¹ Abraham karaju irecuarö ȩmi̧nö̧ Cetura pä'ö micuajuru. ² Juäjuttu i̧tti̧mu̧rö̧ ku̧nä̧ri̧nö̧ Zimram, Jocsán, Medán, Madián, Isbac ja̧'hua̧ta̧'a̧nö̧ Súa'inä. ³ Seba'inä Dedán'inä ttä'ó pinö Jocsánmä̧. Dedán ahuaruhuä o'cotö ji̧na̧'a̧ Letuseo'inä leumeo'inä asirio ttö̧ja̧pinätö̧. ⁴ Madián i̧tti̧mu̧mä̧ pitö ji̧na̧'a̧ Efa,Efer, Hanoc, Abida ja̧'hua̧ta̧'a̧nö̧ Elda'inä. Jahuätö o'catoinä kahuaruhuä ji̧na̧a̧ Cetura. ⁵ Recuo a̧'ȩ o'ca'a Abrahammä o'ca juiyönä u̧ju̧nä̧rö̧mä̧ i̧tti̧ Isaacrö hue'ipinödo. ⁶ Ja̧'hua̧nö̧ ja̧'a̧nä̧ i̧tti̧mö̧rö̧, Ceturacu i̧tti̧mö̧rö̧ koro juäi iyö, i̧tti̧ Isaacttö oto hueinä̧u̧do, kä̧hua̧ räopa'acu tti̧'cha̧ pä'ö ja̧huä̧jä̧ra̧'a̧ ttö̧ja̧cua̧ pä'ö. ⁷ Abraham o'ca juiyönä a̧'cua̧rö̧ kä̧nö̧ u̧ju̧nä̧ri̧nö̧mä̧ ku̧nä̧ri̧nö̧ ciento setenta y cinco a̧'ȩ jo̧mȩnä̧. ⁸ A̧'cua̧ ko̧mȩnä̧ böäcuächötä 'corupä'i'inödo. ⁹ 'Corupäi'äji o'ca'a i̧tti̧mö̧ Isaac'inä, Ismael'inä ttä'omi̧nä̧ o'co jähuä Macpela idoränä rötinätödo. Ja̧huä̧jä̧ Mamre pä̧tȩcuä̧nö̧ ki̧nä̧jä̧, hititas ttö̧ja̧ i̧sa̧ Zohar i̧tti̧ Efrónttö ȩmi̧nä̧jä̧nä̧. ¹⁰ Ja̧huä̧jä̧ Abrahamminä hititas ttö̧ja̧ttö̧ pärätänä mitö ȩmi̧nä̧jä̧nä̧ Abraham minärö'inä, irecua Sarami̧nä̧rö̧'i̧nä̧ rötinätödo. ¹¹ Ja̧'hua̧nö̧ ja̧'a̧ Abraham 'corupäi'inö o'ca'a, i̧tti̧ Isaacrö ppä'ädinödo Diosmä. Isaacmä reju ajiya acuäju ppeye ki̧nö̧do. Jahuäju rejumä ―Dios 'cuäopönä kö̧mä̧ ttörö topö― pä'ö micuinäjudo. ¹² Ja̧'hua̧nö̧ ja̧'a̧, Pitö ji̧na̧'a̧ Abraham irecua Sara cumöhuäyaju Abrahamrö huejinä̧cua̧ Agar Egipto ttö̧ja̧sajuttö i̧tti̧ Ismael i̧tti̧mö̧ pinätö̧mä̧. ¹³ Ismael i̧tti̧mö̧ o'catoi'önä tti̧mi̧mä̧ pa̧'a̧nö̧ micuinä̧tö̧, ttuhuäpächinö̧'a̧cuä̧mä̧: Ismael ä̧cuo̧mȩnä̧ i̧tti̧mä̧ Nebaiot ji̧na̧'a̧, Cedar'inä, Adbeel'inä, Mibsam'inä, ¹⁴ Misma'inä, Duma'inä, Massa'inä, ¹⁵ Hadar'inä, Tema'inä, Jetur'inä, Nafis'inä, Cedema'inä. ¹⁶ Pitö ji̧na̧'a̧ Ismael pinä̧tö̧mä̧, tti̧mi̧mä̧ pa̧'a̧nö micuinätö̧, ttidepiyu ppo̧ö̧'a̧cuä̧, ja̧'hua̧ta̧'a̧nö̧ ä'ö ttö̧jo̧mȩ jö̧'a̧cuä̧; ttahuaruhuä 'cotö docenö huotö ttturuhuotö pinätö̧ttö̧mä̧. ¹⁷ Ismaelmä̧ 137nö a̧'ȩ jo̧mȩnä̧ ku̧nä̧ri̧nö̧. Röjinä̧mä̧ juäpi'ipötä 'corupä'i'inö, 'coru päi'äji o'ca'amä ahuaruhuä 'corujuo'ächinä̧tö̧ ttö̧'o̧mȩcu̧ ttȩpi̧nä̧cu̧. ¹⁸ Jahuätömä Havilacu Shurcu kä'co jo̧mȩ ka̧cui̧nä̧tö̧, Egipto rȩjȩttö̧tä̧ tö'cönä̧nö̧, Asiria rȩjȩra̧'a̧cu̧ 'chä̧cuä̧hua̧'a̧cu̧. Jahuätömä korotö korotönöcu̧ rohuäu ka̧cui̧nä̧tö̧. ¹⁹ Pa̧'a̧nö̧ ji̧na̧'a̧ Abraham i̧tti̧ Isaac ötö'cö huȩnȩmä̧. Abrahammä Isaac jä'o jinö huinö. ²⁰ Isaacmä cuarenta a̧'ȩ hua̧ pinödo Rebecarö irecua päi'önä ȩmi̧nö̧mä̧. Rebecamä Betuel ittiju, Labán öjähuaju pinäjudo. Jahuätömä arameos ttö̧ja̧ pinätödo. Padan-aram rȩjȩnä̧ ka̧cui̧nä̧tö̧do. ²¹ Rebecamä ki̧tti̧mö̧ recuo to'inäjudo. Isaacmä Tu̧ru̧hua̧ Diosrö jä'epö ucuocuinödo Rebecarö. Isaac jäepäjimä ädätinödo Tu̧ru̧hua̧ Dios. Ja̧'hua̧nö̧ ja̧'a̧ Rebeca täcö möchaju päi'inäjudo. ²² Ja̧'hua̧nö̧ ja̧'a̧ ki̧tti̧mö̧ ta̧ju̧ ja̧cuä̧ba̧ttö̧ cäyucue'inätödo. Rebeca pä'inäjudo: ―Ja̧'hua̧nö̧ ja̧'a̧mä̧, ¿Tta̧'a̧nö̧ pä'ö jä̧cua̧sä̧ttö̧ pa̧'a̧nö̧mä̧? Ja̧'hua̧nö̧ jä̧cua̧ amöcuädö, Tu̧ru̧hua̧ Diosrö jä'epö 'chi̧nä̧ju̧do. ²³ Tu̧ru̧hua̧ Dios päinäcuado: Ja̧cuä̧ba̧nä̧ ta̧ju̧ huotö ja̧'a̧ttö̧ jä̧cua̧jä̧. Ji̧nä̧ isocu kada'cattömä jahuätö isotö päi'önä ttö̧ja̧cuä̧cuo̧tö̧rö̧ ta̧ju̧ huotörö cuhuäbecuäcuajujä. Yotötemä korotöttö'inä abonänö ttujuruhuäcuotö. Ä'canä ru̧hua̧ttö̧ isotömä ö̧jä̧hua̧ttö̧ isotö huettötä jȩttä̧cuo̧tö̧―. ä'inödo Tu̧ru̧hua̧ Diosmä. ²⁴ Rebeca täcö kuhuäbecuomenä, u̧mä̧tö̧ ta̧ju̧ru̧ uhuäbecuinäjudo. ²⁵ Ä'canä ru̧hua̧mä̧ i̧jȩta̧ adiu tu'inödo. Uhuo'chemä jä̧ttä̧pä̧ya̧tä̧ ku̧nä̧ri̧nö̧do. Ja̧u̧mä̧ Esaú pä'ö ottinäcudo. ²⁶ Ja̧u̧nu̧ o'ca'a uhuäpächi'ömä uböo utturuhuä'canä u̧mö̧nä̧ 'chu̧huä̧rä̧nö̧ uhuäpächi'inödo. Ja̧u̧mä̧ ottinäcudo Jacob pä'ö. Rebeca Isaacttö ki̧tti̧mö̧rö̧ kuhuäbecuinömä, Isaac sesenta a̧'ȩ ku̧nä̧ri̧nö̧do. ²⁷ Ja̧'hua̧nö̧ ja̧'a̧ Isaac i̧tti̧mö̧ böo juo'inätödo. Esaúmä de'atä cueächa pä̧huä̧ rö̧ji̧nä̧cu̧do, po̧cuä̧ru̧hua̧ ja̧'a̧ttö̧. Jacobmä oju odehuiyänätä a̧'cua̧ pö̧nö̧ aditö ki̧nö̧do. ²⁸ Isaacmä de'a ru̧hua̧ idepä ucua päa'attö, i̧tti̧ Esaúru repe'inödo. Ja̧'hua̧nö̧ ja̧'a̧nä̧ Rebecamä Jacobrö repe'inäjudo. ²⁹ Koronö mo̧ro̧ Jacob jȩru̧huä̧ da'inödo. Uböo Esaúmä de'attö ichomenä, juiyo ucua ppäi rö̧jä̧chi̧'i̧nä̧cu̧do. ³⁰ Ja̧'hua̧nö̧ ja̧'a̧ Esaúmä Jacobrö pä'inödo: ―Chucua iyittö ja̧u̧ tuhuo jȩru̧huä̧ttö̧. Ppäittö juiyupächi'ösä―. (Ja̧'hua̧nö̧ ja̧'a̧ttö̧ Esaú koro i̧mi̧mä̧ Edom pä'ö micuinödo.) ³¹ Jacob ädätinödo: ―Ja̧'hua̧nö̧ jö̧ttö̧mä̧ ä'canä ru̧hua̧ chö̧jö̧nä̧ hue'ipittö, ä'canä ru̧hua̧ ȩmä̧cuȩmä̧ ttötä chȩmä̧cua̧'a̧nö̧ micuä päi'önä―. ³² Esaú pä'inödo: ―Ttömä täcö 'corupädi'ö'a̧nö̧ päi'äcusä. Jitämä ttörö micuähuoca'a ä'canä ru̧hua̧ ȩmä̧cuȩ chȩma̧ pä'ö―. ³³ Jacob pä'inödo: ―Iso päi'önä huecuhuipö'a̧nö̧ jö̧ttö̧mä̧, “A̧' hue'ipösä pä'ittö”― päinäcudo. Ja̧'hua̧nö̧ ja̧'a̧ Esaúmä ä'canä ru̧hua̧ ȩmä̧cuȩmä̧ Jacobrötä hue'ipinödo. ³⁴ Ja̧'hua̧nö̧ ja̧'a̧ttö̧ Jacobmä Esaúru ucua pä'ö iyinödo pa̧'i̧nä̧, jȩru̧huä̧'i̧nä̧. Ja̧'hua̧nö̧ ja̧'a̧ cuä̧nö̧'i̧nä̧ cuäji'ca̧, au'inä ahuäji'ca̧ ä̧rä̧mi̧'ö̧ i̧hui̧nö̧do. Ja̧'hua̧nö̧ jȩa̧'a̧ttö̧ ä'canä ru̧hua̧ ȩmä̧cuȩ ȩma̧ pä'ömä micuähuocö pinödo.