¹ Ja̧u̧nu̧ o'ca'a Jacob juhua'a yabo 'chi̧nö̧do. Kä̧hua̧ räopa'acu ka̧cuä̧tö̧ ttö̧ja̧ tti̧rȩjä̧ra̧'a̧ rȩbȩhui̧nö̧do. ² Meje'canä ajiya reju ka̧'a̧ topinö, ja̧'hua̧ta̧'a̧nö̧, huä̧bo̧sa̧cuä̧nä̧ ji̧nä̧ yo̧mȩtȩ reju jäyä ttö̧'ȩja̧'a̧ topinö, juhua'amä jahuäju rejuttötä ovejatö̧rö̧mä̧ ajiya ttiyä'ijome ja̧'a̧ ja̧'hua̧ta̧'a̧nö̧ ajiya reju möecuäbi inäbimä rö̧i̧nä̧bi. ³ Ttä̧ji̧mö̧ o'catoi'önä ju̧huȩnȩ ttö̧ca̧ca̧cui̧'o̧mȩnä̧, jahuätörö tta̧huä̧rä̧cuä̧huä̧ ttö̧ja̧mä̧ reju möecuäbi pporädi'änätö̧, ja̧'hua̧nö̧ pporädö icu ajiya iyi'änä̧tö̧ ovejastö̧rö̧mä̧, ja̧'hua̧nö̧ ja̧'a̧ pä'äjita'anö rejumä ä'coji jä̧ji̧ta̧'a̧nö̧tä̧ mö̧'ȩpi̧'ä̧nä̧tö̧. ⁴ Jacobmä jahuätörö pä'inö: Chö̧jä̧hua̧tö̧, ¿Tottö cuichätucuä? Jahuätömä ttädätinäcu̧: "Ujutumä Harán ötahuiyä ttö̧ja̧jä̧." ⁵ Ja̧u̧mä̧ jahuätörö pä'inö: ¿Ucutumä Nacor i̧tti̧ Labánrö̧ huo̧juä̧tö̧jä̧? Jahuätömä ttädätinä̧cu̧, A̧ tu̧huo̧juä̧cu̧." Ja̧u̧mä̧ jahuätörö pä'inö: ¿Tocutä ö̧jä̧ttö̧? jahuätömä pättinä̧cu̧, ⁶ Ja̧u̧mä̧ adiutä kö̧, ja̧'hua̧ta̧'a̧nö̧ ju̧huȩnȩ topi, ittiju Raquelmä kä̧ji̧mö̧ ovejastu̧cu̧ ichäju." ⁷ Jacobmä pä'inö̧: "Topi, Mo̧ro̧ kä'co ja̧'a̧. Äjicuäcuähuotörö ji̧nä̧ yo̧mȩtȩ ca̧ca̧tö̧ ku̧nä̧huo̧cö̧ hora ja̧'a̧. Ovejastö̧rö̧ ajiyata cuiya pä'ö ja̧'a̧ ja̧'hua̧ta̧'a̧nö̧ ttucuä'cua cuäjepö cui̧'cha̧ pä'ötä ja̧'a̧." ⁸ Jahuätömä pä'inä̧tö̧: Ajiyamä tiyö juiyö'anö ja̧'a̧ äjicuäcuähuotö o'catoi'önä ji̧nä̧ yo̧mȩtȩ ttö̧ca̧ca̧cui̧'ö̧ juiyäimä. U̧mä̧tö̧mä̧ ja̧'hua̧nö̧ jo̧mȩnä̧tä̧ ajiya reju möecuäbi inäbimä pporädö tticuäcuotö ja̧'hua̧nö̧ jȩtto̧mȩnä̧tä̧ ovejastö̧rö̧ ajiyamä tiyäcuotöjä." ⁹ Jacobmä̧ ji̧nä̧ jahuätucu ucuocu ö̧ja̧'a̧nä̧, Raquelmä kä'o ä̧ji̧mö̧ ovejastö̧cu̧ ichinä̧ju̧, juhua'amä jahuäjutä ji̧na̧'a̧ äjicuäcuähuotörö tta̧'ä̧rä̧ju̧mä̧. ¹⁰ Jacobmä , Raquelrö, ja̧ju̧ kuböo Labán ittijuru topömä, ja̧ju̧ kuböo Labán ä̧ji̧mö̧ ovejastö̧cu̧, Jacobmä 'chä̧hui̧'ö̧, ajiya reju mö̧ȩcuäbi pporädö icuinö ja̧'hua̧nö̧ jȩpö̧ ja̧ju̧ kuböo Labán ä̧ji̧mö̧rö̧ ajiya iyinö. ¹¹ Jacobmä Raquelrö 'chu̧'o̧pö̧mä̧ rö̧ä̧nä̧ ajahuinö. ¹² Jacobmä Raquelrö pä'inö̧, ttömä cuä'o a̧hua̧ru̧hua̧sä̧, ja̧'hua̧ta̧'a̧nö̧ Rebeca ki̧tti̧sä̧. Ja̧'hua̧nö̧ ja̧'a̧ jahuäjumä kä'o ö̧jo̧mȩcu̧ jopipö kä'orö ji'ähuinäju̧. ¹³ Labán öjähuaju ki̧tti̧ Jacob ötö'cö huȩnȩ ä̧ju̧cu̧mä̧, toarö pä'ö jopächäji'ca, hua'adi'ö 'chu̧'o̧pi̧nö̧ ja̧u̧nu̧ o'ca'amä ojusodera̧'a̧cu̧ oipinä̧cu̧. Jacobmä ucuocuäjimä o'cajuiyönä Labánrömä ji'ähuinö. ¹⁴ Labán päinäcu̧: "Ucumä isopäi'önätä ttötä chucuoja isotö i̧sa̧jä̧." Ja̧'hua̧nö̧ ja̧'a̧ Jacobmä ja̧u̧cu̧mä̧ ki̧nö̧ ya'ute kä̧hua̧ tö'cöhuächi'ome jo̧mȩnä̧. ¹⁵ Ja̧'huanö ja'a Labán pä'inö Jacob'rö: "Tocu pä'ö ttö cha̧cua̧ru̧hua̧ jä̧ttö̧, ¿ja̧'hua̧nö̧ jö̧ttö̧mä̧ micuä juiyönätä̧ ppäcuäda'anö ja̧'a̧ tä̧ji̧? Jiähuittö, ¿Däje chimitä̧cua̧jä̧ttö̧?" ¹⁶ Jitä Labán'mä ku̧nä̧ri̧nö̧ i̧tti̧mu̧ nä̧ttö̧ ta̧ju̧ru̧. A̧cuo̧mȩnä̧ isaju ki̧mi̧mä̧ micuinä̧ju̧ Leal pä'ö ja̧hua̧nö̧ ja̧'a̧nä̧ röji isaju kimimä micuinäju̧ Raquel pä'ö. ¹⁷ Leal kiäremä juiyo adihuinä̧ju̧, ja̧'hua̧nö̧ ja̧'a̧nä̧ Raquel'mä jahuänä'inä huä̧mȩnä̧'i̧nä̧ juiyo adihuinä̧ju̧. ¹⁸ Jacobmä öjö'cönä topinö Raquel'rö, ja̧'hua̧nö̧ ja̧'a̧ttö̧ pä'inö: "Ppä̧dä̧dä̧rä̧cua̧jä̧ ji̧mu̧tȩttö̧ todäre a̧'ȩ jo̧mȩnä̧ Raquel'rö ja'ateö, . cuittiju röji isaju ¹⁹ Labán pä'inö: "Adicuä'anö jä̧cu̧sä̧ ucutä chiyapä'ö, ka̧ra̧rö̧ chiyö juiyacua'anö. Ttö cutä ki̧'i̧pi̧." ²⁰ Ja̧'hua̧nö̧ ja̧'a̧ttö̧ Jacob'mä ji̧mu̧tȩ todäre a̧'ȩ jo̧mȩnä̧ aditö ki̧nö̧ Raquel kimicuä, ja̧'hua̧nö̧ ja̧'a̧nä̧ ja̧u̧ru̧mä̧ ji̧na'a̧ yaute mo̧ro̧tä̧ 'cua̧rö̧nä̧, jahuäjuru juiyo öjönä ja̧'a̧ttö̧. ²¹ Ja̧'hua̧nö̧ ja̧'a̧ Jacob pä'inö Labánrö̧: "Chirecuarömä iyittö, tä'cö pätecuächö mo̧ro̧ ja̧'a̧ jahuajuru chirecua päi'önä chȩma̧ pä'ö." ²² Ja̧'hua̧nö̧ ja̧'a̧ Labán umuhuäyotucu ji̧nä̧ yo̧mȩtȩ pä̧'i̧'ö̧ ttö'cäu pä'cäri jȩpi̧nä̧ a̧tȩpi̧nä̧ ppeyänä ko̧cuä̧tö̧rö̧'i̧nä̧. ²³ Yodo päi'a'a, Labán ittiyu Learö ȩpö̧ iyinö Jacob'rö, ja̧u̧nu̧ yodomä jahuäjucutä a'inö. ²⁴ Labán iyinö umuhuäyaju Zilparö'inä ittiju Learö ppä̧'ä̧dä̧rö̧ kö̧ja̧ pä'ö. ²⁵ Mo̧ro̧ päi'a'a, topí, ¡Lea ji̧na̧'a̧! ja̧'hua̧nö̧ topö Jacob pä'inö Labanrö̧: "¿Däje jä̧tö̧ pi̧yȩmä̧ ttörö jȩcu̧'ä̧ji̧mä̧? ¿Raquelnä'cö̧ pädäjä huecuäcu chaditä'amä? ¿Dä̧bu̧ yapare päcuäjättö̧ttö̧ törömä?" ²⁶ Labán ädatinö: ujutu tö̧jö̧ jo̧ca̧'a̧ chittijuru chiya peömä ä̧cuo̧mȩnä̧ huäpächinäju̧ ko'ca'anä isajurumä. ²⁷ Aditi yaute semana jo̧menä pajú chittijunämä ja̧'hua̧nö̧ cuaditö o'caa karajuru chi̧yä̧cua̧jä̧ cuaditiyattö pe'ö ji̧mu̧tȩ koromuttö̧ ta'are a̧'ȩ́ jo̧menä. ²⁸ Jacobmä yaute semana aditinö Leanä. Ja̧'hua̧nö̧ ja̧'a̧ttö̧ Labán ittiju Raquelrö iyinäcu̧ irecua pä'iönä. ²⁹ Ja̧'hua̧nö̧ ja̧'a̧nä̧ Labán ittiju Raquelrö iyinö Bilharö kumuhuäyoju pä'iönä. ³⁰ Ja̧'hua̧nö̧ ja̧'a̧ttö̧ Raquelcu ki̧nö̧ Jacobmä, jo̧u̧mä̧ ri̧ȩnä̧ repeinö Raquelrö, Leattö'inä abonänö. Ja̧'hua̧nö̧ ja̧'a̧ttö̧ Jacobmä a̧di̧tä̧ri̧nö̧ Labán äre ji̧mu̧tȩ karaanättö taare a̧'ȩ́ jo̧menä. ³¹ TÖ̧Ä̧NÄ̧HUA̧MÄ̧ topinö Learömä adiunänömä öjö'coca'a, ja̧'hua̧nö̧ ji̧yä̧cu̧ ki̧tti̧mö̧ ku̧ju̧nä̧rö̧nä̧ jȩi̧nä̧cua̧. ja̧'hua̧nö̧ ja̧'a̧nä̧ Raquelmä ki̧tti̧mö̧ to'inäju̧. ³² Leamä muchaju juo'inä̧juä̧, ja̧'hua̧nö̧ ja̧'a̧ ki̧tti̧rö̧ ku̧nä̧ri̧nä̧ju̧, ja̧u̧rö̧mä̧ Ruben pä'ö o'inäju̧. Juhua'amä pa̧'a̧nö̧ pä'ö: Isopäi'önä CHUÄ̧NÄ̧HUA̧MÄ̧ cha̧'cua̧ tta̧dȩcu̧ toäjäcuasä; jitätä jä̧cua̧'a̧ chirecuo ttörö repeäcua'amä." ³³ Ja̧'hua̧nö̧ ja̧'a̧ jahuäjumä pä'äjita'anö muchaju juo'inä̧ju̧, ja̧'hua̧nö̧ ja̧'a̧ ki̧tti̧rö̧ ku̧nä̧ri̧nä̧ju̧. Jahuäju pä'inäju̧: isopäi'önä TÖ̧Ä̧NÄ̧HUA̧MÄ̧ ttörö öjö'coca'amä ä̧ju̧cuä̧ji̧, ja̧'hua̧nö̧ jo̧mȩttö̧ pide chi̧tti̧rö̧mä̧ iyäjäcuajusä, ja̧'hua̧nö̧ ja̧'a̧ttö̧ ja̧u̧ i̧mi̧mä̧ Simeón pä'ö o'inäju̧. ³⁴ Ja̧'hua̧nö̧ ja̧'a̧ pä'äjita'anö muchaju juo'inä̧ju̧, ja̧'hua̧nö̧ jä̧ji̧ o'ca'a ki̧tti̧rö̧ ku̧nä̧ri̧nä̧ju̧, jahuäjumä pä'inä̧ju̧: Jitätä jä̧cua̧'a̧ chirecuo ttöcu ö̧jä̧cua̧'a̧mä̧, juhua'amä chi̧tti̧mö̧ huämetucuärö iyaja'attö, ja̧'hua̧nö̧ ja̧'a̧ ja̧u̧ i̧mi̧mä̧ Leví pä'ö o'inäju̧. ³⁵ Jahuäjumä pä'äjita'anö muchaju juo'ino'coju ki̧tti̧rö̧ ku̧nä̧ri̧nä̧ju̧. Jahuäjumä pä'inäju̧: "Jitämä TÖ̧Ä̧NÄ̧HUA̧RÖ̧ chesehuäcuajusä." Ja̧'hua̧nö̧ päja'attö imimä Judá pä'ö o'inä̧ju̧, ja̧'hua̧nö̧ ji̧nö̧ o'ca'anä yabonömä i̧tti̧cuo̧co̧ju̧ pinäju̧.