¹ Jitä Abraham'mä buo̧sa̧ huinö, ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧TÄ̧ o'cajuiyönä adiunä ja̧'a̧pä'ö jȩi̧nä̧cu̧ ² Abraham'mä. Abraham pä'inö u̧mu̧huä̧ya̧rö̧, tä'cö recuonä aditö 'kö̧rö̧ ojusodenä ja̧'hua̧ta̧nö̧ ja̧u̧mä̧ o'cajuiyönä̧tä̧ chuä̧ri̧nö̧ u̧ru̧hua̧ öäre jö̧mä̧: "cumunä mȩí̧ chöja dea'a ³ ja̧'hua̧ta̧nö̧ ttötä jȩchä̧cua̧sä̧ TÖ̧Ä̧NÄ̧HUA̧ DIOS mo̧ro̧jä̧'i̧nä̧ pi̧jä̧'i̧nä̧ u̧ru̧hua̧ ä'ca jo̧mȩttö̧ päcuä pä'ö a̧'a̧ jȩchä̧cua̧sä̧, ucumä cui'cächojó canaeos ttö̧ja̧ isajurumä chi̧tti̧ irecua pä'iönämä, ttö chö̧jo̧mȩ 'cä̧tȩttö̧ ka̧cuȩtö̧ttö̧mä̧ ⁴ Ja̧'hua̧nö̧ ja̧'a̧ttö̧ ucumä cui̧'chä̧cua̧jä̧ ttö chi̧rȩjä̧ra̧'a̧, chacuäruhuä ttö̧ja̧'a̧cu̧ jahua'attö cui'cächapä'ö chi̧tti̧ Isaac irecuarö." ⁵ Umucuä̧ya̧ pä'inö ja̧u̧ru̧:? Ttanö jȩcha̧cua̧'a̧jä̧ttö̧ jahuäju pi̧jä̧ra̧'a̧cu̧ kicha ppäjoca'a jö̧ttö̧mä̧? ¿cui̧tti̧rö̧ chuädö chȩpä̧cua'a̧ tä̧ji̧ ucu cui̧chi̧nä̧ja̧ra̧'a̧cu̧tä̧ ppa̧cuä̧cha̧ pä'ö?" ⁶ Abraham pä'inö ja̧u̧ru̧: chi̧tti̧rö̧mä̧ jahua'acumä ppa̧cuä̧di̧yä̧ttö̧ ji̧'qui̧cha̧nö'inä ⁷ TÖ̧Ä̧NÄ̧HU̧A̧ Dios mo̧ro̧jä̧ ru̧hua̧ ȩmi̧nä̧cu̧sä̧ chacuäruhuä ttö'inä chäo ttö'inä räepu'icu ja̧'hua̧tä̧nö̧ chacuäruhuä tti̧rȩjä̧ttö̧'i̧nä̧, ja̧u̧tä̧ ji̧yȩtȩ ucuotönö jȩä̧cuä̧ päinäcu̧sä̧: ' Ucu cuahuäruhuä o'cotörö TTÖTÄ chi̧yä̧cua̧sä̧ pi̧jä̧ rȩjȩmä̧, JA̧U̧TÄ̧ cuȩä̧cua̧ ángelrö̧mä̧ ucu cuä'canämä, ja̧'hua̧nö̧ ja̧'a̧ttö̧ ucumä cui̧'cä̧chä̧cua̧jä̧ chi̧tti̧ irecuarömä jahua'attötä. ⁸ Ja̧'hua̧nö̧ ja̧'a̧nä̧ ja'huäju ucucu ki̧'cha̧ päjöjuiyöttömä, ja̧'hua̧nö̧ jo̧ttö̧mä̧ jȩchä̧cua̧sä̧ päcuinöjinömä jȩpo̧cö̧cuä̧cua̧jä̧. ji̧yȩtȩtä̧ ja̧'a̧ chi̧tti̧rö̧ jua'a cui̧pö̧ juiyä pä'ötä. ⁹ Ja̧'hua̧nö̧ ja̧'a̧ttö̧ jueö adicuä i̧sa̧mä̧ u̧ru̧hua̧ Abaham öjanä me'i̧nö̧, ja̧'hua̧nö̧ jȩa̧'a̧ttö̧ pä'inö isopäi'önätä jȩchä̧cua̧sä̧ ucu päcumä. ¹⁰ Jueö adicua i̧sa̧mä̧ u̧ru̧hua̧ ä̧ji̧mö̧ttö̧ to̧mu̧rȩnö̧ ca̧mȩyu̧tu̧ jo̧mȩ 'chu'ädö rä'opö 'chi̧nö̧. ja̧u̧mä̧ koro u̧ru̧hua̧ mi̧ppoönä iyähua päi'önä u̧ju̧nä̧rö̧'i̧nä̧ ȩpö̧ 'chi̧nö̧. Rä'opö 'chi̧nö̧ Aram Naharaim rȩjȩ ra̧'a̧cu̧, Nacor idepiyu ji̧na̧'a̧cu̧. ¹¹ Ja̧u̧mä̧ jȩpi̧nö̧ ca̧mȩyu̧tu̧'i̧nä̧ ttihue'quiyunä ttö̧'ä̧mä̧dö̧nä̧ ötahuiyä'inä otonänö jo̧mȩttö̧, ajiya ttahuäju tö'cö jo̧mȩ. täcö ni̧pa̧ro̧mȩ ji̧na̧'a̧, nä̧tö̧ ajiya huä'ö tti̧'cha̧ pä'ö pätecuächome. ¹² ja̧'hua̧nö̧ ja̧'a̧ttö̧ jäepinäcu̧: TÖ̧Ä̧NÄHUA̧, chö̧rö̧hua̧ Abraham i̧ä̧nä̧hua̧ DIOS, jädepäcujä jitä moró̧ adiunä pätecuächönä i̧jȩpi̧ttö̧ escu cu̧ju̧ni̧nö̧ chu̧rö̧hua̧ Abrahamcu. ¹³ Pȩné kö̧sä̧ ajiya acuäju jäyä, ja̧'hua̧ta̧'a̧nö̧ ajiya huä'ö räopätö ötahuiyättö nä̧tö̧ mu̧ä̧yotö. ¹⁴ Huȩi̧nä̧ ja̧'a̧tä̧ topi. ttö yajute muä̧yajurö pädomenä: ucú cuäre 'cänäri̧yu̧ttö̧ mȩyȩdi̧ ajiya chahua, ja̧'hua̧nö̧ ja̧'a̧ttö̧ jahuäju päjäcuaju: Ahuí, ja̧'hua̧ta̧'a̧nö̧ cuäji camellorö'inä ajiya ahua peö iyäjusä; ja̧'hua̧nö̧ ja̧'a̧ttö̧ jahuäjutä ja̧cua̧a̧ Isaac irecua päjiäcuaju päö. ja̧'hua̧nö̧ ja̧'a̧ttö̧ chu̧huo̧jui̧a̧ chi̧a̧cua̧sä̧ ucu jueönä cui̧jȩpä̧ji̧mä̧ ttö chu̧ru̧hua̧rö̧ esecu cu̧ju̧ni̧nö̧. ¹⁵ Ji̧nä̧ ucucu cädocä'anä, Rebeca räoinäju̧ kiäre 'cänäri̧yu̧cu̧ ajiya acuaa kuupi'canä ka̧a̧. Rebeca kä'omä Betuel pinö, Milca ki̧tti̧, Nacor irecua, Abraham i̧jä̧hua̧. ¹⁶ Muhuä̧yajumä juiyo a̧'cua̧cui̧nä̧ju̧ ja̧'hua̧ta̧'a̧nö̧ ubocumä 'cuäopocoju pinäju̧. Ya̧tȩ'i̧nä̧ ttö̧ja̧'i̧sä̧mä̧ äocuocua pinäju̧ jahuäjucumä. Jahuäju meyȩdä̧cuä̧huö̧ kiäre 'cänäri̧yu̧nä̧, 'carinäju̧ juo̧nö̧ o̧'ca̧a̧ cäecu kö̧nä̧hui̧nä̧ju̧. ¹⁷ Ja̧'hua̧nö̧ ja̧'a̧ umöhuä̧ya̧mä̧ jopinö jahuäjucu ö'ätecuächa pä'ö, ja̧'hua̧nö̧ pötecuächömä päinäcua̧: Ppä'ädipönö cuiäre 'cänäri̧yu̧ttö̧ ajiya chahua a̧'u̧cu̧nä̧ iyittö." ¹⁸ Jahuäjumä päjimnä̧cu̧: "Chu̧ru̧hua̧, ahui, pä'ö kä̧nö̧ kiäre 'cä̧nä̧ri̧yu̧ jurunä ku̧mö̧nä̧ mȩyȩdä̧cuä̧huo̧po̧'ö̧ ahua pä'ö iyinä̧ju̧. ¹⁹ Ahua pä'ö iyä'coju cä'ädömä, jahuäjumä pä'inä̧ju̧: Ja̧'hua̧ta̧'a̧nö̧ ajiya huä'opo'äjusä camellos au cättädome jubö." ²⁰ Ja̧'hua̧nö̧ ja̧'a̧ttö̧ jurunä̧nö̧ huä'opo'inä̧ju̧, huäpo'ömä 'cä̧nä̧ri̧yu̧ttö̧mä̧ ajicuäcuähuotö ttahuosenä to'inä̧ju̧, ja̧'hua̧nö̧ jȩpö̧mä̧ pä'äjita'anä jopächinäju ajiya rejura̧'a̧cu̧ ajiya huäjopa pä'ö, ja̧'hua̧nö̧ huä'ö camellotö̧mä̧ o'catoi'önärö̧ huä'ö iyinä̧ju̧. ²¹ Ja̧u̧ ttö̧ja̧sa̧mä̧ 'corujueinä to̧pä̧ri̧nö̧ TÖ̧Ä̧NÄ̧HUA̧MÄ̧ po chichäja'amä̧ isojuoönä jȩä̧cua̧di̧, jȩpo̧cö̧di̧ pä'ö u̧huo̧jua̧ pä'ö. ²² Ja̧'hua̧nö̧ ja̧'a̧ Camellos au kättäda'anä̧, ja̧u̧ ttö̧ja̧sa̧mä̧ ttödo'che i̧so̧bö̧ orottö adicuobö̧ tti̧ji̧yu̧nä̧ ru̧nä̧huo̧bö̧ ya'ute siclo kä'co jo̧mȩnä̧ a̧mä̧qui̧nö̧ ja̧'hua̧ta̧'a̧nö̧ ttöjonä rö̧nä̧huä̧sa̧ orottö a̧di̧cuä̧sa̧ diez siclo jo̧mȩnä̧ a̧mä̧qui̧nä̧sa̧, ²³ ja̧'hua̧nö̧ ja̧'a̧ ja̧u̧ jä'epö ä̧ju̧cyu̧i̧nö̧: ¿Ucumä di ittiju cua'attö̧? ji'ähuittö, ¿Cuä'o ojusodenä chä'i'amä yȩnȩtȩ ä'ähuome ka̧'a̧?" ²⁴ Jahuäjumä ja̧u̧rö̧ pä'inäju̧: Ttömä Milca Nacorttö ki̧tti̧ kuhuäbecuinä̧cu̧ Betuel ittijusä." ²⁵ Jahuäjumä ja̧'hua̧ta̧'a̧nö̧ pä'inä̧ju̧ ja̧u̧rö̧mä̧: Rö̧ä̧nä̧ ku̧nä̧rä̧tö̧jä̧, isä'cua'inä, ajicuäcuähuotö ttucuä'cua'inä ja̧'hua̧ta̧'a̧nö̧ ucu yodo cuä'äcyo̧ca̧'inä." ²⁶ Ja̧'hua̧nö̧ ja̧'a̧ ja̧u̧ ttö̧ja̧sa̧mä̧ ja̧rȩyu̧ pä'i'ö TÖ̧Ä̧NÄ̧HUA̧RÖ̧ ucuotö esehuinö. ²⁷ Ja̧u̧mä̧ pä'inö: Diostä ja̧'a̧ adiunä jö̧nä̧ jȩpö̧mä̧, chu̧ru̧hua̧ Abraham Ö̧Ä̧NÄ̧HUA̧ Diosmä, esecuinö jinö̧mä̧ ja̧'hua̧ta̧'a̧nö̧ chu̧ru̧hua̧rö̧ a̧'cua̧ u̧huȩnä̧ri̧nö̧mä̧ cädi'oca'a i̧jȩpö̧. Ttörömä, TÖ̧Ä̧NÄ̧HUA̧MÄ̧ jueönä̧tä̧ o'ipäji chu̧ru̧hua̧ ahuaruhuä ttojusodera̧'a̧tä̧." ²⁸ Ja̧'hua̧nö̧ ja̧'a̧ möäyajumä jopipinäju̧ ja̧'hua̧nö̧ jopipö ka̧ju̧ttö̧ kahuaruhuärö 'cuäopäjimä o'cajuiyönä ji'ähuinä̧ju̧. ²⁹ Ja̧'hua̧nö̧ ja̧'a̧ Rebecamä kubuorö ku̧nä̧ri̧nä̧ju̧ ja̧u̧ i̧mi̧mä̧ Labán pä'ö micuinö. Labánmä umicu rä'opächö ja̧u̧mä̧ mänättömä̧ reju jäyä ö̧jo̧mȩcu̧ jopinö. ³⁰ Ja̧u̧mä̧ i̧so̧bö̧ ki̧ji̧yu̧nä̧ ra̧'a̧ toaja'a ja̧'hua̧ta̧'a̧nö̧ ttö̧jo̧nä̧ rö̧nä̧huä̧sa̧ öjähuaju köjonä ra̧'a̧ toäja'amä, juhua'atäcu öjähuaju Rebeca kucuocua'a ä̧ju̧cuo̧mȩnä̧: "Pi̧yȩ ja̧'a̧ ja̧u̧ ttö̧ja̧sa̧ päinö̧mä: Ja̧u̧mä̧ ttö̧ja̧sa̧ ö̧jo̧mȩcu̧ 'chä̧hui̧'ö̧ toomenä, ja̧u̧ ttö̧ja̧sa̧mä̧ rejuttömä jäyä camellotö̧tä̧ ttippeyänä ki̧nö̧. ³¹ Ja̧'hua̧ta̧nö̧ Labán pä'inö: "Doächí, ucu TÖ̧Ä̧NÄ̧HUA̧ ȩmi̧nä̧cu̧. ¿Tocu pä'ö u̧mi̧tä̧ cu̧jä̧? ttö chojusode jo̧mȩnö̧ ja̧'a̧, ja̧'hua̧ta̧nö̧ cameyu̧tu̧ ttö̧jo̧cuä̧cuo̧mȩ'i̧nä̧." ³² Ja̧'hua̧ja̧'a̧ttö̧ ja̧u̧mä̧ 'chi̧nö̧ isodera'acu ja̧u̧ umuhuäyotötä cameyu̧tu̧ru̧ chuädö rutinättö. jahuätö cameyu̧tu̧ru̧mä̧ juhuätötä ttucuä'che tti̧yi̧nä̧u̧, ja̧'hua̧ta̧nö̧ ajiya'inä tti̧yi̧nä̧u̧ tti̧jä̧pi̧yä̧ ttötöcapä'ö ja̧'hua̧nö̧ jö̧ta̧'a̧nö̧ ja̧u̧cu̧ ka̧cuä̧tö̧rö̧'i̧nä̧ ttö̧jä̧pi̧yä̧ ttötöca pä'ö. ³³ Jahuätömä ja̧u̧ ä'ca jo̧mȩ rutinättö̧ cuäcuähuä ucua pä'ö, ja̧'hua̧nö̧ ja̧'a̧nä̧ ja̧u̧ pä'inö: "Ttömä cuocö chäcua̧sä̧ ji̧yȩtȩ jidäcua pä'ö pädomejobu." Ja̧'hua̧nö̧ ja̧'a̧ttö̧ Labán pä'inö: " Ucuocuí". ³⁴ Ja̧u̧ pä'inö: "Ttömä Abraham umuhuä̧ya̧sä̧. ³⁵ TÖ̧Ä̧NÄ̧HUA̧ ttö chu̧ru̧hua̧rö̧ rö̧ä̧ö̧nä̧ adiunä jȩpu̧ ja̧'hua̧nö̧ ja̧'a̧ttö̧ pä̧rä̧tä̧ ru̧hua̧ juo'ö. JA̧U̧TÄ̧ iyäcu recuätö oveja̧tö̧rö̧'i̧nä̧, pärätä'inä ja̧'hua̧ta̧nö̧ oro'inä, umucuäyotö umätö̧rö̧'i̧nä̧ ja̧'hua̧ta̧nö̧ nä̧tö̧rö̧'i̧nä̧, ja̧hua̧ta̧nö̧ cameyu̧tu̧ru̧'i̧nä̧ ja̧'hua̧ta̧nö̧ asnos'ru̧'i̧nä̧ ³⁶ Sara, chu̧ru̧hua̧ irecua, churuhuattö ki̧tti̧rö̧ uhuäbecuinäju̧ jahuäjumä buasaju ja̧'a̧nä̧, ja̧'hua̧nö̧ ja̧'a̧ttö̧ ja̧u̧ma̧ iyinö jo'cajuiyönä u̧ju̧nä̧rö̧mä̧ ja̧u̧ru̧tä̧. ³⁷ Chu̧ru̧hua̧mä ttörö pä'inö pa̧'a̧nö̧ jȩcu̧'a̧ pä'ö, pä'inö: Chi̧tti̧ irecua päi'önämä jȩcu̧'o nanam ttö̧ja̧ tti̧tti̧mö̧ttö̧mä̧, pi̧jä̧ rȩjȩnä̧ ttö chidepiyu päi'önä chö̧jo̧mȩttö̧mä̧. ³⁸ Ja̧hua̧nö̧ jo̧ca̧'a̧, ucumä cui̧'chä̧cua̧jä̧ chä'ö ö̧jo̧mȩcu̧, ja̧'hua̧ta̧'a̧nö̧ chahuaruhuä ttö̧jo̧cua̧'a̧cu̧tä̧, jua'attö cui̧'cä̧chä̧cua̧jä̧ chi̧tti̧ irecua päi'önä. ³⁹ Chu̧ru̧hua̧rö̧ pä'inösä̧: tta̧'a̧nö̧ jä̧cua̧'a̧ttö̧ isaju ttucu kicha päjöjuiyöttömä. ⁴⁰ Ja̧'a̧hua̧nö̧ pädomenä päinäcu̧sä̧: CHÖ̧A̧NÄ̧HUA̧ ä'canä chi̧'chä̧cu̧mä̧, u̧mu̧hä̧ya̧ Angelrö ucuru huȩä̧cua̧, ja̧u̧tä̧ ppä̧dä̧rä̧cua̧ cui̧'cho̧mȩ, chi̧tti̧ irecuarö cu̧'o̧cui̧'a̧ pä'ö ttöttä chahuaruhuättö ja̧'hua̧ta̧'a̧nö̧ chä'o ahuaruhuä o'cötöttö. ⁴¹ Ja̧'hua̧nö̧ ja̧'a̧nä̧ ttö jȩcu̧'a̧ pädinö ji̧nö̧'i̧nä̧ jȩpo̧cö̧ cuä̧cua̧jä̧ ttö chahuaruhuä ttö̧jo̧cua̧'a̧ cui̧'cha̧'a̧ttö̧ ja̧'hua̧nö̧ ja̧'a̧nä̧ jahuätö ucuru ttiyöjuiyöttö. Jȩcu̧'u̧ jui̧yä̧cua̧jä̧ ttörö jȩchä̧cua̧sä̧ päcuinö'inä. ⁴² Jitä moró̧tä̧ ajiya acuäju ko̧mé ttö rȩbȩhui̧pu̧, ja̧'hua̧ta̧'a̧nö̧ pä̧dö̧cua̧sä̧: TÖ̧Ä̧NÄ̧HUA̧, ttö chu̧ru̧hua̧ Abraham i̧ä̧nä̧hua̧ DIOS, ja̧'hua̧nö̧ jua'acu chi̧'cho̧mȩnä̧ adihuönä pätecuächönä ucurö pä̧huä̧rö̧ jö̧mȩnä̧tä̧ jȩ'cuä̧jä̧cu̧sä̧, ⁴³ pȩnȩtä̧ kö̧sä̧, ajiya acuäju jäyä; ja̧a̧tä̧ topi muä̧yaju räopu ajiya huäja'anä, ttö jädepäcuaju ja̧cua̧'a̧: ajiya chahua iyittö ucú cuiäre 'cä̧nä̧ri̧yu̧ttu̧, ⁴⁴ pädomenä juäju isaju kädätäcuaju, a̧já̧ ahuí, ja̧'hua̧ta̧'a̧nö̧ cuäji camellorö ahua pe'ö ttötä huädäcuajusä ajiya, TÖ̧Ä̧NÄHUA̧, juajutä jä̧cua̧'a̧ isajumä ucú päcuäcua, ucutä ȩmú̧ iyöjä ttö chu̧ru̧hua̧ i̧tti̧rö̧. ⁴⁵ Ji̧nä̧́ ttö jacuänä amuädö ucuocu cädädiyai, topinätö̧jä̧, Rebeca räoinäju̧ kiäre 'cänäri̧yu̧cu̧ kuupi'canä ka̧'a̧ juäju ajiya acuäjucu 'chä̧hui̧'ö̧ ajiya huäopinäju̧. ja̧'hua̧nö̧ ja̧'a̧ ttö jäepinösä̧ juäjurö: chahuá iyittö. ⁴⁶ Juäju yotäcu kuupi'cattö meyȩdä̧cu'ä̧huo̧u̧ kiäre 'cänäri̧yu̧ päjinäcu̧sä̧: a̧já̧ ahuí, ja̧'hua̧ta̧'a̧nö̧ cuäji camello̧tu̧rö̧'i̧nä̧ ajiya iyäjusä. Ja̧'hua̧nö̧ kiyäcu ahuinösä̧, ja̧'hua̧ta̧'a̧nö̧ juäju iyinäju̧ ajiya camello̧tu̧rö̧'i̧nä̧. ⁴⁷ Ttömä jä'epö ä̧ju̧cu̧mä̧ pä'inösä̧: ¿Ucumä di ittiju cua'attö̧? Jahuäjumä ädätinä̧ju̧: Nacor Milcacu tti̧tti̧ uhuäpächinö Betuel ittijusä. Ja̧'hua̧nö̧ ja̧'a̧ i̧so̧bu̧mä̧ ki̧ji̧yu̧nä̧ ru̧ni̧nu̧sä̧ ja̧'hua̧ta̧'a̧nö̧ ttöjonä ru̧nä̧huä̧sa̧mä̧ köjonä. ⁴⁸ Ja̧'hua̧nö̧ jȩpö̧ chihue'quiyunä kä̧mä̧dö̧ ja̧rȩyu̧ pä'i'ö chu̧ru̧hua̧ Ö̧Ä̧NÄ̧HUA̧ Diosrö ucuo te'äu esehuinö̧sä̧, jueä mä̧nä̧nä̧ chi̧'chö̧nä̧ o'ipinö̧rö̧, chu̧ru̧hua̧ ahuaruhuaju kittijurö i̧tti̧ irecua päi'önä chu̧'o̧cui̧'ö̧nä̧. ⁴⁹ Jitämä, ja̧'hua̧nö̧ ja̧'a̧ttö̧, ucutu jo̧mȩnä̧ ku̧jä̧tu̧cu̧ttö̧mä̧ chu̧ru̧hua̧rö̧ re kä̧nö̧ jueönä̧tä̧ ji'ähuätucuittö. Ja̧'hua̧nö̧ ja̧'a̧nä̧ jȩ'cuä̧tu̧cu̧ juiyöttö'inä ji'ähuätucuittö, chu̧huo̧jua̧'a̧cu̧cö̧, chu'ohuecucö̧ chijärächi'äcua'anö̧." ⁵⁰ Ja̧'hua̧nö̧ ja̧'a̧ Labán'inä Betuel'inä ädätömä pättinä̧cu̧: Pi̧yȩ huȩnȩmä̧ TÖ̧Ä̧NÄ̧HUA̧TTÖ̧ ichinö ja̧'a̧; ujutumä suronä'inä, adihuomenä'inä tucuocua pä'ömä juiya'a. ⁵¹ Topiju, Rebecamä yenaja̧ kjä̧ju̧. O'ipächö täiju, cu̧ru̧hua̧ i̧tti̧ irecua jö̧nä̧ käcua'anö, ja̧'hua̧nö̧ TÖ̧Ä̧NÄ̧HUA̧ päjita'anö̧tä̧. ⁵² Abraham umöhuä̧ya̧mä̧ ttucuocu ä̧ju̧cu̧mä̧, TÖ̧Ä̧NÄ̧HUA̧ ä'ca jo̧mȩ ihue'quiyönä kä̧mä̧dö̧ ja̧rȩyu̧ pä'i'inö. ⁵³ Umöhuäya̧mä̧, platattö adicuä'inä, orottö adicuä'inä ja̧'hua̧ta̧'a̧nö̧ pö̧jä̧ta̧'inä Rebecarö iyinö. Ja̧'hua̧ta̧'a̧nö̧ ja̧u̧mä̧ kubuorö'inä, ka̧ju̧ru̧'inä rö̧ä̧nä̧ micuäu mipponä iyinö. ⁵⁴ Ja̧'hua̧nö̧ ja̧'a̧ ja̧u̧mä̧ chutäcu kä̧cuä̧tö̧cu̧ u̧cuȩ'inä cuinö̧ a̧huȩ'inä ahuinö. Jahuätömä juȩnȩtä̧ 'cuäopinä̧tö̧ ja̧u̧ yodomä̧, ja̧'hua̧nö̧ ja̧'a̧ jahuätömä mo̧ro̧ päia'a ttö'orächia'a, ja̧u̧mä̧ pä'inö: ''Chu̧ru̧hua̧ chi̧'cha̧ hue'ittö.'' ⁵⁵ kuböotö̧'inä ka̧ju̧'inä pättinäcu̧: ''Jahuäju muäyajumä ya'ute mo̧ro̧ yabonä̧nö̧ ku̧ji̧a̧'a̧nä̧ ja̧'a̧tä̧ topiju ujutucu, dieznö̧ mo̧ro̧tä̧'iinä. Ja̧u̧nö̧ o'ca'atä, ki̧huä̧cua̧ju̧ juajumä̧.'' ⁵⁶ Ja̧'hua̧nö̧ ja̧'a̧nä ja̧u̧mä̧ jahuättörö päinö, '' chi̧'chä̧'a̧nä̧mä̧ 'to̧huȩpä̧rä̧tö̧, jua'amä̧ TÖ̧Ä̧NÄ̧HUA̧TÄ̧ chu̧mä̧nä̧mä̧ bahuepäcusä. Hueittö chu̧ru̧cuä̧cu̧ chi̧chä̧.'' ⁵⁷ Ja̧'hua̧nö̧ jä̧'ä̧ pättinä̧cu̧: '' juotähuottöjä̧ yajute mu̧äyajuru jätepapä'ö.'' ⁵⁸ Ja̧'hua̧nö̧ ja̧'a̧ Rebecarö juo'opö jäepinätö̧: '' ¿chä̧ju̧juä̧ pidecu?'' juajumä a̧'a̧ chä̧ju̧sä̧ pä'ö ädätinäju̧.'' ⁵⁹ Ja̧'hua̧nö̧ ja̧'a̧ttö̧ jahuätömä ttijäcuaju Rebecarö cueö'icuinättö̧, ki̧'cha̧pä'ö jahuäjuru ttä̧'a̧rä̧ju̧cu̧ ji̧nä̧ yo̧mȩtȩ, Abraham u̧mu̧huäyotucu. ⁶⁰ Ja'huätö Rebecarö̧ ppädäcuäcuä adicuäcua'a pä'inättö̧ jahuäjuru:"Ttijäcuaju repetäcua, ucumä juiyó recuätö ttä̧ju̧ cuäcuajujä pa̧ja̧cuo̧mȩ'i̧nä̧ juiyönä, ja̧'hua̧nö̧ ja̧'a̧ttö̧ ucu cuacuäruhuä iso juottepäcuotö ttabo'iyotö a̧u̧tä̧tö̧rö̧mä̧." ⁶¹ Ja̧'hua̧nö̧ ja̧'a̧ Rebeca ä̧rä̧mi̧'i̧nä̧ju̧, ja'huäju cu̧mu̧cuäyotucu cameyu̧tu̧nä̧ ttu̧cuä̧bä̧da̧pä'ö, ja̧'hua̧nö̧ ja̧'a̧ ja̧u̧ o'ca'anä 'chinättö̧. Ja̧'hua̧nö̧ ja̧'a̧ttö̧ Abraham umuhuä̧ya̧ päjimä o'ipu 'chinö Rebecarö, ja̧'hua̧nö̧ ja̧'a̧ttö̧ ichäjä̧mä̧nä̧tö̧ i̧cui̧nö̧. ⁶² Jitä Isaacmä Neguev ki̧nö̧, Beer Lajai Roi jareönä ppa̧'a̧chö̧. ⁶³ Isaac ni̧pä̧ro̧mȩ rä'opinö meje'cara̧'a̧ adiunänö amucuäda pä'ö. Ja̧'hua̧nö̧ 'chä̧nö̧ to'omenä topinö, ¡ca̧mȩyu̧tu̧ tticha'a! ⁶⁴ Rebeca topinä̧ju̧, ja̧'hua̧nö̧ ja̧'a̧ tojomenä Isaactä jina'a, Camejo u̧huä̧mȩttö̧ jurunä mȩyȩhuä̧chi̧nä̧ju̧. ⁶⁵ Ja'huäju pä'inäju̧ ttu̧mu̧huä̧ya̧rö̧: "¿Tide jua̧'a̧ jä̧ttö̧ ujuturu toa pä'ö meje'cara'a 'chä̧ji̧mä̧?" Ttu̧mu̧huä̧yä̧ ädätinö: "Ja̧u̧mä̧ chu̧ru̧hua̧ jä̧'a̧". Ja̧hua̧nä̧ ä̧ju̧cu̧ jahuäjumä 'to̧ȩcuä̧cuä̧huä̧ta̧ ȩmo̧po̧'ö̧ kunä i̧sä̧ta̧ a'tocuinä̧ju̧. ⁶⁶ Ja̧'hua̧nö̧ ja̧'a̧ Abraham i̧tti̧ Isaac ja̧ju̧ Sarami̧nä̧ kojusodera'acu Rebecarö o'ipinödo jahuäjucutä ö̧ja̧ pä'ö. ⁶⁷ Isaac repe'inödo Rebecarö. Ja̧'hua̧nö̧ ja̧'a̧ttö̧ ja̧ju̧ Sarami̧nä̧ 'corupäji'inö o'ca'a, Rebeca ja̧u̧ru̧ ppäjäda'attö Isaac a̧'cua̧ adihuächi'inäcudo täcö.