¹ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS cu̧jä̧tu̧cua̧ pä'ö i̧yä̧jä̧nä̧ 'coru juo'ächäjirö ya̧tȩ ö̧'o̧cui̧'ö̧ttö̧mä̧, cuähuä ka̧cuo̧mȩ säbucänö ö̧'a̧'a̧ ja̧'hua̧ta̧'a̧nö̧ ja̧u̧rö̧ cuä'ö icuäjirömä jeruhua'anä; ² ja̧'hua̧nö̧ jö̧ttö̧mä̧ ucutu ttö̧ja̧ tturuhuotömä̧ ja̧'hua̧ta̧'a̧nö̧ röji pä'ö icuähuä ttö̧ja̧mä̧ räcuopätucua pä'ö ja̧'a̧, cuä'ö tticuäcu ö̧'o̧mȩ jäyättö kä̧mä̧dö̧ ötahuiyä jubö öoto cu̧'a̧tä̧tu̧cua̧ pä'ö. ³ Ja̧'hua̧nö̧ ja̧'a̧ ötahuiyä ttö̧ja̧ tturuhuotö 'corujuo'ächäji ö̧'o̧mȩ tö'cönä̧nö̧ ka̧cuä̧tö̧mä̧, ttä̧ji̧mö̧ ji̧nä̧ yo̧mȩtȩ ka̧cuä̧tö̧ttö̧ päcäyä isajuru ji̧nä̧ ttadipä'ö'i̧nä̧ nö'cähuocojuru ttȩma̧ pä'ö jä̧cua̧'a̧. ⁴ ja̧'hua̧nö̧ ja̧'a̧ rȩjȩ pämärächi'omȩ, aje i̧sä̧rä̧ joipoco̧rä̧ ro̧mȩcu̧ ja̧'hua̧ta̧'a̧nö̧ cuähuä'i̧nä̧ sa'u ku̧nä̧huo̧co̧mȩ ȩmi̧pö̧, juorötä jahuaju päcäyä isajurö̧mä̧ ku̧ru̧pä̧'quȩ meropö tticua pä'ötä jä̧cua̧'a̧. ⁵ Sacerdotes huotömä, Leví isotötä ja̧'a̧, ja̧'hua̧nö̧ ja̧'a̧ttö̧ jahuätö ttö̧jo̧cua̧'a̧cu̧ tti̧'chö'a̧nö̧ ja̧'a̧ TÖ̧Ä̧NÄ̧HUA̧ DIOSTÄ ȩmi̧nä̧u̧ ja̧'a̧ttö̧ ppättäda pä'ö ja̧'hua̧ta̧'a̧nö̧ ttö̧ja̧rö̧'i̧nä̧ ppättäda'pä'ö TÖ̧Ä̧NÄ̧HUA̧ i̧mi̧nä̧; jahuätö jittäumä ä̧ju̧cua̧tu̧cui̧, ja'huättö pättömä mihuäunä ja̧hua̧'a̧ ja̧'hua̧ta̧nö̧ rohuä jo̧mȩnä̧'i̧nä̧ ro̧ttȩpä̧cuo̧ttö̧. ⁶ O'cato'inä ötahuiyättö ucuo tämu pä'iönä huotöttö 'corujuoächäji tö'cönä huotömä ja̧u̧ u̧mu̧ ttötö'cö'anö ja̧'a̧ päcäyä isaju muäyaju ku̧ru̧pä̧'cȩ merocuaju dea pämäroppättö. ⁷ ja̧'hua̧nö̧ ja̧'a̧ttö̧ jȩtta̧ pä'ötä ja̧'a̧ ja̧u̧mä̧ pä̧'a̧nö̧ pä'ö." Ujutu tu̧mu̧nä̧mä̧ poja ucuojamä cuerächoca'a, ujutu tiärenämä topu'inä topocottöjä. ⁸ Ro̧cuȩpä̧, CHÖ̧Ä̧NÄ̧HUA̧, cu̧mu̧huäyotö Israél ttö̧jä̧rö̧mä̧, ucutä ppä̧cuä̧di̧nä̧u̧ru̧mä̧, ja'huätötä chu̧mu̧huäyotö Israél ttö̧ja̧tä̧ ja̧'a̧ suronä'inä jȩpo̧co̧tö̧rö̧ cuä'äu icuätömä pä'ö'inä päcuä". ⁹ Ja̧'hua̧nö̧ jo̧mȩnä̧tä̧ ro̧'ȩpo̧cö̧ jä̧cua̧ suronä'inä jȩpo̧co̧tö̧rö̧ cuä'äu icuäja'atörömä. Ja̧'hua̧nö̧ ja̧'a̧ttö̧ ro̧'ȩpo̧cö̧ jä̧cua̧ u̧mu̧huäyotö Israél ttö̧ja̧rö̧mä ucu jäcuepa'attö, TÖ̧Ä̧NÄ̧HUA̧ to̧ä̧ro̧mȩttö̧ jäyä jȩcu̧'o̧mȩnä̧mä̧. ¹⁰ Cuabo iyotucu curohuähua pä'ö räcuopomenä CU̧Ä̧NÄ̧HUA̧ Diostä ja̧'a̧ iso juocuepönä ppä'ädömä ucunätä juȩpä̧ra̧'a̧ttö̧, ja̧'hua̧nö̧ ucutä cuȩpä̧cua̧jä̧ jahuätörö koromecu̧, ¹¹ korome cuȩpä̧u̧ttu̧ isaju adihuajuru tocu'uttumä ja̧'hua̧nö̧ jo̧mȩnä̧ jahuäjuru pä̧huä̧ tocu'uttumä cuirecua päi'önä cuȩmä̧ päcuttu, ¹² ja̧'hua̧nö̧ jö̧ttö̧mä̧ cuojusodera̧'a̧cu̧ cuȩpä̧cua̧jä̧; jahuäjumä kuhuä'che 'cui'äu icu ja̧'hua̧ta̧'a̧nö̧ kö̧na̧ji̧yä̧'i̧nä̧ 'cui'äu kicuäcuaju. ¹³ Ja̧'hua̧ta̧no̧ juajumä̧ 'ku̧'cä̧tä̧cuä̧ta̧ 'ca̧tä̧huä̧ta̧ 'ka̧'a̧di̧cu̧ 'carenärä̧ tȩmi̧pi̧nä̧cua̧ ja̧'hua̧ta̧nö̧ juajuamä̧ juȩnä̧tä̧ isodȩnä̧ kä̧nö̧ 'cä̧cua̧ ya̧tȩ jo̧mȩnä̧ aja'cu ku̧ja̧ pä'ö ja̧'a̧ ka'oröinä kä̧'u̧rö̧i̧nä̧. Pi̧yȩ cuä'opu o'ca'amä̧ ucumä̧ cuä'a pä'ö ja̧'a̧ jua'ajucumä̧ ja̧'hua̧'a̧nö̧ ja̧'a̧ttö̧ kirecuo cuä pä'ö ja̧'a̧, ja̧'hua̧ta̧nö̧ juäjumä̧ curecua 'kacuäju. ¹⁴ Ja̧'hua̧'a̧nö̧ ja̧'a̧nä̧ juajuru cuju'coca'aö̧ttö̧mä̧, ja̧'atä topiju ki̧cha̧ päjome ki̧'cha̧nä̧, ja̧'hua̧'a̧nö̧ jo̧ttö̧mä̧ yorisotä pärätänäi'nä̧ micuä pä'öinä̧ iyäcuo'coju, ja̧'hua̧ta̧nö̧ a̧mä̧'co̧nä̧ huȩrö̧ hueähuäjunä̧'ä̧ jȩcuä̧ju̧, jua'amä cuhuoto'ca'a jȩcua̧'a̧ttö̧. ¹⁵ ya̧tȩ ubo i̧rȩcua̧mö̧ ta̧ju̧rö̧ ku̧ ja̧'hua̧ta̧'a̧nö̧ yajuterömä̧ repea'anä karäjurömä̧ repeo'canä̧, ja̧'hua̧ta̧nö̧ repeäcuattöi'nä i̧tti̧cua̧'a̧dä̧, ja̧'hua̧ta̧'a̧nö̧ karäjuttöi'nä abonä̧nö̧ rö̧ȩi̧nä̧ repeäcua irecua, karaju irecua reo'cocuättö i̧tti̧cui̧nö̧ ä̧huo̧mȩnä̧ i̧tti̧rö̧mä̧ juajumä̧ repeo'cocuä tö i̧tti̧ ji̧na̧'a̧, ¹⁶ ja̧'hua̧'a̧nö̧ ja̧'a̧ ji̧yȩtȩ mo̧rö̧ i̧rȩja̧ i̧yä'chu mo̧rö̧ päi'omenä̧ ja̧u̧mä̧ irecua ri̧ȩnä̧ reäcuätö i̧tti̧rö̧mä̧ ichujuiyunä jä̧cua̧'a̧ jua'amä̧ ä̧cuo̧mȩnä̧ i̧tti̧mä̧ repeo'cocuä'attö i̧tti̧ ja̧'a̧ttö̧, isopäi'önätä jua̧'a̧u̧tä̧ ja̧'a̧ttö̧ ä̧cuo̧mȩnä̧ i̧tti̧mä̧. ¹⁷ ja̧u̧mä̧ i̧tti̧ ö̧nä̧tä̧ jȩa̧ pä'ö jä̧cuä̧'a̧ irecuä repeo'cocuätö i̧tti̧rö̧mä̧ , u̧huȩi̧'i̧nä̧ todäre jo̧mȩnä̧ iya pä'ö ja̧hua̧'a̧ jua'amä i'äre päi'önä̧ iyähuina'a̧ttö̧; ja̧u̧mä̧ ja̧u̧ ttö̧jo̧sä̧ i̧tti̧ ö̧nä̧ i̧jȩcuä̧chä̧ttö̧; ja̧u̧mä̧ ö̧ji̧pä̧ pä'ö ja̧'a̧ttö̧ a̧huo̧mȩnä̧ i̧sä̧ ja̧'a̧ttö̧. ¹⁸ Ya̧tȩ i̧tti̧rö̧ cu̧nä̧rö̧ juiyó jarodörö jä'orö'inä ja̧ju̧ru̧'i̧nä̧ eseto'cö pättö'inä ä̧ju̧cua̧ pä'ocö, ja̧'hua̧ta̧nö̧ ro̧ȩpu̧ jittäcua'anä'inä ä̧ju̧cua̧ pä'ocö jahuätörömä. ¹⁹ Ja̧'hua̧nö̧ jö̧ttö̧mä̧ jä'oinä ja̧ju̧'i̧nä̧mä̧ chuä'dö ttȩpu̧'a̧nö̧ ja̧'a̧ u̧mi̧cu̧tä̧ ötahuiyättö ucuo tä̧mu̧ ttä̧'ca̧ jo̧mȩcu̧ ja̧'hua̧ta̧nö̧ ötahuiyä apate doächäcuäcuomȩcu̧. ²⁰ Jahuätömä ötahuiyä ttö̧ja̧ tturuhuotörö jittähua pä'ö jä̧cua̧'a̧: "Pide ti̧tti̧mä̧ ami 'qui'ädäcuäu ra̧huä̧rö̧; ja̧u̧mä jitäu'inä ucuotocö; ja̧u̧mä̧ u̧cuä̧'inä rö̧ä̧nä̧ cu ja̧'hua̧ta̧'a̧nö̧ tä̧'ä̧mä̧chö̧." ²¹ Ja̧'hua̧nö̧ hua̧rö̧mä̧ ötahuiyä ttö̧ja̧ o'catoi'önä 'corupäi'ome jubö inädönä icuäu tti̧cuä̧cua̧, ja̧'hua̧nö̧ jȩpö̧tä̧ ucumä suropätörömä si'epö cuicuäcua̧jä̧. O'catoi'önä Israel ttö̧ja̧ pi̧yȩ ä̧ju̧cu̧mä̧, yettecuäcuotö. ²² Ya̧tȩ ttö̧ja̧sa̧ rö̧ä̧nä̧ surojö jȩpö̧rö̧mä̧, cuä'ö tticua pä'ötä jä̧cua̧, daunä ti̧'ä̧dö̧ rö̧nö̧tä̧, ²³ ja̧'hua̧nö̧ ja̧'a̧ ja̧u̧mä̧ yodo 'cuäo'önä daunä ti̧'ä̧dä̧cuö̧hua̧'a̧mä̧ o'ca jähuäömä ro̧ca̧'a̧ jä̧cua̧'a̧. Ja̧'hua̧nö̧ ra̧ju̧ jueimä ji̧yȩtȩ mo̧ro̧tä̧ 'turu cuicuajá; ja̧'hua̧nö̧ daunä ti̧'ä̧dö̧ ru̧nä̧huo̧tö̧mä̧ Dios suronätä 'cuäopatöjä̧ päinäu̧ ja̧'a̧, pi̧yȩ hueähuä huȩnȩmä̧ ucuoti, pa̧'a̧nö̧ jȩpö̧tä̧ TÖ̧Ä̧NÄ̧HUA̧ CU̧Ä̧NÄ̧HUA̧ DIOS cui̧rȩjä̧ päi'önä i̧yä̧jä̧mä̧ surojuo'epocö jä̧cua̧jä̧.