^{1 2} Isaac tä'cö bu̧o̧sa̧ ji̧na̧'a̧ ja̧'hua̧nö̧ ja̧'a̧ttö̧ ö'äriyä'inä adiunä toö juiyönä ji̧na̧'a̧, juopinä, i̧tti̧ ä̧cuo̧mȩnä̧ i̧sa̧rö̧, ja̧u̧ru̧ pä'inö: "Chi̧tti̧." ja̧u̧ ädätinö: "Pȩnȩtä̧ kö̧sä̧." Ja̧u̧ pä'inö: "Adiunä ä̧ju̧cu̧ topittö, ttömä tä'cö bu̧o̧sa̧sä̧, 'corujuo̧dä̧chä̧cuä̧ mo̧ro̧'i̧nä̧ chieru'unä jä̧cu̧sä̧ ³ Ja̧'hua̧nö̧ ja̧'a̧ttö̧, curämä emi, ppö̧'a̧ri̧ ȩnä̧huättä'inä ja̧'hua̧ta̧'a̧nä̧ ppo'obu'inä, ja̧'hua̧nö̧ ȩmö̧ meje'ca̧ra̧'a̧ 'chä̧nö̧ idepottättö chucua ȩma̧ji̧yi̧ttö̧. ⁴ Adiu nö̧nä̧ da'ö iyittö, chucua pädä'ijö'anö, ja̧'hua̧nö̧tä̧ i'chächö iyittö chucua ja̧hua̧nö̧ jo̧mȩnä̧tä̧ 'corujuodächäcua'a ä'canä a̧di̧huo̧mȩnä̧ cui̧'cha̧tä̧ pä̧dä̧cua̧jä̧." ⁵ Ja̧'hua̧nö̧ ja̧'a̧ Rebeca ä̧ju̧cui̧nä̧ju̧ Isaac ucucua i̧tti̧ Esaúrö. Esaú 'chi̧nö̧ dea po̧i̧rö̧ 'poapeö usú jäorö ucuäjeapeö. ⁶ Ja̧'hua̧nö̧ ja̧'a̧ Rebeca ki̧tti̧ Jacobrö ucucu jijähuinäcu̧: Ä̧ju̧cui̧, ttö ä̧ju̧cuä̧jä̧ju̧sä̧ cuä'ó ucuocua cubuo Esaúrö. Jo̧u̧rö̧ päinö: ⁷ deá i̧sä̧ idepättö nö̧'ö̧nä̧ daipu ttö chucua iyittö TÖ̧Ä̧NÄHUA̧ ö̧jo̧mȩttö̧ hua'ö́ chicuäcua a'canä adihuä juäi ucucu chö̧ju̧na̧cu̧. ⁸ Ja̧'hua̧nö̧ ja̧'a̧ttö̧, chi̧tti̧ ttö huedömä eseti. ⁹ topäji cuä̧ji̧mu̧ ovejatö̧ttö̧ ta̧ju̧rö̧ adihuätöttö ȩmä̧ji̧; jahuätöttö ttötä adihuö nö̧ö̧nä̧ dadacuäjusä cuä'ó ucapeö, chutä ucuapeö öjö'cäita'anö. ¹⁰ Ucutä cuiyä̧cua̧jä̧ cuäorö ucuapeö, ja̧'hua̧nö̧ ja̧'a̧ttö̧ hua'ö icuäcua'a ä'canä adihuönä ucuocu u̧ju̧nä̧cua̧jä̧. ¹¹ Jacobmä ja̧ju̧ Rebecarö pä'inö: Topi, chuböo Esaúmä ttö̧ja̧sa̧ u̧huo̧cua̧ ja̧'a̧, ja̧'hua̧ta̧'a̧nö̧ ttömä uhuocuocösä, ¹² chä'orö ttörö itihuo'omenä, chujuamä yaparetä jȩpä̧'chö̧ pä̧cua̧sä̧. Ttö surojuoecuätä chi'cächä̧cua̧sä̧, adiunätä̧ ja̧rö̧jä̧ pähuämä̧cö̧." ¹³ Ja̧ju̧mä̧ päjinä̧cu̧: Chi̧tti̧, ji̧yȩtȩ surojömä ttörötä ma̧ä̧cua̧'a̧. pädötä'inä ucuotittö, 'chi̧'i̧pö̧ i'cächiyittö. ¹⁴ Ja̧'hua̧nö̧ päjäcu Jacobmä cabra i̧tti̧rö̧ i'cächö ja̧ju̧rö̧ iyinö, ja̧'hua̧nö̧ iyäcua ja̧ju̧mä̧ cuäcuähuämä nö̧nä̧ da'inä̧ju̧, ucua pä'ö öjö'cä'ijomenä. ¹⁵ Rebecamä ki̧tti̧ ä̧cuo̧mȩnä̧ i̧sa̧ Esaú ȩmö̧po̧'i̧nä̧ju̧, yajutä kojusodenä kä̧ta̧ttö̧ ja̧'hua̧nö̧ ȩmö̧ Jacobrö 'ca̧ti̧nä̧ju̧, ki̧tti̧ röjinä̧ i̧sa̧rö̧. ¹⁶ Umö̧pi̧yä̧nä̧mä̧ cabra i̧tti̧ i̧jȩta̧ttö̧ rö̧nö̧ kä̧nö̧ u̧ru̧pä̧'quȩ uhuo'che juiyome'inä ja̧u̧tä̧ i̧jȩta̧ttö̧ huȩni̧nä̧ju̧. ¹⁷ Jahuäjumä cuäcuähuämä nö̧nä̧ da'ä'coju ja̧'hua̧ta̧'a̧nö̧ pancu̧ kȩttä̧ji̧cu̧ ki̧tti̧ Jacob u̧mö̧ttö̧ ȩmö̧. ¹⁸ Jacobmä jä'o ö̧ja̧'a̧ 'chä̧ji̧'ca̧mä̧ pä'inö: "Chä'o" Ja̧u̧mä̧ ädätinä̧cu̧: "Pȩnȩtä̧ pö̧sä̧; ¿Chi̧tti̧ ucumä di cua'attö̧?" ¹⁹ Jacobmä jä'orö pä'inö: "Ttömä cui̧tti̧ ä̧cuo̧mȩnä̧ i̧sa̧ Esaúsä; jȩpä̧ji̧sä̧ huecuäjita'anö. Jitämä pȩnȩ pä̧mä̧dö̧, idepä cuitiyittö, adiunä jö̧nä̧ pähuä cuiyattö." ²⁰ Isaacmä i̧tti̧rö̧ pä'inö: "¿Chi̧tti̧, Tocu jurunämä cu̧'o̧cui̧'ä̧jä̧ttö̧?" Ja̧u̧mä̧ päinä̧cu̧: Isopäi'önä TÖ̧Ä̧NÄ̧HUA̧ Diostä i'chächäjätucui." ²¹ Isaacmä i̧tti̧ Jacobrö pä'inö: "Chi̧tti̧, Ttö chu̧ja̧'a̧cu̧ ichi'ö tihuopittö ja̧'hua̧ta̧'a̧nö̧ ucumä ja̧u̧tä̧ ja̧'a̧ pä'ö chu̧huo̧juä̧cua̧'a̧nö̧, isopäi'önä chi̧tti̧ Esaú ja̧'a̧ pä'ö." ²² Jacobmä jä'o Isaacmä tö'cönänö 'chä̧hui̧'ö̧ mȩ'ö̧mä̧ pä'inö: "I̧huȩnȩmä̧ Jacob i̧huȩnȩ ja̧'a̧, ja̧'hua̧nö̧ ja̧'a̧nä̧ u̧mö̧mä̧ Esaú umö ja̧'a̧. ²³ Isaacmä ttu̧'ȩpä̧ri̧'o̧cö̧ pinö umömä uhuocua'attö uböo Esaú u̧mö̧pi̧yä̧ jä̧'i̧ja̧'a̧nö̧, ja̧'hua̧nö̧ ji̧yä̧cu̧ Isaac adiunätä̧ ja̧ pä'ö iyinö. ²⁴ Ja̧u̧ pä'inö: ¿Ucumä isopä'inätä̧ ttö chi̧tti̧ Esaú tä̧ji̧? ja̧'hua̧nö̧ päcu ädättö pä'inö: "A̧'a̧ ttötä." ²⁵ Isaac pä'inö: "I'cächipi chucua ucu cuabotäcu idepättö, ucuru adiunä ppädäcuähuä rȩbȩhua̧ pädacu." ja̧'hua̧nö̧ ja̧'a̧ttö̧ Jacob i'cächipinö cuäcuähuä. Isaac'mä cuinö, ja̧'hua̧ta̧nö̧ Jacob i'cächipinö vino'inä ja̧'hua̧nö̧ ja̧'a̧ttö̧ ja̧u̧'inä ahui'inö. ²⁶ Ja̧hua̧nö̧ ja̧'a̧ jä'o Isaac pä'inö: "Jitämä tö'cönä̧nö̧ pä'iö 'chu'o̧pi̧ttö̧, ttötä chi̧tti̧." ²⁷ Jacob tö'cönänö pä'iö 'chu̧'o̧pi̧nö, ja̧'hua̧nö̧ jȩpu̧ ö̧'ca̧ta̧hua̧ta̧ ö̧a̧mȩ 'cö̧'ö̧ a̧di̧huä̧cua̧jä̧ päinä̧cu̧. Ja̧u̧ pä'inö: "Topí, ttö chi̧tti̧ ö̧a̧mȩmä̧ a̧mȩhua̧'a̧ de'a 'cua̧rö̧nä̧tä̧ TÖ̧Ä̧NÄ̧HUA̧TÄ̧ adiunä jȩpi̧nö̧. ²⁸ Diota i̧yä̧cua̧jä̧ mo̧ro̧jä̧ra̧'a̧ttö̧ ajiya, cui̧rȩjä̧ttö̧'i̧nä̧ cuähuä ppuru'unä, ja̧'hua̧ta̧'a̧nö̧ cu̧cuä̧ cuähuättö'inä rö̧'ä̧nä̧ttä̧, cua̧huä̧ vinottö̧'i̧nä̧ jare'ötä. ²⁹ Ji̧nä̧ ji̧yȩtȩnä̧ huotö ttö̧ja̧mä̧ ucu huecutä jȩttä̧cuo̧tö̧ ja̧'hua̧ta̧'a̧nö̧ pi̧jä̧ o'cajuiyönä ucu cuä'cajo̧mȩ ja̧rȩyu̧nu̧ pätti'äcuotö. Cua̧mo̧nä̧ cuahuaruhuärötä hue'ö kä̧hui̧, ja̧'hua̧ta̧'a̧nö̧ cua̧ju̧ i̧tti̧mu̧'i̧nä̧ ucu cuä'cajo̧mȩ ja̧rȩyu̧nu̧ pätti'äcuotö. O'catoi'önä ucuru suroja pä'ätömä surojötä jä̧cuo̧tö̧; O'catoi'önä ucuru adiunä pä'ätömä adiunätä jä̧cuo̧tö̧." ³⁰ Juo̧nö̧ o'caa Isaacmä Jacobrö adihuönä ucuocu cäädinö, ja̧'hua̧ta̧'a̧nö̧ Jacobmä Esaú jä'ó ö̧jo̧mȩttö̧ räopä̧ji̧'ca̧ ki̧nö̧, ja̧'hua̧nö̧ ja̧'a̧nä̧ ubuo Esaúmä rȩbȩhui̧nö̧ deá po̧i̧rö̧ ȩmu̧'chä̧ji̧'ca̧. ³¹ Juo̧u̧'i̧nä̧ dainö adihuönä nöönä ja̧'hua̧nö̧ ja̧'a̧ttö̧ jäorö iyö'chi̧nö̧. Juo̧u̧ päinö jäorö: chä'ó, ä̧rä̧mi̧'ö̧ cuití cui̧tti̧ 'poäcu idepä, juo̧nö̧ o'caa adihuönä ucucu cu̧ju̧na̧ttö̧. ³² Isaac i̧tti̧rö̧ ädätinö̧: ¿Di cuättö̧? Juo̧'u̧ ädätinö: ttö cui̧tti̧, ttö ä̧cuo̧mȩnä̧ cui̧tti̧ Esaú. ³³ Isaac ri̧ȩnä̧ yeecueö tti̧ä̧hui̧pu̧ päinö: ¿Di ȩmú̧ i̧huä̧cu̧ idepä jä̧ttö̧ ttörö i'cächo ttiyäjimä? ttö o'cajuiyönä cuäjisä cuichäcua'a a'canä, ja̧'hua̧nö̧ ja̧'a̧ttö̧ adihuönä ucuocu iyäjisä. Ja̧'hua̧nö̧ ja̧'a̧ttö̧ juo̧rö̧tä̧ ki̧a̧'a̧ adihuönä ucuocu chiyäjimä. ³⁴ Esaú jä'o i̧huȩnȩ ä̧ju̧cu̧mä̧, rö̧ä̧nä̧ ajahuinö, ja̧'hua̧nö̧ ja̧'a̧ jä'orö pä'inö: Chä'ö, Ttörö'inä adiunä ja̧ttö̧ pä'ö iyittö". ³⁵ Isaacmä pä'inö: "Cui̧jä̧hua̧ ichi'ö yaparetö ucuru adiunä ja̧ pä'ö jä̧ji̧mä̧ 'cho̧i̧pä̧jä̧cu̧jä." ³⁶ Esaúmä pä'inö: ¿Isopäi'önätä̧ ja̧'hua̧nö̧ jä̧cua̧ ji̧yä̧u̧ Jacob pä'ö ottinä̧cu̧ti̧? Täcö todärenä päia'a ttörö yapare jȩä̧'cha̧'a̧mä̧. Ä̧cuo̧mȩnä̧ uhuäpächinö ȩma̧ pä'ö ji̧nö̧'inä 'choipinä̧cu̧sä̧, ja̧'hua̧ta̧'a̧nö̧ jitämä ttörö adiunä ja̧ pä'ö iyähuä'inä 'choipäjäcusä. Ja̧'hua̧nö̧ jä̧cu̧ ja̧u̧mä̧ pä'inö: ¿Ji̧yȩtȩ ttörö adiunä ja̧ pä'ö iyähuämä i̧mi̧cu̧nä̧mä̧ 'cä̧'ȩpö̧ ku̧no̧cö̧ päjijä̧? ³⁷ Isaacmä. Esaúrö ädätömä pä'inö: "Topi, Ttömä ja̧u̧rö̧mä̧ cu̧ru̧hua̧ jö̧nä̧tä̧ rötäjisä, ahuaruhuämä u̧mö̧huäyotö ttönätä̧ jȩpä̧ji̧sä̧ ja̧'hua̧ta̧'a̧nö̧ u̧huä̧ju̧ ote'inä vino isoya jareö oya'inä iyäjisä. ¿Chi̧tti̧ däjetä jȩchö̧'a̧nö̧ttö̧ ucurumä? ³⁸ Esaúmä jä'orö pä'inö: ¿Chä'o a̧'u̧cu̧nä̧tä̧'inä adiunä ji̧ya̧tö̧ pä'ö iyähuämä juicua'a? Ja̧'hua̧ta̧'a̧nö̧ Ttörö'inä adiunätä ja̧ pä'ö iyähuä iyittö. "Esaúmä pä̧i̧cu̧nä̧ ajahuinö. ³⁹ Jä'o Isaacmä ja̧u̧rö̧ ädätömä pä'inö: Topi, ucu cu̧jo̧mȩttö̧mä̧ rȩjȩ ppö̧rö̧huä̧jä̧mä̧ oto ja̧'a̧, ajiya mo̧ro̧jä̧ttö̧ ka̧ppȩppȩnö̧ ma̧a̧mä̧ oto ja̧'a̧. ⁴⁰ Rohuäutä cu̧jä̧cua̧jä̧ ja̧'hua̧ta̧'a̧nö̧ cu̧jä̧hua̧rö̧ ppä̧'ä̧dä̧rö̧tä̧ cu̧jä̧cua̧jä̧. Ja̧'hua̧nö̧ ja̧'a̧ ucuru ttö̧ra̧huä̧ro̧mȩnä̧mä̧, cu̧ru̧pä̧'quȩnä̧ ppi̧'ȩpö̧ ru̧nä̧huä'camä yȩ'ȩpö̧ cui̧cuä̧cua̧jä̧." ⁴¹ Isaacmä adihuä juäi Esaúru ucuocu'anö ja̧'a̧nä̧, Jacob'rötä ucuocuinö. Ja̧'hua̧nö̧ ja̧'a̧ttö̧ Esaúmä ami surächi'inäcu̧ ö̧jä̧hua̧ Jacob'rö. Chutä a̧mo̧nä̧ amöcuädäcuähuinö. Pä'inö: ―hä'omä 'corujuoächä̧cuȩ mo̧ro̧mä̧ täcö tö'cö ja̧'a̧. 'Corupäi'ö o'ca'a chö̧jä̧hua̧ Jacobrö cuä'ö chi̧cuä̧cua̧sä̧― pä'inödo. ⁴² Rebecamä ki̧tti̧ ä'canä ru̧hua̧ Esaú amöcuädö jittähua'a kä̧ju̧cuo̧mȩnä̧, ki̧tti̧ röji ru̧hua̧ Jacobrö huopo'ö hue'ö kicuinäcudo. Ja̧'hua̧nö̧ ja̧'a̧ttö̧ päjinäcudo: ―Ä̧ju̧cui̧. Cuböo Esaúmä churutä suronä jȩcu̧'i̧nö̧ micuämä pärocua'attö ucuru cuä'ö icua päcujädo. ⁴³ Ja̧'hua̧nö̧ ja̧'a̧ttö̧ ttö huedömä jȩpi̧, chi̧tti̧. Chuböo Labán Harán ötahuiyära̧'a̧ kö̧cu̧ cu̧ja̧ pä'ö, ä̧rä̧mi̧'ö̧ tö'ipächi. ⁴⁴ Ja̧u̧cu̧tä̧ cu̧jä̧cua̧'a̧nö̧, cuböo ami surumä 'cuäopächome jubö päi'önä― päjinäcudo. ⁴⁵ Cuböo amisuru toepächome jubö ja̧'hua̧ta̧'a̧nö̧ ucu churutä jȩ'cui̧nö̧'inä unichi'ome jubö. Ja̧'hua̧nö̧ jo̧mȩnä̧ juhua'attömä tti'cächacu pä'ö huȩdä̧cua̧jä̧. ¿Tta̧'a̧nö̧ ya'ute mo̧ro̧tä̧mä̧ ta̧ju̧cuäyotörö tode'ächa pä'ö ja̧'a̧ttö̧? ⁴⁶ Rebecamä Isaacrö pä'inä̧ju̧: Cha̧'cua̧rö̧mä̧ suräjäcuasä Het i̧tti̧mö̧ nä̧tö̧rö̧mä̧. Jacob Het i̧tti̧mö̧ nä̧tö̧ttö̧ yajuterö irecua pä'i'önä ȩmö̧ttö̧mä̧ jahuätö nä̧tö̧ ja̧huä̧jä̧nä̧ ka̧cuä̧tö̧ tti̧tti̧mö̧ttö̧ yajuterö, ¿Cha̧'cua̧rö̧mä̧ adiunä ppädäcua'a?