¹ Levi ttö̧ja̧ sacerdote huotömä ja̧'hua̧ta̧'a̧nö̧ o'catoi'önä Levi isotöttö, Israel ttö̧ja̧ ttö̧jö̧nä̧rö̧mä̧ ji̧'qui̧cha̧nö̧'i̧nä̧ ttȩmi̧yä̧cuo̧tö̧; jahuätömä ucuränä köhuicu ttiyäjitä TÖ̧Ä̧NÄHUA̧RÖ̧ ttöcuäcuotö ttö̧jö̧nä̧rö̧ ttȩma̧'a̧ jä̧'i̧nö̧'a̧nö̧. ² Tta̧hua̧rö̧hua̧ ö̧jö̧nä̧rö̧ttö̧'i̧nä̧ ttȩmi̧yä̧cuo̧tö̧; ttö̧jö̧nä̧ra̧'a̧ päinö̧mä TÖ̧Ä̧NÄHUA̧TÄ̧ ja̧'a̧, chutä päinö ta̧'a̧nö̧. ³ Pi̧yȩ ja̧'a̧tó sacerdote ttahuaröhuä jȩtta̧ pe'ö jö̧mä̧, jahuätö köhuicu ttiya pä'ö kö̧mä̧, päcäyä jö̧ttö̧'i̧nä̧ ovejattö'inä: sacerdote u'upi'canä ttö̧huȩnä̧cuo̧tö̧, ta'are cue'ö tti'ä päcuäda'a jö̧ttö̧'i̧nä̧ ja̧'hua̧ta̧'a̧nö̧ u̧huä̧si̧yö̧ttö̧'i̧nä̧. ⁴ Cu̧ju̧nä̧hua̧ ä̧cuo̧mȩnä̧ ȩ'ö̧ obattö'inä vinottö'inä cui̧a̧dȩja ä̧cuo̧mȩnä̧ jähuättö'inä ja̧'hua̧ta̧'a̧nö̧ ä̧cuo̧mȩnä̧ oveja uhuo'chettö adicua'inä ttiya pä'ö ka̧'a̧. ⁵ ȩmú̧ ö̧jö̧ni̧nä̧u̧jä̧ CUI̧Ä̧NÄHUA̧TU̧CU̧ DIOS o'catoi'önä cuahuaruhuättö TÖ̧Ä̧NÄHUA̧ i̧mi̧nä̧ tta̧di̧tä̧ra̧ pä'ö, 'cuäopönä juo̧u̧tä̧ ja̧'hua̧ta̧'a̧nö̧ i̧tti̧mu̧cu̧tä̧. ⁶ Leví ahuaruhuättö ya̧tȩ ucu cuidepiyunä̧ ö̧jä̧'i̧jo̧mȩttö̧ israel ttö̧ja̧ o'catoi'önättö̧ räopächöttömä, ja̧'hua̧nö̧ rä'opächö amiso'qui o'cajuiyönä eseu jä̧cu̧mä̧ TÖ̧Ä̧NÄ̧HUA̧ pojopö u̧ju̧ni̧no̧mȩcu̧ i̧chä̧cua̧, ⁷ ja̧'hua̧nö̧ ja̧'a̧ ja̧u̧mä̧ TÖ̧Ä̧NÄ̧HUA̧ DIOS iminä päötä jȩpö̧ ö̧jä̧cua̧, ahuaruhuä ö̧jä̧hua̧tö̧ Leví i̧tti̧mö̧ 'cotö TÖ̧Ä̧NÄ̧HUA̧ ä'ca jo̧mȩ ka̧cuä̧tö̧. jȩttö̧'a̧cuä̧tä̧, ⁸ jahuätö ttucuta'anötä u̧cuä̧'inä, ttiyöttö'inä imicu̧nä̧ ichöttömä ttahuaruhuä ttiya pättinö̧ttö̧mä̧. ⁹ TÖ̧Ä̧NÄ̧HUA̧ DIOS cui̧rȩjä̧ päi'önä i̧yä̧jä̧nä̧ ichomenämä, korotö ttö̧ja̧ su̧ro̧tä̧cuä̧huä̧ jȩttö̧mä̧ jȩ'cu̧ juiya pä'ötä ja̧'a̧. ¹⁰ Ucututtömä ya̧tȩ'inä ö̧ja̧ pä'ö jo̧ca̧'a̧, ittijurucö̧ i̧tti̧rö̧cö̧ ocuränä ttujuhuiyarö pä'ö iyömä, 'cuä̧o̧pä̧cuȩ jiäcuähuä i̧sa̧'i̧nä̧ ö̧ja̧ pä'ömä jo̧ca̧'a̧, märipä i̧jȩcuä̧cu̧ ji'äu'inä, ttesehuähuächi'önä jȩpö̧'inä, märi'inä, ¹¹ märipä jähuänä jȩpä̧'chö̧'inä, corujuo'ächätucu ucuocu'inä, ja̧'hua̧ta̧'a̧nö̧ tta̧'cua̧rö̧ i̧sa̧cu̧ ucuocu'inä. ¹² Ya̧tȩ pi̧yȩ TÖ̧Ä̧NÄ̧HUA̧ u̧su̧ro̧tö̧ jȩpö̧römä̧; ja̧'hua̧nö̧ ja̧u̧ su̧ro̧tä̧cuä̧huä̧ jo̧mȩttö̧ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSMÄ ucutu cuä'catucuttömä kara'acu rä'epö icuinö. ¹³ Ucutumä ja̧u̧ surojömä jȩpo̧co̧tö̧ jö̧nä̧tä̧ cu̧jä̧tu̧cua̧ pä'ö ja̧'a̧ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ä'ca jo̧mȩttö̧mä̧. ¹⁴ Jahuätö ttö̧ja̧ rä'epö icuäcuotömä mä̧ri̧mö̧ jȩtö̧ ttö̧jö̧tä̧ ja̧'hua̧ta̧'a̧nö̧ 'cuä̧o̧pä̧cuȩ ji'ähuätörötä ä̧ju̧cuä̧tö̧ ja̧'a̧; ja̧'hua̧nö̧ ja̧'a̧nä̧ ucutumä TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSMÄ jȩ'cuä̧tu̧cua̧ pä'ömä huȩo̧co̧u̧ pinätöjä. ¹⁵ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSMÄ ya̧tȩ chutä päö ji'äurö ucututtö rä̧ȩpä̧cua̧, cui̧jä̧hua̧tö̧ttö̧ ya̧tȩrö̧, ttö'anö hua̧rö̧. Ja̧u̧ päömä cuä̧ju̧cuä̧tu̧cua̧ pä'ötä jä̧cua̧'a̧. ¹⁶ Pi̧yȩ ja̧'a̧ ucutu TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSRÖ jäcuepinä̧tu̧cu̧mä̧ Horeb möä'cattö ca̧ca̧cuä̧'cotö pä'inä̧tö̧jä̧: Porö yabocumä TÖ̧Ä̧NÄ̧HUA̧ DIOS i̧huȩnȩ ucuocumä tä̧ju̧cua̧ pä'ocotöjä, ocurä cuoö'inä totämä pä'ocotöjä, 'corujuotächa'acu. ¹⁷ TÖ̧Ä̧NÄ̧HUA̧MÄ̧ päinäcu̧sä̧: "Jahuätö pättömä adihua'a. ¹⁸ Jahuätö tti̧jä̧hua̧tö̧ttö̧ ya̧tȩ chucuocu ji̧ä̧huä̧cua̧rö̧ rä̧dȩpä̧cua̧sä̧ ucutu'anö hua̧rö̧. Ja̧u̧rö̧mä̧ Ttö chucuocu ucuocunä jȩchä̧cua̧sä̧ ja̧'hua̧nö̧ ja̧'a̧ttö̧ ja̧u̧mä̧ ucuocuä̧cua̧ jahuätörömä Ttö huedötä. ¹⁹ Pi̧yȩ 'cuäopäcua'a ya̧tȩ Ttö chucuocu chiminä ucuocua'a ä̧ju̧cuo̧cö̧rö̧, ja̧u̧rö̧mä̧ Ttömä ro̧dȩpä̧cua̧sä̧. ²⁰ Ja̧'hua̧nö̧ ja̧'a̧nä̧ Ttö chucuocu jiäcuähuä i̧sa̧ ucuo te'äutä chiminä Ttö ucuocua pä'ö huedocu jä̧ji̧ ucuocuttömä, ja̧'hua̧nö̧ jo̧ca̧'a̧ttö̧'inä koro ttö̧ä̧nä̧huo̧tö̧ tti̧mi̧nä̧ ucuocuttömä ja̧u̧ huȩnȩ jiäcuähuä ttö̧ja̧sa̧mä̧ 'coru juoächa pä'ötä hua̧". ²¹ Pi̧yȩ ja̧'a̧ ucu cuamöcuädönä päcua pä'ö jö̧mä̧: ¿Tocu tu̧huo̧juä̧cua̧'a̧ttö̧ TÖ̧Ä̧NÄ̧HUA̧MÄ̧ pi̧yȩ huȩnȩmä̧ ucuocuocö päji pä'ömä? ²² Ucumä cu̧huo̧juä̧cua̧jä̧ TÖ̧Ä̧NÄ̧HUA̧ huȩnȩ jiäumä profeta hua̧ ucuocuomenä TÖ̧Ä̧Nä̧HUA̧ iminä. Pi̧yȩ 'cuä'oputtö'inä 'cuä'opoca'a jö̧ttö̧'i̧nä̧, jo̧mȩnä̧mä̧ ja̧cua̧'a̧ TÖ̧Ä̧NÄ̧HUA̧ hue'oca'ara'a profeta hua̧tä̧ ucuocuä̧cua̧, ja̧hua̧ ja̧'a̧ttö̧ ucutumä ja̧u̧ru̧mä̧ yecuecuätucuä.