¹ Saramä ciento veintisiete a̧'ȩ huaju 'corupä'i'inäjudo. ² Quiriat-arba ötahuiyänä, koro i̧mi̧mä̧ Hebrón ötahuiyä Canaán rȩjȩttö̧ 'corupä'i'inäjudo. Abrahammä a̧'cua̧ tta̧'ȩcu̧ ajuähuinödo, irecua Sarami̧nä̧ 'corupäji'äjiyäcu. ³ Ja̧'hua̧nö̧ ja̧'a̧ Abrahammä ä̧rä̧mä̧chö̧ juhua'atäcu irecuä minä ko'co jähuätä rutipö, Het i̧tti̧mö̧rö̧ ucuocumä pä'inö: ⁴ Ttömä ucututtömä ko̧ro̧jä̧ra̧'a̧ttö̧ i̧chä̧cuä̧hua̧sä̧, ppä'ädipätucuittö, cui̧rȩjä̧tu̧cu̧ yȩnȩtȩ iyö cu̧'cä̧tȩtu̧cu̧ jo̧mȩ chu'tura, ja̧'hua̧nö̧ jȩpö̧tä̧ chuhuaparemä chu'turäcua'anö̧." ⁵ Het i̧tti̧mö̧mä̧ Abrahamrö ädätömä pä̧'i̧nätö: ⁶ Tu̧ru̧hua̧ ä̧ju̧cui̧tö̧, Ucumä̧ ru̧hua̧ Dios i̧tti̧jä̧ ujututtömä. 'Turepö icui cuhuaparemä, jiuyo adihuome hua'are tu'turä'i jo̧mȩmä̧. Ya̧tȩ'inä cuhuaparemä cu'turu juiya'anö pä'ömä pä'ocö, ja̧'hua̧nö̧tä̧ cuhuaparemä cu'turäcua̧jä̧." ⁷ Abrahammä ä̧rä̧mi̧'ö̧ ja̧huä̧jä̧nä̧ ka̧cuä̧tö̧ ttö̧ja̧ Het i̧tti̧mö̧rö̧ ucuotö ja̧rȩyö̧ pä'i'inö. ⁸ Jahuätörö pa̧'a̧nö̧ pä'inö: "Ttö chuhuapare chu'tura pädö a̧ päcuätucuttömä, adiu ä̧ju̧cuä̧tu̧cui̧ttö̧, Zohar i̧tti̧ Efron ttönä ucuocu ppä'ädätucuittö. ⁹ Macpela idorä ttiyattö jä'epiyätucuittö, jahuätö ttidorä, tti̧rȩjä̧ beipome korä. Juorä micuomemä micuähuome jo̧mȩ chimitäcua̧sä̧, ttö̧ja̧ tto̧ttä̧ra̧'a̧nä̧ ttiyattö pä'ittö chuhuapare chu'tura." ¹⁰ Jitämä Efronmä, Het i̧tti̧mö̧ ttö̧'cä̧tȩ jo̧mȩ pö̧ ja̧'hua̧nö̧ ja̧'a̧ Hit ttö̧ja̧sa̧ Efronmä̧ ädätö̧mä̧ pä'inö̧ Abrahamrö̧mä̧, jitö o'catoi'önä Het i̧tti̧mö̧ ötahuiyära̧'a̧cu̧ dodepätö o'catoi'önä ttä̧ju̧cuä̧ra̧'a̧nä̧. ¹¹ Ja̧'hua̧nö̧mä̧cö̧ Churuhua adiu ä̧ju̧cui̧ttö̧. Ttömä rȩjȩ iyösä ja̧'hua̧ta̧'a̧nö̧ ja̧huä̧jä̧tä̧ kö̧ idorä'inä, chahuaruhuä tti̧tti̧mö̧ to̧ttä̧ra̧'a̧nä̧ chiyäcujä cuirecua ko'co jähuä cu'tura pä'ömä." ¹² Ja̧'hua̧nö̧ ja̧'a̧ Abrahammä ja̧huä̧jä̧nä̧ ka̧cuä̧tö̧ ttä'ca jo̧mȩ ihue'quiyunä kä̧mä̧dö̧ ja̧rȩyu̧ pä'i'inö. ¹³ Ja̧u̧mä̧ ja̧huä̧jä̧ ttö̧ja̧ ttä̧ju̧cuä̧ra̧'a̧nä̧ Efróncumä ucuocuinö: ja̧'hua̧nö̧ ja̧'a̧nä̧ jädepö a̧ päcuttömä, ä̧ju̧cui̧ttö̧. Ja̧u̧ rȩjȩ micuämä chi̧mi̧tä̧cua̧sä̧. Chiäre platamä emiyittö̧ cuȩmö̧ttö̧mä̧, chuhuaparemä ju̧huȩnȩtä̧ chu̧'tu̧rä̧cua̧sä̧." ¹⁴ Efrónmä Abrahamrö̧ ädätömä pä'inö: ¹⁵ Chu̧ru̧hua̧ ä̧ju̧cui̧ttö̧: Rȩjȩ a̧'u̧cuä̧jä̧tä̧mä̧ platamä cuatrocientosnö jo̧mȩnä̧ micuähua'a, ja̧u̧mä̧ micuämä ucu ttöcutä ja̧'a̧. cuhuaparemä 'turu icui. ¹⁶ Abraham, Efrón päömä ä̧ju̧cui̧nö̧, ja̧'hua̧nö̧ ja̧'a̧ttö̧ Abrahamä plata ö̧a̧mȩcä rö̧nö̧ topinö Het i̧tti̧mö̧ ttä'ca jo̧mȩttö̧ ttä̧ju̧cua̧'a̧nö̧ jäepäjita'anö, ttöäre iyähuä ttö̧ja̧ iyö ttö̧'a̧tä̧'i̧jö̧'a̧nö̧tä̧. ¹⁷ Ja̧'hua̧nö̧ ja̧'a̧ Abrahammä i̧rȩjä̧ ji̧'qui̧cha̧jä̧jä̧ Efrón pä'ö mi̧cua̧ttö̧ pärätä mitö ȩmi̧nö̧do. Ja̧huä̧jä̧ rȩjȩ Macpela pä'ö micuome Mamre pä̧tȩcuä̧nö̧ ki̧nä̧jä̧. Idorä'inä, dauhuiyä'inä iyinödo Abrahamrö. ¹⁸ Hititas ttö̧ja̧'i̧nä̧ o'ca toi'önä ötahuiyä u̧mi̧nä̧ tto̧ȩcuo̧ca̧ äpatenä do'ächätö'inä ttu̧huo̧ju̧nä̧ ȩmi̧nö̧do Abrahammä. ¹⁹ Ja̧u̧nu̧ o'ca'a Abrahammä irecua Sarami̧nä̧ ko'co jähuä idoränä rötinödo. Juhuorä Macpelanä Mamre pä̧tȩcuä̧nö̧ Canaán rȩjȩnä̧ rinorädo. Mamre koro i̧mi̧mä̧ Hebrón pä'ö micuinome. ²⁰ Ja̧'hua̧nö̧ ja̧'a̧ ja̧huä̧jä̧ ji̧'qui̧cha̧jä̧jä̧'i̧nä̧ idorä'inä hititas ttö̧ja̧mä̧ Abrahamrö iyinätödo 'corupä'i'ätörö rötähuorä päi'önä.