¹ Isaac huopinö Jacob'rö, adiunä adihuarö pä'ö ja̧'hua̧nö̧ ja̧'a̧nä̧'i̧nä̧ hue'inö: "Cuȩmó cuirecua päi'önämä cananitas nä̧tö̧ttö̧mä̧. ² Jitätä täijó, Padán Aram'ra̧'a̧, Betuel ojusodera'a cua̧ju̧ kä'o, juhua'attötä cuirecuarö cuȩma̧ja̧, Labán cua̧ju̧ ki̧jä̧cua̧ ittiju yajutettö. ³ Dios o'cajuiyönä ju̧ru̧hua̧tä̧ ppädacujá, cuahuäruhuättö juahua'a yabocu ru̧cuä̧chö̧nä̧, cutahuiyä ttö̧ja̧'i̧nä̧ abora'atä pä'inä rö̧'ä̧chö̧nä̧. ⁴ Ja̧u̧tä̧ iyä̧cua̧jä̧ adiunä ppädäcuähuämä Abraham ji̧nö̧ta̧'a̧nö̧, ucuru'inä cuahuaruhuä o'cotörö'inä ucu cuo'comenä ka̧cuȩtö̧rö̧mä̧ ttȩmä̧cua̧'a̧nö̧ ucu ku̧ji̧nä̧jä̧, Dios i̧yi̧nä̧jä̧ Abraham'rö." ⁵ Ja̧'hua̧nö̧ ja̧'a̧ Isaac te'ähui'inö Jacob'rö. Jacob 'chi̧nö̧ Padán Aramra̧'a̧, Betuel aram ttö̧ja̧sa̧ i̧tti̧ Labán ö̧ja̧'a̧, Rebeca chi̧jä̧hua̧, Jacob ja̧'hua̧ta̧'a̧nö̧ Esau'inä ja̧jú̧. ⁶ Jitämä Esaú topinö Isaac Jacab'rö ppäda'a, ja̧'hua̧nö̧ ja̧'a̧ttö̧ hueäja'a Padán Aramra̧'a̧, jahua'attö irecuarö ȩmi̧ya̧rö̧ pä'ö. Ja̧u̧'i̧nä̧ topinö Isaac ppäda'a ja̧'hua̧ta̧'a̧nö̧ huea'a pa̧'a̧nö̧ pä'ö: "Cuirecua päi'önämä cuȩmä̧ Canaán i̧tti̧mu̧ttö̧mä̧." ⁷ Esaú topinö Jacobmä jä'o'inä ja̧ju̧'i̧nä̧ huettöta'anö jȩa̧'a̧, Padán Aramra̧'a̧ i̧'chä̧ja̧'a̧. ⁸ Esaú ttö̧ȩpä̧rä̧chi̧'i̧nö̧ Canaán ttö̧ja̧ nä̧tö̧rö̧ jä'ó Isaac hueocaamä. ⁹ Ja̧'hua̧nö̧ ja̧'a̧ttö̧ jo̧'u̧ 'chi̧nö̧ irecua u̧ju̧na̧ra̧'a̧nä̧ Abrahaminä i̧tti̧ Ismael ö̧ja̧'a̧cu̧ jua'attö ittijurö irecua päi'önä ȩminö Mahalatrö, Nabaiot kahuaruhuajuru. ¹⁰ Ja̧u̧nu̧ o'ca'a Jacob Beersebattö rä'opö, Harán ätahuiyära̧'a̧cu̧ 'chi̧nö̧do. ¹¹ Korome rȩbȩhui̧pi̧nö̧do ya'ute yodo ä'a pä'ö, kä̧hua̧mä̧ täcö mo̧ä̧cha̧'a̧ttö̧. Ido'qui yo'quite ȩmö̧, u dea'a jo̧mȩ rötö, ä'i'inödo ju̧huȩnȩtä̧ pä̧nö̧. ¹² Ä'ö 'cuo̧ti̧cui̧nö̧do. U̧'cuo̧ti̧nä̧mä̧ topinödo 'chahuächäcuähuä̧cä̧ rȩjȩttö̧ todehua'anä mo̧ro̧jä̧ra̧'a̧ päi'önä todehuäcä. Tö̧ä̧nä̧hua̧ Dios hue'ähuotö ángeles 'cha'ächö'inä 'cha'ächinätödo. Mȩyȩu̧'i̧nä̧ mȩyȩhui̧nä̧tö̧do ju̧huä̧cä̧ 'chahuächäcuähuä̧cä̧nä̧. ¹³ Ja̧'hua̧nö̧ ja̧'a̧ Tu̧ru̧hua̧ Dios 'chahuächäcuähuä̧cä̧ yotä kada'ca kä̧nö̧ pä'inödo: ―Ttömä ucu Cu̧ru̧hua̧sä̧. Ucu cuä̧do̧ Abraham'inä, Isaac'inä Ttö̧ä̧nä̧hua̧sä̧. Pi̧jä̧ ucu cu̧'ä̧jä̧mä̧ chi̧yä̧cua̧sä̧ ucuru'inä, cuahuaruhuä'cotörö'inä. ¹⁴ Ucu cuahuaruhuä'cotömä rȩjȩ i̧sa̧ppȩ jä̧'i̧nö̧'a̧nö̧ ttirecuächäcuotö. Ja̧'hua̧nö̧ ja̧'a̧ ucutumä cuipperecuächäcuotöjä kä̧hua̧ mo̧ä̧cha̧'a̧cu̧, kä̧hua̧ räopa'acu'inä, kä̧hua̧ u̧huo̧jua̧'a̧cu̧'i̧nä̧, kä̧hua̧ ieruhua'acu'inä. Ucunä'inä, cuahuaruhuä'cotönä'inä ppä̧dä̧dä̧cua̧sä̧ pi̧jä̧ ttö̧ja̧rö̧ o'ca toi'önä. ¹⁵ Ttömä ucutäcu kö̧sä̧. Tta̧dä̧rä̧cua̧jä̧ cuecuhuächö o̧du̧nä̧. Pä'äji ta'anö chi̧'cä̧chä̧cua̧jä̧ pi̧jä̧ rȩjȩra̧'a̧. Jaropi'ocösä ucuru, ttö pädäjimä jȩcho̧mȩ jubö päi'önä―. ¹⁶ Ja̧'hua̧nö̧ ja̧'a̧ Jacob 'cuo̧ti̧cuä̧ji̧'ca̧ porächi'ö pä'inödo: ―Iso päi'önä Tu̧ru̧hua̧ Diosmä pȩnȩtä̧ kö̧ pä'ömä. Ttömä jerupäjisä―. ¹⁷ Jacob juiyo ye'ecue'inödo. Pä'inödo: ―Pȩnȩmä̧ juiyo ucuotäcuähuäcuome jä̧cuo̧mȩ. Pȩnȩmä̧ Tö̧ä̧nä̧hua̧ Dios ojusode. Pȩnȩmä̧ mo̧ro̧jä̧ra̧'a̧ doächäcuähuate―. ¹⁸ Ja̧'hua̧nö̧ ja̧'a̧ Jacob yo̧ȩi̧ pä'ö mo̧ro̧ päi'a'a porächi'ö, ido'qui u dea'a ötäjo'qui ärädö ku̧ni̧nö̧do. Tö̧ä̧nä̧hua̧ Diosrö ucuotönö juhuo'qui huäme a̧dȩ isoya da'epinödo. ¹⁹ Pä'äjimä ötahuiyä ju̧huȩnȩ huejina'ado. Ja̧u̧ ötahuiyämä Luz pä'ö micuinödo. Ja̧'hua̧nö̧ micuinömä pärou icu o'inödo Jacobmä Betel pä'ö. ²⁰ Ja̧'hua̧ta̧nö̧ po'qui ido'qui ärädö chu̧ju̧no̧mȩmä̧ Tö̧ä̧nä̧hua̧ Diosrö ucuocuäcuähuome jä̧cuo̧mȩ. Ja̧'hua̧ta̧nö̧ o'ca juiyönä ucu ttörö cuiyömä, ucuru to̧mö̧rȩ jähuättömä ji̧yȩtȩ 'quȩ'ȩpö̧ chi̧yä̧cua̧sä̧― pä'inödo Jacobmä Tö̧ä̧nä̧hua̧ Diosrö. ²¹ Ja̧'hua̧nö̧ ja̧'a̧ Jacobmä Tö̧ä̧nä̧hua̧ Diosrö i̧yä̧cuȩ pä'ö ku̧ni̧nö̧do: ―Dios ttöcu ö̧jö̧ttö̧mä̧, chi̧hua̧'a̧nä̧'i̧nä̧ ttörö tta̧huä̧rö̧ttö̧mä̧, chu̧cuȩ'i̧nä̧, chi̧ä̧rȩti̧yu̧'i̧nä̧ iyöttömä, ²² ja̧'hua̧ta̧nö̧ chä'o ojusodera'a adiu ppa̧dä̧chö̧ttö̧mä̧, Diosmä ttö Chu̧ru̧hua̧ päi'önä ö̧jä̧cua̧.