¹ Ja̧'hua̧ta̧'a̧nö̧ Jacob mä i̧'cha̧ pä'acutä 'chi̧nö̧, ja̧'hua̧nö̧ i̧'cha̧'a̧ Dios umöhuäyotö ángeles ttu̧'o̧cui̧'i̧nä̧cu̧. ² Jacob jahuätörö topömä pä'inö: Pȩnȩmä̧ Dios ö̧jo̧mȩ ja̧'a̧, " Ja̧'hua̧nö̧ ja̧'a̧ttö̧ ju̧huȩnȩmä̧ Mahanaim pä'ö o'inö. ³ Jacobmä ä'canä huȩnȩ ȩcuä̧ ttö̧ja̧rö̧ hue'inö uböo Esaú Edóm rȩjȩttö̧ Seir pä'ö micuom e ö̧ja̧'a̧cu̧. ⁴ Ja̧u̧mä̧ jahuätörö hue'ömä pä'inö: "Pi̧yȩ jicuähuätucuaja chu̧ru̧hua̧ Esaúrömä: Pi̧yȩ ja̧'a̧ cu̧mö̧huä̧ya̧ Jacob päömä: Labáncu kä̧'i̧jö̧sä̧ ja̧'hua̧nö̧ jo̧mȩttö̧ jurunä ppa̧dä̧chi̧'ö̧ juiyönä jä̧'i̧ja̧'a̧ jitä jubö päi'önä. Ttömä ku̧nä̧rö̧sä̧ pä̧cä̧yu̧rö̧'inä, bö̧rö̧ba̧rö̧'inä, ovejastö̧rö̧'inä, ttumöhuäyotörö'inä ja̧'hua̧ta̧'a̧nö̧ ttumöhuäyotö nä̧tö̧rö̧'inä. ⁵ Ttömä pi̧yȩ huȩnȩ hue'äjisä chu̧ru̧hua̧rö̧mä̧, adiu amöcuädö topö ppädäcua'anö." ⁶ Huȩnȩ ȩcuä̧ ttö̧ja̧mä̧ Jacob ö̧jo̧mȩ ppä̧'a̧chi̧'ö̧ pä'inä̧ttö̧ ja̧u̧rö̧: '' cubuo Esaú ö̧jä̧'a̧ i̧hu̧ä̧jä̧tö̧jä̧. Ja̧u̧mä̧ i̧chö̧ ucurö toa pä'ö cuatrocientos-nö̧ huottöcu chutäcu 'cä̧cuä̧tö̧cu̧.'' ⁷ Ja̧'hua̧nö̧ ja̧'a̧ Jacob mä̧ a̧cua̧'tä̧nö̧päi'ö Rö̧ȩi̧nä̧ yeähuipu. Ä'ähua'ariyänä̧ chutäcu ka̧cuä̧tö̧cu̧römä̧ todärejo̧mȩnä̧ kä̧'cho̧po̧'ö̧ po̧'i̧nö̧ ja̧hua̧tä̧nö̧ Ovejatö̧ pächunö̧ hueächätörö'inä̧ camellotö̧rö̧'i̧nä̧. ⁸ Ja̧u̧mä̧ pä'inö: '' Ja̧u̧ Esaú ya'ate ä'ähuäränätä̧ röhuäjuö ichutömä̧, ja̧hua̧nö̧ jö̧tö̧mä̧ koraränä̧ ka̧cuä̧tö̧mä̧ ttötipächä pä'ö ja̧'a̧.'' ⁹ Ja̧'hua̧nö̧ ja̧'a̧ pä'inö Jacobmä̧: '' chä̧do̧ Abraham 'inä̧ jäo Dios ja̧'hua̧ta̧nö̧ Isaac jäo Dios, Ja̧u̧ TÖ̧Ä̧NÄ̧HUA̧MÄ̧, pä'äi: ''hui̧rȩjä̧rä̧'a̧ pä̧'a̧chi̧ huäcuäruhuä tö̧jo̧cuä̧ ttötä ppädädäcuäjä̧ cuäcuäruhuärö'inä̧. ¹⁰ ttömä̧ chuju'coku ja̧'a̧nä̧ ucumä̧ re'e cujä̧cu̧sä̧ törömä̧ pi̧yȩ O'cajuiyunä̧mä̧ adiunämä̧ i̧jȩ pä̧ji̧yä̧ cu̧mo̧hu̧äyä̧rö̧mä̧. tömä̧ surö chi'ta'canä̧tä̧ cuäopinö̧sä̧ poto Jordán ajemä̧ ja̧'hua̧nö̧ ja̧'a̧ttö̧ jitämä̧ todäre jo̧mȩnä̧ ku̧nä̧rö̧sä̧ ä'ähuäariyämä̧. ¹¹ Re'topittö, chubu'o Esaú ujuruttu chö̧ji̧pu̧nä̧, ja̧u̧ru̧ yedecunä jä̧cu̧sä̧, ichi'ö rohuäu icuättö pä'ö chi̧tti̧mu̧ tta̧ju̧tu̧cu̧. ¹² ja̧'hua̧nö̧ ja̧'a̧nä̧ ucutä pä'inöjä̧: 'TTÖTÄ adiunä jö̧nä̧ jȩchä̧cua̧jä̧. TTÖTÄ jȩchä̧cua̧sä̧ cuahuäruhuä'cotörö'inä aje rö'oto rȩba̧ 'cuarö̧nä̧ ttirehuächönä, pa̧ja̧cuo̧mȩ'i̧nä̧ juiyönä." ¹³ Jacob ja̧u̧ yodo ju̧huȩnȩtä̧ ki̧'i̧pi̧nö̧. ja̧'hua̧nö̧ ja̧'a̧ttö̧ ä̧ji̧mu̧ u̧ju̧nä̧rä̧u̧ttu̧ ȩmi̧nö̧ ubu'o Esaú'ru mippo'önä iya pä'ö, ¹⁴ doscientas cabras jo̧mȩnä̧, veintenö umä̧ttö̧ cabrios jo̧mȩnä̧, doscientos ovejas jo̧mȩnä̧ ja̧'hua̧ta̧nö̧ veinte carneros jo̧mȩnä̧, ¹⁵ treintanö̧ camellas jo̧mȩ atateja'inä ä̧cuä̧'u̧ tti̧tti̧mu̧cu̧, cuarentanö pä'cäyö̧ jo̧mȩ ja̧'hua̧ta̧nö̧ dieznö torotö̧ jo̧mȩnä̧, veintenö asnas jo̧mȩ ja̧'hua̧ta̧nö̧ dieznö burros jo̧mȩ. ¹⁶ Pitörömä ja̧u̧mä̧ iyinö umuhuäyotö ttu̧mu̧nä̧, ja̧u̧mä̧ yotucu isasa punämä iyinö umuhuäyotörötä: "Ttö chä'canä tätucuijó ja̧'hua̧nö̧ ja̧'a̧nä̧ otonänö punä ocuipätucuajá jisate punämä. ¹⁷ Ja̧u̧mä̧ huo̧juȩti̧u̧nö̧ ä̧cuo̧mȩnä̧ u̧mu̧huä̧ya̧rö̧, pa̧'a̧nä̧ pä'ö: "Chuböo Esaú ucru po̧cui̧pö̧ pa̧'a̧nö̧ jä'epöttömä: ¿Di jä̧ttö̧ ucu cu̧ru̧hua̧mä̧? ¿To cui̧'chä̧? ¿Tide ä̧ji̧mu̧jä̧ttö̧ ucu cuä'canä 'chä̧tö̧mä̧? ¹⁸ Ja̧'hua̧nö̧ jäepomenämä cuädätäröjá̧: Ja'huätömä ucutä cu̧mu̧huä̧ya̧ Jacob ä̧ji̧mö̧. Ja'huätömä u̧ru̧hua̧ Esauru mippoönä i̧yä̧u̧ ja̧'a̧. Topi, ja̧u̧'inä̧ ichö ujutu to'ca'anä." ¹⁹ Jacob ja̧u̧nu̧ o'ca'a todäre päi'önä 'chä̧tö̧rö̧'i̧nä̧ ji'ähuinö, huäbodäcuä päi'önä 'chä̧tö̧rö̧'i̧nä̧ ji'ähuä'chinätö ja̧'hua̧ta̧'a̧nö̧ o'ca'anä päyunu 'chä̧tö̧rö̧'i̧nä̧. Pä'inö: "Ucutu'inä ja̧u̧ päji ta'anö päcuätucuajá Esaúcu cu'ätecuächätucuomenämä. ²⁰ Pa̧'a̧no̧ päcuätucuaröjá̧: Cu̧mu̧huä̧ya̧ Jacob'inä ujutu to'ca'anö ichö. "'Jua'amä amucuädö pä'inö: Ö̧'ä̧i̧ pȩjä̧mi̧pö̧nä̧ jȩchä̧cua̧ pi̧yȩ chä'canä chȩpö̧ mippoönä iyähuä iyö. Ja̧'hua̧nö̧ jȩchö̧ o'ca'atä, dodächomenä tȩä̧huä̧cua̧sä̧ 'cua̧ra̧'a̧." ²¹ Ja̧'hua̧nö̧ ja̧'a̧ttö̧ mipoönä iyähuämä ä'canä hue'inö. Ja̧u̧nu̧ yodo katätä ki̧'i̧pi̧nö̧ ä'ähuaränä ²² Ji̧nä̧ yodó ja̧'a̧nä̧ Jacob porächiö i̧rȩcua̧mu̧ ta̧ju̧rö̧'i̧nä̧ hueö adicuä ttö̧ja̧ nätö̧rö̧ ta̧ju̧rö̧'i̧nä̧ ja̧'a̧hua̧ta̧'a̧nö̧ oncenö huotörö i̧tti̧mu̧rö̧'i̧nä̧ oipinö. Jacob hueinö re'tönänö jo̧mȩnä̧ 'cuätto'inä ajé päcuädä̧jä̧nä̧. ²³ Ja̧'hua̧nö̧ 'cuä'o ä̧ji̧'ca̧ o'cajuiyönä u̧ju̧nä̧rö̧ hueinö 'cuatte pejipa pe'ö. ²⁴ Jacob katä ki̧i̧pi̧nö̧ ya̧tȩ ttö̧ja̧sä̧cu̧tä̧ rohuähuö moró̧ joomebu. ²⁵ Ttö̧ja̧sä̧ ttö̧ȩpä̧rä̧chi̧'i̧nö̧ cuä'ö icuiyönä jä̧cu̧, ja̧'hua̧nö̧ ji̧yä̧cu̧ Jacob äcänä cuäinö. Ijiyuhuächiönä Jacob äcänä ijiyudinäcu̧ jo̧u̧cu̧ örohuähuomenä. ²⁶ Ya̧tȩ ttö̧ja̧i̧sä̧ päinö: Tidipächa'anä ja̧'a̧tä̧ topittö, täcö moró̧ päi'ia. Jacob ädätinäcu̧: Ticuicha'anämä ja̧'a̧tä̧ tochococujä adiunä pä'ö cuiyomebu ttörö. ²⁷ Ja̧u̧ ttö̧ja̧sa̧mä̧ pä'inö: ¿Tocu micua̧jä̧ttö̧ cui̧mi̧mä̧?Jacob pä'ö micua̧sä̧ pä'ö ädätinö. ²⁸ Ja̧'hua̧nö̧ ja̧'a̧ttö̧ ja̧u̧ ubo Jacobrö pä'inödo: ―Cui̧mi̧mä̧ Jacob pä'ö mi̧cuo̧cö̧jä̧. Jitämä ucumä Tö̧ä̧nä̧hua̧ Dioscu'inä, ttö̧ja̧cu̧'i̧nä̧ cu̧ju̧nä̧rä̧cuä̧huo̧mȩnä̧ cujuruhuäja'attö, Israel pä'ö cui̧mi̧cuä̧cua̧jä̧―. ²⁹ Jacobmä ja̧u̧rö̧ jä'epö ä̧ju̧cui̧nö̧: Cuimi ji'ähuittö, päcu ja̧u̧mä̧ ädätinä̧cu̧, ¿Tta̧'a̧nö̧ pä'ö chimi jä̧cuȩpä̧rä̧cu̧sä̧ttö̧? Ja̧u̧nu̧ o'ca'amä juhuorötä adiunä ji̧yä̧rö̧ pä'ötä päinä̧cu̧. ³⁰ Jacob ju̧huȩnȩ peniel pä'ö o'inö pa̧'a̧nö̧ pä'ö, Dioscumä pä̧tȩcuä̧cuä̧huä̧nö̧ topäcuähuöjätöjä ja̧'hua̧nö̧ jo̧mȩnä̧ surojö jȩpo̧cö̧ päji 'cua̧rö̧nä̧tä̧ jȩä̧jä̧cu̧sä̧. ³¹ Kä̧hua̧mä̧ rä'o'inö Jacob ji̧nä̧ Peniel pä'ö micuome 'cuäopa'anä. Ja̧u̧mä̧ ko̧ppȩ ko̧ppȩ 'chi̧nö̧ äcä pporächi'äjäcu. ³² Ja̧'hua̧nö̧ jo̧mȩttö̧ jitä mo̧ro̧ jubö päi'önä, Israel ttö̧ja̧mä̧ cuocotö äcä huäborä jo̧mȩmä̧, juhua'amä ja̧u̧ ttö̧ja̧sa̧mä̧ ju̧huȩnȩ jisome Jacob äcä huäborä jo̧mȩ pporächi'önä jȩi̧no̧mȩttö̧.