¹ Ismaelitas ttö̧ja̧mä̧ Josérö ȩmi̧pi̧nä̧tö̧do Egipto rȩjȩra̧'a̧cu̧. Potifar Josérö jahuätöttö pärätä mitö ȩmi̧nä̧cu̧do. Egipto rȩjȩ ru̧hua̧rö̧ tta̧huä̧rä̧cuä̧huä̧ isotö, guardias ttu̧ru̧hua̧ pinödo Potifarmä. ² Tu̧ru̧hua̧ Dios Josérö ppä'ädinödo, adiu ö̧ja̧ pä'ö u̧ru̧hua̧ Egipto rȩjȩ ttö̧ja̧ i̧sa̧ ojusodenä. ³ Tu̧ru̧hua̧ Dios Josécu ö̧ja̧'a̧ttö̧, o'ca juiyönä José jȩö̧mä̧ adiu räopa'a topinödo u̧ru̧hua̧mä̧. ⁴ Potifar Josérö esehuinödo. Ja̧u̧mä̧ chutä u̧mö̧huä̧ya̧ pä'i'inödo. Ojusodenä aditinätö ttu̧ru̧hua̧ päi'önä u̧ju̧ni̧nä̧cu̧do. O'ca juiyönä u̧ju̧nä̧rö̧mä̧ Josérötä hue'ipinödo. ⁵ O'ca juiyönä u̧ju̧nä̧rö̧mä̧ tta̧huä̧ra̧ pä'ö Josérö hueipinö kä̧mä̧dö̧, Tu̧ru̧hua̧ Dios ppä'ädinödo Potifarrö, Josérö adiu jȩa̧'a̧ttö̧. O'ca juiyönä u̧ju̧nä̧rö̧mä̧, ojusodenä'inä, ö'ättanä'inä, adiu ppä'ädinödo Tu̧ru̧hua̧ Diosmä. ⁶ O'ca juiyönä u̧ju̧nä̧rö̧mä̧ Josérö hue'ipinö'ca̧, yorö'iso koro juäi jȩa̧ pä'ömä amöcuädoca'a, chutä u̧cuȩtä̧ cuä̧nö̧ ki̧nö̧do. Josémä juiyo a̧'cua̧cui̧nö̧do adiunänö. ⁷ Ja̧u̧nu̧ o'ca'a u̧ru̧hua̧ irecua pä̧huä̧ rö̧jö̧nä̧ topinäjudo Josérö. Päjinäcudo: ―Tö̧ra̧ ichihuä ttöcu―. ⁸ Ja̧'hua̧nö̧ ja̧'a̧nä̧ Josémä ji̧'qui̧cha̧nö̧'i̧nä̧ kö'cächi'ocö pinödo. U̧ru̧hua̧ irecuarö pä'inödo: ―Ttö chö̧ja̧'a̧ttö̧, chu̧ru̧hua̧ ojusodenä ka̧cu̧mä̧ yorö'iso amöcuädoca'a kö̧. O'ca juiyönä u̧ju̧nä̧rö̧mä̧ ttörötä hue'ipinö. ⁹ Pode isodenämä toa'a ttöttö'inä abonänö hua̧mä̧. Chu̧ru̧hua̧mä̧ o'ca juiyönä ttörö hueipa'anä, ucurumä hueipococu pinösä. Ucumä chutä irecuajä. ¿Tta̧'a̧nö̧ jä̧cua̧'a̧ttö̧ ttö ucuru suronä jȩcha̧'a̧mä̧ Chö̧ä̧nä̧hua̧ Diosttö'inä suronä jȩä̧cuä̧huä̧ ja̧'a̧mä̧?― pä'inödo. ¹⁰ Koro mo̧ro̧'i̧nä̧, koro mo̧ro̧'i̧nä̧ 'cuäopönä jahuäjumä Josérö kucuocua'anä, jahuäju kucuocumä ä̧ju̧cuo̧cö̧ pinödo. Ja̧'hua̧ta̧nö̧ jahuäjurumä yorö'iso ji̧'qui̧cha̧nö̧'i̧nä̧ tö'cö pä'i'ocö pinödo. ¹¹ Koronö mo̧ro̧ José u̧ru̧hua̧ ojusodenä adita pä'ö doächomenä, korotö umöhuäyotömä yorö'iso toina'ado. ¹² Doächi'omenä, u̧ru̧hua̧ irecua ö̧'ca̧tä̧huä̧ta̧ttö̧ 'chu'ädi'ö pä'inäjudo: ―Tö̧ra̧ ichihuä ttöcu―. José ö̧'ca̧tä̧huä̧ta̧tä̧nä̧ 'chujädi'äcu ö̧'ca̧tä̧huä̧ta̧ ko̧'ä̧dä̧cuä̧u̧ icuipö, jopö rä'opächinödo u̧mi̧cu̧. ¹³ Ttö huochi'a'a ä̧ju̧cuo̧mȩnä̧, ö̧'ca̧tä̧huä̧ta̧ chippeyä jaropi'ö, jopö rä'opächäji―. ¹⁴ Ö̧'ca̧tä̧huä̧ta̧ ku̧mö̧nä̧ 'chujädi'äcu jaropi'ö räopächäjä̧ta̧ tojomenä, u̧mä̧tö̧ kojusodenä aditätörö huopö, päjinä̧u̧do: ―Topächätucui. Chirecuo hebreo ttö̧ja̧ i̧sa̧rö̧ i'cächinäcumä, ja̧u̧mä̧ pä̧huä̧ rö̧jä̧cu̧ ttö̧ja̧ jȩttö̧ juiyö'a̧nö̧ jö̧ jȩa̧ pä'ö ttörö. ¹⁵ Ttöcu ö̧ra̧ pä'ö doächäcua, pä̧i̧cu̧nä̧ huopäjäjusä. ¹⁶ Ja̧'hua̧nö̧ ja̧'a̧ ö̧'ca̧tä̧huä̧ta̧ yajutäcu hua'adö ku̧ni̧nä̧ju̧do, kirecuo ichome jubö päi'önä. ¹⁷ Kirecuo ichomenä, pa̧'a̧nö̧ pä'inäjudo: ―Cu̧mö̧huä̧ya̧ hebreo ttö̧ja̧ i̧sa̧ ucu cui'cächinäcumä, ttörö suronä jȩa̧ pä'ö ttörö do'ächäji. ¹⁸ Ja̧'hua̧nö̧ ja̧'a̧nä̧ ttö huochi'äcu, ö̧'ca̧tä̧huä̧ta̧ chippeyä rötipö u̧mi̧cu̧ rä'opächäji― päjinäcudo. ¹⁹ Potifar irecua, ―Ucu cu̧mö̧huä̧ya̧mä̧ pa̧'a̧nö̧ jȩpä̧ji̧― pä'ö jijähua'a ä̧ju̧cuo̧mȩnä̧, ami surächi'inäcudo. ²⁰ Ja̧'hua̧nö̧ ja̧'a̧ José u̧ru̧hua̧ Josérö 'chu'ädi'ö, cärenä ötinäcudo, cärenä päcuähuome Egipto ru̧hua̧ cärenä ötä'ijome. ²¹ Ja̧'hua̧nö̧ ja̧'a̧nä̧ Tu̧ru̧hua̧ Diosmä Josécu ö̧ja̧'a̧, adiu ppäda'attö, cärenä pȩjä̧tö̧rö̧ tta̧huä̧rä̧cuä̧huä̧ i̧sa̧ Josérö eseunu topinödo. ²² O'ca toi'önä cärenä pȩjä̧tö̧rö̧mä̧ Josérötä hue'ipinödo cärenä pȩjä̧tö̧rö̧ tta̧huä̧rä̧cuä̧huä̧ i̧sa̧mä̧. O'ca juiyönä cärenä pȩjä̧tö̧rö̧ to̧pä̧rö̧ adicuä jȩpi̧nö̧do Josémä. ²³ Cärenä pȩjä̧tö̧rö̧ tta̧huä̧rä̧cuä̧huä̧ i̧sa̧mä̧ täcö to̧pä̧ro̧cö̧ pinödo José aditähuä, Tu̧ru̧hua̧ Dios ja̧u̧cu̧ ö̧ja̧'a̧ttö̧. O'ca juiyönä José jȩö̧mä̧ adiu räopa pä'ö Tu̧ru̧hua̧ Dios ppä'ädinödo.