¹ Ja̧u̧nu̧ o'ca'amä ppa̧'a̧chi̧nä̧ttö̧jä̧ ja̧'hua̧nö̧ jä̧ji̧ o'ca'a 'chi̧nä̧tö̧jä̧ Basánra̧'a̧cu̧. Og, Basán ru̧hua̧ ichi'ö örohuähuinä̧u̧jä̧, ja̧u̧tä̧ umucuäyotö o'catoi'önä̧cu̧ örohuahua pä'ö Edrei ötahuiyättö. ² TÖ̧Ä̧NÄ̧HUA̧ ttörö pä'inö: "Yecuecuä; TTÖTÄ ji̧nä̧'a̧ ja̧u̧ru̧ iso juohuepa päö iyinömä ja̧hua̧ jö̧ta̧'a̧nö̧ chiyinäcu̧jä̧ umuhuäyotö o'catoi'önärö ja̧'hua̧tä̧'a̧nö̧ i̧rȩjä̧'i̧nä̧ ucutä huecua pä'ö. Sehónrö̧ jȩcu̧'i̧nö̧ta̧'a̧nö̧ jȩ'cua̧rö̧já̧, Amorreos ru̧hua̧rö̧'i̧nä̧, Hesbón'nä kinö pinörö.'' ³ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Diostä iyinäu̧jä̧ iso juotepapä'ö Basán rȩjȩ ru̧hua̧ Ogrömä, ja̧'hua̧ jö̧ta̧'a̧nö̧ o'catoi'önä umuhuäyotörö'inä ujutu tu̧mu̧nä̧tä̧ iyinä̧u̧jä̧. Ja̧'hua̧nö̧ ja̧'a̧ttö̧ ya̧tȩ'i̧nä̧ ö̧ji̧pu̧ ju̧iyönä cuä'ö tihuinä̧u̧. ⁴ Ja̧u̧nu̧ pänämä ttötahuiyä o'cajuiyönä 'cho̧tipinä̧u̧; yaute ötahuiyä'inä ki̧'i̧pu̧ juiyönä̧tä̧ 'chotipinä̧u̧: sesenta ötahuiyä jo̧mȩ Argob rȩjȩttö̧mä o'cajuiyönätä̧, Basán ru̧hua̧ Og hueomȩttö̧'i̧nä̧. ⁵ Pi̧yȩ ji̧na̧'a̧ ötahuiyä ttöecuinömä ju'toju jä'ca ttoecuä'canä, apatiyä ttoecuä o̧na̧'i̧nä̧; Ja̧u̧ ötahuiyämä ttöecuocö ötahuiyä ppeya ko̧cui̧na̧'a̧. ⁶ Ujutu o'cajuiyönä si'epö ticuinö ja̧u̧mä̧, Hesbón ru̧hua̧ Sehón'rö̧ jȩti̧nö̧ ta̧'a̧nö̧, ötahuiyä jö̧mö̧ ya'atecutä si'epö ticuinö; u̧mä̧tö̧rö̧'i̧nä̧, nä̧tö̧rö̧'i̧nä̧ ja̧'hua̧ta̧'a̧nö̧ ppo̧'ä̧tö̧rö̧'i̧nä̧. ⁷ Ja̧'hua̧nö̧ ja̧'a̧nä̧ pä̧ca̧yö̧rö̧ ja̧'hua̧ta̧'a̧nö̧ ötahuiyättö micuäunä ko̧cu̧'i̧nä̧, tiäre päi'önä ȩmi̧nä̧tö̧jä̧. ⁸ Ja̧u̧nu̧ pä̧nä̧ ji̧nö̧mä̧ Amorreos ta̧ju̧ ruhuotö ttu̧mu̧tö̧ 'cho'ipinä̧tö̧jä̧ rȩjȩmä, ja'huätömä ko̧cui̧nä̧tö̧ Jordán yabonä, Arnón de'iyuttu kä̧mä̧dö̧ Hermón de'a jubu cä'ädö. ⁹ (Hermón de'amä Sidoniomä pä'inätö Sirión, ja̧'hua̧ta̧'a̧nö̧ Amorreomä pä'inätö Senir) ¹⁰ Jua'a de'iyunä ko̧cu̧ ötahuiyänä o'cajuiyönä, o'cajuiyönä Galaad muä'quiyu'inä ja̧'hua̧ta̧'a̧nö̧ Basán muä'quiyu'inä, o'cajuiyönä maniyä̧ Salca ja̧'hua̧ta̧'a̧nö̧ Edrei jubu, Og ru̧hua̧ hueome Basán ötahuiyä'inä." ¹¹ Dä̧ pe'ö Refaimnä tti̧ji̧pi̧na̧'a̧ttö̧ ttö̧ja̧ tä̧mu̧mä̧, Basán Og reytä ki̧nö̧mä̧ katätä. Ä̧ju̧cua̧tu̧cui̧. Cuoräucä ji̧na'a̧ ä̧ä̧ma ca̧mamä. Ä̧ä̧ma ca̧mamä ko̧ca̧'a̧nä̧a̧ Rabánämä, Amón ahuaruhuä i'cotö ttö̧jo̧memä̧? iotomä ji̧na̧'a̧ cuatro y medio ja̧'hua̧ta̧'a̧nö̧ icähuemä dos metro jo̧menä, pä̧jä̧ti̧nätö̧. ¹² Juo̧nö̧ pänä ȩmi̧nä̧tö̧jä̧ pi̧jä̧ rȩjȩ́mä, Aroer ötahuiyämä, Arnón muä̧tȩtȩ ju̧o̧'cacu ki̧ i̧pa̧'a̧ ja̧'hua̧ta̧'a̧nö̧ ttö̧ja̧cu̧ ötahuiyä mu̧ä̧'qui̧yu Galaad kä'cobu. Ttö iyinösä̧ Rubenitas ttö̧ja̧rö̧ ja̧'hua̧ta̧'a̧nö̧ Gaditas ttö̧ja̧rö̧. ¹³ Ja̧'hua̧nö̧ ja̧'a̧ttö̧ Galaadttö ka̧cui̧pi̧nö ja̧'hua̧ta̧'a̧nö̧ o'cajuiyönä Basánttö̧'i̧nä̧ Og uruhuonätä̧, ttö iyinösä̧ Manasés ahuaruhuä ppaachätöttö: Argob rȩjȩ́ o'cajuiyönä ja̧'hua̧ta̧'a̧nö̧ o'cajuiyönä Basánttö̧'i̧nä̧. (Pi̧jä̧ ja̧a̧ chi̧rȩjä̧mä̧ rȩjȩmä̧ mi̧cuä̧jä̧ Refaim). ¹⁷ Kara'anä rȩjȩ ko̧ro̧jä̧cu̧ beipomemä Jordán aje meje'cattö pämäroppä päi'ime ji̧na̧'a̧, Cineret kä̧mä̧dö̧ rö̧ä̧ aje Arabá jubö ä'ädö (Juhuototä ja̧'a̧ dä'ähuotö sa̧dotomä) Pisga möä'ca kada'ca jubö kä̧hua̧ räopa'acunä. ¹⁸ Ttömä hue'inösä̧ ja̧u̧nu̧ pä̧nä̧mä̧ pa̧'a̧nö̧ pä'önö̧: TÖ̧Ä̧NÄ̧HUA̧ cu̧ä̧nä̧hua̧tu̧cu̧ Diosmä ja̧huä̧jä̧nä̧ do'ächi'ö cu̧jä̧mä̧dä̧tu̧cua̧ pä'ö iyinö̧; ucutu curä rohuähuäcuä ttö̧ja̧mä̧, cuahuaruhuätucu Israel ttö̧ja̧ ttä'ca jo̧mȩnä̧ curä rohuähuäcuähuä 'chu̧huä̧rä̧nö̧ 'cuäcuopäcuotöjä. ¹⁹ Ja̧'hua̧nö̧ ja̧'a̧nä̧ cui̧tti̧mö̧ ttä̧ju̧tu̧'inä, cui̧tti̧mö̧ ppo̧'ä̧tö̧'inä ja̧'hua̧ta̧'a̧nö̧ cuä̧ji̧mö̧tu̧cu̧ isotö'inä (Ajicuäcuähuotö recuätörö ku̧nä̧rä̧tö̧ pä'ömä huo̧jua̧sä̧) cuidepiyutucu chiyinome pönä̧tä̧ ttö̧ja̧cui̧'ä̧cuo̧tö̧, ²⁰ TÖ̧Ä̧NÄ̧HUA̧ cuahuaruhuätucu rohuähuö cä'ädö huȩnȩ juiyönä ttö̧jo̧mȩ jubö päi'önä̧, ucuturu jȩchi̧nö̧ta'anö, jahuätö'inä ja̧huä̧jä̧ TÖ̧Ä̧NÄ̧HUA̧ cu̧ä̧nä̧hua̧tu̧cu̧ Dios i̧yi̧näjä Jordán ajettömä kä̧hua̧ räopa'acunä kä̧jä̧nä̧ do'ächi'ö ttu̧jä̧mä̧do̧mȩ jubö päi'önä; ja̧u̧nu̧ o'ca'atä ucutumä o'catoi'önä ppa̧cuä̧chä̧tu̧cua̧jä̧, cui̧rȩjä̧tu̧cu̧ päi'önä chi̧yi̧nä̧jä̧ra̧'a̧cu̧mä̧. ²¹ Ttömä ja̧u̧nu̧ pä̧nä̧ Josuérömä̧ pa̧'a̧nö̧ pä'önö̧ hue'inö̧sä̧: ucumä o'cajuiyönä topinöjä TÖ̧Ä̧NÄ̧HUA̧ cu̧ä̧nä̧hua̧ Dios pitö ruhuotö ta̧ju̧ru̧ jȩi̧nö̧mä̧; TÖ̧Ä̧NÄ̧HUA̧MÄ̧ ruhuo hue'ätö o'catoi'önärö cu̧huä̧mȩnä̧ 'cu̧öuä'o'ätörömä ja̧'hua̧nö̧tä̧ jȩä̧cua̧. ²² Jahuätörömä jecuecuó, juhua'amä TÖ̧Ä̧NÄ̧HUA̧ cu̧ ä̧nä̧hua̧ Diosmä ucuru ppä'ädö urohuähuäcua'attö." ²³ CHÖ̧Ä̧NÄ̧HUA̧RÖ̧ jä̧'ȩpä̧ri̧nö̧sä̧ ja̧u̧nu̧ pä̧nä̧mä̧ pa̧'a̧nö̧ pä'ö: ²⁴ "CHÖ̧Ä̧NÄ̧HUA̧, ucumä cu̧mu̧huä̧ya̧rö̧ cu̧huo̧juȩta̧ pä'ö kä̧mä̧dö̧jä̧ ucutä cu̧rö̧ä̧ ja̧'hua̧ta̧nö̧ cujuru; tta̧'a̧nö̧ pä'ö, ¿ka̧ra̧ diosma toa'a mo̧ro̧jä̧ra̧'a̧'i̧nä̧ pi̧jä̧nä̧'i̧nä̧ ucu jȩ'cua̧'a̧nö̧ jȩpö̧mä̧ ja̧'hua̧ta̧'a̧nä̧ ju̧ru̧hua̧mä̧? ²⁵ Jua'a chi̧'cha̧ hue'ittö, jä̧dȩpä̧rä̧cu̧jä̧, Jordán yabonä rȩjȩ öadihuä tocha, jua'amä muä'quiyu'inä adihua'a ja̧'hua̧ta̧'a̧nö̧ Libano'inä". ²⁶ Ja̧'hua̧nö̧ ja̧'a̧nä̧ CHÖ̧Ä̧NÄ̧HUA̧MÄ ttörö amisurunä jä̧cu̧ ucutu soronä jȩcu̧'ä̧tu̧cua̧'a̧ttö̧; Ja̧u̧ ttörömä ä̧ju̧cuo̧cö̧. CHÖ̧Ä̧NÄ̧HUA̧ päinäcu̧sä̧: "Ja̧'a̧tä̧ topi ucurumä rö̧ä̧nä̧ ja̧'a̧, ttörömä cucuocuä ja̧u̧ huȩnȩmä̧: ²⁷ Pisga muä'cara̧'a̧tä̧ 'cha'achi jua'atä kä̧nö̧ topi kä̧hua̧ maä'ächa̧'a̧cu̧'i̧nä̧, räopa'acu'inä, u̧huo̧jua̧'a̧cu̧'i̧nä̧ ja̧'hua̧ta̧'a̧nö̧ ieruhua'acu'inä; o'cajuiyönä topi, Jordán yabocumä 'cuä'opocö cuä̧cua̧jä̧. ²⁸ Ja̧u̧ i̧'chä̧cua̧'a̧ ji̧no̧mȩmä̧, Josué huo̧juȩti̧ ujuru'inä iyirö, ja̧u̧ jä̧cua̧'a̧ jahuätö ttä'canä i̧'chä̧cua̧mä̧ ja̧'hua̧ta̧'a̧nö̧ ja̧u̧tyä̧ jä̧cua̧'a̧ o̧i̧pöä̧cua̧mä̧ tti̧rȩjä̧ ttȩma̧ pä'ömä. ²⁹ Ja̧'hua̧ta̧'a̧nö̧ ujutumä ko̧cui̧nä̧tö̧jä̧ Bet-Peor muä'quiyu pä̧tȩcuä̧nö̧.