¹ Ja̧'hua̧nö̧ ja̧'a̧ttö̧ Israel öäre o'ca juiyönä ȩpö̧ rä'opinödo. Ja̧'hua̧nö̧ ja̧'a̧ Beerseba ötahuiyä jubö rȩbȩhui̧nö̧do. Juhuorö jä'o Isaac Ö̧ä̧nä̧hua̧ Diosrö ku icu iyähuä jȩpö̧ iyinödo. ² Ja̧'hua̧nö̧ ja̧'a̧ Israelrö yodo u̧'cuo̧ti̧nä̧ ucuocuinäcudo Tö̧ä̧nä̧hua̧ Dios. Päinäcudo: ―Jacob, Jacob―. Jacob ädätinödo: ―Pȩnȩtä̧ kö̧sä̧―. ³ Ja̧'hua̧nö̧ ja̧'a̧ pä'inödo: ―Ttötäsä Cu̧huä̧nä̧hua̧ Dios, cuä'omi̧nä̧ Ö̧ä̧nä̧hua̧ Diosmä. Egipto rȩjȩra̧'a̧ cui̧'cha̧ pä'ömä yecuhuecuä'. Juhuorötä jȩchä̧cua̧sä̧ ucuttu isotö recuätö ttirecuächönä. ⁴ Ucutäcu chi̧'chä̧cua̧sä̧ Egipto rȩjȩra̧'a̧. Ja̧'hua̧ta̧nö̧ juhua'attö ucuru pocu chi̧'cä̧chä̧cua̧sä̧ pä'äji ta'anö. Josétä cui'äre mö̧'ȩpö̧ tta̧huä̧rä̧cua̧jä̧ cuami yuppa jubö huächi'omemä―. ⁵ Ja̧'hua̧nö̧ ja̧'a̧ Jacob Beersebattö rä'opinödo. Israel i̧tti̧mö̧mä̧ ttä'o Jacobrö'inä, tti̧tti̧mö̧rö̧'i̧nä̧, tti̧tti̧mö̧ tta̧ju̧tu̧ru̧'i̧nä̧ ȩpi̧nä̧tö̧do caruquiyänä, Egipto rȩjȩ ru̧hua̧ ttä'orö ttȩpa̧ pä'ö hueäji ocä caruquiyänä. ⁶ Jahuätö ttöäre'inä, ttä̧ji̧mö̧rö̧'i̧nä̧, Canaán rȩjȩttö̧ ttȩmi̧nö̧mä̧ ȩpö̧, Egipto rȩjȩra̧'a̧cu̧ ichinätödo, Jacob'inä i̧tti̧mö̧'i̧nä̧, i̧tti̧mö̧ tti̧tti̧mö̧'i̧nä̧. ⁷ Jacobmä i̧tti̧mö̧ u̧mä̧tö̧rö̧'i̧nä̧, i̧tti̧mö̧ tti̧tti̧mö̧ u̧mä̧tö̧rö̧'i̧nä̧, i̧tti̧mö̧ nä̧tö̧rö̧'i̧nä̧, i̧tti̧mö̧ tti̧tti̧mö̧ nä̧tö̧rö̧'i̧nä̧, ahuaruhuä o'ca toi'önä̧rö̧ ȩpi̧nö̧do Egipto rȩjȩra̧'a̧. ⁸ Pitö ji̧na̧'a̧ Israel i̧tti̧mö̧ Egipto rȩjȩra̧'a̧ rȩbȩhui̧nä̧tö̧mä̧, Jacob i̧tti̧mö̧mä̧: Rubenmä Jacob i̧tti̧ ä̧cuo̧mȩnä̧ i̧sa̧ ji̧na̧'a̧; ⁹ Ruben i̧tti̧mö̧mä̧: Hanoc'inä, Falú'inä, Hezrón'inä, Carmi'inä ji̧na̧'a̧. ¹⁰ Simeón i̧tti̧mö̧mä̧: Jemuel'inä, Jamín'inä, Ohad'inä, Jaquín'inä, Zohar'inä, ja̧'hua̧ta̧'a̧nö̧ Saúlmä̧ canaán ttö̧ja̧ isaju ki̧tti̧ ji̧na̧'a̧. ¹¹ Leví i̧tti̧mö̧mä̧: Gersón'inä, Coat'inä Merari'inä ji̧na̧'a̧. ¹² Judá i̧tti̧mö̧mä̧: Er'inä, Onán'inä, Sela'inä, Fares'inä, Zara'inä ji̧na̧'a̧ (Ja̧'hua̧nö̧ ja̧'a̧nä̧ Er'inä ja̧'hua̧ta̧'a̧nö̧ Onán'inä canaán rȩjȩttö̧tä̧ 'corujuo'ächinä̧tö̧) Fares i̧tti̧mö̧mä̧: Hezrón ja̧'a̧hua̧ta̧'a̧nö̧ Hamul. ¹³ Isacar i̧tti̧mö̧mä̧: Tola'inä, Fúa'inä, Job'inä, Simrón'inä ji̧na̧'a̧. ¹⁴ Zabulón i̧tti̧mö̧mä̧: Sered'inä, Elón'inä, Jahleel'inä ji̧na̧'a̧. ¹⁵ Pitö ji̧na̧'a̧ Lea ki̧tti̧mö̧mä̧ Padán Aramttö̧ Jacobrö uhuäbecu ki̧yi̧nö̧u̧mä̧, kittijumä Dina pä'ö micuinä̧ju̧. Ki̧tti̧mö̧ u̧mä̧tö̧, nä̧tö̧'inä o'catoi'önä̧mä̧ treinta tres jo̧mȩnä̧ ji̧na̧'a̧. ¹⁶ Gad i̧tti̧mu̧mä̧ jinä'a̧ Zifión, Haqui, Suni, Ezbón, Eri, Arodi ja̧hua̧ta̧nö̧ Areli'inä. ¹⁷ Aser i̧tti̧mu̧mä̧ jinä'a̧: Imna, Isúa ja̧'hua̧ta̧nö̧ Sera kijäcuajucu. Bería i̧tti̧mu̧mä̧ ji̧na̧'a̧ Heber ja̧'hua̧ta̧nö̧ Malquiel'inä. ¹⁸ Pitö jina'a̧ Zilpa ki̧tti̧mu̧mä̧, Labán ittijuru Leal'rö i̧yi̧nä̧u̧mä̧. Pitö ki̧tti̧mu̧mä̧ diciseisnö huotömä Jacob'rö ucuäbecu ki̧yi̧nä̧u̧. ¹⁹ Raquel Jacob irecua ki̧tti̧mu̧mä̧ pitö ji̧na̧'a̧, José'inä ja̧'hua̧ta̧nö̧ Benjamín'inä. ²⁰ Egiptottömä , Manasés'inä ja̧'hua̧ta̧nö̧ Efranín'inä uhuäpächinä̧ttö̧ ja̧'hua̧nö̧ ja̧'a̧ josé irecua pä'inä ji̧na̧'a̧ Asenat'mä Portifera ittiju Onttö̧ sacerdote hua̧. ²¹ Benjamín i̧tti̧mu̧mä̧ pitö ji̧na̧'a̧ Bela, Bequer, Asbel, Gera, Naamán, Ehi, Ros, Mupin, Hupin, Ja̧'hua̧ta̧nö̧ Ard'inä. ²² Pitö ji̧na̧'a̧ Raquel Jacobttö ki̧tti̧mu̧mä̧, cartocenö huottö. ²³ Dam i̧tti̧mä̧ ji̧na̧'a̧ Husim. ²⁴ Neftalí i̧tti̧mu̧mä̧ ji̧na̧'a̧ Jahzeel'inä, Guni'inä, Jezer'inä ja̧'hua̧ta̧'a̧nö̧ Silem'inä. ²⁵ Pitö ji̧na̧'a̧ Jacob i̧tti̧mö̧ uhuäpächinätö̧ Bilhattö, Laban Raquel kumuhuäyaju päi'önä iyinäcuattömä, ki̧tti̧mö̧ o'catoi'önämä ji̧na̧'a̧ ji̧mu̧tȩ ta'arenö. ²⁶ Pitö o'catoi'önä Jacobcu Egiptora̧'a̧ 'chi̧nä̧tö̧mä̧, chutä ahuaruhuätä ji̧na̧'a̧, pa̧ja̧cuä̧ juiyönä Jacob i̧tti̧mö̧ tti̧rȩcua̧mö̧rö̧; sesenta y siesnö ji̧na̧'a̧ o'catoi'önämä. ²⁷ José i̧tti̧mu̧ tta̧ju̧cu̧ Egiptottö uhuäpächinätu̧cu̧mä̧, ahuaruhuä Egiptora̧'a̧ 'chi̧nä̧tö̧mä̧ setentanö ji̧na̧'a̧ o'catoi'önämä. ²⁸ Ja̧'hua̧nö̧ ja̧'a̧ Jacobmä i̧tti̧ Judárö ä'canä hue'inödo Gosénra̧'a̧ todehuä̧mä̧ mä̧nä̧mä̧ ¿ti̧mä̧ttö̧? pä'ö Josérö jä'epö ä̧ju̧cua̧ pä'ö. Ja̧'hua̧nö̧ ja̧'a̧ Gosén rȩjȩra̧'a̧ rȩbȩhui̧nä̧tö̧do. ²⁹ José öäre carucä jo̧mȩ päi'önä jȩtta̧ pä'ö hue'äji'ca̧, Gosén rȩjȩra̧'a̧ 'chi̧nö̧do, jä'o Israelrö esehua pä'ö. Jä'orö toomenä, hua'adi'ö recuonänö ajuäunu esehuinödo. ³⁰ Israel Josérö pä'inödo: ―Täcö ucuru tocha'attö, 'corupädi'öttömä huäinä jä̧cua̧'a̧. ³¹ José päinö u̧bu̧o̧nö̧rö̧'i̧nä̧ ahuaruhuärö'inä jäorö'inä: ttö jidähuo ä̧cua̧sä̧ faraónrö: ttö chubuonö chahuaruhuä'inä chäo'inä, Canaán rȩjȩnä̧ ki̧nä̧tö̧mä̧ täcu rȩbȩhuä̧tö̧ ttö chö̧jo̧mȩ. ³² U̧mä̧tö̧mä̧ oveja̧tö̧rö̧ ttä̧huä̧rä̧cuä̧huä̧ ttö̧ja̧, ja̧'hua̧ta̧'a̧nö̧ pä̧cä̧yö̧rö̧'i̧nä̧ ttä̧a̧rä̧tö̧. jahuätö i'cächäjätö ttä̧ji̧mu̧rö̧, ja̧'hua̧ta̧'a̧nö̧ o'cajuiyönä ttö̧ju̧nä̧rö̧mä̧. ³³ Faraón ä̧tȩpi̧'ca̧ jäeputtömä: ¿däjé cuaditätucuättö̧ päöttömä? ³⁴ ucutu cuädä tätucuaröjá: täbocu ti̧tä̧mu̧mi̧nä̧ ji̧nö̧ta̧'a̧nö̧ muä̧yotö tö̧jo̧mȩnä̧'i̧nä̧ jitä'inä ihueye pä̧cä̧yö̧rö̧ adicuä ttö̧ja̧jä̧. Ja̧'hua̧nö̧ ja̧'a̧ttö̧ jua̧nö̧tä̧ aditö kä̧tu̧cui̧ Gosén rȩjȩnä̧, Egipto ttö̧ja̧'i̧nä̧ oveja̧tö̧rö̧ tta̧'a̧rö̧ ttö̧huo̧jui̧ ä̧cua̧'a̧nö̧.