¹ Cha̧mö̧cuädönämä pi̧yȩ o'cajuiyönä a̧mö̧cuädinö̧sä̧ chu̧huo̧jui̧pa̧ pä'ö ttö̧ja̧ adiu jȩttö̧'i̧nä̧, ttu̧huo̧juö̧'i̧nä̧ ja̧'hua̧ta̧'a̧nö̧ ttaditähuä'i̧nä̧. Ja̧u̧mä̧ o'cajuiyönä̧tä̧ Dios u̧mö̧nä̧tä̧ ka̧'a̧. Ya̧tȩ'i̧nä̧ jȩru̧pa̧, eseäcuähuäcö̧, kö'cähuocöcö̧ ya̧tȩrö̧ rȩbȩhuä̧cuȩmä̧. ² O'cajuiyötä yȩnȩtȩtä̧ rȩbȩhuä̧cua̧'a̧. Adiu jȩpä̧tö̧'i̧nä̧ suronä jȩpä̧tö̧'i̧nä̧ ju̧huȩnȩtä̧ tti̧rȩbȩhuä̧cuo̧tö̧, adihuätö'i̧nä̧, surojö jui'ätö'i̧nä̧, surojöcu huihuacuächinä̧tö̧'i̧nä̧ ja̧'hua̧ta̧'a̧nö̧ i̧sa̧rö̧ ku iyätö'inä iyocotö'i̧nä̧. Adiu jȩpä̧tö̧ 'corujuottächöta'anö, 'corujuottächäcuotö surojö jȩpä̧tö̧'i̧nä̧. Ya̧tȩ i̧mi̧nä̧ huȩnȩtö̧ pä'ö jö̧ta'anö 'corujuoächä̧cua̧, ya̧tȩ i̧mi̧nä̧ huȩnȩtö̧ pähuä jȩa̧ pä'ö yȩ'ȩcua̧i̧'i̧nä̧. ³ Mo̧ro̧ kä̧hua̧ dȩa̧'a̧ ka̧cuä̧tö̧ jȩttö̧mä̧ o'cajuiyötä surojöra̧'a̧tä̧ rȩbȩhua̧'a̧tó, o'catoi'önä juhua'atä rȩbȩhuä̧tö̧. Ttö̧ja̧ tta̧mi̧so'quimä suronä jȩä̧cuä̧huä̧tä̧ su̧'pȩnö̧ ka̧'a̧ ja̧'hua̧ta̧'a̧nö̧ ja̧'a̧tä̧ jȩä̧cuä̧huä̧'i̧nä̧ ji̧nä̧ pi̧jä̧ ttö̧ja̧cuä̧i̧mä̧ ttamiso'quinä ka̧'a̧. Ja̧'hua̧nö̧ ja̧'a̧ttö̧, ja̧u̧nu̧ o'ca'amä hua'arera̧'a̧tä̧ 'chä̧tö̧. ⁴ Ya̧tȩ o'catoi'önä a̧'cua̧rä̧tu̧cu̧ todeunä kö̧mä̧, tta̧huä̧rä̧cuä̧huä̧ ku̧nä̧rö̧, ja̧'hua̧nö̧tä̧ ähuiri a̧'cua̧rö̧ttö̧tä̧ adihua'anö ja̧'a̧, mö yähimä 'corujuoächa'anä. ⁵ Isopäi'önä ttö̧ja̧ ji̧nä̧ a̧'cua̧rö̧ ka̧cuä̧tö̧mä̧ 'corujuotächäcuotöjä pä'ömä huo̧juä̧tö̧, ja̧'hua̧nö̧ ja̧'a̧ 'corujuo'ächätömä jerupätö. Ttȩmä̧cuȩ ji̧nö̧'i̧nä̧ iyähuocotö ttäcuotö juhua'amä täcö unichi'äcuähuotö jo̧mȩttö̧. ⁶ Repecu'inä, cua̧u̧tu̧'inä ja̧'hua̧ta̧nö̧ cuami sunä to'cuinömä tä'cö mo̧tä̧ 'cuäopö siäcuächinö. Pä'äjita'anömä jȩ'cuä̧ pä'ömä ppa̧cuä̧cho̧'cö̧ jä̧cuä̧ pi̧jä̧nä̧mä̧. ⁷ Ja̧'hua̧nö̧ ja̧'a̧ttö̧ täi cumänänä, eseunutä̧ cuiti cu̧cuä̧ pa̧ppȩmä̧ ja̧'hua̧ta̧nö̧ ahui vino isoya'inä cuämiso'quittö eseunu, Diosmä esunu jȩ'cu̧mä̧ adiunätä̧ topö. ⁸ Cu̧'ca̧tä̧hui̧yu̧'inä teönätä̧ kä̧hui̧ 'cuäopönä ja̧'hua̧ta̧nö̧ cunä'inä a̧dȩja da̧ȩcua̧tä̧. ⁹ Cuirecua repecuäcuacumä 'cuäopuönä mo̧ro̧ cua'cuarä̧'i̧tä̧ eseutä kä̧hui̧ ji̧nä̧ cua̧'cua̧ra̧mejobu, pi̧jä̧nä̧ kä̧nö̧ cuaditähuä micuä pä'inä iyinäcua̧ ja̧'a̧. ¹⁰ Cumunä cuadita pä'ö cu'o̧hui̧ö̧mä̧, aditi ja̧u̧mä̧ cujurucu, cuare rejura'a cui̧cho̧mȩnämä ucumä jahuattömä juiyacua'a adicuä'inä jiäcuähuä'inä huo̧jö̧nä̧ ttu̧ȩpä̧rä̧cuä̧'inä. ¹¹ Ttömä kä̧hua̧ dȩa̧'a̧ttö̧mä̧ micuäu'anö jö̧ topä'ijösä: Joäcuähuämä o'capäi'önä jopörötämä pätecuächoca'a. Rohuäcuähuä'inä pätecuächoca'a ju̧ru̧huä̧tö̧rö̧tä̧mä̧. Cuäcuähuämä huo̧juä̧rö̧tä̧mä̧ pä̧tȩcuä̧cho̧ca̧'a̧. Järe rö̧ä̧nä̧ ku̧nä̧rä̧cuä̧huä̧mä̧ huo̧juȩcu̧nä̧ kö̧sä̧ pä'örötämä pätecuächoca'a. Pädäcuähuämä topö huo̧juä̧chä̧tö̧rö̧tä̧mä̧ pätecuächoca'a. Ja̧'hua̧nö̧ 'cuäopo, 'cuäopomenämä o'catoi'önärö̧tä̧ 'cuäopö. ¹² Ya̧tȩ'i̧nä̧ jȩru̧pa̧ 'corujuoächäcuomemä, pö̧i̧ mayanä huottopomenä ȩ'qui̧pä̧tö̧ hua'are ra̧'a̧tä̧ jä̧'i̧nö̧'a̧nö̧, ko̧ro̧nö̧mä̧ ppi̧yu̧ tä̧tȩcuä̧ ko̧mȩ ttȩ'qui̧pa̧'a̧ jä̧'i̧nö̧'a̧nö̧. De'a isotö 'cuarönä, ttö̧ja̧rö̧mä̧ 'cuäopötä cuä̧tä̧dö̧ ku̧na̧'a̧ ttieru'unätä jua'a ma'ä̧tö̧. ¹³ Ttö'inä topä'ijösä huo̧juä̧huä̧ kä̧hua̧ i̧dȩa̧'a̧ttö̧mä̧ ja̧'hua̧nö̧ tochomenämä rö̧ä̧nä̧ jähuä 'cua̧rö̧nä̧ ja̧'a̧. ¹⁴ Ki̧na̧'a̧ ötahuiyä a̧'u̧cuo̧mȩ juȩnȩmä̧ ttö̧ja̧ a̧u̧cu̧nä̧tä̧ ko̧cui̧nä̧tö̧, ja̧'hua̧nö̧ ttö̧jo̧cuo̧mȩ ya̧tȩ ru̧hua̧ u̧mu̧häyotö su̧ro̧do̧u̧cu̧ ichö ötahuiyä ttäecuächönä kä̧mä̧di̧nö̧. ¹⁵ Ja̧'hua̧nö̧ ja̧'a̧nä̧, juȩnȩ ötahuiyänä ya̧tȩ huo̧jua̧ ja̧'a̧nä̧ u̧su̧rä̧i̧sa̧ ki̧nö̧, ja̧u̧, o̧huo̧juo̧mȩnä̧ ötahuiyä ttö̧ja̧rö̧ ppädö'anö ji̧na̧'a̧. Ja̧'hua̧nö̧ jä̧ji̧ o'ca'a, ja̧u̧ru̧mä̧ ya̧tȩ'i̧nä̧ amucuädocö pinö u̧su̧rä̧ i̧sa̧ jo̧mȩttö̧. ¹⁶ Rijönämä huo̧juä̧chi̧'i̧nö̧sä̧: ttujurutö'inä abonänö adihuö huo̧juä̧huä̧mä̧, ja̧'hua̧nö̧ ja̧'a̧nä̧ ttö̧ja̧sä̧ usurä'i̧sä̧ amucuädömä ttöjö'cocö ja̧'hua̧ta̧'a̧nö̧ ucuocu'inä ttä̧ju̧co̧co̧cu̧. ¹⁷ Ruhuotöttö'inä ja̧'a̧ta̧ra̧a̧ huotöttö'inä pä̧i̧cu̧nä̧ ttöcuocuttö'inä ttö̧ȩpä̧rö̧ ttä̧ju̧cuä̧cu̧ ttö̧ja̧sä̧ ttö̧huȩcuä̧nä̧ adiunä ucuocurömä. ¹⁸ Curä rohuähuäcuähuättö'inä abora adiu huo̧ju'ä̧cuä̧huä̧mä̧, ja̧'hua̧nö̧ ja̧'a̧nä̧ surojö jȩä̧cuä̧huä̧'i̧sä̧mä̧ adiumä surojoepu.