¹ israel ttö̧ja̧, ä̧ju̧cuä̧tu̧cui̧ jȩ'cuä̧tu̧cuä̧cuä̧i̧ ja̧hua̧ta̧'a̧nö̧ hueinö ji̧dä̧huä̧u̧jä̧, jȩ'cuä̧tu̧cua̧ pe'ö; cu̧jä̧tu̧cuä̧cua̧'a̧nö̧, doächö cui̧jä̧tu̧cua̧cua̧'a̧nö̧ cuätucu minä i̧ä̧nä̧hua̧ DIOS, TÖ̧Ä̧NÄHUA̧ i̧yä̧ja̧nä̧. ² Ucumä huedinöttö̧mä koró huȩyu̧tö̧ jȩ'cuä̧'chó, ja̧'hua̧ta̧'a̧nö̧ huedinöttö̧mä hui̧cuä̧dä̧'chó̧, ucú huaadö cujunäcua̧'a̧nö̧ huedinöta̧'a̧nö̧ ttö ucú CUIÄNÄHUA̧TU̧CU̧ DIOSÄ, jo̧menö hueda pe'ö ko̧sä̧. ³ Ucutu topinätö̧jä̧ TÖ̧Ä̧NÄHUA̧ ro̧ȩpi̧nö̧ Baalrö yapare tti̧ä̧nä̧hua̧rö̧ Peornä känö̧kä̧nö̧ jȩtta̧a̧ttö̧, o'catoinä u̧mä̧tö̧ Baal-Peor 'chä̧tö̧rö̧mä̧, ucutu CUI̧Ä̧NÄHUA̧TU̧CU̧ DIOS ucutucu kä̧tu̧rö̧ siepicuinö. ⁴ Ja̧'hua̧nö̧ ja̧'a̧nä̧ ucutumä 'quȩi̧pä̧cho̧co̧tö̧ pi̧nä̧tu̧jä̧ CUI̧Ä̧NÄHUA̧TU̧CU̧ DIOS jitä moró̧ a̧'cua̧rö̧ kö̧rö̧mä̧, ya̧cu̧nä̧ ucutucu. ⁵ Ttömä hueähuä huȩnȩ'inä jȩtta̧ pä'ö hue'ö ku̧nä̧huä̧'inä huo̧juȩtä̧'i̧jö̧sä̧. TÖ̧Ä̧NÄ̧HUA̧ Dios ja̧huä̧jä̧nä̧ kä̧nö̧ chu̧huo̧juȩta̧ pä'ö hueinöta'anötö, do'ächi'ö cu̧jä̧mä̧dä̧cua̧ pä'ö docuächätucuäjänämä. ⁶ Ja̧'hua̧nö̧ ja̧'a̧ttö̧ adiu topö jȩpö̧ ka̧cuä̧tu̧cui̧, pa̧'a̧nö̧tä̧ cui̧jȩpä̧cua̧jä̧ huo̧juȩcunä̧ cuamöcuädömä ja̧'hua̧ta̧'a̧nö̧ rö̧ä̧nä̧ jö̧'inä cu̧huo̧jui̧pö̧mä̧, o'catoi'önä jȩtta̧ pä'ö hue'ö ku̧nä̧huä̧ ä̧ju̧cuä̧tö̧mä̧ pättäcuotö: " Isopäi'önätä pitö ttö̧ja̧mä̧ huo̧juȩcu̧nä̧'i̧nä̧ ja̧'hua̧ta̧'a̧nö̧ huo̧jui̧'ä̧cuä̧huä̧'i̧nä ku̧nä̧rä̧tö̧". ⁷ ¿Korotö ttö̧ja̧'inä ka̧cuä̧tö̧ ttö̧ä̧nä̧hua̧ tö'cönänö kö̧rö̧ ku̧nä̧rö̧tä̧mä̧, ujutu TÖ̧Ä̧NÄ̧HUA̧ Dios jätepäcu jä̧'i̧ja̧'a̧nö̧ hua̧rö̧? ⁸ ¿Korotö ttö̧ja̧'inä ka̧cuä̧tö̧ hueähuäö huȩnȩ'inä ja̧'hua̧ta̧'a̧nö̧ jȩtta̧ pä'ö hueähuä'inä jitä mo̧ro̧ ucuturu chiyö'anö jö̧ ku̧nä̧rä̧tö̧mä̧? ⁹ Jidäu adiu ä̧ju̧cuä̧tu̧cui̧jó cua̧mö̧cuädätucuä̧cuȩ adiu jȩpö̧ ku̧nä̧tu̧cui̧, ji̧yȩtȩ korojuäi to'cuinä̧tu̧cu̧'inä cuchiä'ätucuó, 'cuäopönä mo̧ro̧tä̧ cua̧'cua̧tu̧cu̧nä̧ kä̧cua̧'a̧nö̧. Cui̧tti̧mö̧rö̧'inä juhua'a yabo tti̧tti̧mö̧rö̧'inä huo̧juȩtä̧tu̧cui̧. ¹⁰ Horeb mö̧ä̧'cattö TÖ̧Ä̧NÄ̧HUA̧ Dios ä'ca jo̧mȩ cu̧ji̧nä̧tu̧cu̧ mo̧ro̧ TÖ̧Ä̧NÄ̧HUA̧MÄ̧ pi̧yȩ päinä̧cu̧sä̧: "Ttö̧ja̧rö̧ ca̧ca̧ti̧tö̧ Ttö chi̧huȩnȩ ttä̧ju̧cua̧ tticha, 'cuäopönä̧ mo̧ro̧ Ttörö ucuotö ttö̧jä̧cua̧'a̧nä̧ pi̧jä̧ rȩjȩnä̧ ttö̧jä̧i̧mä̧ ja̧'hua̧ta̧'a̧nö̧ tti̧tti̧mö̧rö̧'inä ttu̧huo̧juȩtä̧cua̧'a̧nö̧. ¹¹ Ucumä tö'cö ichi'ö möä'ca kada'ca kä̧mä̧di̧nö̧jä̧. juä'cattötä ocurä cuo'ö mo̧ro̧jä̧ra̧'a̧cu̧ 'chahuächina̧'a̧, ocurä isoppa sutu'canö̧ isoppa päi'önä. ¹² TÖ̧Ä̧NÄ̧HUA̧MÄ̧ ocurä kä̧tȩttö̧ ucuocuinö̧ ucuturumä; Ucumä̧ ä̧ju̧cui̧nä̧tö̧jä̧ ucuocua'a i̧huȩnȩtä̧, ja̧'hua̧ta̧nö̧ ja̧'a̧nä̧ ji̧yȩtȩ a̧'cua̧juä̧'inä topocö pinö̧jä̧; ucumä suro i̧huȩnȩ rä̧mi̧pa̧'a̧tä̧ ä̧ju̧cui̧nö̧jä̧. ¹³ Ja̧u̧mä̧ dieznö hueähuä huȩnȩnä̧ esecuinömä̧ cucuotätucua pä'ö ji'ähuinö. Ja̧u̧mä̧ i̧nä̧ obi tobirenä huȩyu̧tinö. ¹⁴ TÖ̧Ä̧NÄ̧HUA̧MÄ̧ hueinäcu̧sä̧ ja̧u̧nu̧ pä̧nä̧mä̧ jȩpö̧ ku̧jä̧tu̧cua̧ pä'ö hueähui'inö̧ chu̧huo̧juȩta̧ pä'ö, kähuächö 'chä̧hui̧'ö̧ cu̧jä̧tu̧cuä̧jä̧ttö̧ ucuotö cu̧jä̧tu̧cuä̧cua'anö. ¹⁵ Ja̧'hua̧nö̧ ja̧'a̧ ttu̧'ȩpä̧rö̧nö̧ ka̧cuä̧tu̧cui̧ isopäi'önä ucutumä ji̧yȩtȩ a̧'cua̧juä̧'i̧nä̧ topocotö pinätöjä Horeb mö̧ä̧'cattö ocurä cuomȩ ka̧tȩttö̧ TÖ̧Ä̧NÄ̧HUA̧ ucuturu ucuocuinö̧mä̧-- ¹⁶ Cua̧mö̧nä̧ pa̧ja̧tö̧mä̧ suro juocuecuätucuä isotöttö yotute tta̧'u̧cuä̧'inä jȩ'cuä̧'chä̧tu̧cuä̧ ubocö̧ isajucö̧ tta̧'cua̧juä̧ jö̧ a̧'u̧cuä̧'inä, ¹⁷ de'a isotö tta̧'u̧cuä̧'inä ja̧'hua̧ta̧nö̧ ju'tojunä̧ co̧'ä̧rä̧tö̧ tta̧'u̧cuä̧'i̧nä̧, ¹⁸ isotö rȩjȩnä̧ do'ähuätö ja̧'hua̧ta̧nö̧ aje jacuotonä̧ cuo̧'ä̧rä̧tö̧ po̧i̧ tta̧u̧cuä̧'i̧nä̧. ¹⁹ Ucumä mo̧ro̧ji̧yä̧ra̧'a̧mä̧ to'cuä ucuo tecuäcua pä'ömä kä̧hua̧ro̧'inä yodo kä̧hua̧rö̧'inä si̧ri̧'cö̧rö̧'inä o'cajuiyönä mo̧ro̧ji̧yä̧ ujurumä ja̧'hua̧ta̧nö̧'i̧nä̧ ucuo teäumä huesehuä ja̧u̧ juä̧i̧mä̧ TÖ̧Ä̧NÄ̧HUA̧ Diostä o'cajuiyönä iyinö mo̧ro̧jä̧ dea'a ka̧cuä̧tö̧rö̧. ²⁰ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧TÄ̧ u̧mi̧cu̧ ȩpu̧ räepu icuinö Egiptotö pä̧i̧cu̧nä̧ huettomȩttö̧, ucutu cuamo̧nä̧tu̧cu̧tä̧ ucuturu hueähui'inö huȩmä̧tu̧cua̧ pä'ö, jitä pi̧yȩ mo̧ro̧ ucutu cu̧jä̧tu̧cuo̧mȩmä̧. ²¹ Ucutu jähuänä TÖ̧Ä̧NÄ̧HUA̧MÄ̧ ttörö amisuräcu; ja̧u̧ma̧ pä'äji iso päi'önätä pädäcujä 'cuäcuopi̧yä̧cua̧jä̧ Jordán ajemä, do'ächocösädó rȩjȩ a̧di̧huä̧jä̧ra'a̧mä̧, juȩnȩ rȩjȩmä̧ TÖ̧Ä̧NÄ̧HUA̧ DIOS iya'a cui̧rȩjä̧tu̧cu̧ päi'önä. ²² Ja̧'hua̧nö̧ ja̧'a̧ttö̧, ttömä pi̧jä̧ rȩjȩttö̧tä̧ 'corujuodächö'anö ja̧'a̧; Jordánra̧'a̧mä̧ chi̧'chö̧ juiyö'anö ja̧'a̧; ja̧'hua̧nö̧ ja̧'a̧nä̧ ucumä 'cuä̧cuo̧pä̧cua̧jä̧ ja̧huä̧jä̧ rȩjȩ a̧di̧huä̧jä̧ra̧'a̧mä̧. ²³ Adiunä ä̧ju̧cuä̧tu̧cui̧ jó, cu̧ni̧chi'ätucua'acu CU̧Ä̧NÄ̧HUA̧TU̧CU̧ DIOS esecuinö ucuturu, ucututä korojui a̧'u̧cuä̧ 'co̧'ö̧ CU̧Ä̧NÄ̧HUA̧TU̧CU̧ DIOS jȩcu̧'ä̧tu̧cuä̧ päinö. ²⁴ CU̧Ä̧NÄ̧HUA̧TU̧CU̧ DIOMÄ ocurötä hua̧, ja̧u̧ DIOMÄ ä'cuoyäu. ²⁵ Cui̧tti̧mu̧tu̧cu̧ tti̧tti̧mu̧ hua'a yabo tti̧tti̧mu̧ cu̧ju̧nä̧rä̧tu̧cuo̧mȩnä̧, ja̧'hua̧ta̧'nö̧ juä̧jä̧ rȩjȩnä̧ kä̧nö̧ cubuäcuätucuomenä, ucutä cuamonä surojuocuecuttu ja̧'hua̧nö̧tä̧ korojuei a̧'u̧cuä̧ ko̧'ö̧ aditö ja̧'hua̧nö̧ jȩcu̧'u̧ttu̧mä̧ CU̧Ä̧NÄ̧HUA̧ DIOSrö amisurächi'önä jȩcu̧'ä̧cua̧jä̧. ²⁶ Huopösä mo̧ro̧jä̧'i̧nä̧ pi̧jä̧'i̧nä̧ tottä pä'ö ucu jȩcu̧'u̧, recuó jo̧ juiyönätä tocue'ächäcuotöjä ucutu pi̧jä̧ttö̧mä̧ Jordannä ttö̧ja̧ pä'ö 'cuäcuopätucua'anä, recuo mo̧ro̧mä̧ ko̧co̧tö̧ cuäcuotöjä juȩnȩmä̧, ja̧'hua̧nö̧ ja̧'a̧nä̧ ucutumä si'epö icuähuotä cuäcuotäjä. ²⁷ TÖ̧Ä̧NÄHUA̧TÄ̧ ȩpä̧cua̧ ucutöttö Israel ttö̧ja̧rö̧ ja̧'hua̧nö̧ ja̧'a̧nä̧ ji̧'qui̧cha̧nö̧tä̧ tö̧jä̧cuä̧cuo̧tö̧ pi̧jä̧ röhuäcuiyä pä̧ja̧cu̧nä̧, TÖ̧Ä̧NÄHUA̧TÄ̧ otó ȩpä̧cua̧. ²⁸ Ucutu Juattö cuesetäcuotöjä yapare tti̧ä̧nä̧huo̧tu̧rö̧, dahuiyättö ja̧'hua̧ta̧'a̧nö̧ inähuiyättö 'co̧'ö̧ ttö̧mu̧nä̧ tta̧di̧tä̧u̧rö̧ ttö̧ja̧, jahuätö ucuo tȩttä̧huä̧u̧mä̧ topu'inä ä̧ju̧cu̧'i̧nä̧ cuä̧nö̧'i̧nä̧ ja̧'hua̧ta̧'a̧nö̧ 'cö̧ö̧'i̧nä̧ 'cö̧o̧co̧tö̧. ²⁹ Juaattötä, cusäcuotöjä CUI̧Ä̧NÄHUA̧TU̧CU̧ DIORÖ ja̧'hua̧nö̧ ja̧'a̧ttö̧ cui̧o̧cui̧ä̧ cuo̧tö̧jä̧, cusatucuomenä o'ca juiyönä cuamiso 'quittucuttö ja̧'hua̧ta̧'a̧nö̧ o'cajuiyönä cua̧'cua̧rä̧tu̧cu̧ttö̧'i̧nä̧. ³⁰ Cua̧'cua̧ ta̧huȩpö̧tä̧ ko̧mȩnä̧mä̧ ja̧'hua̧ta̧'a̧nö̧ korotä ucuru ichomenämä täcö bu̧o̧sa̧ jö̧nä̧ cu̧ju̧ mo̧ro̧ TÖ̧Ä̧NÄ̧HUA̧ Diosrö ppa̧'a̧chö̧mä̧ i̧huȩnȩ'i̧nä̧ cuä̧ju̧cuä̧cua̧jä̧. ³¹ Isopäi'önä Cu̧ä̧nä̧hua̧ Diosmä rȩru̧ju̧nä̧ topö ja̧'a̧ Ja̧u̧mä̧ päjimä jȩpö̧ ja̧'hua̧ta̧'a̧nä̧ si'epömä icuocö jä̧cua̧ juhua'atäcö cuä̧do̧tö̧ mi̧nä̧cu̧ esecuinömä unichi'ocö jä̧cua̧. ³² Jitämä jä'epö ö̧ju̧cui̧, 'cuättopinö mo̧ro̧, dija̧ pä'ö ucu cuä'coji uhuäbe'ö ku̧ni̧nö̧mä̧: ¿Pi̧jä̧ttö̧ Dios ttö̧ja̧sa̧rö̧ uhuäbe'inömä mo̧ro̧jä̧ pä̧cuä̧dä̧jä̧ rȩjȩttö̧, jä'epö ä̧ju̧cui̧ ji̧yȩtȩ rö̧ä̧u̧ jähuä ki̧na̧ pä'ö ja̧'hua̧ta̧'a̧nö̧ ji̧yȩtȩ pi̧yȩ tö'cö ä̧ju̧cui̧nä̧tö̧? ³³ ¿Ya'utenä ttö̧ja̧sa̧mä̧ Dios ocuränä ucuocua'a ä̧ju̧cui̧nö̧, jitä cuä̧ju̧cuä̧ji̧'a̧nö̧ ja̧'hua̧ta̧'a̧nö̧ ä̧ju̧cuä̧ji̧'ca̧ cu̧ja̧'a̧nö̧? ³⁴ ¿Ka̧ra̧ Dios'i̧nä̧ ö̧ja̧'a̧, korotö ttö̧ja̧ ttö̧'cä̧tȩttö̧ pojopö ȩmi̧nö̧mä̧, rö̧ȩnä̧ ka̧cuä̧mö̧ topö jȩpö̧, tottocö̧jä̧i̧jö̧'i̧nä̧ i̧jȩcuä̧chö̧nä̧ i̧jȩpö̧, curä'i̧nä̧ ttörohuäunä̧ ja̧'hua̧ta̧nö̧ ujurunä̧ öjo cäepa'a ja̧'hua̧ta̧'a̧nö̧ rö̧ä̧nä̧ yettecunä̧ päi'önä̧ jȩpö̧mä̧, TÖ̧Ä̧NÄ̧HUA̧ ucuru Egiptottö rä'epö icu to'cunä̧ jȩinö̧'a̧nö̧ hua̧mä̧? ³⁵ Ucurumä pi̧yȩmä̧ i̧jȩcuä̧chi̧na̧'a̧ TÖ̧Ä̧NÄ̧HUA̧MÄ̧ Dios ja̧'a̧ , ja̧'hua̧ta̧'a̧nö̧ ka̧ra̧ ja̧u̧ ta̧'a̧nö̧ hua̧mä̧ toa'a pä'ö cu̧huo̧jua̧ pä'ötä. ³⁶ Mo̧ro̧jä̧ra̧'a̧ttö̧mä̧ i̧huȩnȩ ucuocua'a ä̧ju̧cui̧nö̧jä̧, ja̧'hua̧nö̧tä̧ u̧huo̧juȩta̧cu̧ pä'ö; pi̧jä̧nä̧ttö̧mä̧ ocurä rö̧a̧rä cuoa'atä topinä̧tö̧jä̧. chutä i̧huȩnȩ ocurä ucuoa'a kä̧tȩttö̧ ä̧ju̧cui̧nö̧jä̧, ³⁷ Juhua'amä cu̧tä̧mö̧ mi̧nä̧rö̧ rö̧ȩnä̧ repeina̧'a̧ttö̧, jahuätöttö yo'ähui'inä̧tö̧rö̧mä̧ pojopö ȩmi̧nä̧u̧jä̧, ja̧'hua̧nö̧ ja̧'a̧ttö̧ Egipto rȩjȩttö̧mä̧ chutä ujuru rö̧ä̧u̧nä̧tä̧ rä'epö icu inö̧. ³⁸ Ucutu cuä'ca jo̧mȩttö̧ ttö̧ja̧ recuätö tti̧rȩjä̧ tä̧mö̧rö̧, ja̧'hua̧ta̧'a̧nö̧ ucututtu'i̧nä̧ abonä̧nö̧ ttujuru ku̧nä̧rä̧tö̧rö̧, jitä mo̧ro̧ pärocuä̧jä̧nä̧ cui̧rȩjä̧tu̧cu̧ päi'önä̧ cu̧jä̧mä̧dä̧tu̧cua̧ pä'ö. ³⁹ Ja̧'hua̧nö̧ ja̧'a̧ttö̧ jitä mo̧ro̧mä̧ cu̧huo̧jua̧ pä'ö ja̧'a̧, juhua'atäcu cuni̧chi'ä, TÖ̧Ä̧NÄ̧HUA̧MÄ̧ Diostä ja̧'a̧, mo̧ro̧jä̧'i̧nä̧ pi̧jä̧'i̧nä̧ u̧ru̧hua̧mä̧, ka̧ra̧mä̧ toa'a ja̧u̧ jö̧'a̧nö̧ hua̧mä̧. ⁴⁰ Jȩ'cua̧ pä'ö hueinömä 'quiyönä 'chu̧cuä̧rä̧cuä̧hua̧jä̧ ja̧'hua̧ta̧'a̧nö̧ hueähuä huȩnȩ'inä, adihuomenä cui̧'chä̧cua̧'a̧nö̧, ucu cuo'ca'a päi'omenä cui̧tti̧mö̧'inä tti̧'chä̧cua̧'a̧nö̧, ja̧'hua̧ta̧'a̧nö̧ recuo a̧'ȩ TÖ̧Ä̧NÄ̧HUA̧ cui̧rȩjä̧ päi'önä i̧yä̧jä̧nä̧mä̧ cuä'opönä̧ cu̧jä̧tu̧cua̧'a̧nö̧. ⁴¹ Ja̧u̧nu̧ o'ca'a, Moisés huäbodäcuä ötähuiyä jo̧mȩ pojopinö Jordanttömä kä̧hua̧ räopa'acuttu, ⁴² juȩnȩ ji̧na̧'a̧ ttö̧jä̧ suronä jȩpo̧co̧tö̧rö̧'i̧nä̧ cuä'äu ticuinome, ä̧cuo̧mȩnä̧ ttaboiyotö jo̧ca̧'a̧nä̧'i̧nä̧; da̧ja̧huä̧chä̧rö̧ kä̧nä̧ pi̧yȩ ötahuiyänä, ja̧'hua̧nö̧ jȩpö̧tä̧ ko̧cui̧pä̧ri̧nä̧tö̧. ⁴³ Pi̧yȩ ji̧na̧'a̧: De'a jui̧yä̧jä̧ Besser, meje'quiyu ötahuiyä, Rubén ahuruhä isotä ji̧na̧'a̧; Ramot en Galaad, Gad ttö̧ja̧ ji̧na̧'a̧; ja̧'hua̧ta̧'a̧nö̧ Golán en Basán, Manas ttö̧ja̧ ttö̧jo̧cuo̧mȩ ji̧na̧'a̧. ⁴⁴ Pi̧yȩ ji̧na̧'a̧ hue'ähuä huȩnȩ Moisés Israel ttö̧ja̧rö̧ iyinömä; ⁴⁵ pi̧yȩ ji̧na̧'a̧ esecuinö hue'ähuämä, koro hue'ähuä'inä ucuocuinämä Israél ttö̧ja̧rö̧ Egirtottö ra'epö icuinöji̧nö̧. ⁴⁶ Jordánttö kä̧hua̧ räopa'acuttu ttö̧jo̧cuo̧mȩnä̧, Bet-Peor pa̧tȩcuä̧nö̧ pämäroppänä, Sehon i̧rȩjä̧cu̧, Amorreo ttö̧ja̧ ttu̧ru̧hua̧, Hebrón ötahuiyänä ki̧nö̧ ji̧na̧'a̧, Moisés ja̧'hua̧ta̧'a̧nö̧ Israél ttö̧ja̧cu̧ rohuäu tticuinäcu̧ pinö ji̧na̧'a̧ Egiptottö rättopinö. ⁴⁷ Jahuätömä iti̧rȩjä̧ päi'önä eminätö juȩnȩ rȩjȩ, ja̧'hua̧ta̧'a̧nö̧ Basán ru̧hua̧ Og i̧rȩjä̧'i̧nä̧. Pitömä, amorreottö tta̧ju̧ ruhuotö ji̧na̧'a̧, ko̧cui̧nä̧tö̧ yabonänö Jordán aje päcuodotönä jä̧hua̧ räopa'acunä. ⁴⁸ Juȩnȩ rȩjȩmä̧ ji̧na̧'a̧ Aroerttö kä̧mä̧dö̧, Arnón muä'quiyu pämäroppä jäyänä, Sion de'a jubu (Hermón de'ä), ⁴⁹ o'cajuiyönätä Jordán aje jäyotonä de'a pämäroppa jo̧mȩ, Jordán yabonä, Arabá dä'ähuoto, Pisga de'a kada'ca jubu.