¹ Jitä mo̧ro̧ huedö hueähuä huȩnȩmä̧ o'cajuiyönätä̧ adiu 'chu̧cuä̧rä̧cuä̧huä̧tu̧cua̧ja̧ adiunä̧ kä̧nö̧ juhua'a yabo cuirecuächätucuäcua'anö̧, TÖ̧Ä̧NÄ̧HUA̧ cu̧tä̧mö̧ mi̧nä̧rö̧ chi̧yä̧cuä̧sä̧ päinä̧jä̧ cui̧rȩjä̧tu̧cu̧ päi'önä̧ docuächätucuäcua'anö. ² Amöcuädätucui TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS cuarenta a̧'ȩ jo̧mȩnä̧ de'a jui̧yä̧jä̧nä̧ oipinö, ja̧'hua̧nö̧tä̧ ja̧u̧mä̧ ucuo tecuähuätucu juyönä jȩpö̧mä̧, cua̧mi̧so'quitucunä ka̧cuä̧mö̧ to̧ä̧cua̧ ucuturumä̧, hueähuä huȩnȩ 'quiyönä 'chu̧ttäräcuähuäcuotöcö, 'chu̧'ä̧rä̧cuä̧huo̧co̧tö̧cö̧ pä'ö u̧huo̧jua̧ pä'ömä. ³ Ja̧u̧ usurä isotö juo'ö, ppäi ttucuätucunä̧ jȩpi̧nö̧ ja̧'hua̧nö̧ jȩpö̧ mo̧ro̧jä̧ jähuä maná pättö ucuäjetinä̧u̧jä̧ ucututä'inä ja̧'hua̧ta̧'a̧nö̧ cuä'otö̧ mi̧nä̧'inä tottocö ji̧nö̧nä. Ja̧u̧ jȩi̧nö̧mä̧ ttö̧ja̧mä̧ ttu̧cuȩ cuä̧nö̧tä̧mä̧ ko̧co̧tö̧; ja̧'hua̧nö̧ ja̧ju̧ juaimä TÖ̧Ä̧NÄ̧HUA̧ i̧huȩnȩ ucuocua'a räopöttö'inä a̧'cua̧rö̧ ttö̧jä̧cuo̧tö̧. ⁴ Ö̧'ca̧ta̧hua̧ta̧'i̧nä̧ beipächoca'a ji̧na̧'a̧ ja̧'hua̧ta̧'a̧nö̧ mo̧'ä̧chö̧'i̧nä̧ mo̧ä̧cho̧co̧cu̧ pinö i̧jä̧pi̧yä̧'i̧nä̧ jö̧a̧mo̧ca̧'a̧ ji̧nä'a̧ cuarenta a̧'ȩ jo̧mȩnä̧ ja̧'a̧nä̧. ⁵ Ucutu cuamiso'quitucunä amucuädätöjä ji̧yȩtȩ, ya̧tȩ ubo i̧tti̧rö̧ ro̧'ȩpu̧nö̧ huo̧juȩtö̧, ja̧'hua̧nö̧ jö̧ta̧'a̧nö̧ huo̧juȩti̧nö̧ TÖ̧Ä̧NÄ̧HUA̧ Diomä ucuturö. ⁶ Ucutumä 'chu̧cuä̧rä̧cuo̧tö̧jä̧ TÖ̧Ä̧NÄ̧HUA̧ DIOS, hue'ähuä huȩnȩ hueinö adiu ucuotönö cui̧'chä̧tu̧cua̧cua̧'a̧nö̧. ⁷ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Dios i'cächinä̧u̧jä̧ rȩjȩ adihuomȩcu̧, aje'inä pu̧nä̧ kä̧jä̧nä̧, aje huiyä ppo̧ö̧'i̧nä̧ kä̧jä̧nä̧, muä'quiyu pämärö oppänä huerächönä jo̧mȩcu̧; ⁸ Trigo rȩjȩ jo̧mȩ ja̧'hua̧ta̧'a̧nö̧ cebada'nä, vino'inä higuera'inä ja̧hua̧ta̧'a̧nö̧ o̧du̧ jö̧ oba'inä ko̧mȩcu̧; olivo'inä maya'inä rȩjȩ jo̧mȩcu̧. ⁹ Ja̧huä̧jä̧ rȩjȩttö̧mä̧ pan'inä juiyiyäcua'a cucuätucua pä'ömä, ucuturu recuä rö̧jö̧mä̧ cu̧ju̧nä̧rä̧cuo̧tö̧nä̧; Juȩnȩ rȩjȩmä̧ ido'qui'inä cuoruttu adicuo'quitä ja̧'a̧, ja̧'hua̧ta̧'a̧nä̧ muä'quiyu jo̧mȩttö̧mä̧ cobreta sacuäcuotöjä. ¹⁰ Ucutumä cu̧cuä̧'i̧nä̧ adiunä sucädi'önä cucuäcuotöjä, Ja̧'hua̧nö̧ ja̧'a̧ttö̧ cuesehuäcuotöjä CU̧Ä̧NÄ̧HUA̧TU̧CU̧RU̧ cui̧rȩjä̧tu̧cu̧ iyina'attö̧. ¹¹ Ttu̧'ȩpä̧rö̧nö̧ ko̧cuä̧tu̧cui̧ cunichi'ätucuoca'a CU̧Ä̧NÄ̧HUA̧TU̧CU̧ DIOSRÖ, ja̧'hua̧ta̧'a̧nö̧ ucutumä hueinötä jȩpö̧ ko̧cuä̧tu̧cui̧, hueipinötä̧, hueipinö jitä hue'ösä ucutu jȩcu̧'ä̧tu̧cua̧ pä'ö, ¹² cu̧cuä̧ jo̧mȩnö̧ cui'ipö cu̧jo̧mȩnä̧tä̧mä̧cö̧, ja̧'hua̧ta̧'a̧nö̧ cuojusode adihuode aditi'ipö cu̧jo̧mȩnä̧tä̧mä̧cö̧, ja̧'hua̧ta̧'a̧nö̧ cuami'iso'qui cuȩsȩu̧nä̧ jo̧mȩnä̧tä̧mä̧cö̧. ¹³ Ttö̧ȩpä̧rö̧ kä̧hui̧ cuä̧ji̧mu̧ ttirecuächomenä ja̧'hua̧ta̧'a̧nö̧ ucu cuäre pärätättö'inä orottö'inä rö̧ä̧chä̧cho̧mȩnä̧ ja̧'hua̧ta̧'a̧nö̧ o'cajuiyönä cu̧ju̧nä̧rö̧ rö̧ä̧cho̧mȩnä̧, ¹⁴ ja̧'hua̧nö̧ ja̧'a̧ttö̧ ucu cuamiso'quittö cuamucuädäcuajä ja̧'hua̧ta̧'a̧nö̧ cu̧ni̧chi̧ä̧cua̧jä̧ ucu CUI̧Ä̧NÄHUA̧ DIOSRÖ, ucurö räepu icuinörö̧ Egipto rȩjȩttö̧, cuäcuäpu huettinomettö̧. ¹⁵ Cunöchiä jo̧u̧rö̧mä̧ ucurö tta̧'a̧ri̧nö̧ rö̧ȩnä̧ yecuecunä 'cuao pa'anä dea juiyomettö̧, ra̧huä̧pi̧ huotö a̧ca̧tö̧ttö̧'i̧nä̧ i̧di̧yu̧tö̧ttö̧'i̧nä̧ ja̧'hua̧ta̧'a̧nö̧ rȩjȩ́ ajé jui̧yä̧jä̧ttö̧'i̧nä̧, di räepu iyinäcu̧ttö̧ ajiya inähuättö räopunä. ¹⁶ Jo̧u̧tä̧ ucuä jueinäcu̧jä̧ maná dea juiyomettö̧ ä'quejimä jerupinä̧tö̧jä̧, jo̧u̧rö̧ ucuo tettähua pe'ömä ja̧'hua̧ta̧'a̧nö̧ ka̧cuä̧mu̧ totta peönä, rijinä adiunä jȩttä̧ pe'ö, ¹⁷ ucutä cuamunä cuamucuädäcuähuä, ttötä cuo̧cui̧pi̧nö̧sä̧ chujurönä o'cajuiyönä chu̧ju̧nä̧rö̧mä̧ päömä. ¹⁸ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ DIOSRÖ cuamöcuädajá, juhua'amä Ja̧u̧ ja̧'a̧ ru̧hua̧ juocua pä'ö cujuru iyömä; jitä mo̧ro̧ jö̧ta̧'a̧nö̧ cu̧tä̧mö̧mi̧nä̧rö̧mä̧ esecu todecuinö. ¹⁹ Pi̧yȩ 'cuäopäcua'a TÖ̧Ä̧NÄ̧HUA̧ DIOSRÖ cunichi'öttömä̧ ja̧'hua̧ta̧'a̧nö̧ korotö ttö̧ä̧nä̧huo̧tö̧ tto'ca'anätö 'chä̧nä̧ ucuo tecuäuttömä ja̧'hua̧ta̧'a̧nö̧ jahuätörö cucuotöttömä, ttömä 'cuä̧o̧pä̧cuȩmä̧ jitä mo̧ro̧ jidähuäcujä tocue'ächäcua̧jä̧tó pä'ö. ²⁰ TÖ̧Ä̧NÄ̧HUA̧ ttö̧ja̧rö̧ cuä̧'ca̧ jo̧mȩttö̧ si'epö icuta'anö, ja̧'hua̧nö̧tä̧ tocue'ächä̧cua̧jä̧, juhua'a TÖ̧Ä̧NÄ̧HUA̧ DIOS ucuocu cuä̧ju̧cuo̧ca̧'a̧ jä̧ji̧ta'anö.