¹ Moró̧ kä̧huá̧ i̧dȩa̧ttö̧ pä̧i̧cu̧nä̧ huȩttä̧u̧rö̧ päita'anö topusä. ¡Ja̧'hua̧ta̧'a̧nö̧ topinösä̧, pä̧i̧cu̧nä̧ huȩttä̧u̧ ttö̧ja̧ tti̧'chȩrȩja, tta̧'cua̧ ttȩma̧ peö'inä topu'inä toätö ya̧tȩ'i̧nä̧! ¡Huȩä̧rä̧tö̧ ttö̧mu̧nä̧tä̧ ki̧na̧a̧ ttöruhuomä ja̧'hua̧ta̧'a̧nö̧ toinaa tta̧'cua̧ ttȩmu̧nä̧ jȩpu̧mä̧. ² Ttö eseusä ttö̧ja̧ huaicuätörö, juätö hua'ö́ icuinätö̧rö̧'inä , a̧'cua̧ rä̧tö̧rö̧mä̧cö̧, juätö ji̧nä̧ a̧'cua̧rö̧ kä̧tö̧rö̧mä̧cö̧. ³ Ja̧'hua̧nö̧ ja̧'a̧nä̧, ji̧nä̧ uhuäpächocotömä adihuaa ji̧nä̧́ ttö̧jo̧ca̧a̧ttö̧, topocotö jinä surojönä jȩä̧'chö̧'i̧nä̧ moró̧ kä̧huá̧ i̧dȩa̧ttö̧. ⁴ Ja̧'hua̧nö̧ ja̧'a̧ttö̧ ttö topinösä̧ ya̧cu̧nä̧ ttaditö ttaditähuä ja̧'hua̧ta̧nö̧ ya̧cu̧nä̧mä̧ huo̧juȩcu̧nä̧ ttaditäjimä ttippeyänä kä̧tö̧tä̧ ttamisurunä jö̧ ja̧'a̧. Pi̧yȩ'i̧nä̧ isoppa 'chu'ädi'ö ottipa pä'ö jȩtta̧'a̧ jä̧'i̧nö̧'a̧nö̧tä̧ jö̧. ⁵ Amucuädö jui̧'a̧mä̧ aditö jui'ö u̧mö̧tä̧ 'chu'ädäcuähui'ö'ca̧ kö̧, ja̧'hua̧nö̧ ja̧'a̧ttö̧ u̧cuä̧mä̧ a̧mo̧nä̧ idepätä cu. ⁶ Ja̧'hua̧nö̧ ja̧'a̧nä̧ adihua'anö ja̧'a̧ huȩnȩ juiyönä ji̧'qui̧cha̧nö̧ aditö yabonä̧nö̧ ȩmö̧ttö̧tä̧ todärenä̧ ȩmä̧huo̧mȩttö̧mä̧ isoppa 'chu'ädi'ö ttȩpa̧'a̧ jä̧'i̧nö̧'anötä̧ ja̧'a̧. ⁷ Ja̧'hua̧nö̧ ja̧'a̧ ttömä pä'äjita'anö a̧mö̧cuädinösä̧ yabonö micuähuocö jähuä tö'cö, ajiya isoppamä yabonötä̧ toepächoppa kä̧hua̧ dȩa̧'a̧dä̧ttö̧mä̧. ⁸ Pa̧'a̧nö̧ hua̧ ja̧'a̧ katätä kö̧mä̧. Ja̧u̧mä̧ a̧hua̧ru̧hua̧'i̧nä̧, i̧tti̧'i̧nä̧, ö̧jä̧hua̧'i̧nä̧ to̧'a̧. Ttaditähuämä o'cajuiyönätä beipächocö ja̧'a̧, Tti'äriyänä̧mä̧ to̧ttä̧ra̧'a̧tä̧ huotö ruhuotö jö̧nä̧ kä̧cuä̧huä̧mä̧. Ja̧u̧mä̧ a̧mö̧cuädö: ¿Dirö ja'ute'ö chadita'attö̧ ja̧'hua̧ta̧nö̧ cha̧mö̧nä̧ pa̧ja̧tö̧mä̧ eseumä chu̧ju̧ juiyö'anö ja̧'a̧ tä̧ji̧? Ja̧u̧'i̧nä̧ ajiya isoppa jä̧'i̧nö̧'a̧nö̧tä̧ ja̧'a̧, ja̧u̧mä̧ surojötä ja̧'a̧. ⁹ Ta̧ju̧mä̧ ya̧tȩtä̧ aditomettö̧'i̧nä̧ yabonä̧nö̧ aditätö; ta̧ju̧cuä̧yotö ttaditöttömä adiu micuähuächönä ttimita pä'ö huotö. ¹⁰ Isopäi'önä ya̧tȩ ma̧ä̧chö̧ttö̧mä̧, ka̧ra̧mä̧ a̧hua̧ru̧hua̧rö̧ cäepa pä'ö ja̧'a̧. Kara'anä̧mä̧, tta̧'cua̧ tta̧huȩcuä̧cuä̧huä̧mä̧ kä̧cua̧'a̧ katä ma̧ä̧cho̧mȩnä̧tä̧, ya̧tȩ'i̧nä̧ äräbe'ocomȩnä̧tä̧. ¹¹ Ta̧ju̧cuäyotö ji̧nä̧ yo̧mȩtȩ ttä'ecuttömä̧, du̧'o̧sȩ jö̧nä̧ ttäcuotö, ja̧'hua̧nö̧ ja̧'a̧nä̧ ¿Tocu du̧'o̧sȩnö̧ jä̧cua̧jä̧ttö̧ katätä hua̧mä̧? ¹² ttö̧jo̧sä̧ ya̧tȩtä̧mä̧ huetäcutä jä̧cuä̧ ja̧'hua̧nö̧ ja̧'a̧nä̧ tä̧ju̧jo̧ jo̧ttö̧mä̧ rohuäu ttöjuruhuäcuottö, isapppä huäboppäcuänä nu̧'cä juä'amä̧ jurunä̧mä̧ 'töio'ca'a. ¹³ U̧su̧rä̧'i̧sä̧ mu̧ä̧yä̧ttö̧ adicuä'anö̧ ja̧'a̧ juo̧juȩcu̧nä̧ a̧mu̧cuädöttö ja̧'hua̧nö̧ ja̧'a̧nä̧ ya̧tȩ ru̧hua̧ bu̧'i̧sä̧mä̧ a̧mu̧hu̧ädäcuä jui̧'a̧mä̧ tä'co jitäjunä̧'ä̧ jä̧ju̧cuä̧ pä̧o̧'cö̧. ¹⁴ pi̧yȩmä̧ isopäi'önä ja̧'a̧ ya̧tȩ mu̧ä̧yä̧ ru̧huä̧ i̧'ä̧mä̧do̧mȩnä̧mä̧ cärenä̧ttö̧ ka̧mä̧dö̧, ruhuottömä̧ u̧su̧rä̧sä̧ ju̧nä̧tä̧ uhuäpächinä̧. ¹⁵ Ja̧'hua̧nö̧ ja̧'a̧nä̧ inä, ttömä topinösä̧ kä̧cua̧ dua'anä cuechö ttö̧ja̧'a̧ mu̧ä̧ya̧rö̧ ucuo ru̧hua̧ päi'önä cä'epö ttu̧huä̧na pä'ö jȩtta̧'a̧. ¹⁶ Beipoca'a ttö̧ja̧ recuätö ru̧hua̧ ja̧rȩpa̧ hueö tteseta pä'ömä, ja̧'hua̧nö̧ ja̧'a̧nä̧'inä recuo nänö jö̧ o'camä jahuätötömä ucuo tettähui̧ya̧cua̧. Pi̧yȩmä̧ jerucuoca'a duo ppatä ja̧'a̧ ja̧'hua̧nö̧ ja̧'a̧ttö̧ sä̧ru̧'cuoppa chuttäda pä'ö ru̧ttä̧ra̧'a̧ jä̧i̧nö̧'anötä̧ ja'a.