¹ Ja̧u̧nu̧ o'ca'a Josémä ojusodenä aditätö ttu̧ru̧hua̧rö̧ hue'inödo: ―Jahuätö ttösacu oyu jacuä ttu̧cuȩ cuȩna̧ja̧, o'ca juiyönä ttȩpö̧'a̧nö̧ jö̧mä̧. Ja̧'hua̧ta̧nö̧ ya̧tȩ pö̧nä̧ öäre pärätä cuȩna̧ja̧ ösacuyu ä'ca. ² Ttö chahuo̧'ta̧, pärätättö adicuo̧'ta̧ röji ru̧hua̧ ösacuyu ä'ca cuȩna̧ja̧, öäre pärätä trigodu imitäji'inä―. José ojusodenä aditätö ttu̧ru̧hua̧ José hueäji ta'anö jȩpi̧nö̧do. ³ Mo̧ro̧ päi'a'a hueinä̧u̧do José u̧bö̧o̧tö̧ tti̧'cha̧ pä'ö ttä̧ji̧mö̧ burrostö̧cu̧. ⁴ Ötahuiyättö rä'opächö, ji̧nä̧ oto pätti'oca'a tti̧'cha̧'a̧nä̧, Josémä ojusodenä aditätö ttu̧ru̧hua̧rö̧ pä'inödo: ―Ä̧rä̧mi̧'ö̧ jahuätö tto'ca'anä täi. Cui̧rȩbȩhui̧'o̧mȩnä̧, pa̧'a̧nö̧ päcuhuaja: ¿Dä̧bö̧ pärätättö adicuo̧'ta̧ cu̧nä̧u̧cuä̧jä̧tu̧cuä̧ttö̧? ⁵ Ju̧huo̧'ta̧mä̧ auä'ijö chu̧ru̧hua̧mä̧. Chu̧ru̧hua̧mä̧ ju̧huo̧'ta̧ yä̧huä̧i̧nä̧ jä̧ji̧mä̧ u̧huo̧juä̧cua̧. Ja̧'hua̧nö̧ jȩcu̧'ä̧tu̧cua̧'a̧ttö̧, suronä jȩpä̧jä̧tö̧jä̧, päcuhuatöja― pä'inödo José. ⁶ Ja̧'hua̧nö̧ ja̧'a̧ José ojusodenä aditätö ttu̧ru̧hua̧mä̧ jahuätö u̧mä̧tö̧rö̧ rȩbȩhui̧pö̧, José hueäjimä pä'inödo. ⁷ Jahuätö ädätinätödo: ―¿Dä̧bö̧ ja̧'hua̧nö̧ päcuhua'attö, chu̧ru̧hua̧? Ujutumä ja̧'hua̧nö̧ jȩpo̧co̧tö̧ päjätöjä yorö'isotä. ⁸ Topi. Pärätä tösacu oyu ä'cattö tö̧'o̧cui̧'i̧nö̧mä̧ Canaán rȩjȩra̧'a̧ttö̧ pä'äji ta'anö i'cächö, ucuru iyäjätöjä. ¿Tta̧'a̧nö̧ pä'ö tö̧nä̧u̧cua̧ttö̧ oro'inä, pärätä'inä cu̧ru̧hua̧ ojusodettömä? ⁹ Ujututtu ya̧tȩ u̧ju̧nä̧ra̧'a̧ cu̧'o̧cui̧'ö̧ttö̧mä̧, huäinä 'corupäi'ä̧cua̧. Ja̧'hua̧nö̧ ja̧'a̧nä̧ ujutumä, chu̧ru̧hua̧, ucu cumöhuäyotö päi'önä tö̧ja̧cuä̧cuo̧tö̧jä̧―. ¹⁰ Ja̧'hua̧nö̧ pättomenä, José ojusodenä aditätö ttu̧ru̧hua̧ pä'inödo: ―Ucutu päcuhuäjätucu ta'anö jä̧cua̧'a̧. Ahuo̧'ta̧ ku̧nä̧rö̧mä̧ ttö chu̧mö̧huä̧ya̧ päi'önä ö̧jä̧cua̧. Korotömä adiunätä ttö̧ja̧cui̧'ä̧cuo̧tö̧―. ¹¹ Ya̧tȩ pö̧nä̧ ttusacu oyu jurunä rȩjȩcu̧ mȩyȩdi̧nä̧tö̧do. Ya̧tȩ pö̧nä̧ ttusacu oyu ejädinätödo. ¹² Ä'canä ru̧hua̧ ösacuyuttö kä̧mä̧dö̧ usinödo, röji ru̧hua̧ ösacuyura̧'a̧ cä'ädö. Benjamín ösacuyu jacuättö po̧cui̧pi̧nö̧do ahuo̧'ta̧. ¹³ Ja̧'hua̧nö̧ ja̧'a̧ttö̧ o'ca toi'önä tta̧'cua̧ juiyächi'ä̧u̧ ttö̧'ca̧tä̧huä̧ti̧yu̧ sȩro̧cu̧ icuinätödo. Ya̧tȩ pö̧nä̧ ttusacu oyu ttä̧ji̧mö̧ burrotö̧nä̧ cä'epö huȩnö̧, pä'äji ta'anö ötahuiyära̧'a̧cu̧ ppa̧'ä̧chi̧nä̧tö̧do. ¹⁴ Judá'inä, u̧bö̧o̧tö̧'i̧nä̧, ö̧jä̧hua̧tö̧'i̧nä̧ José ojusodera̧'a̧ ppa̧ttä̧cho̧mȩnä̧, José ji̧nä̧ ojusodenä pinödo. José ä'ca jo̧mȩ ja̧rȩyu̧nu̧ pä'i'ö tti'ä rȩjȩcu̧ ucuotinätödo. ¹⁵ José jahuätörö pä'inödo: ―¿Däje jä̧ttö̧ pi̧yȩmä̧ ucutu jȩcu̧'ä̧jä̧tu̧cumä̧? ¿Jerupätöjä tä̧ji̧? Ttömä yähuäinä jȩä̧cuä̧huä̧'i̧nä̧ huo̧jua̧sä̧―. ¹⁶ Judá ädätinödo: ―¿Tta̧'a̧nö̧ pätäcua'a jä̧ttö̧ ucuru chu̧ru̧hua̧? ¿Tta̧'a̧nö̧ tädätäcua'a jä̧ttö̧? Suronä jȩpo̧co̧tö̧ päjätöjä pä'ö, ¿tta̧'a̧nö̧ ti̧jȩpä̧cua̧'a̧ jä̧ttö̧? Tö̧ä̧nä̧hua̧ Diosmä suronä jȩtä̧ji̧mä̧ huo̧juä̧ji̧. Jitämä o'ca toi'önä cumöhuäyotö päi'önätä tö̧ja̧cuä̧cuo̧tö̧jä̧, ujutu'inä, cuahuo̧'ta̧ ku̧nä̧rä̧ji̧'i̧nä̧―. ¹⁷ Ja̧'hua̧nö̧ ja̧'a̧nä̧ José pä'inödo: ―Ja̧'hua̧nö̧mä̧ jȩpo̧cö̧sä̧. Chahuo̧'ta̧ ku̧nä̧rä̧ji̧tä̧, ja̧u̧tä̧ chu̧mö̧huä̧ya̧ päi'önä ö̧jä̧cua̧mä̧. Ucutu korotömä adiunätä ppa̧cu̧huä̧chä̧tu̧cu̧'a̧nö̧ ja̧'a̧ cuä'otucu ojusodera̧'a̧―. ¹⁸ Ja̧'hua̧nö̧ ä̧ju̧cuo̧mȩnä̧, Judá Josérö tö'cönänö 'chä̧hui̧'ö̧, ucuotönö Josérö pä'inödo: ―Chu̧ru̧hua̧, ucu cu̧mö̧huä̧ya̧sä̧. Ucuru ji̧'qui̧cha̧nö̧tä̧ chucuocua pä'ösä. Ttörömä cu̧ra̧huä̧rä̧'. Ucu Egipto rȩjȩ ttö̧ja̧ ttu̧ru̧hua̧ jö̧'a̧nö̧ hue'öjä. ¹⁹ Chu̧ru̧hua̧, ujuturu ucu cumöhuäyotörö jä'epinöjä: “¿Cuä'otucuru'inä, cu̧jä̧hua̧tu̧cu̧ru̧'i̧nä̧ ku̧nä̧rä̧tö̧jä̧?” ²⁰ “Tä'o bö̧o̧ i̧sa̧rö̧ ku̧nä̧rä̧tö̧jä̧, ucuru pä'inätöjä, chu̧ru̧hua̧. I̧tti̧ röji ru̧hua̧ ji̧nä̧ mö̧ä̧ya̧, bö̧o̧ i̧sa̧ kä̧nö̧ i̧tti̧ uhuäpächinörö'inä ku̧nä̧rä̧tö̧jä̧. Tö̧jä̧hua̧ u̧bö̧o̧mi̧nä̧mä̧ hua'ö icuina'attö, ja̧u̧tä̧ ka̧tä̧hua̧ kö̧ ja̧ju̧mi̧nä̧ ki̧tti̧mö̧ttö̧. Jä'o juiyo repeäcu” pä'inätöjä. ²¹ Ja̧'hua̧nö̧ pätomenä, “Tocharö cui'cächätucuaröja” pä'inöjä ujuturu cumöhuäyotörö. ²² “Ja̧u̧ mö̧ä̧ya̧mä̧ jä'orö yorö'iso jaropi'ocö. Kara'a i̧'chö̧ttö̧mä̧, jä'o 'corupä'i'anö hua̧,” pä'ö ucuocuinätöjä ucuru, chu̧ru̧hua̧. ²³ Pa̧'a̧nö̧ pä'inöjä ucumä ujuturu: “Cu̧jä̧hua̧tu̧cu̧ ucutucu ichö juiyöttömä, ttörömä ppa̧'ä̧chö̧ tocu'ätucuättö”. ²⁴ Ja̧'hua̧nö̧ ja̧'a̧ tä'orö ti̧rȩbȩhuo̧mȩnä̧, ucu, chu̧ru̧hua̧, cui̧huȩnȩ päcuhuinömä jitähuinäcu. ²⁵ Ja̧'hua̧nö̧ ja̧'a̧ tä'o ujuturu hue'inö: “Pä'äji ta'anö ppa̧'ä̧chö̧ tätucui tu̧cuȩ ji̧'qui̧cha̧nö̧tä̧ mitö 'chä̧nö̧”. ²⁶ Ja̧'hua̧nö̧ ja̧'a̧ tä'orö ädätinätöjä: “Ti̧'chö̧ juiyö'a̧nö̧ ja̧'a̧. Tö̧jä̧hua̧ röji ru̧hua̧ ujutucu ichöttötä, ti̧'chä̧cuo̧tö̧jä̧. Ru̧hua̧rö̧ totö juiyö'a̧nö̧ ja̧'a̧, tö̧jä̧hua̧ ujutucu ichö juiyöttömä”. ²⁷ Ja̧'hua̧nö̧ ja̧'a̧ tä'o ujuturu pä'inö: “Ucutu huo̧juä̧tö̧jä̧ chi̧tti̧mö̧ tta̧ju̧mi̧nä̧ chi̧tti̧mö̧ ta̧ju̧ru̧ kuhuäbecuiniyäcusä. ²⁸ Ya̧tȩmä ttöttö tö'ipächö i̧hui̧nö̧. Ttö pä'inösä iso päi'önä de'a ru̧hua̧ ppo̧ö̧cu̧ jȩpö̧ icuäjiyäcusä a̧'cua̧ra̧'a̧ pä'ö. Ja̧u̧nu̧ o'ca'a ja̧u̧ru̧ yorö'isotä tochococu. ²⁹ Jitä'inä piderö 'chocuhuipätucuomenä, ja̧u̧ru̧'i̧nä̧ surojö 'cuäopö'a̧nö̧ ja̧'a̧. Bö̧o̧ i̧sa̧ cha'attö, a̧'u̧ ttu hua'ö chicua pä'ö ucututä ttörö hue'ö cuicuäcuotöjä,” pä'inö chä'omä― pä'ö ji'ähuinödo Judá Josérö. ³⁰ Juhua'a yabo pä'inödo Judá Josérö: ―Ja̧'hua̧nö̧ ja̧'a̧ttö̧ chu̧ru̧hua̧, ³¹ tä'o ö̧ja̧'a̧ pä'äji ta'anö ppa̧tä̧cho̧mȩnä̧, ja̧u̧ mö̧ä̧ya̧ ujutucu toa'a toomenä, 'corupäi'ö'a̧nö̧ ja̧'a̧. Ujutu tä'o bö̧o̧ i̧sa̧mä̧ a̧'u̧ ttu hua'ö icua pä'ö ujututä hue'ö ticuäcuotöjä. ³² Ttö chä'orö pä'inösä: “Ttötä chö̧jä̧hua̧rö̧ tta̧huä̧rä̧cuä̧huä̧ i̧sa̧ päi'önä chö̧jä̧cua̧sä̧. Ja̧u̧ru̧ ucuru ppa̧dä̧dö̧ juiyöttömä, ucu cuä'ca jo̧mȩttö̧ suronä jȩä̧cuä̧huä̧ i̧sa̧ päi'önä chö̧jä̧cua̧sä̧ 'cuäopönä”. ³³ Ja̧'hua̧nö̧ ja̧'a̧ttö̧ mö̧ä̧ya̧rö̧ cu̧mö̧huä̧ya̧ ja̧ji̧ juäimä, ttörötä hue'i cu̧mö̧huä̧ya̧ päi'önä chö̧ja̧ pä'ö. Mö̧ä̧ya̧rö̧mä̧ u̧bö̧o̧tö̧cu̧ jä'o ö̧ja̧'a̧ i̧'cha̧ hue'irö. ³⁴ Chä'o ö̧ja̧'a̧ 'chi̧'chö̧ttö̧mä̧ ¿tta̧'a̧nö̧ jä̧cua̧'a̧ jä̧ttö̧ mö̧ä̧ya̧ ttöcu ichö juiyöttömä? Ja̧'hua̧nö̧ ja̧'a̧ttö̧ chä'orö surojö 'cuäopa'amä tochö juiyö'a̧nö̧ jä̧cu̧sä̧― pä'inödo Judá Josérö.