¹ Cua̧hua̧ru̧hua̧ Israel ttö̧ja̧sa̧ äji päcäyäröcö̧, ovejacö̧, re'tehuächö pe'ächächörömä, to'cuoca'a jȩpö̧mä̧ yabonö otomä cui̧'chä̧; ucumä ppa̧'a̧dö̧ cuiya pä'ötä ja̧'a̧ u̧ri̧hua̧rö̧mä̧. ² Cua̧hua̧ru̧hua̧ Israel ttö̧ja̧sa̧ tö'cönä̧nö̧ ö̧jo̧ca̧'a̧ jö̧ttö̧cö̧, cuieruhuäcu jö̧ttö̧cö̧, ja̧'hua̧nö̧ jö̧ttö̧mä̧ ja̧u̧ i̧sa̧rö̧mä̧ cuojusodera̧'a̧ cuȩpa̧ pä'ötä ja̧'a̧, ja̧u̧mä̧ cu̧ju̧nä̧ra̧rö̧jä̧, ucu ku̧nä̧rö̧rö̧ topö ichome jubö päi'önä, ja̧'hua̧nö̧ jo̧mȩnä̧ ja̧u̧ i̧sa̧rö̧mä̧ u̧ru̧hua̧rö̧tä̧ ppa̧cuä̧da̧jä. ³ Ja̧'hua̧ta̧'a̧nö̧tä̧ jȩ'cua̧jä̧ aji buröba̧rö̧'inä, ttö̧'ca̧tä̧huä̧ti̧yu̧'inä, ja̧'hua̧ta̧'nö̧tä̧ jȩ'cua̧jä̧ cua̧hua̧ru̧hua̧ Israel ttö̧ja̧sa̧ öäre toe'ächäji, ucu cu̧'o̧cui̧'ä̧ji̧mä̧; cuamönä cuiäretä päi'önämä dajumä cuicuä. ⁴ Cua̧hua̧ru̧hua̧ Israel ttö̧ja̧sa̧ äji buröba̧cö̧, päcäyäcö̧ mä̧nä̧ kä'co ma̧ä̧mä̧ji̧rö̧ to'cuomenämä, ja̧'hua̧ta̧'a̧nö̧ ja̧u̧ i̧sa̧rö̧ to'cuoca'a jȩpö̧mä̧ yabonö otomä cui̧'chä̧; ucumä isopäi'önä̧tä̧ pä'äjita'anö äräbe'ö ppäcuäda pä'ötä hua̧jä̧. ⁵ Isajumä kö̧'ca̧tä̧u̧juiyö'anö ja̧'a̧ ubo ö̧'ca̧tä̧u̧'a̧nö̧ jö̧mä̧, ja̧'hua̧ta̧'a̧nö̧ ubo'inä isaju kö̧'ca̧tä̧huä̧ta̧mä̧ ö̧'ca̧tä̧u̧juiyö'anö ja̧'a̧; pi̧yȩttö̧ ji̧yȩtȩ jȩpö̧mä̧ TÖ̧Ä̧NÄ̧HUA̧ DIOS ä'cajomettö̧ suronä jȩpö̧tä̧ hua̧. ⁶ Pa'anö 'cuäopöttömä ppiyuhuä iädu mänänä cui̧'cho̧mȩnä̧ pö̧ttö̧mä̧, jite daunä'cö̧ ja̧'hua̧nö̧ jö̧ juiyöttömä rȩjȩ'cö̧, isotö ja̧'a̧cö̧ ji̧nö̧ oyä ja̧'a̧cö̧, sisotö ja̧'a̧ ki̧dȩä̧hua̧'a̧cö̧ ji̧nä̧ oyä ja'a ki̧dȩä̧hua̧'a̧cö̧, cuȩpö̧ juiyö'anö ja̧'a̧ i̧so̧tä̧ ppä̧'ä̧ttö̧ tta̧ju̧cu̧mä̧. ⁷ Isopäi'onätä ppi̧yu̧ ppo̧'ä̧ttö̧ tta̧ju̧ru̧mä̧ ttȩpö̧ juiyö'anö̧ ja̧'a̧. Pi̧yȩ hueähuä huȩnȩ pä'öta'nö jȩpö̧ kä̧hui̧ adiunä cu̧jä̧cua̧'a̧nö̧, recuo mo̧ro̧nä̧nö̧ cu̧jä̧cua̧'a̧nö̧. ⁸ Cuojusode jareode cuaditomenämä, cua̧di̧tä̧cua̧jö̧ ju'toju i̧sä̧jä̧nä̧mä̧ ttö̧ȩpäräbä kö̧nu̧ jua'amä cuojusodenä surojö huȩnȩ icha'acu ya̧tȩ ju'tojuttu ma'o̧mȩnä̧. ⁹ U̧huä̧ju̧ todärenä jö̧mä̧ cu̧ju̧nä̧ cui'ättä uva pättänämä, ja̧u̧ u̧huä̧ju̧ surojuoepa'acu tö̧ä̧nä̧hua̧ttö̧ surojö juiyome, u̧huä̧ju̧ ucu cu̧ju̧nä̧ji̧ ja̧'hua̧ta̧'nä̧ adiunä 'cha̧ pä'ö cu̧ju̧nä̧hu̧p uva. ¹⁰ Rȩjȩ sa'ä ttaditö juiyö'anö päcäyäcu ja̧'hua̧ta̧'nö̧ buröcu'inä. ¹¹ Cu̧'ca̧tä̧u̧juiyö'anö ja̧'a̧ i̧sa̧ uhuo'che cuä̧hua̧ jä'chettö adicua'amä ja̧'hua̧ta̧'nä̧ lino i̧sä̧ta̧cu̧ yoräteunämä. ¹² Pa̧ja̧cuä̧nö̧ ö̧yö̧'ca̧ri̧ jo̧mȩt tta̧'cua̧ta̧'a̧nö̧ ja̧'a̧ ucutä cu̧'ca̧ta̧huä̧pittö. ¹³ Ya̧tȩ irecuarö ȩmi̧pi̧'ca̧ jahuäjucu ä'a'a jä̧'i̧nö̧'a̧nö̧ jö̧nä̧, ja̧'hua̧nö̧ jö̧'o'ca̧'a̧ öjö'cö juiyönä topu, ¹⁴ ja̧'hua̧nö̧ jö̧'o'ca'amä dä̧'ä̧rö̧jö̧nä̧ jö̧tä̧ pä'ächö ucuocu jahuäjuru suronä̧ta̧ ja̧' pä'ö, ja̧'hua̧nö̧ ja̧'a̧ttö̧ pä'ö: "Ttö pajuru ȩmi̧nö̧sä̧, ja̧'hua̧nö̧ ja̧'a̧nä̧ jahuäjucu cha'amȩnä̧mä̧, tä'cö uborömä jerupoju pinä̧ju̧. ¹⁵ Ja̧u̧nu̧ o'ca'a ji'quichajuaju kä'o'inä ka̧ji̧'i̧nä̧mö̧ ttȩpä̧cuo̧to̧ iso päi'önä ubocu 'cuä'opocoju ka pä'ö tä̧mö̧ ttä'ca jo̧mȩ ötahuiyä apate ä'ca. ^{16 17} Ji'quichahuaju kä'omä tä̧mö̧ ttä'cajo̧mȩ ji̧ä̧huä̧cua̧: "Ttömä chittijuru iyinösä̧ pide ubo irecua päi'önä, ja̧'hu̧a̧nö̧ ja̧'a̧nä̧ ja̧u̧mä̧ jahuäjuru kö'cocö ja̧'a̧. Topätucui, ja̧u̧mä̧ surojönätä̧ huä̧nȩtä̧ pä'äji pa̧'a̧nö̧: "Ttö̧mä̧ po̧cui̧po̧cö̧ pajisä cuittijunämä̧ uborö jerupaju a̧'cua̧rö̧nä̧mä̧." Ja̧'hua̧nö̧ jo̧mȩnä̧ ja'huatömä kö̧'ca̧tä̧huä̧tä̧ te'ädö ttiö̧i̧jȩpä̧cuo̧tä̧ ötahuiyä ttö̧ja̧ ttä̧mö̧ ttä'cajo̧mȩ. ¹⁸ Ötahuiyä ttö̧ja̧ tturuhuotömä ja̧u̧ ttö̧ja̧sa̧rö̧mä̧ ȩpi̧'i̧pö̧, ro̧ttȩpä̧cuo̧tö̧; ¹⁹ ja̧'hua̧ta̧'a̧nö̧ ja̧u̧rö̧mä̧ pärätämä cien o̧bi̧ imitönä̧ jä̧ttȩpä̧cua̧, ja̧u̧ jättepömä ji'quichahuaju kä'orö iyähuäcua'a, juhua'amä ja̧u̧ ubomä Israel ttö̧ja̧ttö̧ uborö jerupajurö suropaju pä'ö Israel ttö̧ja̧ tta̧mö̧cuädönä jȩä̧jo̧mȩttö̧. Jahuäjumä irecua päi'önätä käcuaju; ji̧nä̧ pi̧jä̧nä̧ ö̧jä̧i̧mä̧ jahuäjurumä jaroi'a pä'ömä jo̧ca̧'a̧ jä̧cua̧'a̧. ²⁰ Ja̧'hua̧nö̧ ja̧'a̧nä̧ ja̧u̧ ttucuocu huȩnȩmä̧ isopäi'önätä̧ jö̧ttö̧mä̧, jahuäju ji'quichahuajumä uborömä jerupajumä jo̧ca̧'a̧ pä'ö ttu̧huo̧jui̧pö̧ttö̧mä̧, ²¹ ja̧'hua̧nö̧ jo̧mȩnä̧, jahuäju ji'quichahuajurumä kä'o ojusode äpate ä'cacu tti'cächäcuaju, ja̧'hua̧nö̧ tti'cächa'amä ötahuiyä ttö̧ja̧ tturuhuotömä inädönä icuäu cuä'ö tticuäcuaju, juhua'amä Israel ttö̧ja̧ttö̧mä̧ dä'ärö̧jö̧ jȩjo̧mȩttö̧, kä'o ojusodenä kä̧nö̧ kidepä iyä'chäcuähuaju 'cua̧rö̧nä̧; ja̧'hua̧nö̧ jȩpö̧tö̧ ucututtö surojömä si'epö cuicuäcua̧jä̧. ²² Ya̧tȩrö̧ isaju kirecuo kä̧ju̧cu̧ ä'a'a ttö̧'o̧cui̧'ö̧ttö̧mä̧, jahuätömä ta̧ju̧ cuäyotö cuä'ö icuähuäcuotö, ubo ä'äjirö'inä ja̧'hua̧ta̧'a̧nö̧ isaju ä'äjuru'inä; ja̧'hua̧nö̧ jȩpö̧tä̧ ucututtö surojömä si'epö cui̧cuä̧cua̧jä̧. ²³ Yajute isaju uborö jerupaju ja̧'a̧, ka̧ra̧ ubo ö̧ja̧ju̧ pä'ö jä'epö u̧ju̧ni̧nä̧cua̧ kä̧ju̧rö̧, ya̧tȩ ötahuiyättö po̧cui̧pö̧, jahuäjucu ä'öttömä, ²⁴ ta̧ju̧ cuäyotö ötahuiyära̧'a̧cu̧ doächi'äcuähuomȩcu̧ ȩmi̧pö̧ 'coru pätti'önä inädönä icuäu icuätucuitö. Ji'quichahuajurumä inädönä icuäu tticua pä'ö ja̧'a̧, juhua'a ötahuiyänä kö̧ja̧'a̧nä̧ ppättädaju pä'ö huojocome jo̧mȩttö̧. Uborö'inä inädönä icuäu tticua pä'ö ja̧'a̧, juhua'a ippeyänä kö̧ irecuarö suronä jȩä̧jo̧mȩttö̧; ja̧'hua̧nö̧ jȩpö̧tä̧ ucututtö surojömä si'epö cuicuäcua̧jä̧. ²⁵ Ja̧'hua̧nö̧ ja̧'a̧nä̧ ya̧tȩ ka̧ra̧ irecua päi'önä jä'epö ku̧nä̧hua̧ju̧ru̧ de'attö pätecu, pä̧i̧cu̧nä̧ 'chu'ädö ja'huajucu ä'öttömä, ja̧'hua̧nö̧ jo̧mȩnä̧mä̧ ja'huäjucu ä'äjimä 'corujuoächa'anötä̧ ja̧'a̧. ²⁶ Ja̧'hua̧nö̧ ja̧'a̧nä̧ isajumä mȩ'ä̧huo̧co̧ju̧ chäcuaju; ja'huäju isajuru ja̧'hua̧nö̧ jä̧ji̧nä̧mä̧ cuä'ö tticua pä'ömä juiya'a. ja̧'hua̧nö̧ jä̧ji̧mä̧ pa̧'a̧nö̧ ja̧'a̧ ya̧tȩ ippeyanä ko̧ro̧ 'chä̧nö̧ cuä'ö icuäjijö'anö. ²⁷ Jua̧u̧mä̧ de'attö ö̧'o̧cui̧'i̧na̧'a̧ttö̧, ja'huäju jä'epö ku̧nä̧hua̧ju̧mä̧ ppättädaju pä'ö huopinäju̧, ja̧'hua̧nö̧ ja̧'a̧nä̧ ppä'ädätö to'ina'a̧. ²⁸ Ya̧tȩ uborö jerupajuru kirecuo jä̧cua̧rö̧'inä jä'epö ku̧nä̧huo̧co̧ju̧ru̧ ö̧'o̧cui̧'ö̧ttö̧mä̧, pä̧i̧cu̧nä̧ 'chu'ädö ja'huajucu ä'öttömä, ja̧'hua̧nö̧ 'cuäopäji korotö tu̧huo̧juä̧chi̧'ö̧ttö̧mä̧, ²⁹ Ja̧u̧ ja'hujucu ä'äjimä cincuentanö jo̧mȩ pärätä o̧bi̧ iya pä'ö ja̧'a̧ ja'huäju kä'orö, ja̧'hua̧nö̧ jo̧mȩnä̧ ja̧u̧ irecua päi'önätä̧ käcuaju. Ja̧u̧mä̧ jaropi'ö icuipö'inä jȩa̧ pä'ömä juiyäcua'a ka̧'cua̧ro̧mȩ jubu. ³⁰ Ya̧tȩ ubomä ȩmu̧jö̧'a̧nö̧ ja̧'a̧ jä'o irecuarö irecua päi'önämä; ja̧u̧mä̧ 'choipä juiyö'anö jä'ö ö'cähua pä'ö patecuochinömä.