¹ Jahuätö Egipto rȩjȩ ru̧hua̧ umöhuäyotö ta̧ju̧ ttu̧'cuo̧ti̧ huäjunä rä'epö icuäji o'ca'a, ji̧nä̧ todäre a̧'ȩ cärenä pinödo Josémä. Ja̧'hua̧ ja̧'a̧ Egipto rȩjȩ ru̧hua̧ ji̧yȩtȩ 'cuo̧ti̧cuä̧cuä̧huä̧ 'cuo̧ti̧cui̧nö̧do. U̧'cuo̧ti̧cuo̧mȩnä̧, Nilo aje jäyoto ö̧ja̧'a̧ jä̧'i̧nö̧'a̧nö̧ ji̧nä̧cu̧do. ² Toomenä, Nilo aje jacuotottö huȩjä̧mi̧nä̧tö̧do ko̧ro̧mö̧ttö̧nö̧ ta̧ju̧nu̧ pä̧cä̧yö̧ adiu bärepätö. Mȩji̧yä̧'chȩ cuä̧nö̧ ka̧cui̧nä̧tö̧do. ³ Ja̧'hua̧ta̧nö̧ jahuätö tto'ca'anä huȩjä̧mi̧nä̧tö̧do ko̧ro̧mö̧ttö̧nö̧ ta̧ju̧nu̧ pä̧cä̧yö̧ suropätö juiyo siähuächätömä. Pä̧cä̧yö̧ barepätöcu tö'cö ka̧cui̧nä̧tö̧do Nilo aje jäyoto. ⁴ Jahuätö pä̧cä̧yö̧ siähuätö cui'i'inätödo pä̧cä̧yö̧ bärepätörö. Ja̧'hua̧nö̧ ja̧'a̧ Egipto rȩjȩ ru̧hua̧ 'cuo̧ti̧cu̧ porächi'inödo. ⁵ Ja̧u̧nu̧ o'ca'a pä'äji ta'anö ä'i'inödo. Ä'i'omenä, pä'äji ta'anö 'cuo̧ti̧cui̧nö̧do. Pättiyu cuähuä trigona ji̧na̧tȩttö̧ ko̧ro̧mö̧ttö̧nö̧ tochare räreipa'a 'cuo̧ti̧cui̧nö̧do, adiu ka̧cu̧ ocha. ⁶ Ja̧u̧ ocha o'ca'a räreipina'ado ji̧na̧tȩttö̧ pä'äji räreipäjomenätä ko̧ro̧mö̧ttö̧nö̧ tocharenö. Ja̧u̧ ocha jä̧ji̧mä̧ surojina'ado. Kä̧ru̧'coppa kä̧hua̧ räopa'acuttu ichoppattö cuo'ö icu jo'ö icuinödo. ⁷ Ja̧'hua̧nö̧ ja̧'a̧ ja̧u̧ ko̧ro̧mö̧ttö̧nö̧ tochare surojäjimä trigo adiu ocha jä̧ji̧ cui'i'ina'ado o'ca juiyönä. Ja̧u̧nu̧ o'ca'a Egipto rȩjȩ ru̧hua̧ porächi'inödo. 'Cuo̧ti̧ a̧'cua̧ra̧'a̧ pä'ö ttu̧'ȩpä̧ri̧'i̧nö̧do. ⁸ Mo̧ro̧ juomenä a̧'cua̧ tta̧'ȩcui̧nö̧do. O'ca toi'önä ttu̧'cuo̧ti̧ huäjunä rä'epö icu jiäcuähuä ttö̧ja̧ pättä̧u̧ru̧'i̧nä̧, o'ca toi'önä huo̧juä̧tö̧rö̧ Egipto rȩjȩnä̧ ka̧cui̧nä̧tö̧rö̧ tticha pä'ö huopinödo. Ru̧hua̧ u̧'cuo̧ti̧cuä̧ji̧mä̧ rö̧ȩnä̧ jahuätörö jiähua'anä, ya̧tȩ'i̧nä̧ yorö'iso toina'ado rä'epö icu ji'äumä. ⁹ Ja̧u̧nu̧ o'ca'a ru̧hua̧ ahuoya iyähuä i̧sa̧mä̧ ru̧hua̧rö̧ pä'inödo. ―Täcö amöcuädi'ösä suronä jȩchi̧nö̧mä̧. ¹⁰ Ucu chu̧ru̧hua̧, cumöhuäyotö ujuturu cu̧ra̧huä̧ri̧'o̧mȩnä̧, ttörö'inä, pa̧ adicuä i̧sa̧rö̧'i̧nä̧ guardia ttu̧ru̧hua̧ ojusodenä cärenä tö̧'a̧ pä'ö do'ädö cuicuinä̧u̧jä̧. ¹¹ Ja̧'hua̧nö̧ ja̧'a̧ ja̧u̧nu̧tä̧ yodo yo̧mȩtȩnä̧ 'cuo̧ti̧cui̧nä̧tö̧jä̧ ttö'inä, ka̧ra̧ pinö'inä. Tu̧'cuo̧ti̧cui̧nö̧ räecuämä i̧mi̧cu̧nä̧ ji̧na̧'a̧. ¹² Mö̧ä̧ya̧mä̧, hebreos ttö̧ja̧ i̧sa̧, guardia ttu̧ru̧hua̧ u̧mö̧huä̧ya̧, ujutucu pinörö ji'ähuinätöjä tu̧'cuo̧ti̧cuä̧ji̧mä̧. Ja̧u̧mä̧ rä'epö icu ji'ähuinö ttö chu̧'cuo̧ti̧cui̧nö̧'i̧nä̧, pa̧ adicuä i̧sa̧ pinö u̧'cuo̧ti̧cui̧nö̧'i̧nä̧. ¹³ Ja̧'hua̧nö̧ ja̧'a̧ ja̧u̧ jiähuäji ta'anö 'cuäopina'a ujuturu. Ja̧'hua̧nö̧ ja̧'a̧ ucu ttörö hue'inöjä ttö chaditä'ijome. Pa̧ adicuä i̧sa̧rö̧mä̧ ti̧'ä̧dö̧ ttönarö pä'ö hue'inöjä―. ¹⁴ Ru̧hua̧ ahuoya iyähuä i̧sa̧ jiähua'a ä̧ju̧cuo̧mȩnä̧, Egipto rȩjȩ ru̧hua̧ Josérö tti'cächa pä'ö hue'inödo. Cärenä päcuähuodettömä jurunä rä'epö tticuinäcudo. Ja̧'hua̧nö̧ ja̧'a̧ ä̧'quȩ isä'che'inä quiräu icuinödo. Ö̧'ca̧tä̧huä̧ta̧'i̧nä̧ pärohuäji'ca̧, ru̧hua̧ ö̧'a̧'a̧cu̧ 'chi̧nö̧do. ¹⁵ Ja̧hua̧nö̧ ja̧'a̧ ru̧hua̧ Josérö pä'inödo: ―'Cuo̧ti̧cuä̧ji̧sä̧. Chu̧'cuo̧ti̧cuä̧ji̧mä̧, ya̧tȩ'i̧nä̧ toa'a jiähuattöhue pädomenä. Ttö ä̧ju̧cuä̧ji̧sä̧ ucuru ttu̧'cuo̧ti̧ rä'epö icu jiäcuähuänä huo̧jua̧do pä'ö jittähua'a―. ¹⁶ José ru̧hua̧rö̧ ädätinödo: ―Ttömäcö̧. Chö̧ä̧nä̧hua̧ Diostä huäjunä i̧yä̧cua̧jä̧ cu̧'cuo̧ti̧ jä̧ji̧mä̧, chu̧ru̧hua̧―. ¹⁷ Faraón Josérö uhuocuinö: "Ttö chu̧'cuo̧ti̧nä̧, kä̧ji̧sä̧, Nilo aje jäyoto. ¹⁸ Topäjisä. ji̧mu̧tȩttö̧ ta̧ju̧ huotö pä̧'cä̧yö̧ rättopa'a Nilo ajettö, bärepätö märiche'inä juiätö, jahuätö ttucuä'che cuänö kä̧jä̧tö̧ aje jäyoto. ¹⁹ Jahuätö tto'come topäjisä, korotö pä'cäyö̧rö̧ ji̧mu̧tȩ ta̧ju̧nu̧ huotörö juiyó abora'atä suropätörö juiyupu'inä juiyupätö ja̧'hua̧nö̧ ja̧'a̧nä̧'i̧nä̧ siäcuätörö. Ttömä pi̧jä̧ Egipto rȩjȩttö̧mä̧ ja̧'hua̧nö̧ huotörömä topo'cö päijösä. ²⁰ Päcäyö̧ juiyo siähuäjätömä cui'iäjätö pä̧cä̧yö̧ ä̧cuo̧mȩnä̧ barepäjätörö. ²¹ Jahuätö ttucuiäji o'ca'amä, jeruhuina'a̧ jä̧ja̧'a̧ ttu̧cui̧ä̧u̧ pä'ömä sittähua'attö. Ja̧'hua̧nö̧ jä̧cu̧ porächiäjisä ²² Ttomä chu̧'cuo̧ti̧nä̧ topinösä̧, ja̧'hua̧ta̧'a̧nö̧, ä̧ju̧cuä̧tu̧cui̧, ji̧mu̧tȩ ta'arenö u̧huä̧ju̧ ocha bahui'ina'a, jo̧mȩnö̧ adiunä. ²³ Topätucui, juȩnȩ yabonänö, ji̧mu̧tȩ ta'arenö u̧huä̧ju̧ ocha, joächächö'inä, pöjuihuächö'inä kä̧hua̧ räopa'acuttu ichoppa du'oppa döomenä cuo'ö icu'inä, ja̧hua̧nö̧ jä̧ji̧ o'ca'a bahui'ina'a. ²⁴ U̧huä̧ju̧ ocha puhuihuächömä rahuädi'inö u̧huä̧ju̧ adiu ocha, Pi̧yȩ chu̧'cuo̧ti̧ i'ähuinösä mä̧ri̧mö̧rö̧, ja̧'hua̧nö̧ ja̧'a̧nä̧ ya̧tȩ'i̧nä̧ toina'a jiähua pä'ömä." ²⁵ Ja̧'hua̧nö̧ ja̧'a̧ Egipto rȩjȩ ru̧hua̧mä̧ Josérö u̧'cuo̧ti̧cuä̧ji̧mä̧ jiähuäji o'ca'a, José ru̧hua̧rö̧ pä'inö: ―Chu̧ru̧hua̧, cu̧'cuo̧ti̧cuä̧ji̧mä̧ ji̧yȩtȩtä̧ ja̧'a̧. Chö̧ä̧nä̧hua̧ Dios jȩä̧cuȩmä̧ ucuru ji'ähuäji. ²⁶ ji̧mu̧tȩ ta'arenö pä̧cä̧yö̧ adihuätömä ja̧u̧ jä̧ji̧mä̧, ji̧mu̧tȩ ta'arenö a̧'ȩ pä'ö jä̧cua̧'a̧. Ja̧'hua̧ta̧nö̧ trigo ocha adiu ocha ji̧mu̧tȩ ta'arenö jä̧ji̧mä̧, ji̧mu̧tȩ ta'arenö a̧'ȩ pä'ö jä̧ji̧. Cu̧'cuo̧ti̧cuä̧ji̧mä̧ ji̧yȩtȩtä̧ ja̧'a̧. ²⁷ Ja̧'hua̧ta̧nö̧ adihuätö tto'ca'anä korotö pä̧cä̧yö̧ si'ähuätö huȩjä̧mä̧jä̧tö̧mä̧, ko̧ro̧mö̧ttö̧nö̧ todäre a̧'ȩ pä'ö jä̧cua̧'a̧. Ja̧'hua̧ta̧nö̧ trigo ocha ko̧ro̧mö̧ttö̧nö̧ tocharenö kä̧rö̧'coppa kä̧hua̧ räopa'acuttu ichoppattö jo'ö icu tu̧huä̧'chȩ jä̧ji̧ ochamä, ko̧ro̧mö̧ttö̧nö̧ todäre a̧'ȩ ppäi rö̧jö̧ 'cuäopäcua'a pä'ö jä̧ji̧. ²⁸ Ucuru jidäumä iso päi'önä jä̧cua̧'a̧. Chö̧ä̧nä̧hua̧ Diosmä ja̧u̧ 'cuäopä̧cuȩ ucuru i̧jȩpä̧ji̧. ²⁹ Ä̧ju̧cui̧, chu̧ru̧hua̧. Egipto rȩjȩ ttö̧ja̧ tti̧rȩjä̧nä̧mä̧ cuähuä rö̧ȩnä̧ ppöröhuäcua'a ko̧ro̧mö̧ttö̧nö̧ todäre a̧'ȩ jo̧mȩtä̧. ³⁰ Ja̧u̧nu̧ o'ca'a rȩbȩhuä̧cua̧'a̧ ppäi rö̧jö̧mä̧ ji̧mu̧tȩ ta'arenö a̧'ȩ. Egipto rȩjȩ ttö̧ja̧mä̧ ttucuähuä rö̧ȩnä̧ ka̧'a̧ pä'ö ttunichi'äcuotö yorö'iso. ³¹ Ja̧'hua̧nö̧ ja̧'a̧nä̧ tti̧rȩjä̧nä̧ rö̧ȩnä̧ ppäi rö̧jä̧cua̧'a̧. Cuähuä bahuoca'attö ppäi ttuttäcuotö. ³² Ucu todärenä cu̧'cuo̧ti̧cuä̧ji̧mä̧ ji̧nä̧ ji̧yȩtȩ jä̧ji̧, Chö̧ä̧nä̧hua̧ Dios iso päi'önä jȩä̧cua̧'a̧ ja̧'a̧ttö̧, ja̧'hua̧ta̧nö̧ jurunänö huȩä̧cuȩ 'cuäopa'a ja̧'a̧ttö̧. ³³ Ja̧'hua̧nö̧ ja̧'a̧ttö̧ ya̧tȩrö̧ cusu'a̧nö̧ ja̧'a̧, chu̧ru̧hua̧, adiu huo̧ju̧nä̧ hua̧ttö̧, adiu huo̧juȩcu̧nä̧ hua̧ttö̧. Ja̧u̧ru̧ ru̧hua̧ päi'önä cu̧ju̧nu̧'a̧nö̧ ja̧'a̧, Egipto ttö̧ja̧rö̧ hueähuä i̧sa̧ päi'önä ö̧jä̧cua̧'a̧nö̧. ³⁴ Ja̧'hua̧ta̧nö̧ korotörö'inä huecu'a̧nö̧ ja̧'a̧, porötä pi̧jä̧ rȩjȩttö̧ cuähuä ttö̧ca̧ca̧tä̧cuo̧tö̧rö̧. Egipto ttö̧ja̧ ttu̧cuȩ cuähuättö, ji̧mö̧tȩ jähuättömä ji̧yȩtȩ tettö'a̧nö̧tä̧ 'quȩ'ȩpö̧ ttiyäcua'anö ucuru. Ja̧'hua̧nö̧ jȩttä̧cua̧'a̧nö̧, ko̧ro̧mö̧ttö̧nö̧ todäre a̧'ȩ cuähuä rö̧ȩnä̧ ppöröhuomenä. ³⁵ Ja̧'hua̧nö̧ rö̧ȩnä̧ cuähuä ttö̧ca̧ca̧tä̧cua̧'a̧nö̧ cuähuä adiu ppöröhuä̧cuȩ a̧'ȩnä̧. Ja̧'hua̧ta̧nö̧ huecu'a̧nö̧ ja̧'a̧ ja̧u̧ cuähuä hua'adö ttu̧ju̧na̧ pä'ö, ötahuiyä jö̧ a̧'u̧cuä̧ ru̧hua̧ hueome pö̧nä̧. Ja̧'hua̧ta̧nö̧ ja̧u̧ cuähuä to̧pä̧rö̧ tta̧huä̧rä̧cuä̧huä̧ isotörö'inä ttu̧ju̧nä̧rä̧cua̧'a̧nö̧. ³⁶ Ja̧u̧ cuähuä hua'adö ku̧nä̧huä̧mä̧ ttö̧ja̧ ttu̧cuȩ päi'önä jä̧cua̧'a̧, ko̧ro̧mö̧ttö̧nö̧ todäre a̧'ȩ ppäi rö̧jo̧mȩnä̧ Egipto rȩjȩttö̧. Ja̧'hua̧nö̧ ja̧'a̧ttö̧ ttö̧ja̧mä̧ 'corupä'i'ocotö ttäcuotö ppäi rö̧jö̧ pä̧nä̧mä̧― pä'inödo Josémä. ³⁷ José jiäu huȩnȩmä̧ ru̧hua̧rö̧'i̧nä̧, ja̧u̧tä̧ ippeye ruhuotörö'inä adihuina'ado. ³⁸ Ja̧'hua̧nö̧ ja̧'a̧ ru̧hua̧mä̧ ippeye ruhuotörö pä'inödo: ―Ka̧ra̧rö̧mä̧ tö̧'o̧cui̧'ö̧ juiyö'a̧nö̧ ja̧'a̧ pide ta'anö hua̧rö̧mä̧. Ö̧ä̧nä̧hua̧ Diosmä iso päi'önä pidecutä kö̧. ³⁹ Ja̧'hua̧nö̧ ja̧'a̧ttö̧ ru̧hua̧mä̧ Josérö pä'inödo: ―Pi̧yȩ o'ca juiyönä Cu̧huä̧nä̧hua̧ Diostä jiähuäjäcujä. Ka̧ra̧mä̧ toa'a ucu ta'anö huo̧ju̧nä̧ hua̧mä̧, adiu huo̧juȩcu̧nä̧ hua̧mä̧. ⁴⁰ Ucurutä hue'ipösä chojusode'inä hueähuä i̧sa̧ cu̧ja̧ pä'ö. Ja̧'hua̧ta̧nö̧ chumöhuäyotö o'ca toi'önä ucu huecutä jȩttä̧cuo̧tö̧. Ttömä ji̧yȩä̧cuȩtä̧ ucuttu'inä abonänö hueähuä i̧sa̧ päi'önätä chö̧jä̧cua̧sä̧. ⁴¹ Juhua'a yabo pä'inödo ru̧hua̧ Josérö: ―Egipto rȩjȩ jä̧ttä̧yä̧jä̧ o'ca juiyönä ru̧hua̧ päi'önä cu̧ja̧ pä'ö ucurutä hue'ipösä―. ⁴² Ja̧'hua̧nö̧ pä'ö kä̧nö̧, ru̧hua̧ ö̧'ca̧tä̧huä̧ti̧yu̧ttu̧ 'ca̧tö̧ ku̧ni̧nö̧do Josérö. Ru̧hua̧ ödo'che o̧bö̧'i̧nä̧ José ödo'chenä rö̧ni̧nö̧do. Ö̧rä̧u̧sa̧ orottö adicuä̧sa̧'i̧nä̧ Josérö huä̧ni̧nö̧do. ⁴³ Ja̧u̧nu̧ o'ca'a todäre päi'önä jäcä carucä adihuä juäi isäcä ru̧hua̧ öärecättö iyinäcudo. José ä'canä 'chi̧nä̧tö̧rö̧mä̧ ―Ucuotätucui― huotta pä'ö hue'inödo ru̧hua̧mä̧. Ja̧'hua̧nö̧ ja̧'a̧ Egipto rȩjȩ ttö̧ja̧ ttu̧ru̧hua̧ päi'önä ö̧ja̧ pä'ö hue'ö ku̧ni̧nö̧do Josérö. ⁴⁴ Ja̧'hua̧ta̧nö̧ ru̧hua̧ Josérö pä'inödo: ―Ttötäsä ru̧hua̧mä̧. Ja̧'hua̧nö̧ ja̧'a̧nä̧ Egipto rȩjȩ o'ca juiyönä ya̧tȩ u̧mö̧'inä̧, ö̧jä̧pö̧'i̧nä̧ cä'epocö jä̧cua̧ ucu huecuhuoca'anämä―. ⁴⁵ Ru̧hua̧ Josérö o'inödo Zafnat-panea pä'ö. Ja̧'hua̧ta̧nö̧ hue'inödo Asenatrö José irecua päi'önä. Asenat kä'omä On ötahuiyä ru̧hua̧ pinödo. Potifera pä'ö micuinödo. Ja̧u̧nu̧ o'ca'a José rä'opö 'chi̧nö̧do Egipto rȩjȩ o'ca juiyönä usäu. ⁴⁶ José Egipto rȩjȩ ru̧hua̧ ä'ca jo̧mȩttö̧ ru̧hua̧ päi'inömä, treinta a̧'ȩ hua̧ pinödo. Egipto rȩjȩ ru̧hua̧ ä'ca jo̧mȩttö̧ rä'opö 'chä̧nö̧, Egipto rȩjȩ jä̧ttä̧yä̧jä̧ cue'ächö usähuinödo. ⁴⁷ Ja̧'hua̧nö̧ ja̧'a̧ ko̧ro̧mö̧ttö̧nö̧ todäre a̧'ȩnä̧mä̧, rȩjȩttö̧ cuähuä rö̧ȩnä̧ ppöröhuina'ado. ⁴⁸ José ko̧ro̧mö̧ttö̧nö̧ todäre a̧'ȩ 'cuäoi'önä ja̧u̧ cuähuä ppöröhuinö pä̧nä̧mä̧ Egipto rȩjȩnä̧ ca̧ca̧tö̧ ttöta hue'inödo ötahuiyänä. Ötahuiyä jö̧ a̧'u̧cuä̧ ca̧ca̧tö̧ rötinätödo ja̧u̧ ötahuiyä tö'cö pä̧jö̧ pättiyuttu cuähuämä. ⁴⁹ Ja̧'hua̧nö̧ trigodu cuähuä juiyo rö̧ȩnä̧ ca̧ca̧tö̧ rötinätödo, rȩba̧ aje jacuoto pä̧ba̧ rö̧ȩnä̧ pa̧'a̧ jä̧'i̧nö̧'a̧nö̧. Ja̧'hua̧nö̧ ja̧'a̧ José täcö pa̧ja̧tö̧ cä'ädinödo, ttö̧'a̧tö̧ juiyö'a̧nö̧ juiyo rö̧ȩnä̧ ja̧'a̧ttö̧. ⁵⁰ Ppäi rö̧jö̧ rȩbȩhuä̧cua̧'a̧ ä'canä, José irecua Asenatmä, On ötahuiyä ttö̧ja̧ ttu̧ru̧hua̧ Potifera ittijumä, José i̧tti̧mö̧ u̧mä̧tö̧ ta̧ju̧ru̧ uhuäbecuinäjudo. ⁵¹ José i̧tti̧ ä'canä ru̧hua̧rö̧ o'inödo Manasés pä'ö. Pä'inödo: ―Tö̧ä̧nä̧hua̧ Dios chunichi'a pä'ö jȩi̧nä̧cu̧sä̧ suronä 'cuäopinö'inä, chä'o ahuaruhuärö'inä―. ⁵² Ju̧huȩnȩ o'comenä i̧tti̧rö̧mä̧ Efraín pä'ö o'inödo. Pä'inödo: ―Tö̧ä̧nä̧hua̧ Dios chi̧tti̧mö̧rö̧ iyäji pi̧jä̧nä̧, surojö ttörö 'cuäopä̧jä̧nä̧―. ⁵³ Ja̧'hua̧nö̧ ja̧'a̧ ko̧ro̧mö̧ttö̧nö̧ todäre a̧'ȩ cuähuä rö̧ȩnä̧ ppöröhuäjimä täcö beipächina'ado. ⁵⁴ Ko̧ro̧mö̧ttö̧nö̧ todäre a̧'ȩ ppäi ttuähuä rȩbȩhui̧na̧'a̧do, José päinö ta'anö. Korotö tti̧rȩjä̧ttö̧'i̧nä̧ ppäi ttu'inätödo. Ja̧'hua̧nö̧ ja̧'a̧nä̧ Egipto rȩjȩ jä̧ttä̧yä̧jä̧mä̧, cuähuä hua'adö ttu̧ju̧ni̧nö̧ ki̧na̧'a̧do. ⁵⁵ Egipto rȩjȩ ttö̧ja̧'i̧nä̧ rö̧ȩnä̧ ppäi ttuttomenä, Egipto rȩjȩ ru̧hua̧rö̧ huopinätödo, cuähuä iyatö pä'ö. Ru̧hua̧mä̧ Egipto ttö̧ja̧rö̧ pä'inödo: ―Josérö jä'epäjätucui. José hueömä jȩpä̧tu̧cui̧― pä'inödo. ⁵⁶ Pi̧jä̧ jä̧ttä̧yä̧jä̧ ppäi rö̧jo̧mȩnä̧, José cuähuä hua'adö ttu̧ju̧ni̧nö̧ odehuiyä o'ca juiyönä ba'epinödo. Cuähuämä Egipto ttö̧ja̧rö̧ micuänätä ttiyä'cha pä'ö hue'inödo, o'ca toi'önä Egipto rȩjȩ ttö̧ja̧ rö̧ȩnä̧ ppäi ttutta'attö. ⁵⁷ Korotö pi̧jä̧ jä̧ttä̧yä̧jä̧ttö̧'i̧nä̧ Egipto rȩjȩra̧'a̧cu̧tä̧ 'chi̧nä̧tö̧do, Joséttö cuähuä mitö ttȩma̧ pä'ö, rö̧ȩnä̧ ppäi ttutta'attö pi̧jä̧ pa̧ja̧cu̧nä̧.