¹ Pi̧yȩ ja̧'a̧ hueähuä huȩnȩmä, jȩ'cuä̧tu̧cua̧ pä'ö hueähui'inömä ja̧'hua̧ta̧'a̧nö̧ TÖ̧Ä̧NÄ̧HUA̧ Cu̧ä̧nä̧hua̧tu̧cu̧ Dios jȩ'cuä̧tu̧cua̧ pä'ö hueinö chu̧huo̧juȩti̧ya̧rö̧ pä'ö hueinö̧mä̧, Jordán aje kähuächö rȩjȩ i̧yä̧jä̧nä̧ cu̧jä̧tu̧cuo̧mȩnä̧ jpäö'a̧cuä̧ jȩpö̧ cu̧jä̧tu̧cua̧ pä'ö. ² TÖ̧Ä̧NÄ̧HUA̧ Cu̧ ä̧nä̧hua̧tu̧cu̧ Diosrö cucuotätucuäcua'anö, o'cajuiyönä jȩ'cuä̧tu̧cua̧ pä'ö hueinö'inä ja̧'hua̧ta̧'a̧nö̧ hueähuä huȩnȩ ucuturu huedömä'i̧nä̧ 'chu̧'ä̧rä̧cuä̧u̧ kä̧nö̧, ucututä'i̧nä̧, cui̧tti̧mö̧'i̧nä̧, cu̧nä̧mö̧'i̧nä̧, pi̧jä̧nä̧ cu̧jä̧tu̧cuä̧i̧mä̧ cua̧cua̧rö̧tu̧cu̧'i̧nä̧ recuo mo̧ro̧ kä̧nö̧ cuböäcuätucuäcua'anö. ³ Ja̧'hua̧nö̧ ja̧'a̧ttö̧, Israel ttö̧já ä̧ju̧cuä̧tu̧cui̧, ja̧'hua̧ta̧'a̧nö̧ jȩpö̧ ka̧cuä̧tu̧cui̧, adihuomenä cui̧'chä̧tu̧cuä̧cua̧'a̧nö̧ juhua'atäcu rö̧ȩnä̧ cuirecuächäcuotöjä juä̧jä̧ rȩjȩttö̧mä̧ leche'i̧nä̧, maya'i̧nä̧ ajiya huerächa'a jä̧'i̧nö̧'a̧nö̧ huȩrä̧chä̧jä̧ttö̧mä̧, TÖ̧Ä̧NÄ̧HUA̧ Dios cuä̧'o̧tö̧ mi̧nä̧ ttö̧ä̧nä̧hua̧ Dios, chi̧yä̧cuä̧u̧jä̧ päinö̧'ta̧'a̧nö̧tä̧. ⁴ Israel ttö̧ja̧ ä̧ju̧cuä̧tu̧cui̧: TÖ̧Ä̧NÄ̧HUA̧ DIOSMÄ chu'äcua̧tä̧ hua̧. ⁵ Ucumä ja̧u̧ TÖ̧Ä̧NÄ̧HUA̧ CU̧ Ä̧NÄ̧HUA̧ DIOSRÖMÄ, cua̧mi̧'iso'quitucu o'cajuiyönä̧, cua̧'cua̧rö̧'i̧nä̧, cujuru'i̧nä̧ o'cajuiyönä̧tä̧ eseunu repeö kä̧hui̧. ⁶ Jitä mo̧ro̧ pi̧yȩ huȩnȩ jidäumä̧ cuamiso'quinä kä̧cuȩ, ⁷ ja̧'hua̧nö̧ ja̧'a̧ttö̧ ttu̧'ȩpä̧rö̧nö̧ cui̧tti̧mö̧tu̧cu̧ru̧mä̧ cu̧huo̧juȩta̧jä̧, ja̧u̧ huȩnȩmä̧ cu̧huo̧juȩtä̧cua̧jä̧ cuoju isodetucuttö'i̧nä̧, mä̧nä̧nä̧ cui̧'chä̧tu̧cuo̧mȩttö̧'i̧nä̧, cuäi'ätucuäcua'a ä'canä̧'i̧nä̧, ja̧'hua̧ta̧nö̧ mo̧ro̧ juoa'a cu'orächätucuomȩttö'i̧nä̧. ⁸ cu̧mu̧nä̧ ti̧'ä̧di̧cuä̧u̧ rö̧nä̧hui̧ tottönä jua'atä jä̧cua̧'a̧ ucuru ttesetönä cuocuoränä rä̧cua̧'a̧mä̧. ⁹ Cui̧huȩyu̧ta̧ja̧ apate huä̧mȩ isodänä cuojuisodena'inä ja̧'hua̧ta̧'a̧nö̧ ötahuiyä apate isodänä̧'i̧nä̧. ¹⁰ CU̧Ä̧NÄ̧HUA̧ DIOS cuä̧'o̧tö̧ mi̧nä̧rö̧ chi̧yä̧cuä̧jä̧ pä̧i̧nä̧jä̧ra̧'a̧ i'chächomenä, Abrahamrö̧'i̧nä̧, Isaac'rö'inä ja̧'hua̧ta̧'nö̧ Jacob'rö'inä; Ja̧u̧mä̧ pä'inö curohuäuttömä chi̧yä̧cua̧sä̧ ötahuiyä bäreu adiuttu, ¹¹ Ja̧'hua̧ta̧'a̧nö̧ odehuiyä'inä jacuä adihuäjuei ko̧cu̧ ode ucu jȩcu̧'o̧cö̧ ji̧nö̧, ajiya reju sacuocoju ji̧nä̧ju'inä, uva pätta'inä ja̧'hua̧nta̧'a̧nö̧ olivo dauhuiyä cu̧ju̧no̧cö̧ ji̧nö̧'i̧nä̧. Ja̧u̧tä̧ cuä̧nö̧ eseu cu̧jä̧cua̧jä̧, ¹² ja̧'hua̧nö̧ ja̧'a̧ttö̧ ro̧huä̧pi̧jö̧nä̧ ja̧'a̧tó cunichi'ä CU̧Ä̧NÄ̧HUA̧RÖ̧ ja̧u̧tä̧ ji̧na̧'a̧ Egipto rȩjȩttö̧ rä'epö icuinömä, pä̧i̧cu̧nä̧ huȩttä̧rodettö koromecu. ¹³ Ucuo te'ähuätucui CU̧'Ä̧NÄ̧HUA̧ DIORÖTÄ, ja̧u̧ru̧tä̧ ucuo te'ähuätucui ja̧'hua̧ta̧'a̧nö̧ ja̧u̧ i̧mi̧nä̧tä̧ iso ja̧'a̧ pä'ö. ¹⁴ Yapare ttö̧ä̧nä̧huo̧tö̧ ttö'ca'anämä cui̧'chä̧tu̧cuä̧, ucutu cuippeyätucunä ko̧cuä̧tö̧ yapare ttö̧ä̧nä̧huo̧tö̧nä̧; ¹⁵ CU̧Ä̧NÄ̧HUA̧TU̧CU̧ DIOS ucututäcu kö̧mä̧ ja̧u̧ DIOSMA ä'cuoyäu ja̧'a̧. Jȩcu̧'ä̧tu̧cu̧ttu̧mä̧, CUÄ̧NÄ̧HUA̧TU̧CU̧ DIOS ö̧'ä̧i̧ ucuturu rä̧bȩhuä̧cua̧'a̧ ja̧'hua̧ta̧'a̧nö̧ ja̧u̧tä̧ ja̧'a̧ pi̧jä̧ttö̧ si'epö i̧cuä̧cua̧. ¹⁶ CU̧Ä̧NÄ̧HUA̧ DIOSRÖMÄ ko̧cuä̧mö̧ tocu'ä Masahttö ko̧cuä̧mö̧ tocu'äji'anömä. ¹⁷ CU̧Ä̧NÄ̧HUA̧ DIOS hueinö ta'anö jȩpö̧ ko̧cuä̧tu̧cui̧, ja̧u̧ hueähuämä adihuäjuei ja̧'a̧, ja̧u̧tä̧ hueinö ucutu jȩcu̧'ä̧tu̧cua̧ pä'ö. ¹⁸ TÖ̧Ä̧NÄHUA̧ hueömä adiunä jȩpä̧tu̧cui̧, ucuturötä adihuäcua'anö, ja̧'hua̧ta̧'a̧nö̧ cui̧jä̧tu̧cuä̧cua̧'a̧nö̧ rȩjȩ́ a̧di̧huä̧jä̧nä̧ TÖ̧Ä̧NÄHUA̧ cuä'ätucurö ucuocu u̧ju̧ni̧nä̧jä̧, ¹⁹ ja̧'hua̧nö̧ ja̧'a̧ttö̧ räepu icuinätö̧jä̧ o'catoinärö̧ cuaboyotörö ucutu cui̧jä̧tu̧cuo̧mȩttö̧ TÖ̧Ä̧NÄHUA̧ päinöta̧'a̧nö̧. ²⁰ Ucú cui̧tti̧ jäepomenä ti̧yȩnö̧ i'cächä cuaajä̧ttö̧, päönänö ¿Dä̧ pe'ö hueö u̧ju̧ni̧nö̧ jȩta̧ pe'ö ka̧'a̧jä̧ttö̧ ucucu u̧jö̧ni̧nö̧'i̧nä̧ hueähuä huȩnȩ'i̧nä̧ ja̧'hua̧ta̧'a̧nö̧ koro ka̧a̧tä̧ji̧ ujuturö TÖ̧Ä̧NÄHUA̧ DIOS hueinömä? ²¹ Ja̧'hua̧'a̧nö̧ jäepomenä cui̧tti̧rö̧ cuädätajá: Ujutumä̧ Egipto ru̧huá̧ Faraón huȩä̧'u̧tä̧ ka̧cui̧nä̧tö̧jä̧; TÖ̧Ä̧NÄHUA̧ ujurönätä̧ Egiptottö räepö i̧cui̧nä̧u̧jä̧, ²² Jo̧ú̧ ujutu tö̧jo̧mȩttö̧ i̧jȩpi̧nä̧'u̧jä̧ jueönä bäreu jähuä Egipto rȩjȩttö̧, ru̧hua̧ Faraón ojusodettö; ²³ Jo̧ú̧ räepu i̧cuinäu̧jä̧ jua'attö, ja̧'hua̧'a̧nö̧ ja̧'a̧ttö̧ jo̧ú̧ i̧'cä̧chi̧nä̧u̧jä̧ po jo̧u̧tä̧ iyinäu̧jä̧ tä'ominärö̧ ucucu u̧ju̧ni̧nä̧jä̧ rȩjȩnä̧. ²⁴ TÖ̧Ä̧NÄ̧HUA̧MÄ̧ hueinäu̧jä̧ 'cuäopönä̧tä̧ jȩta̧ pä'ö hueähui'inö̧mä̧ jȩpö̧ kä̧nö̧mä̧ TÖ̧Ä̧NÄ̧HUA̧RÖ̧ yetecua pä'ö tu̧ru̧hua̧ Diosnä adiunä ja̧tö̧ pä'ömä ja̧'hua̧ta̧'a̧nö̧ ja̧'hua̧nö̧ jȩtö̧ttö̧tä̧ ta̧'cua̧rä̧cuo̧tö̧jä̧, jitä mo̧ro̧ tö̧ja̧cu̧ta̧'a̧nö̧. ²⁵ Hueähuä huȩnȩ o'cajuiyönä päö'acuä̧ TÖ̧Ä̧NÄ̧HUA̧ to̧ä̧ro̧mȩttö̧ jȩtö̧ttö̧mä̧, chutä ujuturu hueinö'acuä̧tä̧, ja̧'hua̧nö̧ jo̧mȩnä̧ adihuätö jö̧nä̧tä̧ to̧ä̧cuä̧u̧jä̧.