ 'chu'ädö pporädinö Efraín uttu Manasés unä u̧huä̧nä̧ pä'ö. ¹⁸ Josemä pä'inö jä'orö: "Chä'o ja̧hua̧nö̧mä̧cö; Pide ja̧'a̧ ä̧cuo̧mȩnä̧ cui̧tti̧mä̧. Cu̧mu̧ cu̧huo̧jua̧'a̧nä̧ i̧sä̧mu̧ piderö mȩ'i̧." ¹⁹ Ja̧'hua̧nö̧ä̧ ja̧'a̧nä̧ jä'omä kö'cö jui'ö pa'inö: "Ttömä huo̧hua̧sä̧, chi̧tti̧, huo̧jua̧sä̧. Ja̧u̧'i̧nä̧ ahuartuhuä ttirecuächönä ö̧jä̧cua̧, ja̧u̧'i̧nä̧ ucuounä ä̧jä̧cua̧. Ja̧'hua̧nö̧ ja̧'a̧nä̧, cui̧jä̧hua̧mä̧ ja̧u̧ttu̧'i̧nä̧ abonänö ucuounä ö̧jä̧cua̧, Ja̧'hua̧nö̧ ja̧'a̧ttö̧ ahuaruhuä o'cotömä pi̧jä̧ o'cajuiyönä yottähuächäcuotö." ²⁰ Ja̧u̧nu̧ mo̧ro̧tä̧ Israél jahuätörö adiunä ja̧ pä'ö ucuocuinö pa̧'a̧nö̧ pä'ö: "Israél ttö̧ja̧mä̧ ucutu cuimitu̧cu̧nä̧ adihua pä'ö pa̧'a̧nö̧ pättäcuotö: Diostä jȩä̧cua̧ Efraínrö̧'i̧nä̧ ja̧'hua̧ta̧'a̧nö̧ Manasérö jȩi̧nö̧ta̧'a̧nö̧." Pa̧'a̧nö̧tä̧ pa'inö, Israélmä Efraínrö̧mä̧ Manasés ä'cattömä. ²¹ Israél pä'inö Josérö: "Topí, ttömä tä'cö 'corujuodächa'anötä̧ ja̧'a̧, ja̧'hua̧nö̧ ja̧'a̧nä̧ Diosmä ucutucu ö̧jä̧cua̧, Ja̧'hua̧ta̧'a̧nö̧ pä'äjita'anö cuä̧'o̧tu̧cu̧ tti̧rȩjä̧ ra̧'a̧cu̧ i'chächäcuotöjä. ²² Ucuru'inä, cuahuaruhuättö'inä abonänö chiyäcujä, chiyäcujä muä'quiyu de'a jo̧mȩ amorreorö chucurä'chunä ja̧'hua̧ta̧'a̧nö̧ chu'popobunä rohuäu 'chodipinome."