¹ Chamonä chamiso'quinätä̧ pä'ähuinösä̧: "Ichi jitämä, ttötä cho̧cuä̧mö̧ topäcuäusä cheseunänö jo̧menä," Ja̧'hua̧nö̧ ja̧'a̧nä̧ topi, pi̧yȩ'i̧nä̧ isoppa 'cuäopa'a ja̧'i̧nö̧'a̧nö̧tä̧ ja̧'a̧. ² Ya̧ttä̧u̧ ötö'cömä pä'inösä̧: "ttu̧ttȩpä̧ro̧cö̧" ja̧'hua̧ta̧'a̧nö̧ ȩsȩu̧nu̧ kö̧sä̧ pähuämä: "¿Däje micuäu?" ³ Vino a̧tti̧poyä aumä tta̧'a̧nä̧ cheseu'anö ja̧'a̧ttö̧ pä̧'ö̧ chamiso'quittö ko̧cuä̧mö̧ topäcuähuinösä̧. huo̧juä̧huä̧mä̧ chamucuädönätä oipa'anä iyähuinäsä̧, jacuänämä micuähuäcönä 'quiyönä repe'ö chö̧ja̧'a̧nä̧. Ttömä chö̧'o̧cui̧'a̧ pä'inösä̧ ttö̧ja̧mä̧ däje öadihuä ttö̧'o̧cui̧'o̧'a̧nä̧ ja̧ pä'ö mo̧ro̧jä̧ dȩa̧'a̧ttö̧mä̧ ji̧nä̧ pi̧jä̧nä̧ a̧'cua̧rö̧ ttö̧jä̧i̧mä̧ ⁴ Kä̧mä̧dinäsä̧ aditö bäreu, chojusodettö aditö ja̧'hua̧ta̧'a̧nö̧ uva pättä'inä kö̧ni̧nö̧sä̧. ⁵ Aditinösä̧ isode ä'ca a̧'cua̧cu̧nä̧ ka̧cu̧'i̧nä̧ ja̧'a̧hua̧ta̧'a̧nö̧ ttö̧ja̧ ttö̧ca̧ca̧co̧mȩ'i̧nä̧; ju̧ȩnȩtä̧ kö̧näjisä̧ o'cajuiyönä 'cä̧huö̧nä dauhuiyä u̧huä̧ju̧ cuäcuähuä'inä. ⁶ Aji acuäba'inä aditinösä̧ dauhuiyä i̧yȩpä̧ra̧ peö buojoa'anä. ⁷ Kö̧nä̧ri̧nö̧sä̧ ä̧mä̧cö̧ adicuä ttö̧ja̧rö̧'i̧nä̧ ja̧'hu̧a̧ta̧'a̧nö̧ adicuä ttö̧ja̧ nä̧tö̧rö̧'i̧nä̧; chojusode jacuättö adicuä ttö̧ja̧ tti̧tti̧mu̧ huäpächinätö̧rö̧'i̧nä̧ kö̧nä̧ri̧nö̧sä̧. Ja̧'hua̧ta̧'a̧nö̧ kö̧nä̧ri̧nö̧sä̧ ri̧ȩnä̧ isotö a̧u̧cu̧nä̧ huotörö'inä ri̧ȩnä̧ huotörö'inä ohueja̧tö̧rö̧, Jerusalén rȩjȩttö̧ ruhuotö pinätö̧ttö̧'i̧nä̧ abonänö̧ kö̧nä̧ri̧nö̧sä̧. ⁸ Ri̧ȩnä̧ kö̧nä̧ri̧nö̧sä̧ pärätättö'inä orottö'inä, koro rȩjȩ́ ruhuotö ttiäre ri̧ȩnä̧ micuäuttö'inä. Kö̧nä̧ri̧nö̧sä̧ ra̧ȩttö̧rö̧ ttörö u̧mä̧tö̧ttö̧'i̧nä̧ natö̧ttö̧'i̧nä̧, chidepä hueönä jȩpu̧ ki̧nö̧sä̧ pi̧jä̧ ttö̧ja̧ tti̧tti̧mu̧ ja̧i̧nö̧'a̧nö̧ recuätö nätu̧cu̧. ⁹ Ja̧'hua̧nö̧ ja̧'a̧ttö̧ yabonä̧ rö̧'ä̧chi̧nö̧sä̧ ja̧'hua̧ta̧'a̧nö̧ yabocutä chu̧mö̧ jähuä rö̧ä̧nä̧ ku̧nä̧ri̧nö̧sä̧ chä'canä Jerusalénä ki̧nä̧tö̧ttö̧ abonänö, juhua'atäcu chu̧huo̧ju̧ huȩnȩmä̧ ttöcutä ki̧na̧'a̧. ¹⁰ O'cajuiyönä chi'äre kö'cönä toömä, ttömä kö'cönänömä̧ topocöpi̧nö̧sä̧ ja̧u̧mä̧. Ttömä̧ chämiso'quinä kämädoca̧'a̧ ji̧na̧'a̧ cheseynä jȩö̧mä̧, juhua'amä̧ chami̧'iso'quimä̧ esehuina'a chäditähuä o'cajuiyöttötä ja̧'hua̧ta̧'a̧nö̧ eseäcuähuätä ji̧na̧'a̧ chaditähuättö micuä jö̧nä̧ iyömä. ¹¹ Ja̧'hua̧nö̧ ja̧'a̧ttö̧ topinösä o'cajuiyönä chu̧mö̧pi̧yä̧ aditinö̧mä̧, ja̧'hua̧ta̧'a̧nö̧ chaditinömä̧ ja̧'hua̧nö̧ ja̧'a̧nä̧ pä'äjita'anö̧ pädömä, o'cajuiyötä isoppa ottipa pä'ö jȩtta̧'a̧ jä̧'i̧na̧'a̧nö̧tä̧ ji̧na̧'a̧. Ja̧u̧mä̧ yabonä̧nö̧ ȩmä̧huä̧mä̧ juiyina̧'a̧ kä̧hua̧ dȩa̧'a̧dä̧ttö̧mä̧. ¹² Ja̧'hua̧nö̧ ji̧yä̧cu̧ amucuädinösä huo̧juä̧huä̧ huȩnȩtä̧, ja̧'hua̧ta̧'a̧nö̧ a̧mö̧cuädäcuähuä juiyönä̧ jȩä̧cuä̧huä̧'i̧nä̧. ¿Däjetä jȩä̧cua̧'a̧ttö̧ cho'ca'anä̧ ru̧hua̧ ö̧jä̧cua̧mä̧, däjetä ichäcua'attö̧, jȩcho̧cö̧ jä̧'i̧jö̧ttö̧mä̧? ¹³ Ja̧'hua̧nö̧ ja̧'a̧ ttömä huo̧jui̧'i̧nö̧sä̧ huo̧juä̧huä̧ huȩnȩmä̧, huo̧jui̧'ä̧cuä̧huo̧cö̧ u̧huä̧mȩnä̧ jö̧ja̧'a̧ pä'ö, ja̧'hua̧ta̧nö̧ tȩya̧u̧mä̧ yo̧u̧ u̧huä̧mȩnä̧ jö̧ta̧'a̧nö̧. ¹⁴ Huo̧juä̧huä̧ huȩnȩ ku̧nä̧rö̧mä̧ unä̧ a̧mö̧cuädö i'ärenämä topö 'chö̧, ja̧'hua̧nö̧ ja̧'a̧nä̧ a̧mö̧cuädäcuähuä jui̧'a̧mä̧ yo̧u̧nä̧tä̧ 'chö̧ ja̧'hua̧nö̧ ja̧'a̧nä̧, ttömä huo̧jua̧sä̧ ti̧rȩbȩhuä̧cuo̧mȩmä̧ yȩnȩtȩtä̧ ja̧'a̧ pä'ötä. ¹⁵ Ja̧'hua̧nö̧ ji̧yä̧cu̧ chamiso'quinä pä'inö̧sä̧: A̧mö̧cuädocörö 'cuäopömä ttörö'i̧nä̧ 'cuäopäcua'adi̧. Ja̧'hua̧nö̧ jö̧ttö̧mä̧, ¿Tocu yoräteu juiyönä chäcua'attö rö̧ä̧nä̧ huo̧jua̧ cha'amä? Ttömä chamiso'quinä pädäunä ji̧na̧'a̧: Pi̧yȩ'i̧nä̧ isoppa jä̧'i̧nö̧'a̧nö̧tä̧ jö̧" ¹⁶ Isopäi'önä ttö̧ja̧sa̧ huo̧jua̧mä̧, huo̧juo̧cö̧ jö̧ta̧'a̧nö̧ recuo mo̧ro̧mä̧ a̧mö̧cuädäcuähuocö jä̧cua̧. Yodoji mo̧rmä̧, o'cajuiyönä̧tä̧ unichi'äcuähuäcua'a. Ttö̧ja̧sa̧ huo̧jua̧'i̧nö̧ hua'ö i̧cuä̧cua̧, a̧mö̧cuädocö 'corujuoächöta'anö. ¹⁷ Ja̧'hua̧'a̧nö̧ ja̧'a̧ cha̧'cua̧ru̧'i̧nä̧ chuju'cö juiyunä̧tä̧ ji̧nä̧cu̧sä̧ jua'amä̧ O'cajuiyönätä̧ kä̧hua̧ i̧dȩä̧ttö̧ adicuämä̧ ttörömä̧ surojutä ji̧na'a̧. Ja̧u̧mä̧ o'cajuiyönä̧ ajiya isoppa ottipa'a pä'ö jȩtta̧'a̧ jä̧'i̧nö̧'a̧ntä̧ ja̧'a̧ttö̧ ¹⁸ O'cajuiyunä kä̧huä̧ i̧dȩa̧ttö̧ aditö chirȩbȩhui̧nö̧mä̧ chuju'cö juiyunä̧ jä̧cu̧sä̧, ja̧u̧mä̧ cho'ca'acutä chu̧ju̧ni̧'ä̧cuȩ jo̧mȩttö̧, ttö̧ja̧sä̧ ttö cho'ca'anä̧ ichörötä. ¹⁹ Isopäi'önä̧tä̧ ¿Dijä̧tö̧ ja̧u̧ ttö̧ja̧sa̧rö̧ u̧huo̧juä̧cua̧cö̧ a̧mu̧cuädö jui̧ä̧cua̧cö̧ pä'ö u̧huo̧juä̧cua̧mä̧? Ja̧'hua̧nö̧ ja̧'a̧nä̧ ja̧u̧tä̧ jä̧cua̧'a̧ O'cajuiyunä̧ chäditinö̧'i̧nä̧ ja̧'hua̧ta̧'a̧nö̧ huo̧juä̧huä̧ huȩnȩmä̧ kä̧hua̧ dȩa̧'a̧ttö̧ chaditinö̧'i̧nä̧ u̧ru̧hua̧ pä̧i̧'ä̧cua̧mä̧. pi̧yȩmä̧ajiya isoppa jö̧'a̧nö̧tä̧ jä̧cuȩ. ²⁰ Ja̧'hua̧nö̧ ja̧'a̧ttö̧, chami̧'isoqui'inä̧ O'cajuiyunä̧ kä̧hua̧ i̧dȩa̧nä̧ ka̧nö̧ chaditäji chämö̧cuädomenä̧mä̧ cha̧cua̧tta̧ päi'i̧näcusä. ²¹ Yotucunä ka̧cuä̧tö̧ ttu̧ȩpä̧rö̧nö̧ huo̧jö̧nä̧ aditäjätö ja̧'hua̧nö̧ ja̧'a̧nä̧, ja̧u̧mä̧ u̧juni̧ä̧cuä̧ u̧ju̧nä̧rö̧mä̧ o'cajuiyönä yaute'cö jȩpo̧'cö̧ päjirötä. Pi̧yȩi̧nä̧mä̧ duoppa 'cua̧rö̧nö̧tä̧ jö̧ ja̧'hua̧nö̧ ja̧'a̧ttö̧ surojötä 'cächö. ²² Tocu pä'ö jä̧'a̧'jä̧ttö̧, ¿däje ppäda jä̧ttö̧ pä̧i̧cu̧nä̧ aditätörömä ja̧'hua̧nö̧ ja̧'a̧nä̧ inä ka̧cua̧ dua'anä ttami 'kiächiö aditätö jo̧mȩnö̧ huottepapä'ö tä̧ji̧? ²³ Mo̧ro̧ji̧nö̧ ä̧u̧cuä̧ ttaditomenä baracuä̧u̧ tta̧'cua̧ tta̧ȩcuä̧tö̧, ja̧'hua̧ta̧nö̧ yodomä tta̧'cua̧ adiunämä ttäö juiyönä jä̧u̧. pi̧yȩ'inämä duoppatä jö̧. ²⁴ Koro adiumä jö̧mä̧ juiya'a suttädiönä cuänö a'u ttaditäcuättö o'cajuiyönä adihuomenä po̧cui̧pu̧tä̧ eseu adihua'amä. Topinösä̧ pi̧yȩmä̧ Diosttötä ichö pä'ö. Tocu ja̧'a̧ttö̧, ²⁵ ¿Di jä̧ttö̧ u̧cuä̧ ucu'anö hua̧mä̧ ja̧'hua̧ta̧nö̧ esehuäcuähuä'inä u̧ju̧nä̧ra̧'a̧nö̧ hua̧mä̧ Diosttö i̧mi̧cu̧nä̧ jö̧nä̧mä̧? ²⁶ Ucututtu ya̧tȩrö̧ iya päcurutä, Diosmä iyö huo̧juȩcu̧nä̧ kä̧cuä̧huä̧'i̧nä̧, huo̧juȩcu̧nä̧ jȩä̧cuä̧huä̧ ja̧'hua̧ta̧'a̧nö̧ tteseu'inä. Ja̧'hua̧nö̧ ja̧'a̧nä̧, suronä jȩä̧cuä̧huä̧ i̧sa̧rö̧mä̧, ja̧u̧mä̧ iyö aditähuä ppäsepö ö̧ca̧ca̧ta̧ pä'ö ja̧'hua̧nö̧ ca̧ca̧tö̧ iya pä'ö Dios päöta'anö jȩpö̧rö̧. Pi̧yȩ'i̧nä̧ yapare adiu ja̧'a̧ ja̧'hua̧ta̧'a̧nö̧ i̧so̧ppa̧nä̧tä̧ coepächö.