¹ Ja̧'hua̧nö̧ ja̧'a̧ Josémä ä'ca jo̧mȩ ka̧cuä̧tö̧ ttä'ca jo̧mȩttö̧ ami 'qui'ächi'ö juiyönä a̧'u̧ rö̧jä̧chi̧'inä̧cu̧do. Huopinödo: ―O'ca toi'önä ttö chä'ca jo̧mȩttö̧ rättopächa hue'itö―. Ja̧'hua̧nö̧ ja̧'a̧ttö̧ ya̧tȩ'i̧nä̧ Josécu ko̧cö̧ pinödo, u̧bö̧o̧tö̧ ttu̧huo̧jua̧rö̧ pä'ö jiähuomenä. ² Pä̧i̧cu̧nä̧ ajuähua'attö, Egipto rȩjȩ ttö̧ja̧'i̧nä̧ ä̧ju̧cui̧nä̧tö̧do. Egipto rȩjȩ ru̧hua̧ ahuaruhuä'inä ä̧ju̧cui̧nä̧tö̧do. ³ Ja̧'hua̧nö̧ ja̧'a̧ José u̧bö̧o̧tö̧rö̧ pä'inödo: ―Ttötäsä Josémä. ¿Ji̧nä̧ kö̧ chä'omä?― Ja̧'hua̧nö̧ ja̧'a̧nä̧ u̧bö̧o̧tö̧ ttä̧ju̧cuo̧mȩnä̧, ja̧u̧ru̧ yettecua'attö, ädätocotö pinätödo. ⁴ Josémä u̧bö̧o̧tö̧rö̧ pä'inödo: ―Ttörö tö'cönänö ichi'ätucui―. Ja̧'hua̧nö̧ päomenä, tö'cönänö 'chä̧hui̧'i̧nä̧tö̧do. José pä'inödo: ―Ttötäsä cu̧jä̧hua̧tu̧cu̧ Josémä. Egipto rȩjȩra̧'a̧ iyö cuicuinätucuäcumä ttötäsä. ⁵ Jitämä cua̧'cua̧ tta̧cu̧huȩcuä̧tu̧cuä̧'. Jitämä cu̧ra̧huä̧rä̧cuä̧huä̧tu̧cuä̧' pocu ttörö pärätänä iyö cuicuinätucua'attö. Tö̧ä̧nä̧hua̧ Diostä ucutu cuä'catucunä hueinäcusä cua̧'cua̧rö̧ cu̧ji̧pä̧tu̧cuä̧cua̧'a̧nö̧. ⁶ Täcö todäre a̧'ȩ 'cuäopina'a ppäi ttuähuämä Egipto rȩjȩttö̧. Ji̧nä̧ ji̧mö̧tȩ a̧'ȩ jä̧cua̧'a̧ ku̧nä̧huä̧nä̧'i̧nä̧, trigo tirähuänä'inä juiyönämä. ⁷ Ja̧'hua̧ta̧nö̧ Tö̧ä̧nä̧hua̧ Diostä ucutu cuä'catucunä hueinäcusä cua̧'cua̧rö̧ cu̧ji̧pä̧tu̧cuä̧cua̧'a̧nö̧, ucutu cuahuaruhuä'inä ttirecuächäcua'anö. ⁸ Ja̧'hua̧nö̧ ja̧'a̧ttö̧ ucutumä huecuhuätucuococu pinösä pocu chicha pä'ömä. Tö̧ä̧nä̧hua̧ Diostä hueinäcusä. Tö̧ä̧nä̧hua̧ Diosmä jȩi̧nä̧cu̧sä̧ Egipto rȩjȩ ru̧hua̧ jä'o jä̧'i̧nö̧'a̧nö̧. Ja̧'hua̧ta̧nö̧ ja̧u̧tä̧ ahuaruhuä ttu̧ru̧hua̧'i̧nä̧, Egipto rȩjȩ ttö̧ja̧ ttu̧ru̧hua̧'i̧nä̧ päi'önä chö̧ja̧ pä'ö hueinäcusä. ⁹ Chä'orö jurunä ji'ähuäjätucui. Ja̧u̧ru̧ päcuhuätucuaja: “Ja̧'hua̧nö̧ pä'äji cui̧tti̧ Josémä pä'ö. Tö̧ä̧nä̧hua̧ Dios hueinäcusä Egipto rȩjȩnä̧ ru̧hua̧ chö̧ja̧ pä'ö. Recuomä toepo. Jurunä ttö chö̧ja̧'a̧cu̧ cuichätucuaja. ¹⁰ Gosén rȩjȩnä̧ cu̧ja̧cuä̧cuo̧tö̧jä̧, ttö chö̧jo̧mȩttö̧ tö'cö, ucutu'inä, cui̧tti̧mö̧'i̧nä̧, cui̧tti̧mö̧ tti̧tti̧mö̧'i̧nä̧, cuä̧ji̧mö̧ o̧vȩja̧stö̧'i̧nä̧, pä̧cä̧yö̧'i̧nä̧, o'ca juiyönä cu̧ju̧nä̧rä̧tu̧cu̧mä̧. ¹¹ Ju̧huȩnȩtä̧ cu̧jä̧tu̧cuo̧mȩnä̧, ttötä cu̧cuȩtu̧cu̧ chi̧yä̧cua̧sä̧, ji̧nä̧ ji̧mö̧tȩ a̧'ȩ ppäi 'cuäopä̧cuȩmä̧ ka̧'a̧ttö̧. Ja̧'hua̧nö̧ jȩchä̧cua̧sä̧ usurä isotö juocuhuätucu juiyäcua'anö, cu̧ju̧nä̧rä̧tu̧cu̧'i̧nä̧ tocuhuepo'ächätucu juiyäcua'anö”. ¹² Ucutu cu'äretucunä topätöjä, chö̧jä̧hua̧ Benjamín'inä ö'ärenä topö, ttötä chamonä chänä chucuocua'amä. ¹³ Ja̧'hua̧nö̧ ja̧'a̧ttö̧ chä'orö jicuhuähuätucu'a̧nö̧ ja̧'a̧ o'ca juiyönä tocu'äjätucumä Egipto rȩjȩnä̧ kä̧nö̧ ttö̧ja̧ ttucuotönä chöadihuä'inä. Ja̧'hua̧nö̧ ja̧'a̧ttö̧ chä'orö jurunä pocu cui'cächätucu'a̧nö̧ ja̧'a̧―. ¹⁴ Jo̧'ú̧ Benjanmínrö̧ uupi'canä huaadiö ajahuinö ja̧'hua̧ta̧'a̧nö̧ Benjanmin'i̧nä̧ uupi'canä huaadiö ajahuinö. ¹⁵ Ajahuinö jahuäturö ja̧'hua̧ta̧'a̧nö̧ 'chuo̧pi̧nö̧ o'catoinärö̧ u̧bu̧o̧tö̧rö̧. Juo̧nö̧ o'caa, ahuaruhuäcu ucuocuinö. ¹⁶ Huo̧juä̧chi̧'i̧nä̧tö̧ Faraón ojusodenä̧ aditätö'inä: José ahuaruhuä'inä rȩbȩhuä̧tö̧ pä'ö. Ja̧'hua̧nö̧ ja̧'a̧ttö̧ Faraón ri̧ȩnä̧ esehuinö ja̧'hua̧ta̧'a̧nö̧ hue'ö adicuä ttö̧ja̧'i̧nä̧. ¹⁷ Faraón päinäcu̧ Josérö: Jiähui ucú cuahuaruhuärö: pi̧yȩ jȩtta̧: ttä̧ji̧mu̧rö̧ huȩni̧pu̧ ppa̧ttä̧cha̧ Canaán rȩjȩra̧'a̧. ¹⁸ Ja̧'hua̧nö̧ ja̧'a̧ttö̧ cuäorö'inä ahuaruhuärö'inä po tticha ttȩmä̧ja̧ ttö chö̧jo̧mȩ. Ttö chiyäcuotöjä Egipto rȩjȩttö̧ adihuome ucuturu ja̧'hua̧nö̧ ja̧'a̧ttö̧ juorö iyö́ cucuäcuotöjä. ¹⁹ Ja̧'hua̧nö̧ ja̧'a̧ ucumä hue'ö ku̧nu̧jä̧: Pi̧yȩ jȩpi̧, carucätta ȩmo̧po̧'ö̧ Egipto rȩjȩ u̧mi̧cu̧ rä'epi cui̧tti̧mö̧rö̧'inä, cui̧rȩcua̧mö̧rö̧'i̧nä cui'cächa. Cuä'orö'inä o'ipö ichi. ²⁰ Cui̧rȩjä̧ jä̧cuä̧jä̧mä̧ cua̧'cua̧ rocuecuä, Egipto rȩjȩ a̧di̧huä̧jä̧mä̧ ucutu cui̧rȩjä̧ jä̧cuä̧jä̧. ²¹ Israel i̧tti̧mö̧mä̧ ja̧'hua̧nö̧tä̧ jȩpi̧nä̧tö̧, Josémä Faraón hueäjita'anö carucätta ȩmo̧po̧'ö̧ iyinö ja̧'hua̧ta̧'a̧nö̧ mä̧nä̧nä̧ 'chä̧nö̧ ttu̧cuä̧cuȩ'inä iyinö. ²² Jahuätö o'catoi'önä̧rö̧ ttö̧'ca̧tä̧huä̧ti̧yu̧ ttö'ärohuäcua'a'inä iyinä̧u̧, ja̧'hua̧nö̧ ja̧'a̧nä̧ Benjaminrö̧mä̧ platamä trescientonö jo̧mȩnä̧ ja̧'hua̧ta̧'a̧nö̧ ö̧'ca̧tä̧huä̧ti̧yu̧mä̧ cinconö o̧ta̧ jo̧mȩnä̧ ö̧'ä̧ro̧huä̧cuȩmä̧. ²³ Jä'orömä pi̧yȩ hue'inö: Egiptottö adihuäjuäi ȩpä̧tö̧ bö̧rö̧ba̧tö̧rö̧mä̧ dieznö huotörö ja̧'hua̧ta̧'a̧nö̧ diez huotö mulatö̧ u̧huä̧ju̧ ote'inä, pan'inä ja̧'hua̧ta̧'a̧nö̧ koro mä̧nä̧nä̧ 'chä̧nö̧ kä̧nö̧ ttu̧cuä̧cuȩ'inä. ²⁴ Ja̧'hua̧nö̧ ja̧'a̧ uböotö̧ hue'ö i̧cuä̧u̧mä̧ i̧hui̧nä̧tö̧ jahuätömä. Ja̧u̧mä̧ jähuätörö pä'inö: "Topätucuittö̧ mä̧nä̧nä̧ 'chä̧nö̧ kä̧nö̧mä̧ curohuähuätucuó. ²⁵ Ja̧'hua̧nö̧ ja̧'a̧ Egipto rȩjȩttö̧ rä'opö, ttä'o Jacob ö̧jo̧mȩ Canaán rȩjȩra̧'a̧ 'chä̧hui̧'i̧nä̧tö̧do. ²⁶ Ja̧'hua̧nö̧ ja̧'a̧ ttä'orö ji'ähuinätödo: ―Josémä ji̧nä̧ kä̧ji̧. Egipto rȩjȩnä̧ ru̧hua̧ päi'önä kä̧ji̧ yorö'iso. Ttä'o jahuätörömä yorö'isotä esetocö pinödo. ²⁷ O'ca juiyönä José jiähuäjimä, ttä'orö ji'ähuinätödo. Ja̧u̧ huȩnȩ ä̧ju̧cuo̧mȩnä̧, caruquiyä José jä'o Jacobrö tti'cächa pä'ö hueäji ocä toomenä, ttä'o Jacob esehuächi'inödo. ²⁸ Ja̧'hua̧nö̧ ja̧'a̧ Israel pä'inödo: ―Ye täcö adihua'a. Chi̧tti̧ Josémä ji̧nä̧ ö̧ji̧yä̧cu̧sä̧. Tochäjä̧cua̧sä̧ 'corupädi'äcua'a ä'canänö― pä'inödo Israelmä.