¹ Ucuotönö täi Dios ö̧jodera̧'a̧ cui̧'cho̧mȩnä̧mä̧, adiunä cuä̧ju̧cuä̧ra̧tä̧ täí. Adiunä ja̧'a̧ ä̧ju̧cu̧ cui̧'cha̧'a̧mä̧ jitöja yapare 'cu iyähuä iyö huottötä ja̧'a̧ yapare jerupö tta̧'cua̧ jui̧yä̧u̧ huottömä. ² Cuättömä o'capäi'önämä cucuocuä, ja̧'hua̧ta̧'a̧nö̧ cuamiso'quina'inä o'capäi'önämä cuiyähuä Dios ä'cajomemä. Diosmä mo̧ro̧jä̧ra̧'a̧tä̧ kö̧. ja̧'hua̧nö̧ ja̧'a̧nä̧ ucumä pi̧jä̧nä̧tä̧ kö̧jä̧, ja̧'hua̧nö̧ ja̧'a̧ttö̧ rö̧ä̧nä̧mä̧ cucuocuä. ³ Rö̧ä̧nä̧ jȩcu̧'u̧a̧nö̧ jö̧ kö̧ttö̧mä̧ dä̧bö̧ juiyo cua̧'cua̧ rocuecuä, ja̧'hua̧nö̧ jö̧ttö̧mä̧ ja̧u̧tä̧ cu̧'cuo̧ti̧cuä̧cua̧jä̧. Jua'a yabocu cucuocuttumä, jua'a yabocu yaparetä cucuocu'anö hua̧jä̧. ⁴ DIOS ucuocu u̧ju̧nu̧mä̧, recuomä tta̧cuä̧rä̧, ja̧'hua̧nö̧ ja̧'a̧nä̧ ja̧a̧ tä̧ra̧a̧ huotörömä esehuocö DIOSMÄ. Jȩ'cua̧ peö hueömä jȩpi̧. ⁵ Cuese cuocaa jö̧ttö̧mä̧ adihuaa, jȩ'cuo̧ca̧ra̧a̧ cuese cuaacu. ⁶ Päcuä cuättömä cuidepä jäyä ki̧a̧cu̧. Sacerdoterö'inä jicuähuä: päcuäjimä jidähuiya̧cua̧sä̧. ¿Jidäuttömä, DIOS öjö'quiyönä ja̧'a̧cu̧ päcuäji ja̧'hua̧nö̧ jo̧mȩnä̧ aditö cui̧o̧cui̧'i̧nö̧ surojoepa'acu. ⁷ Amunä cu̧'cuo̧ti̧cu̧mä̧ cui̧jȩpä̧ huȩnȩ́ jocuä cha'acu. DIOSRÖ ucuoti. ⁸ Cuidepiyu jacuättö adiunä ttö̧jö̧ juiyönä usurä isotörö pä̧i̧cu̧nä̧ huȩ'ä̧rö̧ ja̧'hua̧ta̧'a̧nö̧ ttö̧nä̧u̧cuä̧ra̧'a̧ tocu'uttumä, yecuecui'ä ya̧tȩ'i̧nä̧ ieruhua'a 'cua̧rö̧nä̧mä̧, ruhuo hue'ätöttö ttumuhuäyotörö to̧pä̧rä̧tö̧ ko̧cuä̧tö̧, ja̧'hua̧ta̧'a̧nö̧ jahuätö yabonänö tturuhuotö'inä ko̧cuä̧tö̧. ⁹ Ja̧hu̧nö̧ ja̧'a̧nä̧'i̧nä̧, pi̧jä̧ttö̧ cuähuä iyömä o'catoi'önärö̧tä̧ iya'a. Ja̧'hua̧ta̧'a̧nö̧ ru̧hua̧'i̧nä̧ ja̧u̧ ppättä cuähuättötä ȩmö̧ cu. ¹⁰ Ya̧tȩ pärätä ku̧nä̧rö̧mä̧ tä'cö päprätämä ku̧nä̧rö̧sä̧ pä'öcö. Ja̧'hua̧ta̧'a̧nö̧ ya̧tȩ järe rö̧ä̧nä̧ ku̧nä̧rö̧mä̧ yabocutä u̧ju̧nä̧ra̧tä̧ pä'ö. Pi̧yȩ'i̧nä̧, cäepächötä ja̧'a̧. ¹¹ Cuaditomettö yabocutä yoähuächöttömä, ja̧hua̧ta̧'a̧nö̧ ttö̧ja̧mä̧ yo'ähuächätö ttu̧cuä̧ cuä̧nö̧, ¿Däje öädihuä ja̧'a̧jä̧ttö̧ ruhuo hueähuä u̧ru̧hua̧rö̧mä̧, chutä ö'ärenä toa pä'ötä? ¹² Adicuä ttö̧ja̧sa̧mä̧ u̧ni̧chä̧rö̧ adiu ä'ö ja̧'a̧, rö̧ä̧nä̧ ucuttö'i̧nä̧, a̧'u̧cu̧nä̧tä̧ ucuttö'i̧nä̧, ja̧'hua̧nö̧ ja̧'a̧nä̧ u̧mö̧ jähuä rö̧ä̧nä̧ ku̧nä̧rö̧mä̧ adiumä ä̧'o̧cö̧. ¹³ Rö̧ä̧nä̧ surojötä ka̧'a̧ tochomenämä̧ mo̧ro̧ kä̧hua̧ dȩa̧'a̧ttö̧mä̧: U̧ru̧hua̧ rö̧ä̧nä̧ micuäu ca̧ca̧tö̧ ötöttömä̧, a̧mö̧nä̧ pa̧ja̧tö̧ usurä ȩmä̧huä̧cuȩtä̧. ¹⁴ Ttö̧ja̧sa̧ öäre rö̧ä̧nä̧ ku̧nä̧rö̧ surojö 'cuäopomenä öäre'i̧nä̧, chutä a̧mö̧nä̧ pa̧ja̧tö̧ i̧tti̧'i̧nä̧, i̧tti̧ jö̧nä̧ juhuepinäcu̧'i̧nä̧ toe'ächöttömä̧, jui̧'a̧tä̧tä̧ ö̧ji̧pä̧cua̧. ¹⁵ Ja̧'hua̧nö̧ ttö̧ja̧sa̧ ja̧ju̧ cu̧cuä̧ba̧ jacuättö jui̧'a̧tä̧ uhuäpächöta'anö pi̧jä̧nä̧ttö̧mä̧ jui̧'a̧tä̧ i̧huä̧cua̧. Ja̧u̧mä̧ aditähuä jä̧ji̧mä̧ ȩpo̧cö̧ jä̧cua̧. ¹⁶ Koro suronä pättö jä̧'i̧nö̧'a̧nö̧ jö̧mä̧ pi̧jä̧ ttö̧jsa̧mä̧ ichinöta'anö̧tä̧, i̧hua̧ pä'ötä jä̧cua̧'a̧. Ja̧'hua̧nö̧ ja̧'a̧ttö̧ ¿Däjé yabonänö ȩmä̧cua̧'a̧ttö̧ aditö isoppa 'chuhuädöttömä̧? ¹⁷ Pi̧jä̧nä̧ ö̧jö̧ mo̧ro̧mä̧, a̧'cua̧ tta̧'ȩcu̧ kä̧nö̧tä̧ u̧cuä̧cua̧ ja̧'hua̧ta̧'a̧nö̧ rö̧a̧nä̧tä̧ a̧'cua̧ tta̧huȩcuä̧cua̧ u̧mä̧richeittömä̧ juhua'atäcu amisuräcua̧. ¹⁸ Topittö, Ttö tochä'ijömä adiu jä̧'i̧ja̧'a̧ cuä̧nö̧ ttö̧ja̧'a̧ttö̧, au ttö̧ja̧'a̧ttö̧ ja̧'hua̧ta̧'a̧nö̧ eseu ttö̧ja̧'a̧ttö̧ aditö yabonä̧nö̧ ttȩmä̧ji̧nä̧, ji̧nä̧ kä̧hua̧ dȩa̧'a̧nä̧ kä̧nö̧ aditö ttö̧ja̧cuä̧i̧mä̧, ji̧nä̧ Dios pi̧jä̧ ttö̧ja̧cua̧ pä'ö iyina'amä. Isopäi'önä pi̧yȩ ja̧'a̧ ttö̧ja̧sa̧ aditähuämä. ¹⁹ Pä̧cuä̧rö̧ja̧'a̧nö̧ ya̧tȩrö̧ Diostä pärätä rö̧ä̧'ö̧nä̧ ru̧hua̧ jö̧nä̧ iyäcumä esehuächiö ȩmu̧'anö ja̧'a̧ aditäcuä repeächiönö.> pi̧yȩmä̧ Diostä mippoönä iyö ja̧'a̧ pä'ö. ²⁰ Ja̧'hua̧nö̧ ja̧'a̧ttö̧ ä̧cuo̧mȩnä̧ ö̧ji̧nö̧mä̧ amucuädö juiyö anö ja̧'a̧, Diostä jȩä̧cu̧ eseähuäcuänätä̧ ö̧ja̧ pä'ö.