¹ Ya̧tȩ ttö̧ja̧sa̧ adiu jȩpö̧mä̧ a̧mȩu̧ rö̧ä̧nä̧ micuäu jä̧'i̧ja̧'a̧nö̧ hua̧, ja̧'hua̧ta̧nö̧ 'corujuoächomenämä adihuäcua'a uhuäpächinomȩttö̧'i̧nö̧ yabonä̧nö̧. ² Reruhuä pä'i'äjätö ttojusodera̧'a̧ tti̧'chö̧ttö̧tä̧ adihua'anö ja̧'a̧, pä'cäri ka̧'a̧ tti̧'cha̧jueimä, isopäi'önä reruhua päi'äcuähuämä tta̧'cua̧rö̧ beipächiome ja̧'a̧, ja̧'hua̧nö̧ ja̧'a̧ttö̧ ttö̧ja̧ ji̧nä̧ ka̧cuä̧tö̧mä̧ ttamiso'quimä pi̧yȩ ttötähua pä'ö ja̧'a̧. ³ Tta̧'cua̧ tta̧huȩcuä̧cuä̧huä̧mä̧ adiu ja̧'a̧ ya̧huä̧huä̧cuä̧huä̧ttä̧'i̧nä̧, juhua'amä tti'ä a̧'cua̧tta̧ jö̧ 'cuäoio'ca'amä ttamiso'quinä esehuäcuähuätä icha'attö. ⁴ Huo̧juä̧huä̧ huȩnȩ ku̧nä̧rö̧ amiso'quimä reruhuä juo'äjätö ttojusodenä ka̧'a̧, ja̧'hua̧nö̧ ja̧'a̧nä̧ huo̧juȩcu̧nä̧ a̧mö̧cuädocö amiso'quimä ka̧'a̧ pä'cäri jȩpä̧tö̧ ttojusodenätä̧. ⁵ Huo̧juȩcuä̧ huȩnȩ ku̧nä̧rö̧ u̧ra̧huä̧rö̧ cuä̧ju̧cu̧ttö̧tä̧ adiu'anö ja̧'a̧, a̧mö̧cuädäcuähuä jui̧'a̧ ra̧hua̧'a̧ ttä̧ju̧cua̧jueimä. ⁶ Isopäi'önä uriba dȩa̧'a̧ttö̧ so̧u̧ a̧ri̧ cuoa'a rä̧mi̧pa̧'a̧ jä̧'i̧nö̧'a̧nö̧, rä̧mi̧pa̧'a̧ tta̧mö̧cuädäcuähuä jui'ä ya̧ttä̧u̧mä̧. Pi̧yȩ'i̧nä̧ isoppa jä̧'i̧nö̧'a̧nö̧ toepächö. ⁷ Isopäi'önä ya̧tȩrö̧ suronä jȩä̧cuä̧huä̧mä̧ huo̧juȩcu̧nä̧ a̧mö̧cuädörö a̧mö̧cuädö juiyönä jȩä̧cuö̧ä̧huä̧ ja̧'a̧ ja̧'hua̧ta̧'a̧nö̧ yaparetö mi̧tä̧rä̧cuä̧huä̧mä̧ amiso'qui surojuoepö ja̧'a̧. ⁸ Ji̧yȩtȩ beipomenä adicua'anö ja̧'a̧ ä̧cuo̧mȩnä̧ kä̧mä̧do̧mȩttö̧; ja̧'hua̧ta̧nö̧ ttö̧ja̧ tta̧'cua̧ diyaunä cuätömä adicuätö ttötä ja̧'a̧ pä'ätöttö'inä abonänö, ⁹ cuami surunä jö̧mä̧ jurunämä cui̧jȩpä̧, ttamisunä jö̧mä̧ ttamucuädö juiätönä kö̧. ¹⁰ Päcuä:'' ¿Tocu pä'ö ä̧cuo̧mȩnä̧ mo̧ro̧mä̧ pi̧yȩmä̧ juiyo adihuianä'a̧?''Pi̧yȩmä̧ ucumä huo̧jȩcu̧nä̧mä̧ jȩpö̧mä̧ jäepo'cöjä. ¹¹ Huo̧juä̧huä̧mä̧ juiyo adiu rö̧ä̧nä̧ micuäujuäi ja̧'i̧nö̧'a̧nö̧ tä̧do̧tö̧mi̧nä̧ ttiyipinö ja̧'a̧ttö̧. Recuärö̧jä̧u̧ru̧ iyö ja̧'a̧ttö̧ jitö ji̧nä̧ pi̧jä̧ttö̧ kä̧hua̧rö̧ topätörö. ¹² Ja̧u̧ huo̧juä̧huä̧mä̧ surojöttö huo̧juȩcu̧nä̧ ttö̧jö̧nä̧ ppädö, ja̧'hua̧nö̧ ja̧'a̧nä topö huo̧juä̧chä̧cuä̧huä̧ öadihuä päi'önämä huo̧juä̧huä̧mä̧ tta̧'cua̧rö̧ ja̧'a̧ jitö ku̧nä̧rä̧tö̧rö̧mä. ¹³ Dios aditähuä topi: ¿Dijättö juepö'anö hua̧mä̧ CHUTÄ hui̧su̧'u̧nö̧ aditina'amä? ¹⁴ Du'o adiuttömä, kä̧tu̧cui̧ cua̧'cua̧ adihua'atä juo̧ú̧ duomä, duó surojöttömä, pi̧yȩ amucuädätucui: DIOS iyinö yoräteunä adiunä ja̧'hua̧ta̧'a̧nö̧ surojö'inä. Pa̧'a̧nö̧ ja̧'a̧ttö̧, jerupätöjä tä'cacu jäcuȩi̧mä̧. ¹⁵ Chidepä hueö'anö känö ri̧ȩnä̧ topinäsä̧. Ttö̧ja̧ adiu jȩtta̧'a̧nä̧ huaö́ icuinätö̧ adiu jȩttö̧ttö̧, ja̧'hua̧nö̧ ja̧'a̧nä̧ ttö̧ja̧ jarodätömä recuo ka̧cuä̧tö̧ surojö jȩtta̧'a̧nä̧. ¹⁶ Adihua̧sä̧ päcuähuä ucutämä, topu cuamunä cu̧huo̧ju̧mä̧. ¿Ucututä surojö joecuätöjä? ¹⁷ Suronä̧ jȩä̧cuä̧huä̧ i̧sa̧jö̧nä̧ cujuiya'anö̧ ja̧'a̧ ja̧'hua̧nö̧ jo̧ca̧'ttö̧'i̧nä̧ jȩru̧pa̧ jö̧'a̧nö̧mä̧ ¿Ta̧'a̧nö̧ pä'ö ä'canä̧ 'coru juoächa'ajä̧ttö̧? ¹⁸ Adihua'anö ja̧'a̧ ucutu huo̧juä̧huä̧ huȩnȩtä̧ 'quiyunä 'chu̧cuä̧rä̧cuä̧huä̧tu̧cu̧ttö̧mä̧, ja̧'hua̧ta̧'a̧nö̧ adiu jȩä̧cuä̧huä̧ cäcuädi'ätucuoca'a jö̧ttö̧mä̧. Isopäi'önä ttö̧ja̧sa̧ Diosrö ucuotöttömä jȩö̧'a̧nö̧ jö̧mä̧ i̧rȩbȩhuä̧cua̧. ¹⁹ Huo̧juä̧huä̧ huȩnȩmä̧ huo̧juä̧huä̧ huȩnȩttö̧'i̧nä̧ juruhuö ja̧'a̧, to̧mu̧rȩnö̧ ttö̧ja̧ ruhuotö ötahuiyänä̧ ka̧cuä̧tö̧ttö̧'i̧nä̧. ²⁰ Ttö̧ja̧sa̧ adihuä̧ i̧sa̧mä̧ toa'a pi̧jä̧nä̧mä̧ adiu jȩpu̧mä̧ ja̧'hua̧ta̧'a̧nö̧ surojö'i̧nä̧ jȩpo̧cö̧mä̧ ²¹ Ucuocuäji ji̧yȩcu̧ pö̧nä̧mä̧ cuä̧ju̧cuä̧, cuä̧ju̧cu̧ttö̧mä̧ cu̧mö̧huä̧ya̧ ä̧ju̧cui̧'ö̧ca̧ suronä päcu 'cua̧ra̧'a̧. ²² Ja̧'hua̧nö̧ jö̧ta'anö ucutä'i̧nä̧ huo̧jua̧jä̧ cua̧'cua̧nä̧ cua̧mö̧nä̧ pa̧ja̧tö̧ korotörö 'cuäopönä̧tä̧ suronä päcuä'ijö'i̧nä̧. ²³ Pi̧yȩmä̧ o'cajuyiyönätä̧ ka̧cu̧mö̧ topinö̧sä̧ huo̧juä̧huä̧ huȩnȩnä̧tä̧. Ttömä pä'ösä: huo̧juä̧huä̧ huȩnȩ chu̧ju̧nä̧rä̧cua̧sä̧," ja̧'hua̧nö̧ pädina'amä chamäcuädinomettö̧'i̧nä̧ yabonä̧nö̧ ku̧nä̧ri̧nö̧sä̧. ²⁴ Huo̧juä̧ huȩnȩmä̧ otou jähuä ja̧'a̧ ja̧'hua̧ta̧'a̧nö̧ täcu jähuä ja̧'a̧, ¿Ditä ja̧'a̧ttö̧ ja̧u̧ ö̧'o̧cui̧'ö̧'a̧nö̧ hua̧mä̧? ²⁵ Cha̧mö̧cuädönä kärädö topinösä chu̧huo̧jua̧ pä'ömä ja̧'hua̧ta̧'a̧nö̧ ka̧cuä̧mö̧ topinösä̧ juhua'atäcu huo̧juä̧huä̧ huȩnȩ'i̧nä̧ usinö̧sä̧ ja̧'hua̧ta̧'a̧nö̧ isopäi'önä jiäu huȩnȩ'i̧nä̧, juhua'atäcu surojömä micuähuocö ja̧'a̧ pä'ö chu̧huo̧jua̧ pä'ö'i̧nä̧, a̧mö̧cuädäcuähuocömä tta̧mö̧cuädö jui'ätö jȩä̧cuä̧huä̧ ji̧na̧'a̧. ²⁶ Ttömä po̧cui̧pi̧nö̧sä̧ nä̧tö̧ttö̧ yotötemä̧ ttamiso'quimä kä'ö icuähuätä ja̧'hua̧ta̧'a̧nö̧ juäocuächönä jö̧tä̧ rö̧ä̧nä̧ ku̧nä̧rä̧tö̧, ttu̧mö̧pi̧yä̧mä̧ cä̧rȩnä̧sa̧ jä̧'i̧nö̧'a̧nö̧ huotö, ja̧u̧mä̧ hua'arettö'i̧nä̧ yabonä̧nö̧ reö ja̧'a̧. Ya̧tȩ Dioscu esecu icutä jä̧cua̧'a̧ ja̧u̧ttö̧ u̧ji̧pä̧cua̧mä̧ ja̧'hua̧nö̧ ja̧'a̧nä̧ suronä̧ jȩpö̧mä̧ ja̧u̧ jähuätä oipächä̧cua̧. ²⁷ Ttö chu̧'o̧cui̧'i̧nö̧ cu̧'o̧cui̧'ä̧tu̧cua̧ pä'ösä," Pä'ö huo̧juȩcuä̧ ttö̧ja̧sa̧mä̧. Ttö chu̧'o̧cui̧'ä̧ji̧mä̧ koro'i̧nä̧ po̧cui̧pi̧nö̧sä̧, isopäi'önä jö̧ po̧cui̧pö̧ jidähua pä'ömä. ²⁸ Pi̧yȩ ja̧'a̧ ji̧nä̧ ttö chusumä, ja̧'hua̧nö̧ chusa'anä ji̧nä̧ po̧cui̧po̧cö̧sä̧. Ttömä milnö jo̧mȩnä̧ huotöttömä adiu jȩpö̧rö̧mä̧ ya̧tȩrö̧tä̧ po̧cui̧pi̧nö̧sä̧, ja̧'hua̧nö̧ ja̧'a̧nä̧ nä̧tö̧ o'catoi'önä̧ttö̧mä̧ yajuterö'i̧nä̧ po̧cui̧po̧cö̧sä̧ ²⁹ Ttomä pi̧yȩ ji̧yȩtȩtä̧ po̧cui̧pi̧nö̧sä̧: Diosmä ttö̧ja̧ adiunä huotörötä ucuäbe'inö, ja̧'hua̧nö̧ ja̧'a̧nö̧ jahuätömä surojötä usu rö̧ä̧ö̧nä̧ surähuätö.''