¹ Mö̧ä̧ya̧ jö̧nä̧ ku̧jä̧i̧tä̧ ucuru uhuäbe'inö̧rö̧mä̧ a̧mö̧cuädi, suronä jö̧ mo̧ro̧ ichäcua'a ä'canä ja̧'hua̧ta̧'a̧nö̧ ucu ji̧yȩtȩ a̧'ȩnä̧ päcuäcua'a ä'canä̧: "Ja̧u̧mä̧ cheseu juiyönä jä̧cu̧sä̧," ² Pi̧yȩ jȩpi̧ mo̧ro̧ kä̧hua̧'i̧nä̧, yodo kä̧hua̧'i̧nä̧, si̧ri̧'cö̧'i̧nä̧ natti̧'ä̧cua̧'a̧ ä'canä ja̧'hua̧ta̧'a̧nö̧ ajiya ichö o'ca'a ajiya isoppa yo̧o̧ppa ppa̧huä̧chi̧'ä̧cua̧'a̧ ä'canä. ³ Ja̧u̧mä̧ jä̧cua̧'a̧tó ruhuodenä tta̧'ä̧rä̧tö̧ ttö̧ttä̧u̧ mo̧ro̧ juhua'atäcu juruhuätö'i̧nä̧ ttu'tuhuöcuächö mo̧ro̧ ja̧'hua̧ta̧'a̧nö̧ nä̧tö̧'i̧nä̧ a̧'u̧cu̧tä̧ huotö trigo tattö mo̧ro̧ juhua'atäcu jitö ventananä to̧pä̧rä̧tö̧mä̧ se'pä jö̧nä̧tä̧ tottäcuotö. ⁴ Ja̧u̧ pänämä jä̧cua̧'a̧ mä̧nä̧ apatiyu mi̧ȩcuä̧cho̧mȩnä̧, ja̧'hua̧ta̧nö̧ kärö ttaditäcä i̧huȩnȩ 'inä kä̧mä̧dä̧cua̧'a̧, ttö̧ja̧mä̧ ppiyuhuä i̧huȩnȩ ä̧ju̧cu̧mä̧ yettecuiäcuotö, ja̧'hua̧ta̧nö̧ nä̧tö̧ po̧ä̧tö̧ ra̧ttö̧'inä rä̧mi̧pö̧'inä beipächäcua'a. ⁵ Ji̧yȩnö̧ mo̧ro̧ päi'omenä ttö̧ja̧mä̧ ju'toju'inä yettecuäcuotö ja̧'hua̧ta̧'a̧nö̧ mänättö̧ ro̧huä̧pi̧jö̧'i̧nä̧, ja̧'hua̧ta̧'a̧nö̧ dau ote a̧mo̧ri̧yä̧ttö̧ u̧huä̧ju̧'i̧nä̧ 'cärächäcua'a, mä̧rä̧cä̧yu̧'i̧nä̧ rö̧ä̧nä̧ dottähuäcuotö, ja̧'hua̧ta̧'a̧nö̧ cuamucuädönä jȩcu̧'a̧ päcu'inä jäyätä jä̧cua̧'a̧. Ja̧'hua̧nö̧ jo̧mȩnä̧tä̧ ttö̧ja̧sa̧mö̧ i̧'chä̧cua̧ 'cuäopönä ojusode jä̧cuo̧mȩ ja̧'hua̧ta̧'a̧nö̧ jo̧mȩnä̧ ba̧ra̧huä̧u̧mä̧ mä̧ni̧yä̧nä̧ tti̧mȩyȩhuä̧cuo̧tö̧. ⁶ Amucuädi ucuru aditinörö̧ pärätä isappä 'toi'äcua'a ä'canätä̧ ja̧'hua̧nö̧ jö̧ juiyöttöämä i̧so̧'ta̧ ja̧'tu̧huo̧'ta̧ kä̧dö̧ icuähuäcua'a ä'canä, 'cä̧nä̧ri̧yu̧ aje pö̧o̧mȩttö̧ diähuäcua'a ä'canä, reju ä'cattö kärähuäcä ö̧jä̧pö̧ isä'ca pparächi'äcua'a ä'canä, ⁷ redä'ca i̧sa̧ppä̧ rȩjȩ ra̧'a̧ ichinomecu̧ ppa̧huä̧chä̧cua̧'a̧ ä'canä, ja̧'hua̧ta̧'a̧nö̧ Dios a̧'cua̧ru̧hua̧ iyinö ö̧ja̧'a̧cu̧ ppä̧huä̧cho̧mȩ jubu. ⁸ "Isoppa rȩjȩ tö'cönä ro̧ppamä," pä'ö huo̧juȩcuä̧ i̧sa̧, "O'cajuiyönä beometä rö̧nä̧rö̧ yabocumä dä'ähuächö." ⁹ Juo̧juȩcuä̧ i̧sa̧mä̧ huo̧jua̧ ji̧na̧'a̧ ja̧u̧mä̧ ttö̧ja̧rö̧ huo̧juȩti̧nö̧ topö ttu̧huo̧jui̧ya̧rö̧ pä'ö. Ja̧u̧mä̧ huo̧jui̧pi̧nö̧ ji̧na̧'a̧ ja̧'hua̧ta̧'nö̧ ttucuocua pä'ö huo̧juȩti̧nö̧ ja̧hua̧ta̧'a̧nö̧ rö̧ä̧nä̧ jue'epö aditinä jä̧cuä̧ ttucuocu. ¹⁰ Huo̧juȩcuä̧ i̧sa̧mä̧ usinö iso jö̧nä̧ pättötä i̧huȩyu̧ta̧ pä'ö, ja̧'hua̧ta̧'a̧nö̧ jueönä jö̧tä̧. ¹¹ Huo̧juä̧tö̧ ttucuäcumä so̧ö̧ a̧ri̧ jä̧'i̧nö̧'a̧nö̧ jö̧. Jutujui a̧ri̧ täcunä doächi'a'a jä̧'i̧nö̧'a̧nö̧ ja̧'a̧ huo̧juȩcuä̧ isotö ji̧yȩtȩ pähuä ttucuocumä, ja̧hua̧nö̧ huo̧juä̧huä̧mä̧ ya̧tȩ oicuä i̧sa̧ u̧huo̧juȩtö̧ ja̧'a̧. ¹² Chi̧tti̧, amucuädi yabonänö: cuyäru o'tä rö̧ä̧nä̧ cuaditä, ja̧u̧mä̧ beipocö ja̧'a̧, ja̧'hua̧ta̧'a̧nö̧ rö̧ä̧nä̧ cu̧huo̧jui̧'ö̧ttö̧mä̧ cuidepä'inä 'cuä̧chi̧'ä̧cua̧jä̧. ¹³ Ttucuocuäji röjinä o'cajuiyönä ttä̧ju̧cuä̧ji̧ o'ca'amä, Diosrö yecuecua pä'ötä ja̧'a̧ ja̧'hua̧ta̧'a̧nö̧ hueö huȩnȩ'i̧nä̧ adiu jȩpö̧ ku̧ju̧nö̧ttö̧mä̧, isopäi'önä pi̧yȩ ja̧'a̧ pi̧jä̧ ttö̧ja̧ jȩtta̧ pä'ö jö̧mä̧. ¹⁴ Diosmä o'cajuiyönä ro̧ȩcuä̧ra̧'a̧tä̧ i'cächä̧cua̧, yoräteönä daju ku̧nä̧huä̧cu̧tä̧, adiu ja̧ pä'ö'i̧nä̧, surojö ja̧ pä'ö'i̧nä̧.