¹ Ja̧u̧nu̧ o'ca'a Tö̧ä̧nä̧hua̧ Dios Abrahamrö ka̧cuä̧mö̧ topö päinäcudo: ―¡Abraham!―Abraham ädätinödo: ―Pȩnȩtä̧ kö̧sä̧―. ² Ja̧'hua̧ta̧nö̧ Tö̧ä̧nä̧hua̧ Dios päinäcudo: ―Chu ä̧cua̧ cui̧tti̧ ucu repecuhuäcu Isaacrö o'ipi Moriah rȩjȩra̧'a̧. Ttö jidähuäcuähuä inähuättö cui̧tti̧rö̧ ku icu cuiyattöja―. ³ Pä'ötä mo̧ro̧ päi'a'a Abraham porächi'ö, äji burro abonä huänähuäcä cä'epö huȩnö̧ nö'quinödo. Ja̧'hua̧ta̧nö̧ mi'inä bä'opo'inödo i̧tti̧rö̧ ku icu i̧yä̧cuȩ. Rä'opinödo Tö̧ä̧nä̧hua̧ Dios hueäjomȩcu̧ i̧'cha̧ pä'ö. Chutäcu o'ipinödo umöhuäyotö möäyotö ta̧ju̧ru̧'i̧nä̧, i̧tti̧ Isaacrö'inä. ⁴ Räopäja'attömä huäbodäcuä mo̧ro̧ päi'omenä, Abraham ji̧nä̧ otonänö kä̧nö̧ topinödo Tö̧ä̧nä̧hua̧ Dios hueäjome. ⁵ Ja̧'hua̧nö̧ topö umöhuäyotörö pä'inödo. ―Pȩnȩtä̧ ki̧'ä̧tu̧cui̧ burrocu. Ttömä yȩnȩ jubö 'chö̧sä̧ chi̧tti̧cu̧. Ja̧u̧nu̧ o'ca'a Tö̧ä̧nä̧hua̧ Diosrö ucuotönö tamöcuädö o'ca'a ppa̧tä̧chi̧'ä̧cuo̧tö̧jä̧ ucutu cu̧ja̧cuä̧tu̧cuo̧mȩcu̧―. ⁶ Abraham ku icu iyähuä jȩä̧cuȩ mica, i̧tti̧ Isaac u'upi'canä cä'epö uhuenäcu ȩpi̧nö̧do. Chutämä u̧mö̧nä̧ ȩpi̧nö̧do ocu'quȩ'i̧nä̧, nahuodä'inä. Jahuätö ta̧ju̧tä̧ ji̧nä̧ yo̧mȩtȩ 'chi̧nä̧tö̧do. ⁷ Ja̧'hua̧nö̧ 'chä̧nö̧ kä̧nö̧ Isaac jä'o Abrahamrö pä'inödo: ―Chä'o―. Abraham ädätinödo: ―Pȩnȩtä̧ kö̧sä̧, chi̧tti̧―. Isaac pä'inödo: ―Ocu'quȩ'i̧nä̧, mica'inä ku̧nä̧rä̧tö̧jä̧. Ja̧'hua̧nö̧ ja̧'a̧nä̧ ¿tȩnȩ jä̧ttö̧ oveja i̧tti̧ ku icu iyähuä jȩcu̧'ä̧cua̧mä̧? ⁸ Abraham ädätinödo: ―Tö̧ä̧nä̧hua̧ Diostä ppä̧dä̧cua̧ ovejarö ku icu iyähuä päi'önä ku chicua pä'ö, chi̧tti̧―. Ja̧'hua̧nö̧ ja̧'a̧ tajucuäyotö ji̧nä̧ yo̧mȩtȩ 'chi̧nä̧tö̧do. ⁹ Tö̧ä̧nä̧hua̧ Dios jiähuäjome rȩbȩhui̧pö̧, Abraham ku icu iyähuome aditinödo. Ku icu iyähuome huäme mica rötinödo. Ja̧'hua̧ta̧nö̧ i̧tti̧ Isaacrö nö'cö huȩni̧nö̧do mica huäme. ¹⁰ Ja̧'hua̧nö̧ ja̧'a̧ u̧mö̧nä̧ nahuodä'inä ȩmo̧po̧'i̧nö̧do, i̧tti̧rö̧ ta'ö icua pä'ö. ¹¹ Ja̧'hua̧nö̧ jȩi̧yä̧cu̧ Tu̧ru̧hua̧ Jehová huȩ'ä̧hua̧ ángel mo̧ro̧jä̧ra̧'a̧ttö̧ huoinäcudo. Pä'inödo: ―Abraham, Abraham―. Abraham ädätinödo: ―Pȩnȩtä̧ kö̧sä̧―. ¹² Angelmä pä'inödo: ―Cu̧mö̧mä̧ cäcuepä' cui̧tti̧rö̧ suronä jȩcu̧'a̧ pä'ömä. Jitämä täcö huo̧jua̧sä̧ ucumä Tö̧ä̧nä̧hua̧ Diosrö ucuotönö yȩ'ȩcua̧jä̧ pä'ö. Yorö'iso ucumä cui̧tti̧ chu ä̧cua̧rö̧'i̧nä̧ repe'ö dä̧'ä̧pȩ'ä̧rö̧ hua'adö ku̧no̧cö̧jä̧―. ¹³ Abraham abo ja̧'a̧cu̧ u cä'epö topinödo. Ovejarö daunä ä̧ja̧sä̧na̧ttö̧ äcuächi'äji'ca̧ ö̧ja̧'a̧ topinödo. 'Chä̧hui̧'ö̧, ovejarö 'chu'ädäji'ca̧, ku icuinödo, i̧tti̧rö̧ jȩa̧ päjimä pä̧ro̧cua̧ ovejarötä. ¹⁴ Ja̧'hua̧nö̧ ja̧'a̧ttö̧ ju̧huȩnȩ ji̧no̧mȩmä̧ o'inödo ―Tu̧ru̧hua̧ Jehová ppädäcuome― pä'ö. Jitä'inä pä'ätö ―Tu̧ru̧hua̧ Jehová öäre inähuättö ppä̧dä̧cua̧― pä'ö. ¹⁵ Ja̧'hua̧nö̧ ja̧'a̧ Tu̧ru̧hua̧ Dios huȩ'ä̧hua̧ ángel pä'äji ta'anö mo̧ro̧jä̧ra̧'a̧ttö̧ Abrahamrö huopinödo. ¹⁶ Pä'inödo: ―Ttötä iso päi'önä pä'ösä, ja̧'hua̧nö̧ jȩcu̧'ä̧ja̧'a̧ttö̧, ucu cui̧tti̧rö̧, chu ä̧cua̧ cui̧tti̧rö̧ dä̧'ä̧pȩ'ä̧rö̧ hua'adö cu̧ju̧no̧ca̧'a̧ttö̧ iso päi'önä ttötä juiyo adiunä ppä̧dä̧dä̧cua̧sä̧ ucuru. ¹⁷ Ja̧'hua̧ta̧nö̧ cuahuaruhuä'cotörö recuätörö chi̧yä̧cua̧jä̧. Si̧ri̧'cö̧ mo̧ro̧jä̧ra̧'a̧ rö̧jä̧tö̧ jä̧'i̧nö̧'a̧nö̧ ttirecuächäcuotö. Ja̧'hua̧ta̧nö̧ rȩba̧ aje jacuoto rö̧ȩnä̧ pa̧'a̧ jä̧'i̧nö̧'a̧nö̧ huotö cuahuaruhuä'cotörö recuätörö chi̧yä̧cua̧jä̧. Ja̧'hua̧ta̧nö̧ cuahuaruhuä'cotömä ttaboiyotörö rohuäu ttujuruhuäcuotö. ¹⁸ Ucu huedäji ta'anö jȩcu̧'ä̧ja̧'a̧ttö̧, o'ca toi'önä ttö̧ja̧rö̧ ppädädäcuotö ucu cuahuaruhuä'cotöttö― pä'inödo angelmä. ¹⁹ Ja̧u̧nu̧ o'ca'a Abraham ppa̧'ä̧chi̧nö̧do umöhuäyotö ttö̧ji̧pä̧jo̧mȩcu̧. Ja̧'hua̧nö̧ ja̧'a̧ ji̧nä̧ yo̧mȩtȩ ppa̧'ä̧chi̧nä̧tö̧do Beerseba pä'ö micuomecu. Abraham ju̧huȩnȩtä̧ ki̧nö̧do. ²⁰ Ä̧cuo̧mȩnä̧ recuó 'cuäopinö̧ o'caa Abrahamrö̧ jiähuinö̧: cui̧jä̧hua̧ Nacor Milcacö tti̧tti̧mu̧mä pitö ja̧a̧. ²¹ Jahuätö ä̧cuo̧menä tti̧tti̧mä̧ Uz micuinö, i̧jä̧hua̧mä̧ Buz micuinö, Aram jä'o pinö Quemuelmä, ²² korotömä Quesed, Hazo, Pildas, Jidlaf ja̧'hua̧ta̧'a̧nö̧ Betuelnä̧. ²³ Rebeca kä'o pinö Betuelmä. Pitö ji̧na̧'a̧ ochonö tti̧tti̧mu̧mä̧ Abraham i̧jä̧hua̧ Nacor Milcacö, ²⁴ karaju irecua ki̧mi̧mä micuinäju̧ Reúma, ja̧'hua̧ta̧'a̧nö̧ jahuäjutö i̧tti̧mu̧mä Teba, Gaham, Tahas ja̧'hua̧ta̧'a̧nö̧ Maaca'inä.