¹ O'cajuiyönätä̧ u̧mo̧ro̧ kö̧tä̧ ja̧a̧ ja̧'hua̧ta̧'a̧nö̧ moro̧jä̧ttö̧ pätetöjö̧'a̧cuä̧tä̧ ja̧a̧. ² Ttöhuä pächö moro̧'i̧nä̧ ka̧a̧, huäitticu moro̧'i̧nä̧ ka̧a̧, cuähuä ttö̧jö̧nö̧ morö̧'i̧nä̧ ka̧a̧, cuähuä u̧huä̧ju̧ ttö̧ca̧tä̧tö̧ moró̧'i̧nä̧ ka̧a̧, ³ totteö moró̧'i̧nä̧ ja̧'hua̧ta̧'a̧nö̧ tti̧i̧pu̧ moró̧'i̧nä̧ ka̧a̧, surojottepu moró̧'i̧nä̧ ja̧'hua̧ta̧'a̧nö̧ ttäditö moró̧'i̧nä̧ ka̧a̧. ⁴ Ttäjahuö moró̧'i̧nä̧ ja̧'hua̧ta̧'a̧nö̧ ya̧ttä̧u̧ moró̧'i̧nä̧ ka̧a̧, huaitticu moró̧'i̧nä̧ ja̧'hua̧ta̧'a̧nö̧ baira ttitö moró̧'i̧nä̧ ka̧a̧, ⁵ inädu tticú moró̧'i̧nä̧ ja̧'hua̧ta̧'a̧nö̧ inädu tte'tö moró̧'i̧nä̧ ka̧a̧, huaadö korottö ttö̧ja̧rö̧ tteseu moró̧'i̧nä̧ ja̧'hua̧ta̧'a̧nö̧ korotö ttö̧ja̧rö̧ huattädocö moró̧'i̧nä̧ ka̧a̧. ⁶ Korojuei ttusa pä'ö'i̧nä̧ mo̧ro̧mä̧ ka̧'a̧ ja̧'hua̧ta̧'a̧nö̧ ka̧'a̧ ttusa'a kättädi'a pä'ö'i̧nä̧, mo̧ro̧mä̧ ka̧'a̧ korojuei adiu jȩpö̧ ttu̧ju̧na̧ pä'ö'i̧nä̧ ja̧'hua̧ta̧'a̧nö̧ mo̧ro̧mä̧ ka̧'a̧ dochäu tticua pä'ö'i̧nä̧. ⁷ pö̧jä̧ti̧yu̧ sȩrö̧ tticu mo̧ro̧'i̧nä̧ ka̧'a̧ juhua'atäcu pu̧jä̧ta̧ 'tö̧ttö̧ mo̧ro̧'i̧nä̧ ka̧'a̧ ja̧'hua̧ta̧'a̧nö̧ ttö'coröchi'ö mo̧ro̧'i̧nä̧ ka̧'a̧ juhua'atäcu ttucuocu mo̧ro̧'i̧nä̧ ka̧'a̧. ⁸ Repe'äcuäu ttu̧ju̧ mo̧ro̧'i̧nä̧ ka̧'a̧, ja̧'hua̧ta̧'a̧nö̧ ttuju'cö juiyönä jö̧ mo̧ro̧'i̧nä̧ ka̧'a̧, ja̧'hua̧ta̧'a̧nö̧ huȩnȩ juiyönä ttu̧ju̧ moro'inä ka'a. ⁹ ¿Däje micuätä yabonä̧nö̧ ȩmä̧cua̧'a̧jä̧ttö̧ adicuä ttö̧ja̧sa̧mä̧ aditähuättömä? ¹⁰ Ttömä topä'i̧jösä adicuä Dios iyinö pi̧jä̧ ttö̧ja̧ jo̧mȩnö̧ päi'önä ttadita pä'ötä. ¹¹ Diosmä 'cuäopä̧cuȩ mo̧ro̧mä̧ jo̧mȩnö̧tä̧ jȩpö̧ ku̧ni̧nö̧. Ja̧'hua̧ta̧'a̧nö̧ Ja̧u̧mä̧ tta̧miso'quinä 'cuäopö̧cuȩmä̧ jo̧mȩnä̧ iyö ku̧ni̧nö̧. Ja̧'hua̧nö̧ iyina'anä pi̧jä̧ ttö̧ja̧mä̧ Dios aditähuämä huo̧u̧i̧'o̧co̧tö̧, ä̧cuo̧mȩnä̧ kä̧mä̧dö̧ aditinomettö̧ röji kädinome jubömä̧. ¹² Korottö'i̧nä̧ ya̧bo̧nä̧nö̧ jö̧mä̧ adihuäjuei eseäcuähuätä ka̧'a̧ pä'ö huo̧jua̧sä̧ ja̧'hua̧ta̧'a̧nö̧ ji̧nä̧ tta̧'cua̧rä̧i̧tä̧ adihuäi jȩä̧cuä̧hua̧'a̧ pä'ö'i̧nä̧, ¹³ juhua'atäcu o'catoi'önä̧tä̧ cuätö ja̧'hua̧ta̧'a̧nö̧ ahuätö, juhua'atäcu ttu̧huo̧jua̧ pä'ö ja̧'a̧ ttaditähuättö ichöttömä ttesehua pä'ötä ja̧'a̧. Pi̧yȩmä̧ Dios mippounä ppädö ja̧'a̧. ¹⁴ Ttömä huo̧jua̧sä̧ ji̧yȩtȩ Dios jȩö̧mä̧ 'cuäopönä̧tä̧ kä̧cuȩ ja̧'a̧. Yorö'iso yabonä̧nö̧'i̧nä̧ rö̧ä̧dä̧cuä̧huo̧cö̧, jȩpö̧'i̧nä̧ icuähuocö, juhua'amä Diostä ja̧'a̧ttö̧ churutä ucuotönö ttutu'cöhuächarö pä'ötä jȩpi̧nö̧mä̧. ¹⁵ Ji̧yȩtȩ ka̧cu̧mä̧ mo̧ ka̧cui̧nö̧tä̧ ja̧'a̧; ka̧cuä̧cuȩ'i̧nä̧ ka̧cui̧nö̧tä̧ ja̧'a̧. Dios jȩpö̧ ttö̧ja̧rö̧mä̧ daju ku̧nä̧huä̧ ttusa pä'ötä. ¹⁶ Ttömä surojö jȩttö̧tä̧ tpä'ijösä kä̧hua̧ dȩa̧'a̧ttö̧, adiu jȩä̧cuä̧huä̧ ka̧'a̧nö̧ jo̧mȩttö̧mä̧, adiu jȩä̧cuä̧huä̧ ka̧ jueimä, suronä̧ jȩä̧cuä̧huä̧tä̧ ka̧'a̧ ju̧huȩnȩmä̧. ¹⁷ Cha̧mi̧so'quinä̧mä̧ pä'inösä̧: "Diosmä̧ adihuomenä jȩä̧cua̧ adiunä̧ ka̧cuä̧tö̧rö̧mä̧ ja̧'hua̧ta̧'a̧nö̧ suronä jȩpä̧tö̧rö̧ ro̧ȩcuä̧cuȩ mo̧ro̧'i̧nä̧, jȩttä̧cuȩ mo̧ro̧'i̧nä̧ ka̧'a̧." ¹⁸ Ttötä chamonä amucuädö pä'ähuinösä̧: Diosmä ttö̧ja̧rö̧ ka̧cuä̧mö̧ topö de'a isotö 'cua̧rö̧nä̧ huottöjä pä'ö i̧jȩpa̧ pä'ö.'' ¹⁹ Ja̧'hua̧nö̧ ja̧'a̧ttö̧ ttö̧ja̧ tti̧tti̧mö̧ ttö̧jo̧cuä̧cuo̧mȩ'i̧nä̧ de'a isottö ttö̧jo̧cuä̧cuo̧me'inä yoretehua'a. Ujututä 'coru huotächomenä jä̧i̧nö̧'anötä ja̧'a̧ ka̧rä̧ 'cöru pä'ömenämä. Ja̧u̧ juä'oppamä yoretehua'a jahuätö o'catoinärö̧. Juiya'a ttö̧jä̧ttö̧ juiyo abonänö̧ jö̧mä̧ de'a isotucumä. ¿Juä'toppamä pi̧yȩ o'cajuiyönä mä̧'cö̧ tä̧ji̧? ²⁰ O'cajuiyönä jinä yo̧mȩtȩtä̧ cha̧'a̧. O'cajuiyönä rȩjȩ i̧sa̧ppȩttö̧tä̧ ichö, ja̧hua̧nö̧ ja̧'a̧ttö̧ o'cajuiyönätä̧ i̧sa̧ppȩra̧'a̧ttä̧ ppa̧huä̧chö̧. ²¹ ¿Di jä̧ttö̧ huo̧jua̧ ttö̧ja̧tta̧'cua̧ ru̧hua̧ ju'tojucu i̧'schä̧cua̧ pä'ömä ja'huata'anö isotö tta̧'cua̧ru̧hua̧ pi̧jä̧ rȩjȩ jacuäcu i̧'chä̧cua̧ pä̧'ö̧mä̧? ²² Pä'äjita'anä huo̧juä̧chi̧pi̧nä̧sä̧ ya̧tȩrö̧'i̧nä̧ adihuä jueimä juiya'a pä'ö aditähuä eseunu aditörömä, ja̧'hua̧nö̧ jö̧mä̧ ttadita pä'ö hueähuättä ja̧'a̧. ¿Di jä̧ttö̧ pä'äjita'anö i'chächö'anö hua̧mä̧ ja̧u̧ jȩi̧nö̧ o'ca'a 'cuäopö toa pä'ömä.