¹ Ja̧u̧nu̧ mo̧ro̧mä̧ 'cuäopina'a Judá ö̧jä̧hua̧tö̧ttö̧ 'cä̧i̧pä̧chi̧nö̧ mo̧ro̧mä̧ ja̧'hua̧nö̧ ja̧'a̧ Adulam ttö̧ja̧sa̧ Hira pä'ö micua̧ ö̧jo̧mȩ kä̧nö̧ 'chi̧nö̧. ² Ja̧u̧mä̧ topinö Canaán ttö̧ja̧ isajuru jahuäju kimimä Súa pä'ö micuinä̧ju̧. Ja̧u̧mä̧ jahuäjuru irecua päi'önä ȩmä̧ji̧'ca̧ jahuäjucutä ä'inö. ³ Jahuäjumä muchaju juo'inö̧'coju ki̧tti̧rö̧ uhuäbecuinäju̧. Ja̧u̧ i̧mi̧mä̧ Er pä'ö o'inä̧tö̧. ⁴ Jahuäjumä pä'äjita'anö muchaju juo'inä̧'coju kuhuäbecuäcurumä Onán pä'ö o'inäju̧. ⁵ Pä'äjita'anö ka̧ra̧ ki̧tti̧rö̧ ku̧nä̧ri̧nä̧ju̧, ja̧u̧ i̧mi̧mä̧ Sela pä'ö ottinäcu̧. Jahuätörö Quezib pä'ö micuome ttö̧ja̧cua̧'a̧ uhuäpächinä̧tö̧. ⁶ Judámä̧ i̧tti̧ ä'canä̧ i̧sa̧mä̧ ER ji̧na'a̧ irecuaru huei'nö. ki̧mi̧mä̧ mihuinä̧ju̧ tamar pä'ö. ⁷ ER Judá i̧tti̧ ä'ca̧nä̧ isä̧ ji̧na'a̧ suronä̧ jȩpi̧nö̧ TÖ̧Ä̧NÄ̧HUA̧, ä̧'ca jo̧mȩtö̧mä̧, TÖ̧Ä̧NÄ̧HUA̧MÄ̧ cuä'ö icuinä̧cu̧. ⁸ Judá-mä̧ pä'inö onörö̧: ä'i cubo'ominä̧ irecuacu ja̧'hua̧'a̧nö̧ jȩpi̧ cusäpo a̧cu̧ru̧nä̧ juajuru, ja̧'hua̧ta̧'a̧nö̧ putädi juajuru cubuominä̧ reyojuru. ⁹ Onan-mä̧ huo̧jui̧'i̧nö̧ juajutö i̧tti̧mä̧ i̧tti̧ jo̧'ca̧'a̧ pä'ömä, Ja̧'hua̧nö̧ ja̧'a̧ ubuo irecua minä̧cu̧ ä'omenä̧mä̧, ja̧u̧mä̧ jäyatä do'opinö̧ uuti rȩjȩttä̧, ja̧'hua̧'a̧nö̧ jȩpo̧ i̧tti̧cui̧cu̧ya pä'ömä̧ uborö. ¹⁰ Ja̧u̧ jȩ'i̧nö̧mä̧ surojina'a̧ TÖ̧Ä̧NÄ̧HUA̧ ä'ca jo̧mȩttö̧mä̧, TÖ̧Ä̧NÄ̧HUA̧MÄ̧ ja̧'hua̧ta̧'a̧nö̧ cuä'ö icuinä̧cu̧. ¹¹ Ja̧'hua̧nö̧ ja̧'a̧ Judá pä'inö ö̧ja̧ri̧ju̧ Tamar'rö: "Recua juocuyäji o'ca'amä cuä'o ujusudenätä̧ kä̧hui̧ chui̧tti̧ Zela, buo juoa'anä." Yecunä ji̧na̧'a̧: "Ja̧u̧'i̧nä̧ 'corujuächö'anö ja̧'a̧, u̧bu̧o̧tö̧ 'corujuotächinö ta'anö." Tamar i̧hui̧nä̧ju̧ ja̧'hua̧nö̧ ja̧'a̧ttö̧ kö'o ö̧ja̧'a̧tä̧ ki̧nä̧ju̧. ¹² Recuó 'cuäopinö o'ca'a, Súa ittiju, Judá irecua, 'corujuo'ächinä̧ju̧. A̧'cua̧ tta̧huȩcuo̧mȩ ppättädäji o'ca'a 'chi̧nö̧ ovejattö̧ ttuhuo'che 'cuittome Timnat ra̧'a̧cu̧, chutä'inä ja̧'hua̧ta̧'a̧nö̧ a̧hua̧ru̧hua̧ Hira adulam ttö̧ja̧sa̧'i̧nä̧. ¹³ Tamarömä ji'ähuinätö̧: "Ä̧ju̧cui̧, cui̧mi̧ya̧mä̧ Timnat ra̧'a̧cu̧ ichö äji ovejatö̧ ttuhuo'che 'cui'a pä'ö." ¹⁴ Ja'huäju recua jö̧nä kö̧'ca̧tä̧huä̧ta̧ cärocu icuinäju̧ ja̧'hua̧nö̧ jȩpö̧ ki'ä a̧tto̧cuä̧ta̧ attocu juä'ocuyinä̧ju̧. Enaim doächäcuähuome tta̧'a̧rö̧ pi̧nä̧ju̧, juȩnȩmä̧ ki̧'i̧pi̧na̧'a̧ Timnat ra̧'a̧ 'chä̧cuä̧huä̧mä̧cu̧. Jahuäju topinäju̧ Sela buo juoina'a̧ ja̧'hua̧nö̧ ja̧'a̧nä̧ jahuäjurumä ttiyococu pinö irecua päi'önä. ¹⁵ Ja̧'hua̧nö̧ ja̧'a̧ Judá to'omenä, jo̧'u̧ jahuajurö kidepä iyä'chä 'cuähuäju 'cua̧ra̧'a̧ pä'ö amucuädinö ki'änä̧ mu̧ȩcuä̧ta̧ ri̧yä̧cu̧. ¹⁶ Jo̧'ú̧ jahuäjurö 'chähuiö päinö: ichi ucucu chäa päösä ja̧'hua̧nö̧ ja̧'a̧nä̧ jerupinö jahuäjurumä chö̧jo̧ri̧ju̧ päömä ja̧'hua̧nö̧ ja̧'a̧ttö̧ jahuäju kädätinäcu̧: ¿ttucu cuäöttömä däjé cuiyäcu'ajusättö̧? ¹⁷ Jo̧'ú̧ ädätinäcua̧: ttö chäji̧mu ovejatö̧ttö̧ ya̧tȩ ovejarö huedäcuajujä päinäcua̧. Jahuäju kädätinäcu̧ ¿ju̧'o̧nö̧mä̧ huecuomebu päi'onä cuiyattöjé yaute pu̧jä̧ta̧? ¹⁸ Jo̧'ú̧ ädätinö: ¿Däjé pu̧jä̧ta̧ttö̧ chiyacu päcuä? jahuäju kädätinäcu̧: iyittö curahuappäcu ucú cua̧'cua̧juȩ ka̧bi̧ ja̧'hua̧ta̧'a̧nö̧ cu̧mu̧nä̧ 'chu̧cuä̧ro̧'quȩ'i̧nä̧. ja̧'hua̧nö̧ iyinö jahuäjuru ja̧'hua̧nö̧ ja̧'a̧ttö̧ äinö jahuäjucumä ääji o'ca'amä jahuäju muchaju joächinäju̧ jo̧u̧ttu̧. ¹⁹ Ja'huäjumä ä̧rä̧mi̧'ö̧ 'chi̧nä̧ju̧, pu̧jä̧ta̧ ki'änä a̧tto̧pä̧rä̧ta̧ ȩmä̧u̧ icuinäju̧ ja̧'hua̧nö̧ jȩpö̧ recua kö̧'ca̧tä̧huä̧tä̧ 'ca̧tä̧hui̧nö̧ju̧. ²⁰ Judá ä̧ji̧mu̧tö̧ cabra i̧tti̧ttö̧ hue'inö a̧hua̧ru̧hua̧ adulam ttö̧ja̧sa̧ ȩpi̧ya̧rö̧ pä'ö ja'huäju öräu o̧sa̧ ppa̧ja̧da̧rö̧ pä'ö, ja̧'hua̧nö̧ ja̧'a̧nä̧ jahuäjurumä po̧cui̧po̧cö̧ pinö. ²¹ Ja̧'hua̧nö̧ ja̧'a̧ Adulám ttö̧ja̧sa̧ jä'epö ä̧ju̧cui̧nö̧ juȩnȩ ttö̧ja̧rö̧: "¿Tȩnȩ kö̧jä̧ ttö̧ä̧nä̧hua̧rö̧ ucuo tettähuodettö kidepä iyä'chäcuähuäjumä Enaim mä̧nä̧ ra̧'a̧'i̧nä̧ kä̧jä̧ju̧?" Jahuätö pä'inätö̧: "Porö ttö̧ä̧nä̧hua̧rö̧ ucuo tettähuodettö kidepä iyä'chäcuähuäjumä tome." ²² Ja̧u̧mä̧ Judá ö̧ja̧'a̧ ppa̧'a̧chö̧ ji'ähuinö: "Po̧cui̧po̧cö̧ päjisä. Ttö̧ja̧ juȩnȩ ko̧cuä̧tö̧'i̧nä̧ pä'äjätö: Pȩnȩmä̧ kidepä iyä'chäcuähuäjumä tome." ²³ Judá pä'inö: "Ja̧'a̧tä̧ topätucui jahuäju ku̧ju̧nä̧rö̧mä̧, 'cuäopäji ä̧ju̧cu̧ ujuturutä ya̧ttä̧huä̧'cha̧'a̧cu̧. Iso päi'önätä ja̧'a̧, ttömä hue'inösä cabra i̧tti̧ mu̧ä̧ya̧rö̧, ja̧'hua̧nö̧ä̧ ja̧'a̧nä̧ ucumä po̧cui̧po̧cö̧ pinöjä." ²⁴ Pi̧yȩ 'cuäopinömä kä̧hua̧tö̧ huämetucuä jo̧mȩ tö'cöhuächi'omenä Judárömä̧ jittähuinätö̧: "Tamar cu̧jo̧ri̧ju̧mä̧ kidepä iyä'chäcuähuinä̧ju̧mä̧, ja̧'hua̧nö̧ jȩji̧nö̧nä̧mä̧ jitämä̧ muchaju ja̧'a̧." Judámä pä'inö: ²⁵ Pocu i'cächätucuiju cui'cächipätucuomenä ku tticuaju." Jahuäjurö umicu tti'cächomenä ji̧yȩtȩ huȩnȩ ki̧mi̧ya̧rö̧ hue'inä̧ju̧: Pi̧yȩ öäre pä'ömä ttörö muchaju juo'epinö ja̧'a̧." Jahuäjumä pä'inä̧ju̧: Adiu topätucui pi̧yȩmä̧ di öäre ja̧ pä'ö: sellomä, i̧sä̧ta̧mä̧ ja̧'hua̧ta̧'a̧nö̧ ttötta'camä." ²⁶ Judá ja̧u̧ topö huo̧jui̧'ö̧ pä'inö: Jahuäjumä adiutä jȩji̧na̧'a̧nä̧ ttötä ja̧'a̧ suronä jȩpi̧nö̧mä̧, ttömä chi̧tti̧ Sela irecua päi'önämä iyocö pinäsä̧." Ja̧u̧mä̧ pä'äjita'anö̧mä̧ jahuäjucumä ä'ocö pinö. ²⁷ Kuhuäbecua pä'ö jö̧ mo̧ro̧mä̧ pa̧'a̧nö̧ 'cuäopina'a, topätucuittö̧, ku̧cuä̧ba̧ jacuä ka̧cuä̧tö̧mä̧ ta̧ju̧huotö ji̧na̧'a̧. ²⁸ Jahuäju kuhuäbecu mo̧ro̧mä̧ 'cuäopina'a, ya̧tȩmä̧ u̧mö̧ rä'epinö ja̧'hua̧nö̧ ji̧yä̧cua̧ modu tta̧'ä̧rä̧jö̧mä̧ isappä tuhuappä ȩmo̧po̧'ö̧ u̧mö̧nä̧ tti̧'ä̧dö̧ kä̧nö̧ pä'inäju̧: pide ja̧'a̧ ä̧cuo̧mȩnä̧ ma̧'a̧mi̧pä̧ji̧mä̧." ²⁹ Ja̧'hua̧nö̧ ja̧'a̧nä̧ u̧mö̧mä̧ do'ädö icuinö ja̧'hua̧nö̧ ja̧'a̧mä̧ adiu topätucuittö̧, ö̧jä̧hua̧ju̧ ä̧cuo̧mȩnä̧ ma̧'a̧mi̧pi̧nö̧. Modu tta̧'ä̧rä̧ju̧mä̧ pä'inäju̧: ¡Tocu bahuecuächäcuttö cu̧mä̧nä̧mä̧!" Ja̧hua̧nö̧ ji̧no̧mȩttö̧ Fares pä'ö ottinä̧cu̧. ³⁰ Ja̧u̧nu̧ o'ca'a uböomä ma̧'ä̧mi̧pi̧nö̧, u̧mö̧nä̧ ttuhuappä ti̧'ä̧dä̧cuä̧hua̧mä̧ ja̧u̧ i̧mi̧mä̧ Zara pä'ö ottinä̧cu̧.