¹ José ji̧nä̧ cärenä ö̧'a̧'a̧nä̧, Egipto rȩjȩ ru̧hua̧ umöhuäyotö ta̧ju̧ ttu̧ru̧hua̧ öjö'cocö juäi jȩpi̧nä̧tö̧do. Ya̧tȩmä̧ u̧ru̧hua̧ ahuoya iyähuä i̧sa̧ pinödo. Ka̧ra̧mä̧ u̧ru̧hua̧ u̧cuȩ pa̧ adicuä i̧sa̧ pinödo. ² Ja̧'hua̧nö̧ ja̧'a̧ Egipto rȩjȩ ru̧hua̧mä̧ ahuoya iyähuä i̧sa̧rö̧'i̧nä̧, u̧cuȩ pa̧ adicuä i̧sa̧rö̧'i̧nä̧ ra̧huä̧ri̧pi̧nö̧do. ³ Jahuätörö guardia ttu̧ru̧hua̧ ojusodenä cärenä ttöta pä'ö hue'inödo, José cärenä ö̧'odenä. ⁴ Guardia ttu̧ru̧hua̧ Josérö hueipinä̧u̧do. José jahuätörö tta̧'ä̧ri̧nö̧do. Recuo cärenä pȩji̧nä̧tö̧do. ⁵ Ja̧'hua̧nö̧ ja̧'a̧ ja̧u̧nu̧tä̧ yodo Egipto rȩjȩ ru̧hua̧ umöhuäyotö, ahuoya iyähuä i̧sa̧'i̧nä̧, u̧cuȩ pa̧ adicuä i̧sa̧'i̧nä̧ cärenä pä̧nö̧ 'cuo̧ti̧cui̧nä̧tö̧do. Ya̧tȩ pö̧nä̧ i̧mi̧cu̧nä̧nö̧ jö̧nä̧ 'cuo̧ti̧cui̧nä̧tö̧do. Ttu̧'cuo̧ti̧cuä̧ji̧ räecuämä i̧mi̧cu̧nä̧nö̧ ji̧na̧'a̧do. ⁶ Mo̧ro̧ päi'a'a, José jahuätörö ichi'ö toomenä, tta̧'cua̧ tta̧'ȩcu̧ ttö̧'ö̧ja̧'a̧ toinä̧u̧do. ⁷ Ru̧hua̧ umöhuäyotörö, chutäcu cärenä pä̧jä̧tö̧rö̧, jä'epinödo José: ―¿Dä̧bö̧ cua̧'cua̧ tta̧'ȩcu̧ cu̧'ä̧tu̧cuä̧ jitä mo̧ro̧mä̧?― ⁸ Josérö ädätinätödo: ―Tu̧'cuo̧ti̧cuä̧ji̧mä̧ ya̧tȩ'i̧nä̧ toa'a rä'epö icu jiähuatöhue pätomenä―. Ja̧'hua̧nö̧ pättomenä, José pä'inödo: ―Chö̧ä̧nä̧hua̧ Dios ya̧tȩtä̧ huo̧jua̧mä̧. Ji'ähuätucuittö cu̧'cuo̧ti̧cuä̧jä̧tu̧cu̧mä̧―. ⁹ José ja̧'hua̧nö̧ päomenä, ru̧hua̧ ahuoya iyähuä i̧sa̧ u̧'cuo̧ti̧ Josérö ji'ähuinödo. Pä'inödo: ―Chu̧'cuo̧ti̧nä̧ uva dau uju'ca'ca chä'ca jo̧mȩ ka̧'a̧ topäjisä. ¹⁰ Juhuä'ca uju'ca'cattö huäbadecuä isade rä'oi'ö, o̧ba̧ jö̧ttö̧ ȩ'u̧ 'cärächipö, tädö ocha huȩja̧'a̧ topäjisä. ¹¹ Ja̧'hua̧ta̧nö̧ chu̧ru̧hua̧ ahuo̧'ta̧ jä̧'i̧jo̧'ta̧ 'chu'ädäjisä chu̧mö̧nä̧. Ko̧ro̧mö̧nä̧ uva isächa 'chu'huädö, i̧so̧'ta̧ jacuä dahuipönä 'chu'ädäjisä. Ja̧'hua̧nö̧ jȩpö̧ chu̧ru̧hua̧rö̧ iyäjisä i̧so̧'ta̧―. ¹² Ja̧'hua̧nö̧ ä̧ju̧cu̧, José päinäcudo: ―Pi̧yȩtä̧ o'ca juiyö ji'äu räecuämä: Ja̧u̧ huäbadecuä isade jä̧ji̧mä̧, huäbodäcuä mo̧ro̧ pä'ö ja̧'a̧. ¹³ Huäbodäcuä mo̧ro̧ päi'omenä, Egipto rȩjȩ ru̧hua̧ ucuru pottö rä'epö icu, pä'äji ta'anö cuaditähuä ji̧nö̧ huȩä̧cua̧jä̧. Ucumä cu̧ru̧hua̧ ahuo̧'ta̧ cu̧ru̧hua̧rö̧ cui̧yä̧cua̧jä̧, ahuoya iyähuä i̧sa̧ päi'önä cu̧jo̧mȩnä̧ cuiyinö ta'anö. ¹⁴ Ja̧'hua̧nö̧ ja̧'a̧ttö̧ ttörö cuamöcuädaja porö adiu räcuhuopächöttömä. Ru̧hua̧rö̧ cucuocuaja, pode isodettö rä'epö icuäcua'anö ttörö. ¹⁵ Korotö ttörö i'cächinätö hebreos ttö̧ja̧ tti̧rȩjä̧ra̧'a̧ttö̧. Porö'inä yorö'iso suronä jȩpo̧cö̧ pinö̧sä̧, ttörö cärenä ttöta pä'ö―. ¹⁶ Ru̧hua̧ u̧mö̧huä̧ya̧ pa̧ adicuä i̧sa̧mä̧, José adiu rä'epö jiähua'a ä̧ju̧cuo̧mȩnä̧, Josérö pä'inödo: ―Ttö'inä chu̧'cuo̧ti̧nä̧ mänäre ocä huäbocäcuä chu ju'tä pa̧ ȩca̧'a̧ topäcuähuäjisä. ¹⁷ Mänäre ocä huäme korottö'inä, korottö'inä ȩca̧'a̧ ru̧hua̧ u̧cuȩ pa̧ o̧ppä̧. Tochäcuähua'anä ppi̧yu̧ ichi'ö, mänäre ocä chu ju'tättö cui'i'äjätö―. ¹⁸ Ja̧'hua̧nö̧ ja̧'a̧ José ji'ähuinödo: ―Pi̧yȩtä̧ o'ca juiyönä rä'epö jiäcuähuämä. Ja̧u̧ mänäre ocä huäbocäcuä jä̧ji̧mä̧, huäbodäcuä mo̧ro̧ pä'ö jä̧ji̧. ¹⁹ Huäbodäcuä mo̧ro̧ päi'omenä, ru̧hua̧ cu 'cui'opö i̧cuä̧cua̧jä̧. Daunä ti̧'ä̧dö̧ ö̧nä̧cua̧jä̧. Ja̧'hua̧ ja̧'a̧ cuidepämä ppi̧yu̧tä̧ ttu̧cuä̧cua̧jä̧―. ²⁰ Ja̧'hua̧nö̧ ja̧'a̧, huäbodäcuä mo̧ro̧ päi'omenä, Egipto rȩjȩ ru̧hua̧ uhuäpächinö mo̧ro̧ päi'omenä, pä'cäri jȩpi̧nö̧do, umöhuäyotö o'ca toi'önä ttucua pä'ö. Ahuoya iyähuä i̧sa̧rö̧'i̧nä̧, pa̧ adicuä i̧sa̧rö̧'i̧nä̧ rä'epö icuinödo. Korotö umöhuäyotö ttä'ca jo̧mȩ i'cächö, u̧ju̧ni̧nä̧u̧do. ²¹ Pä'äji ta'anö ahuoya iyähuä i̧sa̧rö̧ chutä aditä'ijome hue'inödo. Ja̧u̧nu̧ o'ca'a ahuo̧'ta̧ u̧ru̧hua̧rö̧ iyinödo. ²² Ja̧'hua̧nö̧ ja̧'a̧nä̧ pa̧ adicuä i̧sa̧rö̧ ti̧'ä̧dö̧ ö̧ni̧nä̧cu̧do, José jiähuäji ta'anö. ²³ Ja̧'hua̧nö̧ ja̧'a̧nä̧ ru̧hua̧ ahuoya iyähuä i̧sa̧ pinömä, José jiähuäjimä yorö'iso unichi'inödo, Josérö amöcuädäcuähuä juiyönä.