¹ Ja̧'hua̧ ja̧'a̧ Sararö päinö ta'anö ppä'ädö jȩpi̧nö̧do Tu̧ru̧hua̧ Diosmä. ² Saramä täcö möchaju juo'ächinäjudo. Abrahammä bö̧o̧ i̧sa̧ ja̧'a̧nä̧, i̧tti̧rö̧ kuhuäbecuiniyäcudo, Tö̧ä̧nä̧hua̧ Dios päinö pä̧nä̧tä̧. ³ Abraham i̧tti̧ Sara kuhuäbecuäjäcuru o'inödo i̧mi̧mä̧ Isaac pä'ö. ⁴ Isaac uhuäpächäja'attömä ochonö mo̧ro̧ päi'omenä, Abraham i̧tti̧rö̧ i̧jȩta̧ 'cui'opö jȩpi̧nö̧do, Tö̧ä̧nä̧hua̧ Dios hueinö ta'anö. ⁵ Abraham cien a̧'ȩ huinödo, i̧tti̧ Isaac uhuäpächinömä. ⁶ Sara pä'inäjudo: ―Tö̧ä̧nä̧hua̧ Diosmä ttö eseu ya̧dä̧hua̧ pä'ö jȩi̧nä̧cua̧sä̧. Ja̧'hua̧ta̧nö̧ o'ca toi'önä ä̧ju̧cuä̧tö̧mä̧ ttöcu ya̧'ä̧u̧ ttesehuäcuotö. ⁷ ¿Di jä̧ttö̧ Abrahamrö pä'ajimä, Saramä ki̧tti̧rö̧ kuhuäbecuäcuaju pä'ö? Ja̧'hua̧nö̧ ja̧'a̧nä̧ ttö chi̧tti̧ jä'o bö̧o̧ i̧sa̧ ja̧'a̧nä̧, i̧tti̧rö̧ chuhuäbecuäjiyäcu― pä'inäjudo. ⁸ Isaac böo juomenä, ahuatemä täcö ahuocö pinödo. Ja̧u̧nu̧tä̧ mo̧ro̧ Abraham rö̧ȩnä̧ pä'cäri jȩpi̧nö̧do. ⁹ Ja̧'hua̧ ja̧'a̧ Ejipto rȩjȩ ttö̧ja̧ isaju Agar Abrahamcu ki̧tti̧mä̧, Isaacrö ya̧huä̧huȩ'a̧'a̧ topinäjudo Saramä. ¹⁰ Ja̧'hua̧nö̧ ja̧'a̧ttö̧ Saramä Abrahamrö pä'inäjudo: ―Ya'opö icuiju cumöhuäyajuru ki̧tti̧cu̧. Cumöhuäyaju ki̧tti̧mä̧ ttö chi̧tti̧ Isaaccu yoräteunämä ȩmo̧cö̧ jä̧cua̧ ucu cuiäre'cottömä―. ¹¹ Ja̧'hua̧nö̧ päja'a ä̧ju̧cuo̧mȩnä̧, Abraham a̧'cua̧ tta̧'ȩcui̧nö̧do, Ismael'inä chutä i̧tti̧ ja̧'a̧ttö̧. ¹² Ja̧'hua̧nö̧ ja̧'a̧nä̧ Tö̧ä̧nä̧hua̧ Dios Abrahamrö pä'inödo: ―Cua̧'cua̧ tta̧cuȩcuä̧' cumöhuäyajuru'inä, cumöhuäyaju ki̧tti̧rö̧'i̧nä̧. Ja̧'hua̧nö̧ ja̧'a̧ttö̧ Sara päjömä eseti. Isaacttö isotötä jitötä cua̧mo̧nä̧ cuahuaruhuä päi'önä ttuhuäpächäcuotö. ¹³ Ja̧'hua̧ta̧nö̧ cumöhuäyaju ki̧tti̧ttö̧'i̧nä̧ jȩchä̧cua̧sä̧ recuätö ttö̧ja̧rö̧, ja̧u̧'i̧nä̧ ucu cui̧tti̧ ja̧'a̧ttö̧―. ¹⁴ Abrahammä mo̧ro̧ päia'a porächi'ö, pan o̧si̧ ȩmo̧po̧'ö̧ ja̧'hua̧ta̧'a̧nö̧ 'carahuäbanä ajiya 'caropo'ö, Hagarmä iyäjäcua ku'upi'canä cä'ecu huȩnä̧hui̧nä̧ju̧. Ja̧u̧mä̧ ji̧'qui̧cha̧hua̧rö̧ iyö, oto hue'ö icuinä̧cua. Jahuäjumä juorö rä'opächö Beersebattö de'a jui̧yä̧jä̧ttö̧ cue'ächö ki̧nä̧ju̧. ¹⁵ 'Carahuäbanä acuäjoyamä ajiyamä joipächina'a, jahuäjumä ji̧'qui̧cha̧hua̧rö̧ dau dȩa̧'a̧ rötipinäju. ¹⁶ Ja̧'hua̧nö̧ ja̧'a̧ jahuäjumä ja̧u̧ ji̧'qui̧cha̧hua̧ttö̧mä̧ otonä̧nö̧ pä̧mä̧di̧nä̧ju̧, 'po̧'a̧ri̧ 'pottomenä ma̧o̧mȩ jo̧mȩ, ja̧'hua̧nö̧ ja̧'a̧ pä'inä̧ju̧: "Ji̧'qui̧cha̧hua̧ 'corujuoächa'amä tocha pä'ocojusä." Jahuäjumä juhuene pä̧tȩcuä̧nö̧ to̧pä̧rö̧ pä̧nö̧ pä̧i̧cu̧nä̧ huoji'omenä ajahuinö. ¹⁷ Diosmä ji̧'qui̧cha̧hua̧ ajahua'a ä̧ju̧cui̧nö̧, ja̧'hua̧nö̧ ja̧'a̧ Dios umöhuä̧ya̧ ángelmä mo̧ro̧jä̧ra̧'a̧ttö̧ Agarö huopinö̧, ja̧'hua̧nö̧ huopömä päinä̧cua̧: ¿Däje cua̧'cua̧ rocuecua'attö Agar? Yecuecuä, Diosmä ä̧ju̧cuä̧ji̧ ju̧huȩnȩ pä̧nö̧ ajahua'amä. ¹⁸ Ä̧rä̧mi̧'ö̧ ji̧'qui̧cha̧hua̧rö̧ cä'epömä, a̧'cua̧ ȩmö̧nä̧ jȩpi̧rö̧; isopäi'önä ja̧u̧ttö̧mä̧ i̧tti̧mö̧ ttirecuächönä jȩchä̧cua̧sä̧." ¹⁹ Ja̧'hua̧nö̧ ja̧'a̧ Diosmä̧ jahuäjuru ajiya 'carächome tojunä jȩpi̧nö̧. Jahuäjumä̧ ajiya 'carähuäbanä 'carinä̧ju̧, 'carä'cajumä ji̧'qui̧chäa̧hua̧rö̧ ajiya ahua pä'ö iyinä̧ju̧. ²⁰ Diosmä̧ ja̧u̧tä̧cu̧ ki̧nö̧, ja̧'hua̧nö̧ ja̧'a̧ buo juo'inö. Ja̧u̧mä̧ dea jui̧yä̧jä̧nä̧ kä̧nö̧mä̧ 'po'obunä 'po'ähuä isä̧tä̧ jo̧nä̧ juo'ächinö̧. ²¹ Parán rȩjȩ dea juiyä̧jä̧nä̧ ki̧nö̧, Ja̧'hua̧nö̧ ja̧'a̧ ja̧u̧ ja̧ju̧mä̧ Egipto rȩjȩttö̧ irecuarö kö̧'o̧cui̧'i̧ni̧yä̧cu̧. ²² Ja̧'hua̧nö̧ ja̧'a̧ ja̧u̧nö̧ pä̧nä̧mä̧ Abimalecmä̧ ja̧'hua̧ta̧'a̧nö̧ Su̧ro̧da̧u̧ ttu̧ru̧hua̧ru̧ Ficolcumä̧, Abrahamcu ucuocumä pä'inätö̧: ''O'cajuiyunä̧ jȩ'cu̧nä̧ Diosmä ucutäcu ö̧ja̧'a̧ topäjätöjä̧. ²³ Ja̧'hua̧nö̧ ja̧'a̧ttö̧ jitämä Dios i̧mi̧nä̧ huȩnȩtö̧ pä'itö yapare jȩ'cuä̧ttö̧ chi̧tti̧mo̧rö̧'i̧nä̧ ja̧'hua̧ta̧'a̧nö̧ juhua'a yabo tti̧mä̧rö̧'inä. i̧jȩpi̧ttö̧ chi̧rȩjä̧ jä̧cuä̧jä̧ ttö chu̧ja̧ pä̧cui̧nä̧jä̧nä̧ päcuina̧'a̧cu̧tä̧ jȩpi̧. ²⁴ ''Abrahammä: ''huȩnȩtö̧ päinä̧cu̧. ²⁵ Abraham öjö'cö juiyönä topinö Abimelec'rö umuhuäyotö 'chottipina'a̧ttö̧ ajiya cuäcuäju . ²⁶ Abimelec pä'inö: Ttömä jȩru̧pa̧sä̧ pi̧yȩ jȩpö̧ji̧rö̧mä̧. Ucumä ä'canämä pa'anömä pä'ocö päi'jä; Jitä mo̧ro̧tä̧ chä̧ju̧cuä̧cu̧jä̧. ²⁷ "Ja̧'hua̧nö̧ ja̧'ttö̧ Abraham'mä iyinö ovejatö̧'i̧nä̧, pä̧cä̧yö̧rö̧'i̧nä̧ Abimelec'rö ja̧'hua̧ta̧nö̧ jahuätö ta̧ju̧mä̧ esecu pä'ö 'cu̧ni̧nä̧tö̧. ²⁸ Ja̧'hua̧ta̧nö̧ Abraham'mä ji̧mu̧tȩ ta̧ju̧nu huotö ovejatö̧rö̧ 'cä̧pu̧ ku̧ni̧nö̧. ²⁹ Abimelec pä'inö Abraham'rö̧: "?Däje jä̧'a̧ttö̧ pitö ji̧mu̧tȩ ta̧ju̧nu̧ ovejattö̧ ttötö'cömä ucu korotöttö 'cä̧ȩpu̧ cu̧ju̧nä̧u̧nä̧mä̧?" ³⁰ Ja̧u̧ ädätinö: " Pitö ji̧mu̧tȩttö̧ ta̧ju̧nu̧ huotorömä cuȩmä̧cua̧jä̧, jiäcuäcuä päi'iönä ttörö, ttö sadinäju pä'ö." ³¹ Ja̧u̧ juȩnȩmä̧ o'inö Beerseba pä'ö, juorö ji̧na̧'a̧ jȩtä̧cuo̧tö̧jä̧ pättina̧'a̧mä̧. ³² Jȩtä̧cuo̧tö̧jä̧ pä'inätö̧ Beersebattö, ja̧'hua̧nö̧ ja̧'a̧ttö̧ Abimael ja̧'hua̧ta̧'a̧nö̧ Ficol, su̧ro̧do̧u̧ ttu̧ru̧hua̧, ppa̧'a̧chi̧nä̧tö̧ filisteo tti̧rȩjä̧cu̧. ³³ Abraham tamarisco dau ku̧ni̧nö̧ Beersebanä. Juorö Ö̧Ä̧NÄ̧HUA̧RÖ̧ ucuo teähua pä'ö, Dios 'cuäoipönä kö̧rö̧. ³⁴ Abraham recuo ki̧nö̧ i̧chä̧cuä̧hua̧ 'cua̧rö̧nä̧ filisteo tti̧rȩjä̧nä̧ recuo mo̧ro̧.