¹ Diosmä Jacobrö pä'inö̧: A̧rä̧mi̧'ö̧ Betelra̧'a̧ täi, ja̧'hua̧nö̧ ja̧'a̧ ju̧huȩnȩtȩ cu̧ja̧jä̧. Ju̧huȩnȩtä̧ Dios ku icu icu Diosrö iyähuome aditi, cuböo Esaúttö tö'ipö cui̧huo̧mȩnä̧ ucuru i̧jȩcui̧nörö. ² Ja̧'hua̧nö̧ ja̧'a̧ Jacobmä pä'inö ojusodenä̧ ka̧cuä̧tö̧rö̧'inä ja̧'hua̧ta̧'a̧nö̧ o'catoi'önä chutäcu ka̧cuä̧tö̧rö̧'inä: pporädö ku̧nä̧tu̧cui̧ korotö ttö̧ä̧nä̧huo̧tö̧ ucutucu ka̧cuä̧tö̧rö̧mä̧, cua̧mö̧nä̧ pa̧ja̧tö̧ tucäu icu cu̧'ca̧tä̧huä̧ti̧yu̧tu̧cu̧'inä pärou icuätucui. ³ Ja̧'hua̧nö̧ ja̧'a̧ rä'opö Betelra̧'a̧cu̧ 'chatächätucua. Ttömä ju̧huȩnȩtä̧ ku icu Diosrö iyähuome chaditäcua̧sä̧, cha̧'cua̧ tta̧dȩcu̧ mo̧ro̧ ädätinö̧rö̧, ja̧'hua̧ta̧'a̧nö̧ cuedächome pönä ttötäcu kä̧'i̧jö̧rö̧." ⁴ Ja̧'hua̧nö̧ ja̧'a̧ttö̧ Jacobrömä korotö ttö̧ä̧nä̧huo̧tö̧ o'catoi'önä̧rö̧ jitötä ttu̧ju̧nä̧rä̧u̧rö̧mä̧ iyinä̧tö̧ ja̧'hua̧ta̧'a̧nö̧ o̧bö̧ ttä̧ja̧hui̧yä̧nä̧ rö̧jö̧'inä. Jacob Siquemttö̧mä̧ tö'cönänö encina dau kada'ca 'turu icuinö. ⁵ Yabonö tti̧'cha̧'a̧nä̧, ju̧huȩnȩ jäyänä ka̧cu̧ ötahuiyänä ka̧cuä̧tö̧rö̧ Diosmä yettecunä jȩpi̧nö̧, ja̧'hua̧nö̧ jo̧mȩttö̧ Jacob i̧tti̧mö̧rö̧mä̧ ru'ocotö pinä̧tö̧. ⁶ Ja̧'hua̧nö̧ ja̧'a̧ttö̧ Jacobmä Luz ötahuiyära̧'a̧ttö̧ rȩbȩhui̧pi̧nö̧ (Ju̧huȩnȩmä̧ Betel pä'ö'inä ottinome) ja̧u̧ ötahuiyämä Canaán rȩjȩnä̧ huȩji̧nö̧, Chutä'inä, ja̧'hua̧ta̧'a̧nö̧ ja̧u̧tä̧cu̧ ka̧cuä̧tö̧ o'catoi'önäcu̧. ⁷ Ja̧u̧mä̧ i̧sa̧rö̧ ku icu iyähuome aditinö̧ ju̧huȩnȩ aditäjomemä Betel pä'ö o'inö, isopäi'önä Diosmä churutä juhuorö i̧jȩcui̧na̧'a̧ttö̧, uböottö tö'ipö i̧huo̧mȩnä̧. ⁸ Rebecarö to̧pä̧rö̧ tta̧'ä̧rä̧'i̧jä̧ju̧mä̧ Deboramä 'corujuo'ächinä̧ju̧. Jahuäjumä Betelttömä dȩa̧'a̧nä̧nö̧ Encina dau dȩa̧'a̧ rȩ'ä̧dö̧ tticuinäcua̧, ja̧'hua̧nö̧ ji̧no̧mȩttö̧ Alón Bacut pä'ö ottinome. ⁹ Jacob Padán Aramra̧'a̧ttö̧ ichomenä, Diosmä pä'äjita'anö i̧jȩcu̧, adiunä ji̧ya̧rö̧ pä'ötä päinä̧cu̧. ¹⁰ Diosmä ja̧u̧rö̧ pä'inö: "Ucu cuimimä Jacob pä'ö cuimicuä'ija'anä Jacob pä'ömä micuocö cuä̧cua̧jä̧. Cui̧mi̧mä̧ Israel pä'ö cuimi̧cuä̧cua̧jä̧." Ja̧'hua̧nö̧ ja̧'a̧ttö̧ Diosmä Ja̧u̧ i̧mimä Israel pä'ö oinä̧cu̧. ¹¹ Diosmä̧ ja̧u̧rö̧ pä'inö: '' tötäjä̧ ja̧'a̧ Dios O'cajuiyunä̧ ju̧rö̧cuä̧mä̧. yabonö recuätö jonä̧ yoäju 'cä̧cuä̧tö̧cui̧. jitöte ttöjä̧ jo̧nä̧ rä'topähuotö juätötumä̧ ja̧'hua̧ta̧nö̧ ppa'ächätö ttö̧ja̧'i̧nä̧ ttichäcuotö ucutumä̧, ja̧'hua̧ta̧nö̧ cui̧tti̧mo̧tö̧mä̧ ruhuotö'inä̧ rä'topähuotö. ¹² Cui̧rȩjä̧tö̧cu̧ Abrahamrö̧'i̧nä̧ Isaacrö'inä̧ chi̧yi̧nä̧jä̧nä̧mä̧, chi̧yä̧cuä̧jä̧ ucurumä̧. ja̧u̧nö̧ O'ca'amä̧ ja̧'hua̧ta̧nö̧ cui̧tti̧mo̧rö̧'i̧nä̧ chi̧yä̧cuä̧sä̧ tti̧rȩjä̧mä̧.'' ¹³ Diosmä̧ 'cha'achinö̧ uhuocuä jomecu̧. ¹⁴ Jacobmä̧ inä̧oyu bärejutö 'cä̧tö̧ rutinö Dios ucuocuäjo̧mȩmä̧, i̧nä̧yu 'cätä̧cuä̧ oyu. acuähuoya ttiya pä'ö joya totopinö ja̧u̧mȩ ja̧'hua̧ta̧nö̧ a̧dȩhuo̧ya'inä totopinö ja̧'hua̧ta̧nö̧ ja̧u̧tä̧ huä̧mȩmä̧. ¹⁵ Jacobmä̧ Dios chutä ucuocuäjämemä̧ juenȩmä̧ i̧mi̧mä̧ oinö̧ Betel pä'ö. ¹⁶ Jahuätö i̧cui̧nä̧tö̧ Betel'ttö kä̧mä̧dö̧. Efratara'acu jinä o'to ki̧'i̧pi̧nä̧'a̧, ja̧'hua̧nö̧ ja̧'a̧nä̧ Raquel'rö ku̧cuä̧ba̧ baracuächi'inä̧'a̧ kucuäbecua pä'ö. Kucuäbecuomenä juiyo ra̧huȩpi̧'ji̧nä̧cua̧. ¹⁷ Ja̧'hua̧nö̧ päi'omenämä jahuäjuru tta̧'ä̧rä̧ju̧mä̧ päinä̧ju̧: "Yecuecuä, jitämä kä̧ra̧ cui̧tti̧rö̧ cu̧ju̧nä̧rä̧cua̧ju̧jä̧." ¹⁸ 'coru juoächö'cä̧nö̧ röji juäjoppanä jahuäju o'inä̧ju̧ Benoni pä'ö, ja̧'hua̧nö̧ ja̧'a̧nä̧ jä'omä o'inö Benjamín pä'ö. ¹⁹ Raquel 'coru juoächinä̧ju̧ ja̧'hua̧nö̧ ja̧'a̧ttö̧ Efrata mä̧nä̧ jäyä rȩ'ä̧dö̧ tticuinä̧cua̧ "jahua'amä,jitämä Belén" . ²⁰ Jacobmä jahuäju huajomȩmä̧ i̧nä̧ttö̧ 'ca̧ttö̧ huä̧ni̧nö̧. Jahua'amä jitä mo̧ro̧ jobu huo̧jä̧cua̧'a̧ Raquel huajome pä'ö. ²¹ Israel juhuä'a yabocutä i̧hui̧nö̧ ja̧'hua̧nö̧ ja̧'a̧ kä̧bä̧di̧nö̧ ttä̧ji̧mu̧rö̧ to̧pä̧rö̧ ju'tojunä to̧'ä̧rä̧cuä̧'cuä̧'ca abonänö. ²² Israel ju̧huä̧jä̧nä̧ ö̧jo̧mȩnä̧mä̧, Rubén ä'inö Bilhacu jä'o karaju irecuacu. Ja̧hua̧nö̧ jo̧mȩnä̧ Israel huo̧jä̧chi̧'i̧nö̧. Jitä Jacobmä ku̧nä̧ri̧nö̧ i̧tti̧mu̧ docenö huotörö. ²³ Leattö i̧tti̧mu̧mä̧ ji̧na̧'a̧ Rubén, a̧cuo̧mȩnä̧ Jacob i̧tti̧ ji̧na̧'a̧, ja̧'hua̧ta̧'a̧nö̧ Si̧mȩ'o̧n'i̧nä̧, Levi'inä, Juda'inä, Isacar'inä, Zebulón'inä. ²⁴ Raquelttö i̧tti̧mu̧mä̧ ji̧na̧'a̧ José ja̧'hua̧ta̧nö̧ Benjamín. ²⁵ Bilhattö i̧tti̧mö̧, Raquel kumuhuäyäjuttu, ji̧na̧'a̧ Dan ja̧'hua̧ta̧'a̧nö̧ Neftalí. ²⁶ Zilpa ki̧tti̧mö̧, Lea ku̧mu̧huäyajuttu, ji̧na̧'a̧ Gad ja̧'hua̧ta̧'a̧nö̧ Aser. Pitö o'catoi'önä Jacob i̧tti̧mö̧ ji̧na̧'a̧ uhuäpächinätö̧ Padán Aramttö̧. ²⁷ Jacob jä'o Isaac'rö topu 'chi̧nö̧, Mamre ra̧'a̧ Quiriat Arba ötahuiyäcu (juȩnȩmä̧ Hebróntä ja'a), Abraham'inä Isaac'inä ttö̧ji̧no̧mȩ. ²⁸ Isaac ku̧nä̧ri̧nö̧ ciento ochenta a̧'ȩ́ jo̧menä. ²⁹ Isaac recuo ki̧nö̧'ca̧ 'cörujoächinö, ja̧'hu̧nö̧ ja̧'a̧tö̧ i̧tä̧mu̧mi̧nä̧cu̧ ji̧nä̧ yo̧mȩtȩ päiönö, recuo ö̧ja̧'a̧ttö̧ bu̧o̧sa̧ joächinö. I̧tti̧mu Esaú'inä Jacob'inä ttu'turinäcu̧.