¹ Cu̧cuä̧ hue'i aje huämotonä, pä'äjita'anö recuo mo̧ro̧ 'cuäopö o'ca'a pä'äjita'anä cu̧'o̧cui̧'ä̧cua̧jä̧. ² Ko̧cuä̧mö̧ topi ji̧mu̧tȩ ta̧'a̧rȩnö̧ jo̧mȩnä̧, ja̧'hua̧nö̧ jö̧ juiyöttömä ji̧mu̧tȩ huäba'acuä jo̧mȩ huotönä, ucumä ji̧nä̧ jȩru̧pa̧jä̧ pi̧jä̧ra̧'a̧ surojö ichäcua'a pä'ömä. ³ I̧so̧ppa̧nä̧ ajiyä rö̧nä̧rö̧ttö̧mä̧, pi̧jä̧ rȩjȩnä̧tä̧ iyepö icua'a, Ja̧'hua̧ta̧'a̧nö̧ dau kä̧hua̧ ieruhua'acu mäö̧ttö̧mä̧, u̧huo̧jua̧'a̧cu̧ ma̧ö̧ttö̧'i̧nä̧, ma̧o̧mȩ päte'ö maö̧ttö̧'i̧nä̧, juȩnȩtä̧ pä̧cua̧'a̧. ⁴ Ya̧tȩ ku̧nä̧hua̧ ru̧hua̧ kä̧rö̧'cö isoppätä to̧a̧rö̧ttö̧mä̧ u̧ju̧nu̧ juiyö'anö ja̧'a̧. ja̧'hua̧ta̧'a̧nö̧ ya̧tȩ ajiya isoppätä to̧ä̧rö̧ttö̧'i̧nä̧ u̧huä̧ju̧ toö juiyö'anö ja̧'a̧. ⁵ Kä̧rö̧'copä döome päte'ö ucu cu̧huo̧ju̧'a̧nö̧, ja̧'hua̧ta̧'a̧nö̧ ji̧'qui̧cha̧hua̧ ihue'quiyumä tta̧'a̧nö̧ pöttächa'a jä̧ttä̧ ttu̧cuä̧ba̧ jacuätömä, ja̧'hua̧nö̧ jö̧ta̧'a̧nö̧ Dios aditähuämä huo̧juä̧chi̧'o̧co̧tö̧jä̧, dijättö o'cajuiyönä uhuäbe'inömä. ⁶ Mo̧ro̧ päia'a cuähuä u̧huä̧ju̧mä̧ ku̧nö̧jä̧; ni̧pä̧cho̧mȩ jubö aditöjä̧ cuadita'anö jome jubö, juhua'a cuähuä rö̧ä̧chä̧cuȩmä̧ cuiruhua'attö, mo̧ro̧ päia'acu ku̧ju̧nä̧ji̧cö̧, ni̧pä̧ro̧mȩcu̧ cu̧ju̧nä̧ji̧cö̧, pi̧yȩcö̧, ji̧yȩcö̧, yoräteu ku̧ju̧nä̧ji̧mä̧ iyäcua'acö̧. ⁷ Isopäi'önä̧tä̧ tȩya̧u̧ topömä esehuätöjä ja̧'hua̧ta̧'a̧nö̧ ti'äriyä kä̧hua̧rö̧ topömä esehua'a. ⁸ Ya̧tȩ recuo mo̧ro̧ ö̧jö̧ttö̧mä̧, ja̧u̧nä̧tä̧ eseu ö̧jö̧nä̧tä̧ pä'irö, ja̧'hua̧nö̧ ja̧'a̧nä̧'i̧nä̧ yo̧u̧ mo̧ro̧ i̧chä̧cuȩ'i̧nä̧ a̧mö̧cuäda pä'iröjó, isopäi'önä rö̧ä̧ö̧ jä̧cuȩ ja̧'a̧. Pi̧yȩ o'cajuiyönämä ajiya isoppa toepächoppa jä̧'i̧nö̧'a̧nö̧tä̧ ja̧'a̧. ⁹ Esehui, mö̧ä̧ya̧, mö̧ä̧ya̧ ku̧jä̧i̧tä̧, cuamiso'quinä eseu kä̧hui̧ ji̧nä̧ mö̧ä̧ya̧ ku̧ju̧ mo̧ro̧tä̧. Cua̧mö̧cuädomenä eseunä̧ jö̧nä̧tä̧ täi, ji̧yȩtȩ cui'ärenä to'cuomenä adiunä jö̧nä̧tä̧. Ja̧'hua̧nö̧ ja̧'a̧nä̧ Diostä jä̧cuä̧ jȩ'cu̧ o'cajuiyönä jä̧ȩpä̧cua̧mä̧. ¹⁰ Cuamiso'quinä cuamisurunä ku̧mä̧ ya'ocu icuähui, ji̧yȩtȩ cuidepänä baraunä jö̧ttö̧mä̧ 'cä̧'i̧pä̧chi̧, isopäi'önä mö̧ä̧ya̧ ku̧ju̧mä̧ ja̧'hua̧ta̧'a̧nö̧ cujurumä isoppa jä̧'i̧nö̧'a̧nö̧tä̧ jö̧.