¹ Ja̧'hua̧nö̧ ja̧'a̧ ja̧u̧ rȩjȩnä̧mä̧ ppäi ttuhuähuä 'cuäopina'a, ä̧cuo̧mȩnä̧ ppäi ttuhuähuä Abraham ö̧ji̧nö̧ pä̧nä̧ 'cuäopinö̧ttö̧'inä. Isaacmä filisteos Gerar ötahuioyänä ka̧cuä̧tö̧ ttu̧ru̧hua̧ Abimelec ö̧ja̧'a̧cu̧ 'chi̧nö̧. ² Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ ja̧u̧rö̧ i̧jȩcu̧mä̧ päinä̧cu̧: Egipto rȩjȩra̧'a̧cu̧mä̧ cui̧mȩyȩhuä̧; Ttö ku̧ja̧ pä̧dä̧jä̧nä̧tä̧ ku̧ja̧jä̧. ³ Ja̧huä̧jä̧nä̧tä̧ kä̧hui̧ ja̧'hua̧ta̧'a̧nö̧ Ttömä ucutäcu chu̧jä̧cua̧sä̧ juhua'atäcu adiunä̧tä̧ jȩchä̧cua̧jä̧, ucuru'inä, cui̧tti̧mö̧rö̧'inä pi̧jä̧ rȩjȩ jä̧ttä̧jä̧ chi̧yä̧cua̧sä̧ ja̧'hua̧nö̧ iyö cuä'o Abraham minärö̧ chi̧yä̧cua̧jä̧ pädinö ji̧nö̧mä̧ ja̧u̧nu̧ mo̧ro̧ pätecuächäcua'a. ⁴ Ttötä jȩchä̧cua̧sä̧ ucutu ru̧cuä̧chä̧tu̧cu̧nä̧ mo̧ro̧jä̧ si̧ri̧'cö̧ jö̧ ta̧'a̧nä̧, ja̧'hua̧ta̧'a̧nö̧ ucu cuahuäruhuä 'cotörö chiyä̧cua̧sä̧ pi̧jä̧ rȩjȩ o'cajuiyönä. Cuahuäruhuä 'cotöttömä o'catoinä tti̧rȩjä̧ ttö̧jo̧cuo̧mȩ pu̧nä̧mä̧ adihua pä'ötä jȩchä̧cua̧sä̧. ⁵ TTÖ pi̧yȩmä̧ jȩchä̧cua̧sä̧ Abraham TTÖ chi̧huȩnȩ esetinä'a̧ttö̧ ja̧'hua̧ta̧nö̧ TTÖ chu̧huo̧juȩtö̧ ucuotönö jȩi̧nä̧'a̧ttö̧ TTÖ huedö'i̧nä̧, TTÖTTÖ pa̧'a̧nö̧ ja̧'a̧cua̧ pä'ö huȩyu̧tu̧ rutähuä'inä, ja̧'hua̧ta̧nö̧ TTÖTTÖ hueähuä huȩnȩ'i̧nä̧." ⁶ Ja̧'hua̧nö̧ ja̧'a̧ttö̧ Isaacmä kä̧bä̧di̧nö̧ Gerar'nä. ⁷ Juä̧nȩ ka̧cuä̧tö̧mä̧ jättepinäcu̧ irecua kötö'cö, Ja̧'hua̧nö̧ jo̧mȩnä̧ ja̧u̧ ädätinö: "Jahuäjumä ttö chijähuaju." Ja̧u̧mä̧ yecunä ji̧nä̧cu̧ papä'ömä: "Ja'huäjumä ttö chirecua." Ja̧u̧mä̧ amucuadinö: " Pȩnȩ u̧mä̧tö̧mä̧ ttörö cuä'ö tticu'anö ja̧'a̧ Rebecarö ttȩmi̧pa̧ pä'ö, ja'huäju juiyó kö'adicua'attö." ⁸ Ja̧u̧nu̧ o'ca'a Isaacmä juä̧nȩmä̧ recuonänö ki̧nö̧, ja̧'hua̧nö̧ ja̧'a̧nä̧ Filisteos tu̧ru̧hua̧ Abimelec topinö ventana isatenä. Ja̧u̧ to'omenä, topinö, Isaac irecua Rebecarö esecua'a. ⁹ Abimelecmä Isaac ichi'a pä'ö ä̧tȩpä̧ji̧'ca̧ pa'inö: "Topi, iso päi'önä ja'huäjumä ucu cuirecua ja̧'a̧. ¿Tta̧'a̧nö̧ pä'ö päcuättö̧, ja'huäjumä ttötä chijähuaju pä'ömä?" Isaac ja̧u̧ru̧ pä'inö: "Ttömä amucuädäjisä ya̧tȩ cuä'ö icu'anö ja̧'a̧ jahuäjuru chȩmä̧ttä̧mä̧ pä'ö." ¹⁰ Abimelec pä'inö: "¿Däje jä̧ttö̧ ja̧'hua̧nö̧ ujuturu jecu'äjimä? Ötahuiyä ttö̧ja̧sa̧ttö̧ ya̧tȩ ä'ö'anö̧tä̧ jä̧'a̧ cuirecuacumä ja̧'hua̧nö̧ jȩo̧mȩnä̧ huȩnȩ jö̧'a̧nö̧ jä̧'a̧ ujuturu." ¹¹ Ja̧'hua̧nö̧ ji̧yä̧cu̧, Abimelecmä ji'äu ku̧ni̧nö̧ o'catoi'önä ttö̧ja̧rö̧ pa̧'a̧nö̧ pä'ö: "Ujututtö ya̧tȩ ja̧u̧ru̧ suronä jȩö̧ttö̧mä̧ ja̧'hua̧ta̧'a̧nö̧ irecuarö'inä, iso päi'önätä pä'ösa ja̧u̧mä̧ cuä'ö i̧cuä̧hua̧ jä̧cua̧." ¹² Isaac cuähuä ku̧ni̧nö̧ ja̧huä̧jä̧ rȩjȩnä̧ ja̧'hua̧nö̧ ja̧'a̧ ja̧u̧ a̧'ȩttö̧tä̧mä̧ cienö̧ jo̧mȩ yabonänö ucuähuö 'to'inä, TÖ̧Ä̧NÄ̧HUÄ̧TÄ̧ ppäda'attö̧. ¹³ Ja̧u̧mä̧ ru̧hua̧ juo'inö ja̧'hua̧ta̧'a̧nö̧ aditähuä'inä yabocutä rö̧'ä̧chi̧na̧'a̧ ja̧'hua̧ta̧'a̧nö̧ yabocutä hueöttö'inä ru̧hua̧ juo'inö. ¹⁴ Ku̧nä̧ri̧nö̧ ovejattö̧ recuätörö ja̧'hua̧ta̧'a̧nö̧ pä̧ca̧yö̧'i̧nä̧ ja̧'hua̧ta̧'a̧nö̧ recuätö umuhuäyotörö'inä. Ja'huanö jiyäu filistea ttö̧ja̧mä̧ ja̧u̧ru̧ ä'cuoyähuinätö. ¹⁵ Ja̧'hua̧nö̧ ja̧'a̧ttö̧, u̧mu̧huäyotörö jä'ó hueinö satta peö o'cajuiyönä ajiya acuäjumä jä'ó Abraham u̧mo̧ro̧, filisteos ttö̧ja̧mä̧ redä'ca tta̧'ö̧ du̧mä̧di̧nä̧ttö̧. ¹⁶ Isaacrö päinö Abimelecmä: tiipächi otó ujututtömä, ucú juiyo ri̧ȩnä̧ ju̧ru̧hua̧jä̧ ujututtö'inä abonänö. ¹⁷ ja̧'hua̧nö̧ ja̧'a̧ttö̧ Isaac räopächinö juorö ja̧'hua̧nö̧ ja̧'a̧ kä̧mä̧di̧nö̧ Gerar ötahuiyä pämäroppänä ja̧'hua̧nö̧ ja̧'a̧ttö̧ juȩnȩtä̧ ki̧nö̧. ¹⁸ Jä'ó Abraham minä huahuinö moró̧, Isaac päajita'anö sainö ajiya acuäju. Filisteos ttö̧ja̧ a̧ttu̧tticuinö oju Abraham 'corujuächinö'ca'a. Ja̧'hua̧nö̧ ja̧'a̧ Isaac rejuhuiyä ajiya acuäjumä̧ oinö jä'ó minä oä'chinö̧ta̧'a̧nö̧. ¹⁹ Isaac umöhuäyotö pämäroppä päi'ome reju sattomenä, jahuätömä rejuttömä ajiya rȩjȩttö̧ räopa'a po̧cui̧pi̧nä̧tö̧. ²⁰ Gerar a̧ji̧mö̧rö̧ tta̧huä̧rä̧cuä̧huä̧ ttö̧ja̧mä̧ Isaac ä̧ji̧mö̧rö̧ tta̧'a̧rä̧tu̧cu̧ pä'ä'chäcuäumä pä'inä̧tö̧: "Poya ajiyamä ujutu tahuoya" ja̧'hua̧nö̧ ji̧yä̧cu̧ Isaacmä jahuäju reju i̧mi̧mä̧ o'inö esek pä'ö juhua'amä jahuätö churutä ra̧huä̧rö̧nä̧ pättä'chinomettö̧. ²¹ Ja̧'hua̧nö̧ ji̧yä̧u̧ jahuätömä rejumä korojutä sa'inä̧tö̧, ja̧'hua̧ta̧'a̧nö̧ koro oju'inä, ja̧'hua̧nö̧ sattäja'amä jahuäjunä'inä pä'ä'chäcuähuinä̧tö̧, ja̧'hua̧nö̧ ja̧'a̧ttö̧ jahuäjumä o'inätö̧ Sitna pä'ö. ²² Ja̧u̧mä̧ juorömä koromecu̧ 'chä̧hui̧'ö̧, koro oju'inä sa'inä̧tö̧, ja̧'hua̧nö̧ sattaja'amä yabonö̧mä̧ pä'ä'chocotö pinä̧tö̧ jahuäju tö'cömä. Ja̧'hua̧nö̧ jo̧mȩttö̧ jahuäjumä o'inö Rehobot pä'ö, ja̧'hua̧nö̧ pä'ömä pä'inö: Jitämä TÖ̧Ä̧NÄ̧HUA̧MÄ̧ rö̧ä̧nä̧nö̧ jo̧mȩ i̧yä̧jä̧u̧jä̧, ja̧'hua̧nö̧ ja̧'a̧ttö̧ ujutumä pi̧jä̧ttö̧mä̧ yabonö rö̧tä̧chä̧cuo̧tö̧jä̧." ²³ Ja̧u̧nu̧ o'ca'a Isaacmä juorumä Beersebara̧'a̧cu̧ 'cha'achinö. ²⁴ TÖ̧Ä̧NÄ̧HUA̧MÄ̧ ja̧u̧tä̧ yodo i̧jȩcu̧mä̧ päinä̧cu̧: "Ttötäsä cuä'o Abraham ö̧ä̧nä̧hua̧ Diosmä. Yecuecuä, isopäi'önä ucutäcu ku̧sä̧ ja̧'hua̧ta̧'a̧nö̧ adiunätä jö̧nä̧ jȩchä̧cua̧jä̧ juhua'atäcu cui̧tti̧mö̧ yabonö yottäunä jȩchä̧cua̧jä̧, chu̧mö̧huä̧ya̧ Abraham jähuänämä." ²⁵ Isaacmä ju̧huȩnä̧tä̧ i̧sa̧rö̧ ku icu iyähuome aditinö, aditäji'ca̧mä̧ Ö̧Ä̧NÄ̧HUA̧ i̧mi̧nä̧ ucuocuinö. Ju̧huȩnȩtä̧ isode i̧sa̧ i̧jȩta̧ttö̧ 'tu̧ä̧huode aditö kä̧nö̧mä̧ juhua'atäcu umöhuäyotömä ajiya reju sa'inä̧tö̧. ²⁶ Ja̧'hua̧nö̧ ja̧'a̧ Abimelecmä yo̧mȩtȩnä̧ 'chi̧nä̧tö̧ Gerarttö kä̧mä̧dö̧ a̧hua̧ru̧hua̧ Ahuzatcumä ja̧'hua̧ta̧'a̧nö̧ su̧ro̧da̧u̧ ttu̧ru̧hua̧ Ficolcu'inä. ²⁷ Isaacmä jahuätörö pä'inö: ¿Tta̧'a̧nö̧ pä'ö ttö chö̧ja̧'a̧cu̧ cuichätucua'attö, ucutumä ttörö kö'cocotöjä̧ ja̧'hua̧ta̧'a̧nö̧ ucutumä ttörö otome hue'ö icuocotö pinä̧tö̧jä̧? ²⁸ Ja̧'hua̧nö̧ ja̧'a̧ jahuätömä pä'inä̧tö̧: Ujumä huajunä topä'ijätöjä TÖ̧Ä̧NÄ̧HUA̧ ucucu ö̧ja̧'a̧mä̧, ja̧'hua̧nö̧ ji̧yä̧u̧ a̧mö̧cuädätöjä ji̧yȩtȩnä̧ huȩnȩtö̧ päcuatö pä'ö, ujutumä ucucu. Ja̧'hua̧nö̧ ja̧'a̧ttö̧ ucucu esecuätöjä, ²⁹ ucumä suronämä jȩ'cuo̧tó, ujutu ucuru suronä jȩto̧ca̧'a̧ jä̧'i̧ta'anö ja̧'hua̧nö̧ ja̧'a̧ttö̧ adiu jȩpö̧mä̧, huȩnȩ juiyönä̧tä̧ oto huetinä̧cu̧jä̧. Isopäi'önä̧tä̧ ucumä̧ TÖ̧Ä̧NÄ̧HUA̧TÄ̧ adiu jö̧nä̧ jȩi̧nä̧cu̧jä̧. ³⁰ Ja̧'hua̧nö̧ ja̧'a̧ttö̧ Isaac pä'cäri jȩpi̧nö̧ jahuätucumä ja̧'hua̧ta̧'a̧nö̧ cuä̧nö̧'inö cuinä̧tö̧, au'inä ahuinä̧tö̧. ³¹ Pä'ö mo̧ro̧ päia'a poröchi'ö ji̧yȩtȩ i̧mi̧nä̧ huȩnȩtö̧ pä'ähuinä̧tö̧ ka̧ra̧ ka̧ra̧nö̧. Ja̧'hua̧nö̧ ja̧'a̧ Isaacmä te'ähui'inö, ja̧'hua̧nö̧ jo̧mȩnä̧ huȩnȩ juiyönätä ki̧'i̧nö̧. ³² Ja̧u̧nu̧tö̧ mo̧ro̧ ichi'inättö Isaac umuhuäyotö ja̧'hua̧nö̧ ja̧'a̧ttö̧ pä'inättö̧ reju sattäju ötö'cö. Jähuättö pö'inättö̧: "Tä'cö ajiya po̧cui̧pä̧jä̧tö̧jä̧." ³³ Ja̧u̧ jahuäju o'inö Seba pä'ö, ja̧u̧ ötahuiyämä micua'a Beerseba pä'ö jitä mo̧ro̧ jobu pä'inä. ³⁴ Esaú cuarenta a̧'ȩ u̧ju̧nä̧ro̧mȩnä̧ irecuarö ȩmi̧nö̧, Judit'rö Beeri ittijuru hitita ttö̧ja̧sa̧, ja̧'hua̧nö̧ ja̧'a̧nä̧'i̧nä̧ eminö Basemat' rö'inä Elón ittijuru hitita ttö̧ja̧sa̧. ³⁵ Jahuätö nä̧ttö̧mä̧ kä̧'chinä̧tö̧ tta̧'cua̧ tta̧huȩcuä̧cuä̧huä̧tä̧ Isaac'rö'inä ja̧'hua̧ta̧nö̧ Rebeca 'rö'inä.