¹ Ja̧'hua̧'a̧nö̧ ja̧'a̧ na̧nö̧ 'corujuo'ächätömä amȩu̧mä̧ surojuo'epätö huaönä̧tä̧, ja̧'hua̧nö̧ jö̧ta'anö ja̧'a̧tä̧ jȩä̧cuä̧huä̧mä̧ a̧'u̧cu̧nä̧tä̧ jö̧ja̧'a̧nä̧ huo̧juä̧huä̧ huȩnȩ'i̧nä̧, ucuotäcuähuä'i̧nä̧ surojuoepa pä'ö ja̧'a̧. ² Ya̧tȩ ttö̧ja̧sa̧ huo̧juä̧huä̧ huȩnȩ ku̧nä̧rö̧mä̧ jueönä̧tä̧ ja̧rȩyu̧ pä'i'ö ja̧'hua̧nö̧ ja̧'a̧nä̧ ttö̧ja̧sa̧ huo̧juȩcu̧nä̧ huocömä amiso'quimä ttuóhue ja̧'a̧cu̧tä̧ ja̧rȩyö̧ pä'i'ö. ³ Ya̧tȩ ttö̧ja̧sa̧ huo̧juȩcu̧nä̧ a̧mö̧cuädocömä̧ ji̧mä̧tȩ mä̧nä̧nä̧ i̧'cho̧mȩnä̧, a̧mö̧cuädäjimä̧ a̧'u̧cu̧nä̧tä̧ ku̧nä̧rö̧, ja̧u̧rö̧mä̧ ttö̧ja̧ o'catoi'önä ka̧cuä̧mö̧ to̧ttä̧cua̧ ja̧u̧mä̧ a̧mö̧cuädäcuähuä jui̧'a̧tó pä'ötä. ⁴ Ru̧hua̧ suro a̧mö̧cuädöttötä ucuru to'ija̧'a̧cu̧ jȩö̧ttö̧mä̧, cuaditähuämä käcuädi'ä. A̧mö̧cuädönänö jȩä̧cuä̧huä̧mä̧ tta̧mi̧suru mȩya̧dö̧ i̧cu̧ ja̧'a̧'. ⁵ Ka̧hua̧ dȩa̧'a̧ttö̧mä̧ surojö ka̧'a̧ topä'ijösä, jiyete 'cuä̧o̧pö̧ ru̧hua̧ jäyä jȩo̧mȩnä̧: ⁶ Ruhuotö adiunä̧ a̧mö̧cuädocotörö ttö̧ja̧ tturuhuotö jö̧nö̧ ttö̧jö̧nä̧ ku̧nä̧'i̧jä̧tö̧, ttö̧ja̧ jȩttä̧ji̧ isojuo'epätörömä ruhuo kä̧cuä̧huä̧mä̧ tti̧dȩra̧'a̧nä̧ ttö̧jö̧nä̧tä̧ ku̧nä̧'i̧jä̧tö̧. ⁷ Ttömä topä'ijösä a̧mä̧cö̧ aditönä huȩ'ä̧hua̧mä̧ cabayunä u̧hua̧'a̧ ja̧'hua̧ta̧'a̧nö̧ a̧mö̧cuädäji isojuo'epömä rȩjȩnä̧tä̧ cueächa'a a̧mö̧cö̧ aditönä̧ huȩ'ä̧hua̧ 'cua̧rö̧nä̧tä̧. ⁸ Ya̧tȩ reju sauttömä jahuäjunä̧tä̧ ma̧ä̧cha̧'a̧nö̧ ja̧'a̧, ja̧'hua̧ta̧'a̧nö̧ ya̧tȩ ttoecuäbä ki'opö icuttömä, äcätä yö̧ö̧'a̧nö̧ hua̧. ⁹ Ya̧tȩ ido'qui 'ta'umä juo'quitä yö̧o̧po̧'ä̧cha̧'a̧nö̧ hua̧ juhua'atäcu ya̧tȩ dauhuiyä'ca̧rä̧u̧mä̧ ji̧yȩttö̧tä̧ ra̧huä̧pi̧jö̧nä̧ kö̧. ¹⁰ Curä'chu sa̧huȩcuo̧co̧'chu jö̧ttö̧mä̧, ya̧tȩ sa̧huȩpo̧ca̧'a̧ jö̧ttö̧mä̧, ttujurucutä 'cuittopa pä'ö jodä, ja̧'hua̧nö̧ ja̧'a̧nä̧ huo̧juä̧huä̧ huȩnȩmä̧ isojuottepönä̧ ppädö ja̧'a̧. ¹¹ Ä̧ca̧rö̧ pahuähuä ttö̧ja̧sa̧ pahuäcua'a ä'canä yö̧'ö̧ttö̧mä̧, pahua pä'ömä juiyäcua'a. ¹² Ya̧tȩ huo̧juä̧huä̧ huȩnȩ ku̧nä̧rö̧ ucuocuomenämä 'cuiocuächö ja̧'a̧, ja̧'hua̧nö̧ ja̧'a̧ huo̧juä̧huä̧ huȩnȩ ku̧nä̧rö̧cö̧ cuocuttömä a̧mö̧nä̧ pa̧ja̧tö̧tä̧ kä'äu icu. ¹³ Ja̧'a̧tä̧ra̧'a̧ hua̧ kä̧mä̧dö̧ ucuocuomenämä, yapare jö̧tä̧ ucuocunä räopäcu ja̧'hua̧ta̧'a̧nä̧ röjinämä ahuaruhuärö suronä pähuätä räopöcu. ¹⁴ Jä̧'a̧tä̧ra̧'a̧ hua̧mä̧ yabocutä yoähuächönä ucuocu, ja̧'hua̧nö̧ ja̧'a̧nö̧ yȩtȩ'i̧nä̧ jȩru̧pa̧ 'cuä̧o̧pä̧cuä̧mä̧. ¿Dijä̧ttö̧ huo̧jua̧ ja̧u̧nu̧ o'ca'a ichö? ¹⁵ Ja̧'a̧tä̧ra̧'a̧ huotö rö̧ä̧nä̧ adittö 'cuä'ächächätö, ja̧'hua̧nö̧ jo̧mȩnä̧mä̧ yoröisotä jerupächätö ötahuiyä ra̧'a̧ 'chä̧cuä̧huä̧mä̧'i̧nä̧ ¹⁶ ¡Äyó rejé, ucuhué, ucu cu̧ru̧hua̧ ruhuo hueähuä ieru'uttumä, ja̧'hua̧nö̧ jo̧mȩnä̧ ru̧hua̧ cui̧tti̧mö̧'i̧nä̧ mä̧ro̧ juoöta'anö pä'cäritä jȩpö̧ eseu ttö̧jö̧ttö̧mä̧! ¹⁷ ¡Adiunätä jä̧cua̧jä̧ ucumä, rȩjȩ, cu̧ru̧hua̧ huo̧juȩcu̧nä̧ hua̧ hueöttömä, ja̧'hua̧ta̧'a̧nö̧ ru̧hua̧ cui̧tti̧mö̧'i̧nä̧ pätecuächometä ttucua pä'ö, 'cuättächi'ö juiyönä tä̧ttä̧mä̧cha̧ pä'ö mä̧cö̧! ¹⁸ Ö̧tä̧rö̧jä̧cu̧ cuojusode cuaditocomenämä maä̧cha̧'a̧, ja̧'hua̧ta̧'a̧nö̧ cua̧mo̧nä̧ cu̧mu̧nä̧ cuadotocomenämä cuojusode'inä era'a. ¹⁹ Ttö̧ja̧mä̧ ttu̧cua̧ da'ätö ya̧'a̧huä̧rö̧nö̧ ttö̧ja̧ pä'ö, vino isoyamä ppädipa'a tta̧'cua̧rö̧nä̧ ttesehuipa pä'ö, ja̧'hua̧ta̧'a̧nö̧ pärätämä ppädipa'a recuä rö̧jö̧ tȩma̧ pä'ö. ²⁰ Ru̧hua̧rö̧mä̧ suronämä päcuä, ji̧'qui̧cha̧nö̧'i̧nä̧ cuamucuädönämä, ja̧'hua̧ta̧'a̧nö̧ ucu cu̧jo̧mȩ ko̧cuä̧tö̧ ruhuotörö'inä suronämä päcuä. Ja̧'hua̧nö̧ jȩcu̧'u̧ttu̧mä̧ ju'tojunä co̧ä̧rö̧ ppiyuhuä ȩpö̧'a̧nö̧ ja̧'a̧ päcumä; Ujuabä'inä juiya'anö pperecuächö cucuocumä.