¹ TÖ̧Ä̧NÄ̧HUA̧ CU̧Ä̧NÄ̧HUA̧ DIOS cui̧rȩjä̧ päi'önä cu̧jä̧cuä̧ja̧ra̧'a̧ i'cächomenämä, ja̧'hua̧nö̧ ja̧'a̧ cuä'catu jo̧mȩttö̧ ttö̧ja̧ recuätörö rä'epö i̧cuä̧cua̧: Hititasrö'inä, gergerseosrö'inä, amorreosrö'inä, cananeosrö'inä ferezeosrö'inä, heveosrö'inä, ja̧'hua̧ta̧'a̧nö̧ jebuseosrö'inä; sietenö huottö ttö̧ja̧ korotöttö'inä yabonänö huotörö ja̧'hua̧ta̧'a̧nö̧ ucututtö'inä yabonänö juruhuätörö. ² TÖ̧Ä̧NÄ̧HUA̧ CU̧Ä̧NÄ̧HUA̧ DIOS jahuätörö rohuäu icu isojuocuepätucunä ppädomenämä, curä rohuäu to̧'cuä̧u̧rö̧mä̧ rohuäutä cuicuatöjä, ja̧u̧nu̧ o'ca'amä o'catoi'önä̧rö̧tä̧ si'epö cuicuatöjä̧. Ucumä jahuätucu cuesecuó ja̧'hu̧ta̧'a̧nö̧ yorö'iso rerö̧jö̧nä̧'inä to'cuätö. ³ Ja̧'hua̧ta̧'a̧nö̧ jahuätöttömä cuirecuamö päi'önämä cuȩmä̧tu̧cuä̧, cui̧tti̧mö̧tu̧cu̧ nä̧tö̧rö̧'i̧nä̧ jahuätö jahuätö tti̧tti̧mö̧ tti̧rȩcua̧mö̧ päi'önä̧ cuiyätucuä juhua'atäcu jahuätö tti̧tti̧ nä̧tö̧rö̧'inä cui̧tti̧mö̧tu̧cu̧ u̧mä̧tö̧ tti̧rȩcua̧mö̧ päi'önämä ttȩmö̧tó, ⁴ Ja̧'hua̧nö̧tä̧ jȩtä̧cuo̧ttö̧ ucututtö cuitti̧mö̧tu̧curö̧mä̧ jitötä korotö ttö̧'ä̧nä̧huo̧tö̧rö̧ ucuo tettähua pä'ötä. ja̧'hua̧nö ja̧'a̧ttö̧ TÖ̧Ä̧NÄ̧HUA̧ Öra̧huä̧ri̧'ä̧cua̧ ucuturumä̧ ja̧'hua̧nö̧ ra̧huä̧ri̧pö̧ jurunä̧ siepö i̧cuä̧cua̧jä̧. ⁵ Ja̧'hua̧nö̧tä̧ ucutu jahuätörö jȩ'cuä̧cua̧jä̧; ku icu ttiyä'ijome'inä pparö cuicuäcua̧jä̧, ja̧'hua̧ta̧'a̧nö̧ i̧nä̧o̧bi̧ttö̧ tätähuä o'ca'inä̧ ppo̧u̧cu̧ päi'önä̧ jȩcuä̧cua̧jä̧, Asera ka̧'u̧cuä̧ tätähuä o'ca'inä juhua'atäcu topö ttötätä'ijö o'ca'inä si'epö ku cuicuäcua̧jä̧. ⁶ Isopäi'önä ucumä ucumä̧ TÖ̧Ä̧NÄ̧HUÄ̧ cu̧ä̧nä̧hua̧ Dios umöhuäya̧ jö̧nä̧tä̧ 'cä̧'ȩpo̧ u̧ju̧ninä̧cu̧jä̧, Chutä umöhuäyotö cuätucunätä pojopö ȩminä̧u̧jä̧, ja̧'hua̧jä̧nä̧ ka̧cuä̧tö̧ o'catoi'önättö̧'inä abonä̧nö̧ jönä̧. ⁷ TÖ̧Ä̧NÄ̧HUA̧MÄ̧ repeäcuähuämä hueinäcu̧jä̧, korotöttö'inä abonä̧nö̧ hua̧ cuoca'attö, ucumä jahuättö o'catoi'önä tti̧dȩa̧'a̧nä̧ juinö̧jä̧. ⁸ Ja̧'hua̧nö̧ ja̧'a̧nä̧ CHUTÄ juiyo repeäcujä, ja̧'hua̧nö̧ ja̧'a̧ttö̧ cuä̧do̧tö̧ mi̧nä̧rö̧ ji̧yȩtȩ jȩchä̧cua̧sä̧ päinö̧ ji̧nö̧ 'chu̧'ä̧ri̧nö̧. Ja̧'hua̧nö̧ ja̧'a̧ttö̧ TTÖ̧Ä̧NÄ̧HUA̧MÄ̧ chutä ujurunä̧ rä'epö icuinäcu̧jä̧ Egipto ru̧hua̧ Faraón ojusode pä̧'i̧cu̧nä̧ hueomettö̧mä̧. ⁹ Ja̧'hua̧nö̧ ja̧'a̧nä̧, huo̧jua̧jä̧ CUÄ̧NÄ̧HUA̧ Diosmä amo̧nä̧mä̧ huo'cö jueötä hua̧,churutä repeö hueö jȩpä̧tö̧rö̧mä̧ täbocö päiönä esecu u̧ju̧ni̧nö̧ ji̧nö̧mä̧ ji̧nä̧ u̧ni̧chi̧o̧cö̧, ¹⁰ Ja̧'hua̧nö̧ ja̧'a̧nä̧ jitö kö'cocotörömä mihuä päinä ro̧ȩpu̧ siepu icuäcuotö; JU̧MÄ̧ pä̧i̧cu̧nä̧tä̧ ro̧ȩpä̧cua̧ churutä a̧u̧tä̧tö̧rö̧mä̧; JU̧MÄ̧ jitörötä ttiänä ppa̧cuä̧dä̧cua̧. ¹¹ Ja̧'hua̧nö̧ ja̧'a̧nä̧ ucumä chu̧cuä̧rä̧cua̧jä̧ hueähuä huȩnȩ'inä, pä'ö cu̧nä̧cuä̧'i̧nä̧, ja̧'hua̧ta̧'a̧nö̧ TÖTÄ ucuru pi̧yȩ mo̧ro̧ hue'ö pä'ö chu̧ju̧nu̧'i̧nä̧ jȩ'cua̧ já̧. ¹² Pi̧yȩ hueähuä cuä̧ju̧cu̧ttu̧mä̧, hua'adö ku̧nu̧ päöta'anö jȩpi̧; 'cuäopäcua'a TU̧RU̧HUA̧ TÖ̧Ä̧NÄ̧HUA̧ DIOSMA ucucu esecuinömä yȩ'ä̧cua̧ ja̧'hua̧ta̧'a̧nö̧ ja̧u̧mä̧ cuä̧'o̧ttö̧ mi̧nä̧rö̧ yȩchä̧cua̧sä̧ päinöta'anö. ¹³ Ja̧u̧mä̧ ucuru rȩpȩä̧cua̧, ppä̧dä̧cua̧jä̧ ja̧'hua̧ta̧'a̧nä̧ yabocu yocuäunätä̧ jȩä̧cua̧jä̧; Jua'a jö̧ta̧'a̧nö̧ cui̧tti̧mö̧'i̧nä̧ yottäunä ppä̧dä̧cua̧ ja̧'hua̧ta̧'a̧nö̧ cu̧cuä̧ cuähuä cu̧ju̧nome'inä, u̧huä̧ju̧ ote'inä, cua̧huä̧ vino isoya'inä, a̧dȩ'i̧nä̧, cuä̧ji̧ pä̧cä̧yö̧'i̧nä̧ yabocu yottäunä ja̧'hua̧ta̧'a̧nö̧ cuä̧ji̧mu ovejatö yottäunä, rȩjȩ chi̧yä̧cua̧sä̧ päinäjä cuä̧'o̧tu̧cu̧ mi̧nä̧rö̧. ¹⁴ Ucu jä̧cua̧'a̧ korotöttö'inä abonänö ppä̧dä̧cua̧mä̧; Ya̧tȩí̧nä̧ i̧tti̧mä̧ to'ömä ä̧jö̧ jui̧yä̧cua̧ isaju'inä ki̧tti̧mö̧ to'ajumä kö̧jö̧ juiyäcuaju ucutucumä ja̧'hua̧ta̧'a̧nö̧ cuä̧ji̧ pä̧cä̧yö̧'i̧nä̧ yottähuäcuotö. ¹⁵ TÖ̧Ä̧NÄ̧HUA̧MÄ̧ na̧cuä̧chö̧ jui̧yö̧nä̧ yȩä̧cua̧; Surojö märichei Egiptottö tocu'inö ji̧nä̧mä̧ rö̧jä̧mu̧ juiyäcua'a ucuturumä, ja̧'hua̧nö̧ ja̧'a̧nä̧ ja̧u̧ märichimä ucuturu kä'cocotörötä rö̧jä̧mä̧cua̧'a̧. ¹⁶ Ucú CUI̧Ä̧NÄHUA̧ DIOS cujuröunä i̧yä̧cua̧jä̧ ja̧'hua̧nö̧ ja̧'a̧ttö̧ ucumä o'catoinä ttö̧ja̧rö̧ 'cho̧cui̧pä̧cua̧jä̧. Ucumä jui̧cuä̧cua̧jä̧ ucuotäcuähuämä. Ja̧'hua̧ta̧'a̧nö̧ ucumä yapare tti̧ä̧nä̧huä̧tö̧rö̧mä̧ cueseti̧yä̧cua̧jä̧, jo̧u̧mä̧ ucú jäyä jȩ'cua̧ pe'ö jä̧cuȩi̧. ¹⁷ Ucu cuamiso'qui jacuättö ucucuttömä. Pitömä juiyo juröhuätö ttöttö'inä abonänö; ¿tta̧'a̧nö̧ jȩpu̧ 'chodipäcua'attö̧? ¹⁸ Yecuecuä jahuätörömä; cuamucuä dä̧cua̧jä̧ ucu CUI̧Ä̧NÄHUA̧ DIOS ru̧hua̧ Faraónrö̧ jȩi̧nö̧mä̧ ja̧'hua̧ta̧'a̧nö̧ o'catoinä Egipto rȩjȩnä̧ ka̧cuä̧tö̧rö̧; ¹⁹ juȩnȩ cui̧jä̧tu̧cuo̧mȩnä̧ rö̧'ȩnä̧ tösurähuaa topinätö̧jä̧, öjo teädö ujurönä i̧jȩ pi̧nä̧u̧jä̧ ucu CUI̧Ä̧NÄHUA̧ DIOS räepu icuinömä. Ucu CUI̧Ä̧NÄHUA̧ DIOS o'catoinä ttö̧ja̧rö̧ yecu ucutö̧nö̧ jȩpä̧tu̧rö̧mä̧ ja̧'hua̧ta̧'a̧nö̧ tta̧huä̧rä̧cua̧. ²⁰ Kara'anämä, TÖ̧Ä̧NÄ̧HUA̧ DIOSMÄ cu̧'cä̧tȩtu̧cu̧nä̧mä̧ pä̧ju̧ru̧ huȩä̧cua̧, jitö totte'ächa'anä ka̧cui̧pi̧nä̧tö̧'i̧nä̧ ucuttömä ttödahuächa'a cuä'ca jo̧mȩttö̧mä̧ tottepächäcuotö. ²¹ Ucumä jahuätörömä yecuecuoca'a cu̧jä̧cua̧jä̧, juhua'amä CU̧Ä̧NÄ̧HUA̧TU̧CU̧ DIOSMÄ ucututäcu ö̧ja̧'a̧ttö̧, Dios rö̧ä̧nä̧ yettecunä jȩpö̧mä̧. ²² TÖ̧Ä̧NÄ̧HUA̧ DIOSMÄ u̧'cua̧pö̧nä̧ cuä'ca jo̧mȩttö̧ jahuätörömä rä'epö i̧cuä̧cua̧. Ucumä ya'utecutä rohuäu kä'ö cuicuatöjä, de'a isotö'inä cuippeyä jo̧mȩnä̧ yabonö yottäu juiyäcua'anö. ²³ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ DIOSMÄ rohu[u isojuocuepätucunä ppä̧dä̧cuä̧u̧jä̧ curä rohuäu to'cuä̧tu̧cuä̧u̧rö̧mä̧; Ja̧u̧mä̧ jubötö icuäcuotö totte'ächome jubö päi'önä. ²⁴ Ja̧u̧mä̧ ucu cujurunä̧tä̧ ruhuotörömä ö̧tä̧cua̧ ja̧'hua̧ta̧'a̧nö̧ ucumä mo̧ro̧jä̧ dȩa̧'a̧ttö̧mä̧ tti̧mi̧mä̧ si'epö cuicuäcua̧jä̧. Ya̧tȩ'i̧nä ucucu to'ija'acu jȩpö̧mä̧ toäcua'a, jahuätörö si'epö cuicupme jubö. ²⁵ Ucumä yapare ttö̧ä̧nä̧huo̧tö̧rö̧mä̧ kuhuä'chu cuicuajá. Ku'quecunämä to'cuó huä̧mȩnä̧ tuhuecuä plata'inä, oro'inämä ja̧'hua̧ta̧'a̧nö̧ cuiäre päi'önämä cuȩmä̧, ja̧'hua̧nö̧ jȩ'cu̧ttö̧mä̧ jahuätötä 'chu̧ttä̧dä̧cua̧jä̧, ja̧u̧mä̧ TÖ̧Ä̧NÄ̧HUA̧ CU̧Ä̧NÄ̧HUA̧ DIOSMÄ̧ u̧su̧ru̧tö̧ ja̧'a̧. ²⁶ Yorö'iso ja̧u̧ su̧ro̧tä̧cuä̧huä̧mä̧ cuojusodera̧'a̧mä̧ cui'cächä ucuo te'äu cuesehua pä'ömä. Ja̧u̧ttö̧mä̧ 'to'ocu cuicajä ja̧'hua̧ta̧'a̧nö̧ cuju'cö juiyönätä̧ to'cucuajá, ja̧u̧mä̧ si'epö tticua pä'ötä 'cä̧'ȩpö̧ ku̧nä̧huä̧ ja̧'a̧.