¹ TÖ̧Ä̧NÄ̧HUA̧ DIOSRÖMÄ päcäyärcö̧, ovejaröcö̧ ji̧yȩtȩ suroju ku̧nä̧rö̧rö̧ cuä'ö icumä cuiya pä'ömä jo̧ca̧'a̧ korojuei surojö jö̧ttö̧mä̧, ja̧u̧mä̧ TÖ̧Ä̧NÄ̧HUA̧ DIOSMÄ u̧su̧ru̧tö̧tä̧ ja̧'a̧tttö̧. ² ji̧yȩtȩ surojö ucututtö ttu̧'o̧cui̧'ö̧ttö̧mä̧, cuidepiyu TÖ̧Ä̧NÄ̧HUA̧ iyinome jacuä ka̧'a̧, TÖ̧Ä̧NÄ̧HUA̧ DIOS toomenä suropätörö ubocö̧, isajucö̧ ja̧'hua̧ta̧'a̧nö̧ esecuinö jinö ucuotoca'a jä̧ttö̧mä̧, ³ ya̧tȩ 'chä̧nö̧ korotö ttö̧ä̧nä̧huo̧tö̧rö̧ ucuo te'äu jahuätö ttä'ca jo̧mȩ ihue'quiyunä kä̧mä̧dö̧, mo̧ro̧ kä̧hua̧rö̧, yodo kä̧hua̧rö̧, mo̧ro̧jä̧nä̧ rö̧jä̧tö̧ si̧ri̧'cö̧rö̧cö̧, ttömä huedocö ji̧nö̧, ⁴ ja̧'hua̧ta̧'a̧nö̧ pi̧yȩ tö'cö ucuru jittäuttöcö̧ pi̧yȩ huȩnȩ cuä̧ju̧cuä̧'i̧ttö̧cö̧, ja̧'hua̧nö̧ jö̧ttö̧mä̧ ttö̧ȩcuä̧nä̧ cusähua pä'ö ja̧'a̧. Isopäi'önä Israelnä su̧ro̧tä̧cuä̧huä̧ jȩä̧ji̧ttö̧mä̧́. ⁵ ja̧'hua̧ta̧'a̧nö̧ ja̧u̧ uboröcö̧ juhua'atäcu jahuäju isajurucö̧ surojö jȩpä̧jä̧tö̧rö̧mä̧, cuidepiyu doächi'äcuähuomettö, ubomä ja̧u̧tä̧ päjiröcö̧, isajumä jahuäju päjäjurucö̧ ucumä 'coru päi'önä ido'quinä icuäu cuicua pä'ö ja̧'a̧. ⁶ Ta̧ju̧cö̧ huämetucuäcö̧ ja̧u̧ jȩä̧ji̧ jittäuttömä, ja̧u̧cö̧ jahuätöcö̧ 'corujuottächönä cuä'ö tticuatö pä'ötä huotö; ja̧'hua̧nö̧ ja̧'a̧nä̧ jahuätö jȩttä̧ji̧ ya̧tȩtä̧ jiäuttömä, jahuätörömä cuä'ö tticua pä'ömä jo̧ca̧'a̧ jä̧cua̧'a̧. ⁷ Jahuätö ttötö'cö ji'ähuätö jä̧cua̧'a̧ Ä̧cuo̧mȩnä̧ inä o'quinä 'coru pätti'önä icuäu tticuäcuotömä, ja̧u̧nu̧ o'ca'atä ötahuiyä ttö̧ja̧mä̧ o'catoi'önä inä o'quinä icuäu tticuäcuotö; ja̧'hua̧nö̧tä̧ ucutumä suronä jȩpä̧jä̧tö̧rö̧mä̧ si'epötä cuicuäcuotöjä̧. ⁸ Ja̧'hua̧nö̧ ja̧'a̧nä̧ ji̧yȩtȩ bäreu huȩnȩ ro̧cuȩpä̧tu̧cua̧ päcuätucuomȩnä̧ juiyo rö̧ȩnä̧ jeruhuö jo̧mȩnä̧mä, ttöja̧rö̧ cuähuäcö̧, cuä'ö chichicuarö pättoca'anä cuä'ö tticuäjicö̧, ya̧tȩ ucuo ucuotocomenäcö̧, ka̧ra̧ ucuo ucuotocomenäcö̧, surojö jȩttä̧ji̧nä̧cö̧, koro huȩnȩnä̧cö̧, koro huȩnȩ ötahuiyä cu̧jä̧tu̧cuo̧mȩttö̧ cuäopomȩnä̧cö̧, ja̧'hua̧nö̧ jö̧ttö̧mä̧ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ö̧ja̧ pä'ö emö̧ ku̧nu̧ ö'ätetinome cui̧'cha̧ pä'ö jä̧cua̧'a̧. ⁹ Ucumä sacerdotetö̧ ja̧'hua̧ta̧'a̧nö̧ ja̧u̧nu̧ mo̧ro̧ kö̧ röji pä'ö icuähuä i̧sa̧ ö̧ja̧'a̧cu̧; Ucumä jahuätö tä̧bo̧tö̧ jittähuacu pä'ö cusajä juhua'atäcu jahuätö jä̧cua̧'a̧ ja̧u̧ ötö'cö jȩttä̧cuȩ pättäcuotömä̧. ¹⁰ Ucumä hueähuä huȩnȩ ppäö'anö cui̧'cha̧ pä'ö ja̧'a̧, TÖ̧Ä̧NÄ̧HUA̧ ö̧ja̧ pä'ö pojopö u̧ju̧ni̧no̧mȩttö̧mä̧. Jahuätö jȩ'cua̧ pä'ö huettäjimä o'cajuuiyötä ttu̧'ȩpä̧rö̧nö̧ jȩ'cua̧ pä'ö ja̧cua̧'a̧. ¹¹ Hueähuä huȩnȩ ucuru ttu̧huo̧juȩtö̧'a̧cuä̧tä̧ jȩpi̧, ja̧'hua̧ta̧'a̧nö̧ jahuätö pättäjita'anötä̧ jȩpi̧. Pättäjittömä 'cä̧cui̧pä̧chä̧, ttu̧huo̧jua̧'a̧cu̧'i̧nä̧ ja̧'hua̧ta̧'a̧nö̧ ttu'opjhuecu'inä. ¹² Ya̧tȩ a̧mö̧nä̧ ucuo te'äutä TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ä'ca jo̧mȩ kö̧ sacerdote päö'inä ä̧ju̧cuo̧ca̧'a̧ jȩö̧ttö̧mä̧, ja̧'hua̧ta̧'a̧nö̧ röji pä'ö icuähuä i̧sa̧ päö'inä ä̧ju̧cuo̧ca̧'a̧ jö̧ttö̧mä̧, ja̧u̧ ttö̧ja̧sa̧mä̧ cuä'ö tticua pä'ötä hua̧. Ucumä ja̧'hua̧nö̧tä̧ Israel ttö̧ja̧ ttö̧'cä̧tȩttö̧ surojömä rä'opö cui̧cuä̧cua̧jä̧. ¹³ Ttö̧ja̧mä̧ o'catoi'önä ä̧ju̧cu̧ yettecua pä'ötä ja̧'a̧, ja̧'hua̧ta̧'a̧nö̧ ucuomä tettähuoca'atä; (Ucuomä tecuähuoca'atä ä̧ju̧cui̧ ja̧'hu̧ta̧'a̧nö̧ hueähuä huȩnȩmä̧ ucuoti). ¹⁴ CUÄ̧NÄ̧HUA̧ DIOS iyinäjä̧ra̧'a̧cu̧ cuichomenä, ja̧huä̧jä̧nä̧ kä̧nö̧mä̧ uruhuo chu̧cuä̧dä̧cua̧jä̧, ja̧'hua̧nö̧ ja̧'a̧ttö̧ ucu pä'öjä: "Ttötä ya̧tȩro̧ ucuo ru̧hua̧ pä'iönä chu̧ju̧nu̧'a̧nö̧ ja̧'a̧, korotö o'cato'inä tippeyenä kä̧cua̧ttö̧ jö̧'ta̧'a̧nö̧". ¹⁵ Ja̧'hua̧nö̧ ja̧'a̧ttö̧ ucutä ja̧'a̧ ya̧tȩrö̧ ucututtutä ȩmu̧ cu̧ju̧nu̧'anö hua̧mä̧ CUÄ̧NÄ̧HUA̧ DIOSTÄ ȩmä̧cu̧ru̧. Ucutä cu̧ju̧nu̧'anö̧ ja̧'a̧ ru̧hua̧ päi'önämä cui̧jä̧hua̧tö̧ huotöttö ya̧tȩrö̧. Ucumä i̧chä̧cua̧hua̧rö̧mä̧ cu̧ju̧nu̧ juiyö'anö ja̧'a̧, cui̧'jä̧hua̧ huo'cö, hue'a pä'ömä. ¹⁶ Ja̧'hua̧nö̧ ja̧'a̧nä̧ ja̧u̧mä̧ chutä ä̧ji̧mu̧ ca̧ba̧yu̧tu̧ päi'önä ri̧'ä̧dö̧ juiyö'anö ja̧'a̧ ttö̧ja̧ Egiptora'a ppa̧ttä̧chö̧nä̧'i̧nä̧ jahuätö cabayu̧tu̧ rö̧ttä̧chö̧nä̧'i̧nä̧, TÖ̧Ä̧NÄ̧HUA̧ pä'inäcu̧jä̧: "Ucumä porö kä̧bä̧dö̧ pä'äjita'anömä ppa̧'a̧cho̧'cö̧jä̧ jua'acumä". ¹⁷ Ja̧u̧mä̧ irecua̧mu̧rö̧mä̧ recuätörömä ȩmu̧ juiyö'anö ja̧'a̧, Ö̧Ä̧NÄ̧HUA̧TTÖ̧ oto juoächa'acu; ja̧'hua̧ta̧nö̧ ja̧u̧mä̧ chutätä ö'äre pä'iönä ri̧'ä̧di̧ya̧'a̧nä̧ ja̧'a̧ pärätä'inä oro'inämä. ¹⁸ Chutä uruhuo deäcänä ö̧'ä̧mä̧do̧mȩnä̧, ji'täte cuyäru'tänä i̧huȩyu̧tä̧cua̧ chutä u̧ju̧nä̧ra̧ pä̧'ö̧ pi̧yȩ hueähuä huȩnȩ, sacerdote huotötä ttu̧ju̧nä̧rö̧, llevi ahuaruhuä o'cötötä. ¹⁹ Jahuä'tä cuyäru'tämä chutä u̧ju̧nä̧rä̧cuä'tä ja̧'hua̧nä̧ ja̧'a̧ttö̧ 'cuäopönä mo̧ro̧ u̧cuo̧cuä̧cua̧ a̧'cua̧rä̧i̧mä̧, u̧juo̧juä̧chi̧'ä̧cua̧'a̧nö̧ repe'ö ucuotäcuähuä TÖ̧Ä̧NÄ̧HUA̧ DIOSRÖ, ja̧'hua̧nö̧ jȩpö̧tä̧ pi̧yȩ huähuä huȩnȩ u̧huo̧huä̧chä̧cua̧ ja̧'hua̧ta̧'a̧nö̧ pi̧yȩ hueähuä jȩ'a̧ pä'ötä to̧tä̧rä̧cua̧. ²⁰ Pidemä pa̧'a̧nö̧tä̧ jȩa̧cua̧ amiso'qui jacuättö ji̧jä̧huä̧tö̧ huotörö pä̧i̧cu̧nä̧ pä'cha'acu ja̧'hua̧ta̧'nö̧ ja̧hua̧nö̧ jo̧mȩnä̧tä̧ 'cä̧i̧pä̧chö̧ jui̧yä̧cua̧ u̧huo̧jua̧'a̧nä̧ i̧sä̧mu̧nä̧'i̧nä̧ ja̧'hua̧ta̧'nö̧ ieruhua'anä i̧sä̧mu̧nä̧'i̧nä̧; jua'amä uruhuä yabonänö hue'äcua'anö pä'ö, chutä'i̧nä̧ ja̧'hua̧ta̧'nö̧ i̧tti̧mu̧'i̧nä̧ Israél ttö̧ja̧ ttö̧'cä̧tȩ jo̧mȩttö̧.