¹ Abib kä̧hua̧nä̧mä̧ a̧mö̧cuädätucui ja̧'hua̧ta̧'a̧nö̧ TÖ̧Ä̧NÄ̧HUA̧ DIOSRÖ ucuotö pascua pä'cäri jȩpä̧tu̧cui̧, ja̧u̧ jȩä̧cuä̧huä̧ kä̧hua̧mä̧ Abib ja̧'a̧ TÖ̧Ä̧NÄ̧HUA̧ Dios ja̧u̧nu̧ pä̧nä̧ Egipto rȩjȩttö̧mä̧ yodo rä'epö icuinä̧u̧jä̧. ² Ucutumä i̧sa̧rö̧ cuä'ö icu pascua pä'cäri TÖ̧Ä̧NÄ̧HUA̧RÖ̧ ucuo te'äu jȩpä̧tu̧cui̧, cuä̧ji̧mö̧tö̧cö̧ yo̧mȩtȩ ka̧cuä̧tö̧ttö̧ iyö kä̧nö̧ TÖ̧Ä̧NÄ̧HUA̧ ö̧ja̧ pä'ö adicui'inomettö̧. ³ Pö̧ä̧mö̧nä̧ ȩnä̧huä̧ panmä cucuätucua pä'ö jo̧ca̧'a̧; pan ppö̧ä̧mö̧nä̧ ȩnä̧huo̧cö̧mä̧ sietenö mo̧ro̧ jo̧mȩnä̧ cucuätucuajá, tta̧'cua̧ tta̧'ȩcu̧ cuäcuähuä panmä; isopäi'önä ucutumä jurunä rä'opächinätö̧jä̧. Pi̧yȩmä̧ ji̧nä̧ pi̧jä̧nä̧ cu̧jä̧i̧mä̧ 'cuäopönätä̧ mo̧ro̧ jȩ'cua̧jä̧ Egipto rȩjȩttö̧ räcuopinä toepächö juiyäcua'anö. ⁴ Ppö̧ä̧mö̧nä̧ ȩnä̧huä̧mä̧ ka̧ pä'ömä jo̧ca̧'a̧tó sietenö mo̧ro̧ jo̧mȩnä̧ tti̧rȩjä̧ jacuättömä ja̧'hua̧ta̧'a̧nö̧ idepä ku icu ä̧cuo̧mȩnä̧ mo̧ro̧ iyähuämä̧ koro mo̧ro̧ juoome jubötä ka̧ pä'ö ja̧'a̧. ⁵ Ja̧u̧ Pascua pä'cärinä̧ i̧sa̧rö̧ cuä'ö icumä TÖ̧Ä̧NÄ̧HUA̧ Dios iyinö ötahuiyättö jacuättömä cuiya pä'ömä̧ jo̧ca̧'a̧ jä̧cua̧'a̧, ⁶ Ja̧'hua̧nö̧ ja̧ju̧jueimä cuiyätucua pä'ö jä̧cua̧'a̧ yȩnȩtȩ TÖ̧Ä̧NÄ̧HUA̧ CU̧Ä̧NÄ̧HUA̧ DIOS ö̧ja̧ pä'ö pojopö ö'ätetinomȩttö̧tä̧. Juhuorötä cuiyätucuajá pascuanä i̧sa̧rö̧ cuä'ö icumä ni̧pä̧ro̧mȩcu̧ kä̧hua̧ ma̧'a̧cha̧'a̧ttö̧ topö, ucututä Egipto rȩjȩra̧'a̧ttö̧ räcuopinä̧tu̧cuo̧mȩ pätecuächome amöcuädö. ⁷ I̧sa̧ idepämä̧ da'ipö'cotö cucuätucuajá TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ö'ätetinomȩttö̧tä̧; koro mo̧ro̧tä̧ ppa̧cuä̧chä̧cuotöjá cuojusodetucura̧'a̧cu̧mä̧. ⁸ Seisnö mo̧ro̧ ä̧tȩcuo̧mȩmä̧ pan ppö̧ä̧ma̧ pä'ö enä̧huä̧ juiyönätä̧ cucuätucuajá, sietenö mo̧ro̧ päi'omȩnä̧mä̧ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSRÖ ucuotö rö̧ȩnä̧ micuäunä̧ amöcuädö ca̧ca̧cu̧ cu̧'ä̧mä̧dä̧cuo̧tö̧jä̧; ja̧u̧nu̧ mo̧ro̧mä̧ ya̧tȩ'i̧nä̧ aditocö jä̧cua̧. ⁹ "Ucutätä cuamönä pa̧ja̧tö̧ sietenö semana jo̧mȩnä̧ cu̧'a̧ta̧ja̧, Trigo u̧huä̧ju̧ ca̧ca̧tö̧ 'cuittome mo̧ro̧ttö̧ kä̧mä̧dö̧, ja̧'hua̧ta̧'a̧nö̧ juhuorötä kä̧mä̧dö̧ cu̧'a̧tä̧cua̧jä̧ sietenö semanamä. ¹⁰ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOSRÖ ucuotö ja̧u̧ semananä̧ cu̧cuȩtu̧cu̧ ku̧nä̧huä̧ u̧huä̧ju̧ amöcuädö pä'cäri cu̧ju̧nä̧cuo̧tö̧jä̧, TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ucuturutä iyäijo̧mȩttö̧ amöcuädö topö. ¹¹ Ja̧'hua̧ta̧'a̧nö̧ ucumä TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ä'ca jo̧mȩttö̧ cuesehuä̧cua̧jä̧; ucutä'inä, cui̧tti̧mö̧ttö̧ ubo'inä, isaju'inä, Leví i̧tti̧mö̧ 'cotö cuidepiyunä ka̧cuä̧tö̧'inä. cu̧mö̧huäyotöttö u̧mä̧tö̧'inä nä̧tö̧'inä, ko̧ro̧jä̧ttö̧ ichäcuähuotö'i̧nä̧, reyotö'i̧nä̧ rȩcua̧mö̧'i̧nä̧ yo̧mȩtȩ TÖ̧Ä̧NÄ̧HUA̧ CU̧Ä̧NÄ̧HUA̧TU̧CU̧ DIOS ö̧ja̧ pätetö ö̧jö̧ni̧no̧mȩttö̧. ¹² Ucutumä̧ amöcuädätucui Egipto rȩjȩnä̧ a̧mä̧cö̧ aditö ku̧ji̧nä̧tu̧cu̧; pi̧yȩ hueähuä huȩnȩmä̧ o'cajuiyötä ucuotö päö'a̧u̧cuä̧ jȩpö̧ ka̧cuä̧tu̧cui̧. ¹³ Ucumä Dios ö̧jode pä'cäri ji̧mu̧tȩ ta'arenö mo̧ro̧ jo̧mȩ hua'adö cu̧ju̧nu̧'a̧nö̧ ja̧'a̧, rȩjȩttö̧ cu̧ju̧nä̧cuä̧ 'tocu o'ca'a ja̧'hua̧ta̧nö̧ isoya päi'önä tahuähuome'inä. ¹⁴ Cuesehua̧cua̧jä̧ pä'cäri pänätä̧, ucutä'inä, ucu cui̧tti̧'i̧nä̧, ucu cuittiju'inä, ucu cu̧mu̧huä̧ya̧'i̧nä̧, ucu cumuhuäyaju'inä, Levi ttö̧ja̧sa̧'i̧nä̧, i̧chä̧cuä̧hua̧'i̧nä̧, reyotö'inä ja̧hua̧ta̧'a̧nö̧ rȩcua̧tö̧'i̧nä̧ cutahuiyä jacuä ka̧cuä̧ttö̧mä̧, ¹⁵ Ji̧mu̧tȩttö̧ ta'arenö mo̧ro̧ to̧'cua̧ra̧'a̧nö̧ ja̧'a̧ pä'cärimä CU̧Ä̧NÄ̧HUA̧ DIOS ö̧jo̧mȩmä̧ TÖ̧Ä̧NÄ̧HUA̧TÄ̧ pojopu ȩmä̧hua̧, CU̧Ä̧NÄ̧HUA̧ DIOSTÄ o'cajuiyönä adiunä i̧yä̧cua̧jä̧ cu̧ju̧nä̧cua̧mä̧ ja̧'hua̧ta̧nö̧ o'cajuiyönä cuaditähuättö'inä, ja̧'hua̧nö̧ ja̧'a̧ttö̧ ucumä cuesȩu̧nä̧ jä̧cua̧'a̧. ¹⁶ o'catoi'önä u̧mä̧tö̧mä̧ a̧'ȩ jö̧ ta̧'a̧nä̧ huäbodäcuänä jo̧mȩ tti̧jȩcuä̧cuo̧tö̧ TÖ̧Ä̧NÄ̧HUA̧ Dios ä'ca jo̧mȩ chutä porö jä̧cua̧'a̧ pä̧o̧me: Pan ppu̧ä̧mö̧ huihuacuä juiyönä pä'cäri pä̧nä̧, semana pä'cäri, ja̧'hua̧ta̧'a̧nö̧ ttä'ähuaränä ko̧cuä̧tö̧ pä'cäri'inä; ya̧tȩ'i̧nä̧ u̧mu̧nä̧mä̧ jui'önä i̧'cha̧ pä'ömä̧ juiya'a TÖ̧Ä̧NÄ̧HUA̧ ä'cajomemä; ¹⁷ ja̧'hua̧nä̧ jo̧ca̧'a̧, o'catoi'önä u̧mä̧tö̧mä̧ ttiyäcuotö ttu̧ju̧nä̧ro̧mȩttö̧ topö, ttu̧huo̧juä̧chi̧'a̧ pä'ö ppädäcuähua TÖ̧Ä̧NÄ̧HUA̧ Dios iyö ja'huätörö. ¹⁸ rö̧ji̧ huȩnȩ pä'ätörö'inä pätetö cu̧ju̧nä̧cua̧jä̧ ja̧'hua̧ta̧nö̧ su̧ro̧do̧u̧ru̧'i̧nä̧ o'cajuiyönä ötahuiyä jacuä jo̧ ta̧'a̧nä̧ TÖ̧Ä̧NÄ̧HUA̧ Dios ucuru iyäjomemä; juahuätörömä ȩmä̧huä̧cua̧'a̧ ya̧cu̧pu̧nä̧rö̧ ttahuaruhuä isäsattö, ja'huätömä adiunä jo̧mȩnä̧ jȩttö̧tö̧ topö pättäcuotö. ¹⁹ cua̧mo̧nä̧ cujurunä ro̧dȩpa̧ pä'ömä jȩcu̧'ä̧; ucumä ppädäda pi̧derä piderömäcö̧ päcuä tti̧mi̧tacu pä'ö'inä jȩcu̧'ä̧, micuänä jȩa̧cuä̧huä̧mä̧ adiunä topö'inä ä̧to̧cä̧chö̧ ja̧'hua̧ta̧'a̧nö̧ kara'acutä juoächö adiunä jȩpö̧'i̧nä̧. ²⁰ Ucumä hue'ähuä pä'öta'anötä jȩpi̧, huähuä jo̧ta̧'a̧nö̧tä̧, recuonänö cu̧jä̧cua̧'a̧nö̧ cui̧rȩjä̧nä̧ CU̧Ä̧NÄ̧HUA̧TU̧CU̧ Dios i̧yä̧jä̧nä̧. ²¹ Ucutu jȩ'cua̧tu̧cua̧ peömä jo̧ca̧'a̧ ucutu yapare cuänähua̧tu̧cu̧ Asera ka̧'cua̧juȩ'i̧mä, ja̧'hua̧ta̧'a̧nö̧ korojuei̧ a̧'cua̧juȩi̧ jö̧ttö̧'i̧nä̧, CUI̧Ä̧NÄHUA̧ DIORÖ köhuicu iyähuome ppeyänä cuadita peömä jo̧ca̧'a̧. ²² Ja̧'hua̧ta̧'a̧nö̧ ucú cuadita peomä jo̧ca̧'a̧ ido'qui ro̧o̧'qui̧ päömä, ja̧'hua̧ta̧'a̧nö̧ kö'cocö CUI̧Ä̧NÄHUA̧ DIOMÄ.