¹ Ppäimä rö̧ȩnä̧ ppäi ttu'inätödo Canaán rȩjȩttö̧. ² Egipto rȩjȩra̧'a̧ttö̧ ȩmö̧ tti̧hui̧nö̧ cuähuä ttucui'omenä beipächa'attö, Jacob i̧tti̧mö̧rö̧ pä'inödo: ―Pä'äji ta'anö tätucui. Tu̧cuȩ ji̧'qui̧cha̧nö̧tä̧ ȩmä̧jä̧tu̧cui̧―. ³ Ja̧'hua̧nö̧ ja̧'a̧nä̧ Judá jä'orö pä'inödo: ―Ja̧u̧ ru̧hua̧ pä̧i̧cu̧nä̧ pä'inö: “Ppa̧'ä̧chö̧ tocu'ätucuättö cu̧jä̧hua̧rö̧ cui'cächätucu juiyöttömä,” pä'inö ru̧hua̧mä̧― pä'ö ji'ähuinödo Judá. ⁴ ―Ja̧'hua̧nö̧ ja̧'a̧ttö̧ tö̧jä̧hua̧rö̧ ujutucu huecuttutä, ti̧'chä̧cuo̧tö̧jä̧ tu̧cuȩ ȩmö̧ 'chä̧nö̧. ⁵ Ja̧'hua̧nö̧ ja̧'a̧nä̧ ja̧u̧ru̧ huecu juiyöttömä, 'cho̧co̧tö̧jä̧, “Ttörömä ppa̧'ä̧chö̧ tocu'ätucuättö, cu̧jä̧hua̧rö̧ cui'cächätucu juiyöttömä,” ru̧hua̧ päina'attö― pä'inödo Judá. ⁶ Ja̧'hua̧nö̧ ja̧'a̧ Israel pä'inödo: ―¿Dä̧bö̧ ja̧'hua̧nö̧ ttörö suronä jȩcu̧'i̧nä̧tu̧cua̧'a̧ttö̧ ucutumä? ¿Dä̧bö̧ ru̧hua̧rö̧ jicuhuähuinätucua'attö ji̧nä̧ ka̧ra̧ tö̧jä̧hua̧rö̧ ku̧nä̧rä̧tö̧jä̧ pä'ö?― ⁷ Jahuätö ttä'orö ädätinätödo: ―Ru̧hua̧ pä̧i̧cu̧nä̧ jäepä̧ri̧nä̧u̧jä̧ ujuturu'inä tahuaruhuärö'inä. “¿Cuä'omä ji̧nä̧ kö̧? ¿Ka̧ra̧ cu̧jä̧hua̧tu̧cu̧ru̧'i̧nä̧ ku̧nä̧rä̧tö̧jä̧ pä'ö?” jä̧ȩpä̧ri̧nä̧u̧jä̧. Jerupö ädätinätöjä, cu̧jä̧hua̧tu̧cu̧ru̧ cui'cächätucuaja päiyäcua'acö̧ pä'ö―. ⁸ Ja̧'hua̧ta̧nö̧ Judá jä'o Israelrö pä'inödo: ―Mö̧ä̧ya̧rö̧ hue'ittö ttöcu. Ja̧'hua̧nö̧ jȩcu̧'u̧ttu̧mä̧, ä̧rä̧mi̧'ö̧ ti̧'chä̧cuo̧tö̧jä̧, ji̧nä̧ ta̧'cua̧rä̧cua̧'a̧nö̧ 'corupäti'oca'a, ujutu'inä, ucu'inä, ujutu ti̧tti̧mö̧'i̧nä̧. ⁹ Ttötä ja̧u̧ru̧ tta̧huä̧rä̧cuä̧huä̧ i̧sa̧ päi'önä chö̧jä̧cua̧sä̧. Ja̧u̧ru̧ ji̧'qui̧cha̧nö̧ i̧mi̧cu̧nä̧ 'cuäopöttömä, ttöcu, ucucu'inä ji̧nä̧yo̧mȩtȩ tucuocuäcuotöjä. Ucu cui̧tti̧rö̧ ucuru ppa̧dä̧dö̧ juiyöttömä, ucu cuä'ca jo̧mȩ chi'cächö juiyöttömä, ucu cuä'ca jo̧mȩttö̧ ttötä suronä jȩä̧cuä̧huä̧ i̧sa̧ päi'önä chö̧jä̧cua̧sä̧ o'ca juiyö cha̧'cua̧ro̧mȩ jubö päi'önä. ¹⁰ Tta̧tä̧ro̧ca̧'a̧ jä̧ji̧ttö̧mä̧ täcö todärenä i̧u̧ i̧hua̧tö̧ päjatöjä―. ¹¹ Ja̧'hua̧nö̧ ja̧'a̧ ttä'o Israel i̧tti̧mö̧rö̧ pä'inödo: ―Ye. Ja̧'hua̧nö̧ jö̧ttö̧mä̧, ja̧'hua̧nö̧ jȩcu̧'ä̧tu̧cu̧'a̧nö̧ ja̧'a̧. Ujutu ti̧rȩjä̧ jähuättömä adihuä juäittötä cusacu oyunä ȩpä̧tu̧cui̧, ru̧hua̧rö̧ cuiyätucua pä'ö. Mayattö'inä ji̧'qui̧cha̧nö̧tä̧, ja̧'hua̧ta̧nö̧ ameuttu'inä, koro juäi u̧ju̧ca̧ca̧ jacuä jähuättö'inä ji̧'qui̧cha̧nö̧tä̧ ȩpö̧ cuiyätucuaröja. ¹² Ja̧'hua̧ta̧nö̧ cuähuä micuä todärenä ȩpä̧tu̧cui̧, pärätä cusacuyutucu ä'cattö cu̧'o̧cui̧'i̧nä̧tu̧cu̧ micuä päi'önä ppa̧cu̧huä̧dä̧tu̧cua̧ pä'ö. Jerupächi'ö ȩni̧nä̧tö̧cö̧. ¹³ Cu̧jä̧hua̧tu̧cu̧ru̧'i̧nä̧ o'ipätucuirö. Ja̧'hua̧nö̧ ä̧rä̧mi̧'ö̧ ru̧hua̧ ö̧ja̧'a̧ tätucui. ¹⁴ Tö̧ä̧nä̧hua̧ Dios o'ca juiyönä ju̧ru̧hua̧mä̧ ucuturu ppä̧dä̧cua̧, ru̧hua̧ ucuturu re rö̧jö̧nä̧ toäcua'anö, Simeónrö'inä, Benjamínrö'inä ppa̧huä̧dä̧cua̧'a̧nö̧. Ttötämä chi̧tti̧mö̧ toönä chö̧jö̧ttö̧mä̧, huäinä chi̧tti̧mö̧ toönä chö̧jä̧cua̧sä̧―. ¹⁵ Ttä'o jiähua'a ttäju̧cuo̧mȩnä̧, Jacob i̧tti̧mö̧ adihuä juäittö ȩpi̧nä̧tö̧do, ru̧hua̧rö̧ ttiya pä'ö. Ja̧'hua̧ta̧nö̧ cuähuä micuämä todärenä päi'önä ttu̧mö̧nä̧ ȩpi̧nä̧tö̧do. Ja̧'hua̧ta̧nö̧ Benjamínrö'inä ȩpö̧, ä̧rä̧mi̧'ö̧ 'chi̧nä̧tö̧do Egipto rȩjȩra̧'a̧cu̧. Juhua'attö José ä'ca jo̧mȩ ka̧cuä̧mi̧nä̧tö̧do. ¹⁶ Josémä jahuätöcu Benjamínrö toomenä, ojusodenä aditätö ttu̧ru̧hua̧rö̧ pä'inödo: ―Pitörö o'ipi chojusodera̧'a̧. Po̧ya̧rö̧ cuä'ö icu, cuaditätucuaja tucua. Jahuätömä ttöcu ttu̧cuȩ ttucuäcuotö kä̧hua̧ jueö päi'omenä―. ¹⁷ José hueäjimä jȩpi̧nö̧do. Ojusodenä aditätö ttu̧ru̧hua̧mä̧ jahuätö u̧mä̧tö̧rö̧ o'ipinödo José ojusodera̧'a̧. ¹⁸ José ojusodera̧'a̧ jahuätörö oipomenä, ye'ecuinätödo. Ka̧ra̧ ka̧ra̧nö̧ ucuocu pä'inätödo: ―Ä̧cuo̧mȩnä̧ ti̧huä̧chi̧nö̧ ji̧nö̧ pärätä tusacu oyu jacuättö po̧cui̧pi̧nä̧tö̧jä̧. Ja̧'hua̧nö̧ ja̧'a̧ttö̧ ujuturu pocu i'cächö. Ujutumä 'choipä̧u̧jä̧, chutä umöhuäyotö päi'önä chutäcu taditäcuotöjä. Tä̧ji̧mö̧ burrotö̧rö̧'i̧nä̧ 'choipäcuotöjä, a̧'cua̧ra̧'a̧― pä'inätödo. ¹⁹ Äpate ttötö'cöhuächi'omenä, José ojusodenä aditätö ttu̧ru̧hua̧rö̧ töcönänö 'chä̧hui̧'ö̧ ttucuocuinäcudo. ²⁰ Pä'inätödo: ―Chu̧ru̧hua̧, iso päi'önä ujutu ä̧cuo̧mȩnä̧ tu̧cuȩ ȩmö̧ i̧huä̧chi̧nä̧tö̧jä̧. ²¹ Ja̧'hua̧nö̧ ja̧'a̧ i̧u̧ kä'co tä'omettö̧ tösacu oyu ejädö totomenä, o'ca toi'önä ya̧cu̧nä̧ tösacuyu ä'ca pärätä ȩji̧na̧'a̧, töäre pärätä pö̧nä̧ jä̧ji̧mä̧ yoräteunätä. Ja̧'hua̧nö̧ ja̧'a̧ttö̧ pä'äji ta'anö i'cächäjätöjä. ²² Ja̧'hua̧ta̧nö̧ koro pärätä'inä tu̧mö̧nä̧ i'cächäjätöjä, tu̧cuȩ cuähuä tȩma̧ pä'ö. Ujutu jerupätöjä di ȩni̧na̧'a̧jo tusacu oyu jacuä pärätämä pä'ö―. ²³ Ja̧'hua̧nö̧ ja̧'a̧ José ojusodenä aditätö ttu̧ru̧hua̧ pä'inödo: ―Huä̧i̧nä̧ ja̧'a̧cuä̧. Yecuecuätucuä'. Ucutu Cu̧huä̧nä̧hua̧tu̧cu̧, ucutu cuä'o Ö̧ä̧nä̧hua̧ iyinä̧u̧jä̧ pärätämä cusacu oyutucu jacuä. Ttömä ȩmi̧nö̧sä̧ cuähuä micuä ji̧nö̧mä̧― pä'inödo ttu̧ru̧hua̧mä̧. Ja̧'hua̧nö̧ ja̧'a̧ttö̧ rä'epö icuiniyä̧u̧do cärenä pä̧cuä̧huode jacuättö tö̧jä̧hua̧ Simeónrö. ²⁴ Ja̧'hua̧nö̧ ja̧'a̧ jahuätörö do'ädinödo José ojusode jacuä. Ja̧'hua̧ta̧nö̧ ajiya iyinä̧u̧do ttö̧jä̧pi̧yä̧ ttötöcähua pä'ö. Ja̧'hua̧ta̧nö̧ ttä̧ji̧mö̧ burrotö̧rö̧'i̧nä̧ ttu̧cuȩ iyinödo. ²⁵ José ojusodenä ttu̧cuȩ ttucuäcua'a ttä̧ju̧cuä̧ja̧'a̧ttö̧, tti'cächäjimä jo̧mȩ päi'önä jȩpi̧nä̧tö̧do, kä̧hua̧ jueö päi'a'a ichomenä, Josérö ttiya pä'ö. ²⁶ José ojusodera̧'a̧ ichi'omenä, tti̧yä̧cuȩmä̧ jacuojucu ttu̧mö̧nä̧ i'cächinätödo. José ä'ca jo̧mȩttö̧ ja̧rȩyu̧nu̧ pä'i'ö tti'ä rȩjȩcu̧ ucuotönö jȩpi̧nä̧tö̧do. ²⁷ Ja̧'hua̧nö̧ ja̧'a̧ ―¿Tta̧'a̧nö̧ ja̧'a̧cuä̧ ucutumä?― pä'ö jäepinä̧u̧do. ―¿Tta̧'a̧nö̧ ja̧'a̧cuä̧ cuä'o bö̧o̧ i̧sa̧mä̧, ucutu ttörö jicuhuähuinätucuäcumä? ¿Ja̧u̧mä̧ ji̧nä̧ kö̧?― ²⁸ Jahuätö pä'inätödo: ―Ujutu tä'o, ucu cu̧mö̧huä̧ya̧mä̧, adiu kä̧ji̧. Ji̧nä̧ a̧'cua̧rä̧ji̧―. Pä'ö, tti'ä rȩjȩcu̧ ja̧rȩyu̧nu̧ ucuotönö jȩpi̧nä̧tö̧do. ²⁹ Ja̧'hua̧nö̧ ja̧'a̧ Josémä u cä'epö, ö̧jä̧hua̧ Benjamínrö, ja̧ju̧mi̧nä̧ ki̧tti̧rö̧ topinödo. Pä'inödo: ―Pidemä ¿cu̧jä̧hua̧tu̧cu̧ röji ru̧hua̧ tä̧ji̧, ttörö jicuhuähuinätucuäcumä? Tö̧ä̧nä̧hua̧ Diostä adiu ppä̧dä̧cua̧jä̧, chi̧tti̧― pä'inödo. ³⁰ José ja̧'hua̧nö̧ päomenä, rö̧ȩnä̧ a̧'u̧ rö̧jä̧chi̧'i̧nä̧cu̧do. Jurunä rä'opächö ä'o̧ca̧ra̧'a̧. Do'ächächö juhuorö ajuähuinödo. ³¹ Täcö ajuähuäjimä 'cuäopächi'äcu, i'ä töcähuäji'ca̧, pä'äji ta'anö do'ächi'ö, pä'inödo: ―Tu̧cuȩ tucua iyä'chätucui―. ³² Ja̧'hua̧nö̧ ja̧'a̧ Josérö'inä i̧mi̧cu̧nä̧, u̧bö̧o̧tö̧rö̧'i̧nä̧ i̧mi̧cu̧nä̧, Egipto rȩjȩ ttö̧ja̧ Josécu cuä'ijätörö'inä i̧mi̧cu̧nä̧ ttu̧cuȩ iyä'chinätödo. Egipto rȩjȩ ttö̧ja̧ yorö'iso cuocotö pinätödo hebreos ttö̧ja̧cu̧. Tucuttumä suroja'a pä'ö ttamöcuädina'attö, jahuätöcumä i̧mi̧cu̧nä̧nö̧ ja̧'a̧ttö̧. ³³ José huea'attö u̧bö̧o̧tö̧rö̧mä̧ chutä ä'ca jo̧mȩ ttö̧'ä̧mä̧da̧ pä'ö hue'inätödo. Ä'canä ru̧hua̧mä̧ ä'canä ö̧'ä̧mä̧da̧ pä'ö hue'inätödo. Ju̧huȩnȩ o'ca'a ru̧hua̧mä̧ ja̧u̧ o'comenä ö̧'ä̧mä̧da̧ pä'ö hue'inätödo. Röji ru̧hua̧mä̧ röjinä ö̧'ä̧mä̧da̧ pä'ö hue'inätödo. José u̧bö̧o̧tö̧mä̧, ¿tta̧'a̧nö̧ pä'ö ja̧'hua̧nö̧ u̧huo̧jua̧'a̧huä̧jo? pä'ö amöcuädinätödo. ³⁴ Ja̧'hua̧nö̧ ja̧'a̧ José chutä mesa isodättö ttu̧cuȩ iyä'chinödo. Ja̧'hua̧nö̧ ja̧'a̧nä̧ Benjamínrö korotöttö'inä abonänö rö̧ȩnä̧ u̧cuȩ iyinödo. Ja̧'hua̧nö̧ cuä̧nö̧'i̧nä̧ cuinätödo. Au'inä ahuinätödo. Cuä̧nö̧ eseäcuähuinätödo Josécu o'ca toi'önä.