¹ Ja̧'hua̧nö̧ ja̧'a̧ Dina, Lea Jacob ittiju jö̧nä̧ o'cajuo'ö kiyinä̧cua̧mä̧, rä'opächinä̧ju̧ ja̧huä̧jä̧ rȩjȩnä̧ ka̧cuä̧tu̧cu̧ ki'ätecuächa pä'ö. ² Siquen, Hev ttö̧ja̧sa̧ Ha̧mo̧r ittimä ja̧huä̧jä̧ttö̧ ru̧hua̧ jö̧nä̧ kö̧mä̧, topö 'chu'ädi'ö ȩmi̧pö̧ jahuäjucu ä'inö. ³ Ja̧u̧mä̧ jahuäju Dinarö̧ rö̧ä̧nä̧ kö'quinö̧ , Jacob ittijuru, jahuäju möäyajurumä rö̧ä̧nä̧ öjö'cönä ji̧nä̧cu̧ ja̧'hua̧nö̧ jä̧cu̧ adiunä̧tä̧ ucuocuinö. ⁴ Siquenmä jä'o Hamorcu ucuocumä pä'inö: jahuäju möäyajuru chirecua päi'önä jä'epiyittö." Ja̧'hua̧nö̧ ja̧'a̧ Jacobmä ittiju Dinaru suronä jȩä̧ja̧'a̧mä̧ ä̧ju̧cui̧nö̧, Ja̧u̧ i̧tti̧mö̧mä̧ ttä̧ji̧mö̧cu̧ meje'cara̧'a̧ ka̧cui̧nätö, ⁵ ja̧'hua̧nö̧ ja̧'a̧ttö̧ Jacobmä 'coruchi'äji'ca̧ ki̧nö̧ jahuätö ttichi'ome jubö. ⁶ Siquem jä'o Hamormä Jacobcu ucuocu 'chä̧nö̧ rä'opächinö. ⁷ Jacob i̧tti̧mö̧mä̧ ja̧u̧ huȩnȩ ä̧ju̧cuo̧po̧'ö̧mä̧ meje'cara̧'a̧ttö̧ ichi'äcuähuipinätö̧. Jahuätö umätö̧mä̧ surojönä jö̧nä̧ ttö̧ja̧cui̧'ä̧ja̧'a̧tä̧ ji̧nä̧u̧. Rö̧ä̧nä̧ ttami surinä̧u̧ juhua'amä Israel ttö̧ja̧rö̧ dä'ä ttuhuähuä jö̧nä̧ Jacob ittijuru ujurucu ȩmi̧pä̧jo̧mȩnä̧, ja̧u̧ jahuämä jȩä̧cuä̧huo̧cö̧ jähuä jȩä̧jo̧mȩnä̧. ⁸ Hamormä pa̧'a̧nö̧ ucuocuinö: "Chi̧tti̧ Siquemmä cuittijuru rö̧ä̧nä̧ öjö'cönä jä̧cu̧. Ja̧u̧ru̧mä̧ irecua päi'önä iyyätucuittö. ⁹ Ujutucu jinä yotute päcui'ätucunä, cui̧tti̧mö̧cu̧ nä̧tö̧rö̧mä̧ ujuturu iyätucuitö ja̧'hua̧ta̧'a̧nö̧ ujutu ti̧tti̧mö̧ nä̧tö̧rö̧mä̧ ucutu ȩmä̧tu̧cui̧tö̧. ¹⁰ Ujutucu cu̧ja̧cuä̧cuo̧tö̧jä̧ ja̧'hua̧nö̧ jo̧mȩttö̧ ucutu pi̧jä̧ rȩjȩnä̧ cu̧ja̧cuä̧tu̧cua̧ pä'ömä huȩnȩmä̧ juiyäcua'a juhua'atäcu cuiäretucu micuänä cuiyätucua pä'ö'inä ja̧'hua̧ta̧'a̧nö̧ cui̧rȩjä̧tu̧cu̧ päi'önä cuȩmä̧tu̧cua̧ pä'ö'inä. ¹¹ Siquemä̧ pä'inö kä'o'inä̧ ja̧'hua̧ta̧nö̧ kahuärucuärö'inä̧: '' tocha pä'ö a̧ päcuätöcutömä̧, ja'hua̧ta̧nö̧ jähue pättöcucumä̧ chi̧yä̧cua̧sä̧. ¹² jäepätucuitö cuju'cätucu mipponä̧ i̧chäcuä bäreju'ö jo̧ttö̧'i̧nä, ja̧'hua̧nö̧ jo̧ttö̧mä̧ ttömä̧ chi̧yä̧cua̧sä̧ jähuepättöcumä̧, ja̧'hua̧nö̧ ja̧'a̧ttö̧ juaju muäyajurumä̧ chirecuä pä'iönätä iyätucuittö. ¹³ Jacob i̧tti̧mo̧mä̧ ädätinä̧ttö̧ Siquemrö̧'i̧nä̧ ja̧'hua̧ta̧nö̧ jä'o Hamorö̧'i̧nä̧ yaparehuinä̧tö̧, jua'amä̧ Siquemä̧ uhuotoca'a jȩö̧ta̧nö̧ ttijäcuäju Dinarömä̧. ¹⁴ juättömä̧ pä'i̧nä̧tö̧: '' pi̧yȩmä̧ ujutu tijäcuäjurumä irecua päi'önä̧ tiya pä'ömä̧ ö̧dä̧pä̧rö̧ päjure cuiohuokorömä̧; juo̧'ö̧mä̧ ujuturumä̧ surojutä ja̧'a̧ ja̧u̧mä̧. ¹⁵ pi̧yȩ jȩcu̧tö̧tä̧ ujutumä̧ a̧ pätähuotöjä̧ ucuturumä̧: ucutu'inä ujutu jo̧tä̧nö̧ cu̧nä̧pä̧'ä̧rö̧ päjure cuihohuätucutötä ja̧'a̧cuä̧, ja̧'hua̧nö̧ ja̧'a̧ttö̧ ucutu ö̧mä̧tö̧ O'cato'iönä̧ cu̧nä̧ pä̧rö̧ päju̧re cuihuocuätöcutömä̧, ¹⁶ ja̧'hua̧nö̧ jo̧ttö̧mä̧ ujutu titti̧mo̧rö̧mä̧ nä̧tö̧rö̧mä̧ ti̧yä̧cuä̧u̧cuä̧, ja̧'hua̧ta̧nö̧ ujutu'inä cui̧tti̧mo̧tö̧cu̧ nä̧tö̧rö̧mä̧ tȩmä̧cuä̧tö̧jä̧, ja̧'hua̧'a̧nö̧ jo̧ttö̧mä̧ ucutucumä̧ i̧nä̧yotöte ö̧nä̧tä̧ tähuotujä̧. ¹⁷ ja̧'hua̧nö̧ ja̧'a̧nä̧ ucutu cunä̧pä̧rö̧ pä̧ju̧re cuihuocuätuhuoca'a jo̧ttö̧mä̧, tijäcuajurutä ȩmi̧po̧ ti̧cuä̧cuä̧tö̧ja̧. ¹⁸ Tti̧huȩnȩ jä̧ji̧mä̧ micuäunä jȩpi̧nä̧tö̧ Hamor'rö'inä ja̧hua̧ta̧nö̧ i̧tti̧ Siquem'rö̧'i̧nä̧. ¹⁹ Ubo mu̧ä̧ya̧mä̧ jurunätä̧ jȩpi̧nö̧ pättäjimä, ja̧u̧mä̧ Jacob ittijuru öjö'cönä jinäcu, ja̧u̧mä̧ jä'o ojusodettömä o'cato'inä ttucuotinä̧cu̧. ²⁰ Hamor i̧tti̧ Siquemcu̧ chi̧nä̧ttö̧ ötähuiyä apate ä'cacu ttucuocua pä'ö ötahuiyä tä̧mu̧cu̧, pä'inä̧ttö: ²¹ "Pitö u̧mä̧tö̧mä̧ ujutucumä huȩnȩ 'i̧nä̧ juiätö ja̧'hua̧nö̧ ja̧'a̧ttö̧ ja̧'a̧tä̧ topätucuitö ti̧rȩjä̧nä̧ ttö̧jo̧cua̧'a̧nä̧ ja̧'hua̧ta̧nö̧ ttiäre'inä micuänä ttiyä'cha'anä, jueönämä ujutumä ti̧rȩjä̧'i̧nä̧ rö̧a̧'a̧ jahuätörömä. Tȩmä̧cua̧'a̧nä̧ jahuätö tti̧tti̧mu̧ nä̧tö̧ttö̧ tirecua pä'iönä, ja̧hua̧ta̧'a̧nö̧ ujutu'inä ttittijuru tiyäcua'anö ²² Iso päi'öna jitötä ttö̧jö̧'a̧nö̧ ttö̧jö̧ttö̧tä̧ jitucu tö̧ja̧'a̧nä̧ ja̧'a̧tä̧ tottäcuotö ja̧'hua̧nö̧tä̧ ji̧nä̧ yotöte jö̧nä̧ tö̧jä̧cuo̧tö̧jä̧: ujututtu o'catoi'önä u̧mä̧tö̧ ttö̧dä̧pä̧rȩ päjure 'cui̧'o̧cuo̧tö̧ jö̧'ttö̧mä̧, jitötä ttö̧dä̧pä̧rȩ päjure 'cui̧'o̧cuo̧tö̧ ttö̧jö̧'a̧nö̧. ²³ Täji päcayö̧ ja̧'hua̧ta̧'a̧nö̧ o'cajuiyönä ttu̧ju̧nä̧rö̧'i̧nä̧, o'catoi'önä i̧so̧ca̧nä̧ tto'epu ku̧nu̧ ttä̧ji̧mu̧mä̧, ¿ujutu tiäre mä̧cö̧ jä̧cua̧'a̧? Ja̧'hua̧nö̧ jö̧ttö̧mä̧ jahuätucu adihuomenä tucuocu'anö ja̧'a̧, ja̧'hua̧nö̧tä̧ ujutucu ttö̧jä̧cuo̧tö̧." ²⁴ O'catoi'önä ötahuiyä ttö̧ja̧mä̧ ä̧ju̧cui̧nä̧tö̧ Hamor ja̧'hua̧ta̧'a̧nö̧ i̧tti̧ Siquemrö̧'i̧nä̧. O'catoi'önä u̧mä̧tö̧mä̧ ttö̧dä̧pä̧rȩ pöjure 'cui'ocuotöä pinätö̧. ²⁵ Huäbodäcuä mo̧ro̧ päi'omernä, ji̧nä̧ ubara ttuttä'anä, Jacob i̧tti̧mu̧ ta̧jú̧, Dina ki̧jä̧hua̧tö̧'i̧nä̧, Simeón ja̧'hua̧ta̧'a̧nö̧ Levi'inä, ya̧cu̧pu̧nä̧ ttucurä'chu 'chu'ädö ötahuiyä ra̧'a̧ 'chi̧nä̧tö̧ huȩnȩ juiyönä ja̧'a̧ pä'ö, ja̧'hua̧nö̧ 'chä̧nö̧ ötahuiyä tö̧ja̧rö̧ cuä'äu icuinätö. ²⁶ Ja'huätömä cuä'äu icuinätö̧ ttucurä'chunä Hamor'rö ja̧'hua̧ta̧'nö̧ i̧tti̧ Siquemrö'inä. ²⁷ korotö Jacob i̧tti̧mu̧ ötahuiyänä doächö cuä'ö icuinätö̧ ja̧'hua̧ta̧'a̧nö̧ ttäre'inä ȩmi̧pi̧nä̧tö̧, ötahuiyä ttö̧ja̧ ttahuaruhuajurö ttucuotocaja̧ttö̧. ²⁸ Ttȩmi̧pi̧ni̧yä̧u̧ oveja̧tö̧rö̧'i̧nä̧ burrotö̧rö̧'i̧nä̧ ja̧'hua̧ta̧'a̧nö̧ o'cajuiyönä ötahuiyä jäyänä ka̧cu̧'i̧nä̧. ²⁹ Ja̧'hua̧ta̧'a̧nö̧ o'cajuiyönä ttiäre ri̧ȩnä̧ micuäuje'inä, tti̧tti̧mu̧rö̧'i̧nä̧, tti̧rȩcua̧mu̧rö̧'i̧nä̧ jahuätö 'chuädinätö̧. jahuätö ȩmi̧nä̧tö̧ o'cajuiyönä ttojusodenä ka̧cu̧'i̧nä̧. ³⁰ Jacob päi̧nä̧u̧ Simeónrö̧'i̧nä̧ ja̧'hua̧ta̧'a̧nö̧ Levirö'inä. Ucutu jȩ'cuä̧tu̧cu̧mä̧ ttörö ri̧ȩnä̧ huȩnȩ́ jö̧nä̧ jȩpä̧tö̧jä̧, cananeos'inä, ferezeos'inö ju̧huä̧jä̧nä̧ kä̧tö̧mä̧ totta pe'ömä ttö̧ji̧'qui̧yä̧cua̧sä̧. Ttö chahuarähuä juiyo ji̧'qui̧cha̧ ja̧'a̧. Jahuätö ji̧nä̧ yo̧mȩtȩ pä'iö ttörö ttörohuahua'anö, ja̧'hua̧nö̧ ja̧'a̧ttö̧ cuä'ö tticua peötä hua̧sä̧ ttörö'inä chahuaruhuärö'inä. ³¹ Ja̧hua̧nö̧ ja̧'a̧nä̧ Simeón'inä Levi'inä ttädätinäcu̧: ¿Siquemmä ujutu tahuaruhuajurö toiya'anö ji̧na̧a̧ quidepä iyähuäju ju̧nä̧mä̧?