¹ Raquelmä Jacobrö ki̧tti̧mö̧rö̧ uhuäbecu kiyö juiyönä jä̧cua̧mä̧, kuböarö kö'cocoju pinä̧ju̧. Jahuäjumä Jacobrö pä'inäju: muchaju juo'epittö ja̧'hua̧nö̧ jo̧ca̧'a̧ttö̧ 'corujuodächäcuajusä." ² Jacobmä Raquel rö̧ä̧nä̧ ra̧huä̧ri̧pi̧nö̧. Ja̧u̧mä̧ pä'inö: ¿Ttömä cui̧tti̧mö̧ tocunä jȩpi̧nö̧ Dios ja̧'a̧nö̧ hua̧sä̧? ³ Jahuäjumä pä'inä̧ju̧: Topittö, Juȩnȩ kä̧ju̧ chumöhuäyaju Bilha. Jahuäjucu ä'i, jahuäju kihue'quiyönä pä̧mä̧dö̧ ppo̧'ä̧tö̧rö̧ kuhuäbecuäcua'anö, jahuäjunätä̧ chi̧tti̧mö̧rö̧mä̧ chu̧ju̧nä̧rä̧cua̧'a̧nö̧." ⁴ Ja̧'hua̧nö̧ ja̧'a̧ttö̧ ku̧möhuäyajurö hue'inä̧ju̧ irecua päi'önä, ja̧'hua̧nö̧ ja̧'a̧ Jacob jahuäjucu ä'inö. ⁵ Bilha muchaju juojinäju̧ jahuanö ja'attö Jacob'rö ya̧tȩrö̧ i̧tti̧cu̧ iyinäju. ⁶ Ja̧'hua̧nnö ja̧'a̧ Raquel pä'inä̧ju̧: "Diostä ttörö re'topu ppädäcuasä. Ja̧u̧tä̧ ttö jueönä jä̧dȩpä̧rö̧ ä̧ju̧cu̧mä̧ ja̧'hua̧nö̧ ja̧'a̧ttö̧ ya̧tȩ chi̧tti̧rö̧ iyäcuasä." ja̧'hua̧nö̧ jä̧cua̧ jahuäju o'inä̧ju̧ ja̧u̧ imimä Dan pä'ö. ⁷ Raquel 'cumuhuäyaju Bilha, pä'äjita'anö muchaju juo'ö Jacobttö i̧tti̧cui̧nä̧ju̧ ta̧ju̧ pä'inä. ⁸ Raquel pä'inäju̧: "Chubuarö pä̧i̧cu̧nä̧ chi̧tti̧cua̧ pä'ö pädächönä jä̧i̧ja̧'a̧ttö̧ iso jö̧nä̧ jä̧cua̧sä̧." Ja̧'hua̧nö̧ ja̧'a̧ttö̧ jahuäju o'inä̧ju̧ ja̧u̧ i̧mi̧mä̧ Neftalí pä'ö. ⁹ Lea jua'a yabocu ki̧tti̧cu̧ jui̧yö̧nä̧ jä̧cua̧, hue'inäju ku̧mu̧huäyaju Zilparö, Jacob irecua päi'önä. ¹⁰ Zilpa, Lea kumuhuäyaju, Jacob i̧tti̧rö̧ uhuäbecuinäju. ¹¹ Lea pä'inäju: "¡Pomä adiunätä ja̧'a̧!" ja̧'hua̧nö̧ä̧ ja̧'a̧ttö̧ ojinäcu̧ Gad pä'ö. ¹² Ja̧'hua̧nö̧ ja̧'a̧ttö̧ Zilpa, Lea kumuhuäyajumä, Jacob ä̧cuo̧mȩnä̧ i̧tti̧ o'ca'anä i̧sa̧rö̧ uhuäbecuinäju. ¹³ Lea pä'inäju̧: "¡Cha̧'cua̧ adihuäcuasä! nä̧tö̧ muäyotömä ka̧'cua̧ adihuäcua pättäcuajusä." Ja̧'hua̧nö̧ ja̧'a̧ttö̧ jahuäjumä o'inäju Aser pä'ö. ¹⁴ Rubén räopinö trigo ttö̧ca̧ta̧tö̧ moró̧ juattö ttu̧cuȩ ku̧nä̧hua̧'a̧ttö̧ cuo̧cu'i̧ pi̧nö̧ ȩ'u̧ oba mandrágora päö micú. Juo̧'u̧ i'cächö iyinö a̧jú̧ Learö. Ja̧'hua̧nö̧ ja̧'a̧ Raquel päinäju̧ Learö: cui̧tti̧ i'cächäjomettö̧ yaute mandrágora iyittö. ¹⁵ Lea kädätinäcua̧: ¿Jerupajujä tä̧ji̧ ucumä, chirecuorö 'chocui pina'amä? ¿Ja̧'hua̧ta̧'a̧nö̧ chi̧tti̧ i'cächäji mandrágoras 'chocuipa päcua'a? Raquel ädätinäju̧: juo̧nö̧mä̧ jitä yodo juo̧u̧mä̧ ucucu ä̧'ä̧cua̧, cui̧tti̧ i'cächäji mandrágora cuya'attö. ¹⁶ Jacob ppa̧a̧chi̧nö ttö̧cuȩ ku̧nä̧huo̧mȩttö̧ ni̧pä̧ro̧mȩ. Lea rä'oö päjinäcu̧: jitä yodo ttucu cuä̧'ä̧cua̧jä̧, chi̧tti̧ iäre mandrágoracu chiärohua ja̧'a̧ttö̧. Ja̧'hua̧nö̧ ja̧'a̧ttö̧ Jacobmä juo̧'u̧ yodomä Leacu äinö̧. ¹⁷ Learö ä̧ju̧cui̧nö̧ DIOSMÄ, ja̧'hua̧nö̧ ja̧'a̧ttö̧ iyinäcua̧ ji̧mu̧tȩ jo̧mȩnä̧ päi'önä ki̧tti̧rö̧ Jacobttö. ¹⁸ Lea päinäju̧: DIOSTÄ iyäcuasä micuä päi'önä, chumuhuäyojuru chiyina'a̧ttö̧ chirecuorö, Ja̧hua̧nö̧ ja̧'a̧ttö̧ i̧mi̧mä̧ mi̧cua̧ Isacar. ¹⁹ Leamä pä'äjita'anö muchaju juo'inä̧ju̧, ja̧'hua̧nö̧ ja̧'a̧ Jacob i̧tti̧mö̧ttö̧mä̧ 6nö̧ päi'önä uhuäbecu kiyinä̧cu̧. ²⁰ Leame pä'inä̧ju̧: "Dios adihuäjuei mippounä iyähuä iyäcuasä. Jitämä chirecuomä ucuotäcuajusä, juhua'amä i̧tti̧mö̧rö̧mä̧ seisnö huotörö i̧tti̧cu̧ chiya'attö." Jahuäju ja̧u̧ i̧mi̧mä̧ Zabulón pä'ö o'inäju̧. ²¹ Ja̧u̧nu̧ o'ca'amä isajuru uhuäbecuinäju̧ ja̧'hua̧nö̧ ja̧'a̧ juajurumä Dina pä'ö o'inä̧ju̧. ²² Diosmä Raquelrö amöcuädinö ja̧'hua̧nö̧ jo̧mȩnä̧ ä̧ju̧cui̧nä̧cua̧. Ja̧u̧mä̧ muchaju juojunä jȩpi̧nö̧. ²³ Jahuäju muchaju juojinö o'ca'a ki̧tti̧rö̧ uhuäbecuinä̧ju̧. Jahuäjumä pä'inä̧ju̧: "Diosmä ttö dä'ä ttudä'ijömä jȩpö̧ icuäcuasä." ²⁴ Jahuäju ki̧tti̧ i̧mi̧mä̧ José pä'ö o'inä̧ju̧: TÖ̧Ä̧NÄ̧HUA̧MÄ̧ ka̧ra̧ chi̧tti̧rö̧ iyäcuasä" päja'attö. ²⁵ Raquelmä Joserö kuhuäbecuinö o'ca'a, Jacomä Labanrö pä'inö: Oto hue'ö icuittö, cha̧mö̧nä̧ chojusodera̧'a̧ ja̧'hua̧ta̧'a̧nö̧ cha̧mö̧nä̧ chi̧rȩjä̧ra̧'a̧ chi̧'cha̧. ²⁶ Chirecuamö̧rö̧'inä, chi̧tti̧mö̧rö̧'i̧nä̧ iyittö jahuätönä ucurumä ppä̧'ä̧dä̧rö̧ aditinö̧sä̧ ja̧'hua̧nö̧ ja̧'a̧ chi̧'cha̧'a̧nä̧ ja̧'a̧tä̧ topittö, isopäi'önä ucumä huo̧jua̧jä̧ ucuru ppä̧'ä̧dä̧rö̧ chaditä'ijömä." ²⁷ Labánmä ädätinäcu̧: Isopäi'önä ttöcu eseu ku̧ju̧ttö̧mä̧, a̧'u̧cuo̧mȩ ki̧'o̧po̧'i̧, isopäi'önä amöcuädö tochomenä TÖ̧Ä̧NÄ̧HUA̧MÄ̧ ucu jähuänämä adiunä jö̧nä̧ ppädä'ijäcusä." ²⁸ Ja̧'hua̧ta̧'a̧nö̧ päinä̧cu̧: "Ucuru chimitä̧cuȩ ji'ähuittö ja̧'hua̧nö̧ jö̧ttö̧mä̧ ttömä chi̧mi̧tä̧cua̧jä̧." ²⁹ Jacobmä päinä̧cu̧: "Ucumä huo̧jua̧jä̧ ucuru ppä̧'ä̧dä̧rö̧ chäditä'ijömä, ja̧'hua̧ta̧'a̧nö̧ cuä̧ji̧mö̧rö̧ ttö adiu jȩchä̧'i̧jö̧'i̧nä̧. ³⁰ Isopäi'önä ttö chichäcua'a ä'canämä a̧'u̧cuo̧tö̧rö̧tä̧ ku̧nä̧ri̧nä̧jä̧ ja̧'hua̧nö̧ ja̧'a̧nä̧ yabonö rö̧ä̧nä̧ rechächinä̧tö̧. TÖ̧Ä̧NÄ̧HUA̧MÄ̧ adiunä jö̧nä̧ jȩä̧'i̧jä̧cu̧jä̧ ttö chaditome pö̧nä̧mä. Ja̧'hua̧nö̧ ja̧'a̧ jitämä ¿Tocu tta̧'dä̧rä̧cua̧'a̧ttö̧ chamönä chi̧tti̧mö̧rö̧mä̧? ³¹ Ja̧'hua̧nö̧ päcu Labánmä pä'inö: ¿Däjetä chimitä̧cua̧ cua'attö̧? Jacobmä ädätinö: Ucumä yorö'iso ji̧yȩtȩ'inä cuiyättö. Ttönä ja̧u̧ jȩ'cu̧ttö̧mä̧, ttömä ppa̧dä̧chä̧cua̧sä̧ cuä̧ji̧mö̧rö̧ ttu̧cuä̧ iyö tta̧dä̧ra̧ pä'ö. ³² Jitä no̧ro̧ cuä̧ji̧mö̧ ttippeyänä cuedächa'anä ja̧'a̧tä̧ topittö, juorö rä'epö chi̧cuä̧cua̧sä̧ idicuätörö'inä, hueyucä huotörö'inä, idicuätörömä yotucupönätä̧ ja̧'hua̧ta̧'a̧nö̧ hueyucä huotö'inä juhua'atäcu cabaratöttö huȩyu̧pä̧tö̧rö̧'inä, Ja̧u̧ jä̧cua̧'a̧ ttö chaditähuä micuämä. ³³ Ttö jueönä jidäuttö huo̧jä̧cuä̧cua̧'a̧ jȩchö̧mä̧, ucutä usäu cuichomenä ttö chaditähuä. chä̧ji̧mu̧ cabras tö̧ttö̧ ya̧cu̧nä̧rö̧ to'cuomenä teasanö cua̧jö̧ttö̧'i̧nä̧ teöcu jö̧ttö̧'i̧nä̧, ja̧'hua̧ta̧nö̧ ovejattö̧ ttö̧'cä̧tȩnä̧ idicuättö jö̧ttö̧'i̧nä̧, ya̧tȩrö̧ chu̧ju̧nä̧ra̧'a̧ cu̧'o̧cui̧ö̧ttö̧mä̧, nä̧u̧cuä̧cuö̧cua̧tä̧ jä̧cua̧'a̧." ³⁴ Labán pä'inö: "Ja̧'hua̧nö̧tä̧ ja̧cua̧'a̧. Ucu päcuta'anö." ³⁵ Labán ja̧u̧nu̧ mo̧ro̧ pojö icuinö cabras u̧mä̧tö̧rö̧ sa̧sa̧ba̧nö̧ cuätörö'inä ja̧'hua̧ta̧nö̧ po̧ö̧nä̧ huȩyu̧pä̧tö̧rö̧'i̧nä̧ ja̧'hua̧ta̧nö̧ bäreunä huȩyu̧pä̧tö̧rö̧'i̧nä̧, teö̧nä̧ huätörö'inä i̧mi̧cu̧nä̧ ja̧'hua̧ta̧nö̧ oveja̧ttö̧ idicuätörö'inä, ja̧'hua̧'a̧nö̧ jȩpu̧ i̧tti̧ tta̧cua̧ra̧ pä'ö iyinö. ³⁶ Labánmä cuäbodäcuä mo̧ro̧ jo̧mȩnä̧ jȩpu̧ ku̧ni̧nö̧ ttadita pä'ö ja̧u̧'inä ja̧hua̧ta̧nö̧ Jacob'inä. Ja̧'hua̧nö̧ ja̧'ttö̧ Jacobmä Labán ä̧ji̧mu̧rö̧ ka̧cui̧pä̧jä̧tö̧rö̧ tta̧'a̧rö̧ ki̧'i̧pi̧nö̧. ³⁷ Jacob ȩmi̧nö̧ álamö ä̧na̧jui̧yä̧ jareönä 'co̧rä̧huä̧ttö̧, almendrottö'inä ja̧hua̧ta̧'a̧nö̧ bäreu päruruttö'inä, ja̧'hua̧ta̧'a̧nö̧ 'pa̧'i̧nö̧ ja̧u̧nä̧mä̧ i̧sä̧mä̧ tȩä̧mä̧tä̧ päi'önä, ja̧'hua̧nö̧tä̧ jȩpi̧nö̧ dauhuiyämä jacuä jähuä teötä ko̧cua̧'a̧ 'cua̧rö̧nä̧. ³⁸ Ja̧'hua̧nö̧ ja̧'a̧ ja̧u̧mä̧ ku̧ni̧nö̧ duhuiyä 'pa̧huä̧ji̧mä̧ ku̧ni̧nö̧ äjicuäcuähuotö ttö̧jo̧cuo̧mȩ pä̧tȩcuä̧nö̧, ä̧ji̧mö̧ au ttichome pä̧tȩcuä̧nö̧. Au ttichomettö ttömu̧'u̧ muchotö juottiyarö pä'ö. ³⁹ ttä̧ji̧mö̧ dauhuiyä pä̧tȩcuä̧nö̧ttö̧ ttä̧mu̧huä̧tö̧mä̧, jahuättö tti̧tti̧mu̧mä̧ uhuäpächinätö o̧mä̧nö̧, hueyucänö ttȩhuä̧ta̧nö̧ huotö. ⁴⁰ Jacob jahuätö tti̧tti̧mu̧ru̧ kä̧'ȩpi̧nö̧, ja̧'hua̧nö̧ ja̧'a̧nä̧ ju'totörömä huȩyu̧pä̧tö̧ ttö̧ja̧'a̧cu̧ to̧ttää̧rö̧nä jȩpi̧nö̧, ja̧'hua̧ta̧'a̧nö̧ idicuätörömä Labán ä̧ji̧mö̧ ttö̧jo̧cua̧'a̧cu̧. Ja̧'hua̧nö̧ ja̧'a̧ttö̧ ja̧u̧mä̧ chutä ä̧ji̧mö̧rö̧mä̧ i̧mi̧cu̧nä̧ kä̧'ȩpö̧ ku̧ni̧nö̧ Labán ä̧ji̧mu̧cu̧ ttihuacuächö juiyönä. ⁴¹ Oveja̧tö̧ juruhuätö tti̧tti̧mu̧ru̧ yottähuomenä, ja̧'hua̧nö̧ ja̧'a̧ttö̧ Jacob ru̧nä̧'chi̧nö̧ da'ú isade cuänö'cänö dau isadetä tottäcuäcua'anö. ⁴² Ja̧'hua̧nö̧ ja̧'a̧nä̧ oveja̧tö̧ jiyupätö ttichomenämä, jo̧u̧mä̧ dau isademä rö̧no̧cö̧ pinö jahuätö tta'cajo̧memä. Jahuätö isotö jiyupätömä Labán ä̧ji̧mu̧ ji̧na̧'a̧, ja̧'hua̧nö̧ ja̧'a̧nä̧ oveja̧tö̧ juruhuätömä Jacob ä̧ji̧mu̧ ji̧na̧'a̧. ⁴³ Jo̧ú̧ tti̧ja̧sä̧mä̧ ru̧hua̧ joächinö. Oveja̧tö̧rö̧'inä, camellotö̧rö̧'i̧nä̧, burrotö̧rö̧'i̧nä̧ ri̧ȩnä̧ kö̧nä̧ri̧nö̧, nä̧tö̧rö̧ hue'ö aditätörö'inä ja̧'hua̧ta̧'a̧nö̧ u̧mä̧tö̧ hueö aditätörö'inä kö̧nä̧ri̧nö̧.