¹ A̧'ȩttö̧ Sietenö jä̧ji̧ beipächomenämä, ttimippotäjimä cunichi'a pä'ö ja̧'a̧. ² Pa̧'a̧nö̧tä̧ mitö icuähua'a ttimippotömä: Pärohuäjimä, ö̧jo̧mȩ ppeyänä kö̧rö̧ ö'ärohuäjimä unichi'a pä'ötä jä̧cua̧'a̧; Ja̧u̧mä̧ imitärö pä'ömä jȩpö̧cö̧ jä̧cua̧ ippeyänä kö̧rö̧'i̧nä̧, a̧hua̧ru̧hua̧rö̧'i̧nä̧, ttimippotö mitö icumä TÖ̧Ä̧NÄ̧HUA̧TÄ̧ ja̧'hua̧nä̧ jȩtti̧ya̧rä̧ päina̧'a̧ttö̧. ³ Korojä̧ra̧'a̧ttö̧ i̧chä̧cuä̧hua̧ jö̧ttö̧mä̧ i̧mi̧tähua jä'epätucuirö; ja̧'hua̧nö̧ ja̧'a̧nä̧ korojuäu cua̧hua̧ru̧hua̧rö̧ cuiärohuinö̧ttö̧mä̧ imitacu pä'ömä jäcuepä. ⁴ Ja̧'hua̧nö̧ ja̧'a̧nä̧, ucututtömä ya̧tȩ'inä usurä i̧sa̧mä̧ ö̧ja̧ pä'ömä jo̧ca̧'a̧ (TÖ̧Ä̧NÄ̧HUA̧RÖ̧MÄ̧ adiu ppädecuähuätä jä̧cua̧'a̧ cui̧rȩjä̧tö̧cu̧ päi'önä Ja̧u̧ i̧yä̧jä̧mä̧) ⁵ TÖ̧Ä̧NÄ̧HUA̧ CU̧Ä̧NÄ̧HUA̧ DIOS päö ttu̧'ȩpä̧rö̧nö̧ cuä̧ju̧cu̧ttö̧tä̧, jitä mo̧ro̧ hueähuä huȩnȩ o'cajuiyönä ucuru huedö cunä 'chu'ädö cu̧ju̧nä̧cua̧'a̧nö̧. ⁶ Ja̧'hua̧nö̧ jö̧ttö̧tä̧ TÖ̧Ä̧NÄ̧HUA̧ CU̧Ä̧NÄ̧HUA̧ DIOSMÄ̧ adiu ppä̧dä̧cua̧jä̧, ppä̧dä̧cua̧sä̧ päinöta'anö̧tä̧; ucumä ttö̧ja̧ recuätörö cu'ärohuä̧cua̧jä̧, ja̧'hua̧nö̧ ja̧'a̧nä̧ cu'ärohuäjimä jä̧cuȩpä̧rä̧; ucumä recuätö ttö̧ja̧rö̧ ruhuonä huȩcuä̧cua̧jä̧, ja̧'hua̧nö̧ ja̧'a̧nä̧ ucurumä ruhuonämä hue'ocotö ttäcuotö. ⁷ Ucututtö ya̧tȩ usurä i̧sa̧ ö̧jö̧ttö̧mä̧, cuahuaruhuättö ya̧tȩ, cui̧rȩjä̧ päi'önä TÖ̧Ä̧NÄ̧HUA̧ CU̧Ä̧NÄ̧HUA̧ DIOS i̧yä̧jä̧nä̧ jacuä, cuami'inä 'quicuädäcuähuä ja̧'hua̧ta̧'a̧nö̧ cha̧hua̧ru̧hua̧ usurä i̧sa̧rö̧mä̧ ppädäda pä'ömä juiya'a päcuä; ⁸ ja̧'hua̧nö̧ ja̧jö̧ juäimä ucumä ppäcuäda pä'ötä hua̧jä̧, isopäi'önä̧tä̧ recuä rö̧jö̧mä̧ ö̧jö̧nä̧rö̧nä̧ ppä'ädirö. ⁹ Ttu̧'ȩpä̧rö̧nö̧ kä̧hui̧jó surojö amöcuädäcuämä päcuä: "Täcö tö'cö ja̧'a̧ mippotätörö tunichi'äcuomȩ sietenö jö̧ a̧'ȩmä̧", ucu cu'ä cuju'quiyönä̧ cu̧ju̧mä̧ cui̧jȩpä̧tu̧cuä̧ cua̧hua̧ru̧hua̧tu̧cu̧ usurä ȩmä̧u̧ru̧ cuiyätucuoca'a jȩpö̧mä̧; ja̧u̧ cua̧hua̧ru̧hua̧mä̧ ucu jȩ'cu̧ topö TÖ̧Ä̧NÄ̧HUA̧RÖ̧ ji'äu ucuocua'acu, ja̧'hua̧nö̧ jiähuomenä ucumä surojö jähuänätä̧ cu̧ji̧pä̧cua̧jä̧. ¹⁰ Ucumä isopäi'önätä̧ ja̧u̧rö̧mä̧ ppäcuäda pä'ötä ja̧'a̧ ja̧'hua̧ta̧'a̧nö̧ ja̧u̧rö̧ cuiyomenämä cua̧'cua̧ tta̧'ȩcu̧nö̧mä̧ cuiyä, isopäi'önä pi̧yȩ TÖ̧Ä̧NÄ̧HUA̧TÄ̧ adihuä juäi ppä̧dä̧cua̧jä̧ cuaditähuänä̧'i̧nä̧ ja̧'hua̧ta̧nö̧ jȩ'cuä̧tu̧cua̧ pä'ö cuamöcuädätucunä̧'i̧nä̧. ¹¹ Usurä i̧sä̧mä̧ pi̧jä̧tö̧mä̧ 'cuächi'oca'atä ö̧jä̧cua̧; ja̧'huanö ja'attö, TTÖTÄ hue'ösä ucuru pa'anö pä'ö: "Ucu cu̧mu̧nä̧tä̧ iyösä cu̧jä̧hua̧tö̧rö̧ ppäcuäda pä'ö, re'cuä rö̧jä̧cu̧ru̧, cui̧rȩjä̧ttö̧ usurä i̧sa̧rö̧mä̧." ¹² Cui̧jä̧hua̧ hebreo i̧sa̧ ubo jö̧ttö̧'i̧nä̧, isaju jö̧ttö̧'i̧nä̧, ucuru micuänä ttiyomenämä ja̧u̧ ji̧mu̧tȩttö̧ yaute a̧'ȩ aditö o'ca'amä, ji̧mu̧tȩ ta'arenö a̧'ȩ päi'omenämä ucumä rä'epu cuicua pä'ö ja̧'a̧. ¹³ Jahuätörö ucutu rä'epu cuicuomenämä, juiömä räepu cuicuiya'anö ja̧'a̧. ¹⁴ Ucumä cuiya pä'ö ja̧'a̧ cuä̧ji̧mu̧ttö̧, rȩjȩ 'to'ö cututtu'inä ja̧'hua̧ta̧nö̧ isoya pä'iönä jȩä̧cuä̧huo̧mȩttö̧'i̧nä̧ CU̧Ä̧NÄ̧HUA̧ DIOS ppädinöttö, cuiya pä'ö ja̧'a̧ ja̧u̧ru̧. ¹⁵ Amucuädi ucumä cuahuaruhuä pinätömä pä̧'i̧cu̧nä̧ huȩttä̧ra̧'a̧nä̧tä̧ ki̧nö̧tö̧ Egipto rȩjȩra̧'a̧ttö̧mä̧, CU̧"Ä̧NÄ̧HUA̧TÄ̧ mitäu rä'epö icuinääujä; ja̧hua̧nö̧ ja̧'a̧ttö̧ jitämä TTÖ pa̧'a̧nö̧ huedäcujä jȩcu̧'a̧ pä'ö. ¹⁶ Pa̧'a̧nö̧ 'cuäopäcua'a ja̧u̧ ucuru pä'öttömä: "Ucuttu kä'ipömä 'cho̧cö̧sä̧," jua'amä ucuru ja̧'hua̧ta̧'a̧nö̧ cuojusode'inä repea'attö, jua'amä ucucu adiunä o̧ja̧'a̧ttö̧, ¹⁷ ja̧'hua̧nö̧ jo̧mȩnä̧mä̧ so̧'ä'chu 'chu'ädö apate isobunä jäbetö ä̧ja̧ ppörähui'önä ta'ö cu̧ju̧nä̧cua̧, ja̧'hua̧nö̧ jo̧mȩnä̧tä̧ ja̧u̧mä̧ 'cuaopönä cu̧mu̧huä̧ya̧tä̧ jä̧cua̧. Ja̧'hua̧nö̧tä̧ jȩcu̧'ä̧cua̧jä̧ huecuäcuarö'inä. ¹⁸ Ucumä cu̧ro̧huä̧rö̧ juiyö'anö ja̧'a̧ amäcönä huȩcuä̧u̧ru̧ ttaditomettö̧ rättopächomenä, Ja̧u̧mä̧ ucucu aditinö ja̧'a̧ ji̧mu̧tȩ ta'arenö a̧'ȩ ji̧o̧mȩ ja̧'hua̧ta̧'a̧nö̧ beömetä̧ aditönä huȩ'ä̧hua̧ttö̧'i̧nä̧ todäre jo̧mȩ abonänöjo̧mȩnä̧ aditinö ja̧'a̧ ja̧u̧mä̧. TÖ̧Ä̧NÄHUA̧ DIOSTÄ ppä̧dä̧cua̧jä̧ ucu jȩcu̧'u̧mä̧. ¹⁹ Ucú CUI̧Ä̧NÄHUA̧ DIORÖ cuäji̧mu̧ pä̧cä̧yu̧tö̧ttö̧'i̧nä̧ ovejatö̧ttö̧'i̧nä̧ o'catoinä ä̧cuo̧mȩnä̧ huäpächätöttö̧ u̧mä̧tö̧rö̧ pporädö cu̧ju̧na peö ja'a. Ucumä cuaditiya̧cua̧jä̧ cuä̧ji̧mu̧ pä̧cä̧ ä̧cuo̧mȩnä̧ huäpächinörö̧mä ja̧'hua̧ta̧'a̧nö̧ uhuo'che 'cui̧cui̧yä̧cua̧jä̧ ä̧cuo̧mȩnä̧ huäpächinö ovejatö̧ttö̧. ²⁰ Ä̧cuo̧menä huäpächinörö̧ ucú cucua peö ka̧'a̧ CUI̧Ä̧NÄHUA̧ DIOS ö̧jo̧mettö̧ a̧'ȩ́ jö̧ a̧u̧cuä̧ TÖ̧Ä̧NÄHUA̧ ȩmú ö̧ju̧ninomettö̧, ucuru'inä cuahuaruhuarö'inä. ²¹ Uhuäpächinomettö̧ öja suronä kö̧ jö̧ttö̧mä, iäre jui̧a̧ jö̧ttö̧'i̧nä̧ ja̧'hua̧ta̧'a̧nö̧ utta pu̧ttö̧mä, ucú cuiya peömä jo̧ca̧'a̧ ucú CUI̧Ä̧NÄHUA̧ DIORÖ. ²² Ucú cuojusode cu̧jo̧mȩttö̧ cucuäcua̧jä̧, ttö̧ja̧ ucuotönö jȩpä̧tö̧'i̧nä̧ tucuotoca'a jȩpä̧tö̧'i̧nä̧ yoräteunä ttucua pe'ö ka̧'a̧, yä̧märö̧ cucua'a jö̧ta̧'a̧nö̧. ²³ Ja̧'hua̧nö̧ ja̧'a̧nä̧ ucuojamä cucuä; ucumä ucuojamä huerädö cuicuajá rȩjȩcu̧tä̧ ajiya 'cua̧rö̧nä̧.